វ៉ាក់សាំងបង្ការកូវីដ៖ នៅទីបំផុតកីឡាករវាយកូនបាល់ លោកចូកូវីកត្រូវបណ្តេញចេញពីទឹកដីអូស្ត្រាលី
ចុះផ្សាយនៅថ្ងៃ៖
ស្តាប់ - ០៧:៤៦
រឿងភាគប្តឹងផ្តល់គ្នារវាងរដ្ឋាភិបាលអូស្ត្រាលី និងកីឡាករជើងឯកពិភពលោកខាងកូនបាល់ ដែលភាសាអង់គ្លេសហៅថា Tennis បានបិទបញ្ចប់ បន្ទាប់ពីតុលាការអូស្ត្រាលី បានសម្រេចនៅថ្ងៃអាទិត្យទី ១៦ មករា ទាត់ចោលបណ្តឹងតវ៉ា របស់កីឡាករវាយកូនបាល់ ជើងឯកពិភព លោក ណូវ៉ាក់ ចូកូវីក (Novak Djokovic) ដែលទើបត្រូវរដ្ឋាភិបាលអូស្ត្រាលី លុបចោលទិដ្ឋាការចូលអូស្ត្រាលី ជាលើកទី២។ នៅក្រោយការសម្រេចរបស់តុលាការអូស្ត្រាលី កីឡាករជើងឯកពិភពលោកត្រូវបានបណ្តេញចេញពីអូស្ត្រាលី និងមិនអាចចូលរួមក្នុងការប្រកួតវាយកូនបាល់អន្តរជាតិ Australian Open ដែលត្រូវបើកចាប់ផ្តើមនៅថ្ងៃចន្ទស្អែក ទី ១៧មករា។ តាមអំណះអំណាងរបស់រដ្ឋាភិបាលអូស្ត្រាលី កីឡាករ ណូវ៉ាក់ ចូកូវីក ដែលមិនបានចាក់វ៉ាក់សាំង បង្ការកូវីដ អាចជាគ្រោះថ្នាក់សម្រាប់សុខភាពសាធារណៈនៅអូស្ត្រាលី។
តុលាការអូស្ត្រាលី នៅថ្ងៃអាទិត្យនេះបានសម្រេចទាត់ចោលបណ្តឹងតវ៉ារបស់ណូវ៉ាក់ ចូកូវីក កីឡាករជើងឯកពិភពលោក ខាងវាយកូនបាល់ ដែលត្រូវបានរដ្ឋាភិបាលអូស្ត្រាលីសម្រេចលុបចោលទិដ្ឋាការចូលទឹកដីអូស្ត្រាលី ជាលើកទី២ កាលពីថ្ងៃទី១៤មករា។ នៅ១០ថ្ងៃមកនេះ វត្តមានរបស់កីឡាករជាតិស៊ែរប៊ី ដើម្បីចូលរួមក្នុងការប្រកួតកីឡាវាយកូនបាល់អន្តរជាតិ Australia Open នៅអូស្រ្តាលី បានបង្កឲ្យមានសង្រ្គាមប៉ាកា និងទាក់ទាញចំណាប់អារម្មណ៍ច្រើនពីសាធារណជនមិនថា នៅអូស្ត្រាលី និងនៅប្រទេសស៊ែរប៊ី។ ការសម្រេចរបស់តុលាការអូស្ត្រាលីត្រូវបានចុះផ្សាយព្រោងព្រាត ដោយប្រព័ន្ធផ្សព្វផ្សាយអន្តរជាតិ។
នៅក្នុងសេចក្តីថ្លែងការណ៍នៅថ្ងៃអាទិត្យ កីឡាករសញ្ជាតិស៊ែរប៊ីបានសំដែងការខកចិត្តពន់ពេកនឹងការសម្រេចចិត្តរបស់តុលាការ ប៉ុន្តែ លោកយល់ព្រមសហការជាមួយអាជ្ញាធរអូស្ត្រាលី ដើម្បីចាកចេញពីអូស្ត្រាលី។ នៅថ្ងៃអាទិត្យដដែល នៅក្រោយចាញ់ក្តីក្តាំនៅតុលាការ កីឡាករចូកូវីកបានធ្វើដំណើរចាកចេញពីអូស្ត្រាលី ពោលគឺនៅតែមួយថ្ងៃមុន ដែលលោកត្រូវចូលរួមក្នុងការប្រកួតកីឡាវាយកូនបាល់ Tennis នៅថ្ងៃចន្ទទី ១៧មករា។
