មួយឆ្នាំក្រោយការវាយលុកវិមានកាពីតូល ពលរដ្ឋអាមេរិកបន្តព្រួយបារម្ភពីលទ្ធិប្រជាធិបតេយ្យ
មួយឆ្នាំក្រោយការវាយលុកចូលក្នុងវិមានកាពីតូល ដែលជារូបភាពដ៏អាក្រក់មួយមិនធ្លាប់មានក្នុងប្រវត្តិសាស្ត្រអាមេរិក ពលរដ្ឋអាមេរិកនៅបន្តព្រួយបារម្ភខ្លាំងពីលទ្ធិប្រជាធិបតេយ្យអាមេរិក។ បើតាមការស្ទង់មតិពីរ ចេញផ្សាយកាលពីថ្ងៃអាទិត្យទី ២មករា២០២២ មួយភាគបីនៃពលរដ្ឋអាមេរិកនៅតែគិតថា ជួនកាល គេត្រូវការប្រើកម្លាំង (ប្រើអំពើហិង្សា) ដើម្បីការពារទស្សនៈនិងគំនិតរបស់ពួកគេ។
ចុះផ្សាយនៅថ្ងៃ៖
បើតាមការស្ទង់មតិរៀបចំដោយទូរទស្សន៍ CBS News ពីរភាគបីនៃពលរដ្ឋអាមេរិកយល់ថា លទ្ធិប្រជាធិបតេយ្យអាមេរិកបច្ចុប្បន្នរងការគំរាមកំហែងខ្លាំង។ ហើយការវាយលុកចូលក្នុងវិមានព្រឹទ្ធសភា កាពីតូល ដោយក្រុមសកម្មជនគាំទ្រអតីតប្រធានាធិបតីដូណាល់ ត្រាំ កាលពីថ្ងៃទី ៦ មករា ២០២១ ជាសញ្ញាបញ្ជាក់ឱ្យឃើញថា អំពើហិង្សាកើនឡើងជាលំដាប់នៅអាមេរិក។
សម្រាប់ពេលនេះ មានពលរដ្ឋអាមេរិកតែប្រមាណ៥២%ប៉ុណ្ណោះ ដែលនៅមានមោទនភាពនឹងលទ្ធិប្រជាធិបតេយ្យអាមេរិក។ ជាការធ្លាក់ចុះយ៉ាងខ្លាំងណាស់ បើប្រៀបទៅនឹងឆ្នាំ ២០០២ ដែលកាលណោះ ពលរដ្ឋអាមេរិកដល់ទៅ៩០% បានបង្ហាញមោទនភាពជាតិ។ នេះបើតាមការសិក្សារបស់ Washington Post សហការជាមួយសកលវិទ្យា Maryland ។
ការស្ទង់មតិទាំងពីរ ដែលចេញផ្សាយនៅថ្ងៃអាទិត្យទី ២មករា២០២២ បានបង្ហាញអំពីមូលហេតុជាក់ស្តែងនៃការព្រួយបារម្ភរបស់ប្រជាពលរដ្ឋអាមេរិក ដែលមានពីរចំណុច។ ទីមួយ ជាងមួយភាគបីនៃពលរដ្ឋអាមេរិក (២៨%) នៅតែគិតថា ជួនកាល គេត្រូវការប្រើកម្លាំង (ប្រើអំពើហិង្សា) ដើម្បីការពារលទ្ធផលនៃការបោះឆ្នោត។ ទីពីរ ៣៤% ទង្វើហិង្សាប្រឆាំងរដ្ឋាភិបាល ជាអំពើសមហេតុសមផល។
លទ្ធផលនៃការស្ទង់មតិបានឆ្លុះបញ្ចាំងឱ្យឃើញថា សង្គមអាមេរិក នៅតែមានការបែងចែកនិងប្រេះឆាខ្លាំងណាស់។ ប្រធានាធិបតីអាមេរិក លោក ចូ បៃដិន និងលោកស្រីអនុប្រធានាធិបតី ខាមាឡា ហារីស ដែលធ្លាប់សន្យាផ្សះផ្សាជាតិ ត្រូវថ្លែងសុន្ទរកថា នៅថ្ងៃព្រហស្បតិ៍ទិ ៦ មករា ២០២២ ឱ្យចំថ្ងៃខួបនៃការវាយលុកចូលវិមានកាពីតូល។
សូមបញ្ជាក់ថា ពីរភាគបីនៃសកម្មជនគាំទ្រលោកដូណាល់ ត្រាំ នៅតែជឿថា លោក ចូបៃដិន ជាប់បោះឆ្នោតដោយមិនស្របច្បាប់ និងមានការលួចបន្លំ ក្នុងសម័យឆ្នោតប្រធានាធិបតីឆ្នាំ ២០២០ ដូចអ្វីដែលអតីតប្រធានាធិបតីដូណាល់ត្រាំបានធ្វើការចោទប្រកាន់។ នៅប៉ុន្មាននាទីមុនការវាយលុកចូលវិមានកាពីតូល លោក ដូណាល់ ត្រាំ ដែលនៅមានជាតួនាទីជាប្រធានាធិបតីអាមេរិកនៅឡើយ បានថ្លែងទៅកាន់សកម្មជន នៅមុខសេតវិមានថា គេលួចសន្លឹកឆ្នោតលោក ដូច្នេះត្រូវតែប្រយុទ្ធប្រឆាំង។ ហេតុដូច្នេះហើយបានជាសកម្មជនទាំងនោះបង្វែរក្បួនបាតុកម្មចូលទៅវិមានកាពីតូល ដែលកំពុងបោះឆ្នោតបញ្ជាក់ជោគជ័យរបស់លោក ចូបៃដិន ជាប្រធានាធិបតីសហរដ្ឋអាមេរិកអាណត្តិថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