ការសម្រេចរបស់តុលាការអូស្ត្រាលី មិនទទួលយកបណ្តឹងតវ៉ារបស់កីឡាករ ស៊ែរប៊ី បានធ្វើបង្កឲ្យមតិរិះគន់ជាពិសេស រដ្ឋាភិបាលស៊ែរប៊ី។ សម្រាប់ប្រធានាធិបតី ស៊ែរប៊ី ការសម្រេចរបស់ រដ្ឋាភិបាលអូស្ត្រាលី នឹងធ្វើឲ្យរដ្ឋាភិបាលអូស្ត្រាលីខូចស្អុយឈ្មោះ។ ចំណែកគណៈកម្មការអូឡាំពិកស៊ែរប៊ីបានចាត់ទុកការសម្រេចរបស់តុលាការអូស្ត្រាលីថា ជារឿងអាស្រូវដ៏ធំមួយ។ នៅរដ្ឋធានីប៊ែលក្រាត ប្រជាជនស៊ែរប៊ីជាច្រើនពាន់នាក់បានធ្វើបាតុកម្មប្រឆាំងការបណ្តេញកីឡាករ ចូកូវីក ពីប្រទេសអូស្ត្រាលី។
សំណុំរឿងប្តឹងផ្តល់រវាងកីឡាករវាយកូនបាល់ពិភពលោក លោកណូវ៉ាក់ ចូកូវីក និងរដ្ឋាភិបាលអូស្ត្រាលី បានក្លាយជារឿងភាគមួយ ដែលមនុស្សជាច្រើនបានតាមដាន១០ថ្ងៃមកហើយ មិនថាអ្នកនោះជាអ្នកដែលគាំទ្រ ចូលចិត្ត កីឡាវាយកូនបាល់ ឬអ្នកនោះជាអ្នកដែលមិនធ្លាប់ស្គាល់ កីឡាករនេះពីមុនមក។ ប្រព័ន្ធផ្សព្វផ្សាយអន្តរជាតិវិញ សរសេរចុះផ្សាយច្រើន ព្រោះអាចថា សំណុំរឿងនេះ មានជាប់ទាក់ទងនឹងលោកណូវ៉ាក់ ចូកូវីក ដែលជាកីឡាករជើងឯកពិភពលោក ដ៏ល្បី ខាងវាយកូនបាល់ ដែលភាសាបារាំងហៅថាTennis។ ម្យ៉ាងគេតាមដានចុះផ្សាយនិយាយពីរឿងនេះ ព្រោះវាទាក់ទងនឹងការសម្រេចចិត្តដ៏ចម្រូងចម្រាសមួយ ស្តីរឿងចាក់វ៉ាក់សាំងបង្កាកូវីដ។
សូមរំលឹកថា កីឡាករ ស៊ែរប៊ី បានធ្វើដំណើរទៅទីក្រុងមែលប៊ន នៅថ្ងៃទី ៦មករា ដើម្បីចូលរួមក្នុងការប្រកួតកីឡាវាយកូនបាល់ Australia open។ ប៉ុន្តែ លោកត្រូវបានប៉ូលិសអន្តោប្រវេសន៍ចាប់ឃុំខ្លួននៅព្រលានយន្តហោះក្នុងហេតុផលថា លោកមិនបានបំពេញលក្ខខណ្ឌត្រឹមត្រូវ។ រឿងនេះបានធ្វើឲ្យគេចាប់អារម្មណ៍គ្រប់គ្នា ព្រោះថា បើទោះបីជាមិនបានចាក់វ៉ាក់សាំង បង្ការកូវីដ ដែលជាការតម្រូវរបស់រដ្ឋាភិបាលអូស្ត្រាលីសម្រាប់ជនបរទេស ប៉ុន្តែ លោកចូកូវីកនៅតែបានទទួលសិទ្ធិលើកលែង ពិសេស សម្រាប់ ចូលទឹកដីអូស្ត្រាលី។ មេធាវី របស់លោកចូកូវីក បាននិយាយការពារថា បើទោះលោកចូកូវីកមិនបានចាក់វ៉ាក់សាំង ប៉ុន្តែ លោកបានទទួលសិទ្ធិលើកលែង ដោយមកពីលោកធ្លាប់បានឆ្លងមេរោគកូវីដ។ នៅដើមសប្តាហ៍នេះ តុលាការអូស្ត្រាលីបានសម្រេចឲ្យគេដោះលែងលោកចូកូវីក ប៉ុន្តែ នៅទីបំផុត នៅថ្ងៃសុក្រ រដ្ឋមន្រ្តីក្រសួងអន្តោប្រវេសន៍អូស្ត្រាលីបានសម្រេចចិត្ត លុបចោលជាលើកទី២ ទិដ្ឋការចូលទឹកដីអូស្ត្រាលី របស់កីឡាករ Tennisជាតិស៊ែប ដែលត្រូវប្រឈមនឹងការបណ្តេញចេញពីអូស្ត្រាលី។
រដ្ឋាភិបាលអូស្ត្រាលី៖ លោកចូកូវីក ជាគ្រោះថ្នាក់សម្រាប់សុខភាពប្រជាជនអូស្ត្រាលី
នៅក្នុងអំណះអំណាងទៅកាន់តុលាការនៅថ្ងៃអាទិត្យនេះ រដ្ឋាភិបាលអូស្ត្រាលីបានលើកហតុផលថា គេសម្រេចលុបចោលទិដ្ឋាការរបស់កីឡាករ ចូកូវីក ក្នុង ហេតុផលប្រយោជន៍ សុខភាពសាធារណៈ និងសណ្តាប់ធ្នាប់សង្គម។
ដើម្បីដកហូតទិដ្ឋាការពីកីឡាករ Tennis លោកចូកូវីក រដ្ឋមន្រ្តីអន្តោប្រវេសន៍អូស្ត្រាលី លោកAlex Hawke បានលើកឡើងពីហេតុផល គ្រោះថ្នាក់សុខភាព សាធារណៈ ដែលអាចបង្កឡើងដោយលោកចូកូវីក។
រដ្ឋាភិបាលអូស្ត្រាលី បានលើកឡើងពីទឡ្ហីករណ៍ថា កីឡាករស៊ែរប៊ីបាននិយាយមិនច្បាស់លាស់ ទាក់ទងនឹងការប្រកាសពីរឿងឆ្លងកូវីដ នៅក្នុងក្រដាសស្នាមសុំទិដ្ឋាការ និងបានភូតកុហក ពីកន្លែងផ្លាស់ទី មុនចូលទឹកដី អូស្ត្រាលី។ តាមកាសែតក្នុងស្រុកអូស្ត្រាលី នៅពេលសួរថា តើលោកមានបានធ្វើដំណើរទៅណាខ្លះ នៅក្នុងរយៈពេល ១៤ថ្ងៃចុងក្រោយ មុននឹងធ្វើដំណើរមកអូស្ត្រាលី កីឡាករចូកូវីកបានគូសឆ្លើយថា អត់ទេ។ ប៉ុន្តែ រូបថតនៅក្នុងបណ្តាញសង្គមដែលកីឡាករផ្ទាល់ធ្លាប់បានបង្ហោះកន្លងមក បង្ហាញថា លោកចូកូវីដ បានធ្វើដំណើររវាងប្រទេសកំណើតរបស់លោក គឺស៊ែរប៊ី និងអេស្ប៉ាញ មុនធ្វើដំណើរមកអូស្ត្រាលី។
ម្យ៉ាងកីឡាករដឹងថា ខ្លួនធ្វើតេស្តឃើញ វិជ្ជមានកូវីដ កាលពីថ្ងៃទី ១៦ធ្នូ ប៉ុន្តែ នៅតែចូលរួមក្នុងកម្មវិធីកីឡាផ្សេងទៀត ដោយគ្មានរក្សាគម្លាត ពាក់ម៉ាស។ រូបភាពទាំងអស់នេះ មិនបានបង្ហាញគំរូល្អ និងការទទួលខុសត្រូវ ទេ នៅក្នុងកាលៈទេសៈដែលជំងឺកូវីដកំពុង ឆ្លងរាលដាលខ្លាំងនៅពេលនេះ។ នេះបើតាមអំណះអំណាងរបស់រដ្ឋមន្រ្តីក្រសួងអន្តោប្រវេសន៍អូស្ត្រាលី។
នៅអូស្ត្រាលី ជាពិសេសនៅទីក្រុងវិចតូរីយ៉ា ជាទីដែលមានការប្រកួត កីឡាវាយកូនបាល់ Australia Open ករណីឆ្លងកូវីដបានកើនឡើង ដល់ជាងមួយពាន់នាក់ក្នុងមួយថ្ងៃ។ អំណះអំណាងសំខាន់មួយទៀតរបស់រដ្ឋាភិបាល គឺថា បើគេអនុញ្ញាតឲ្យលោកចូកូវីក ដែលមិនបានចាក់វ៉ាក់សាំង ចូលអូស្ត្រាលី នោះ រដ្ឋមន្រ្តីអូស្ត្រាលី បារម្ភខ្លាចថា លោកចូកូវីក ដែលធ្លាប់បង្ហាញជំហរប្រឆាំងវ៉ាក់សាំងកន្លងមក នឹងអាចទាក់ទាញមនុស្សជាច្រើននៅអូស្ត្រាលីឲ្យងើបបះបោរប្រឆាំងការចាក់វ៉ាក់សាំង នៅអូស្ត្រាលី។ រដ្ឋាភិបាលអូស្ត្រាលីបានសង្កត់ធ្ងន់ថា ជំហរប្រឆាំងវ៉ាក់សាំងរបស់លោកចូកូវីក ឬការដែលលោកមិនព្រមចាក់វ៉ាក់សាំង នឹងអាចជំរុញឲ្យប្រជាជនអូស្ត្រាលី លែងចង់ទៅ ចាក់វ៉ាក់សាំង ដូសជំរុញ។
ករណីរបស់ចូកូវីក មានជាប់ទាក់ទងនឹងរឿងនយោបាយនៅអូស្ត្រាលី?
សម្រាប់មេធាវីរបស់កីឡាករ ចូកូវីក ការលើកឡើងរបស់រដ្ឋាភិបាលអូស្ត្រាលី គឺគ្មានសមហេតុផល ទាល់តែសោះ។ គ្រាន់តែមិនបានចាក់វ៉ាក់សាំង ប៉ុន្តែ លោកចូកូវីកមិនមែនគ្រោះថ្នាក់សម្រាប់សុខភាពប្រជាជនអូស្ត្រាលីនោះទេ។ ករណីរបស់លោកចូកូវីកបានរំលឹកឲ្យគេគិតឡើងវិញ ពី សិទ្ធិសេរីភាព ការប្រកួតកីឡា ហើយនិងសុខភាពសាធារណៈ ក្នុងកាលៈទេសៈកូវីដ។
តើឯណាទៅការគោរពសិទ្ធិមនុស្ស។ តើការឆ្លងរាតត្បាតជំងឺកូវីដសព្វថ្ងៃ ជាកំហុសរបស់អ្នកដែលមិនចាក់ វ៉ាក់សាំង ឬយ៉ាងណា? តើការដោះស្រាយវិបត្តិកូវីដ ជាទំនួលខុសត្រូវរបស់រដ្ឋាភិបាល ឬរបស់អ្នកមិនបានចាក់វ៉ាក់សាំង? ទាំងនេះជាសំណួរដែលគេត្រូវចោទសួរឲ្យឡើងវិញ។
មួយវិញទៀត អ្វីដែលគេឆ្ងល់ខ្លាំងក្នុងករណីរបស់កីឡាករចូកូវីកនោះ គឺថា ហេតុអ្វីបានកីឡាករចូកូវីកបានទទួលទិដ្ឋាការតាំងពីដំបូងទីឲ្យចូលទឹកដីអូស្ត្រាលី។ ហេតុអ្វីបានជារដ្ឋាភិបាលអូស្ត្រាលីទើបមកស្រែកអន្តរាគមន៍ ប្តូរចិត្ត លែងទទួលស្គាល់ករណីលើកលែងរបស់កីឡាករចូកូវីក នៅពេលកីឡាករបានចូលទឹកដីអូស្ត្រាលីរួចហើយនោះ ?
សម្រាប់អ្នកវិភាគមួយចំនួន រឿងចម្រូងចម្រាសលើកនេះ មានជាប់ក្លិននយោបាយ ព្រោះថា នៅប៉ុន្មានខែខាងមុខ អូស្ត្រាលីនឹងមានការបោះឆ្នោត សភា រើសរដ្ឋាភិបាលថ្មី។ គេជឿថា រដ្ឋាភិបាលរបស់លោកនាយករដ្ឋមន្រ្តីអូស្ត្រាលី ស្កុត ម៉ូរីសុនបានប្រែក្រឡាស់ ជំហររបស់ខ្លួន នៅពេលនេះ ក៏ដោយសារតែមានមតិប្រឆាំងកាន់តែច្រើន នឹងរឿងដែលអាជ្ញាធរអនុញ្ញាតឲ្យកីឡាករ ដែលមិនបានចាក់វ៉ាក់សាំង បានទទួលសិទ្ធិលើកលែងចូលទឹកដីអូស្ត្រាលី។ នៅអូស្ត្រាលី ប្រជាជនជាង ៩០ភាគរយបានចាក់វ៉ាក់សាំងបង្ការកូវីដ និងត្រូវរស់នៅ ក្នុងប្រទេសមួយ ដែលអនុវត្តវិធានការរឹតត្បិតតឹងតែងបំផុត សម្រាប់ការផ្លាស់ទី។ ដូច្នេះ នៅពេលឃើញ មានករណីលើកលែង សម្រាប់ឥស្សរជន កីឡាករ ល្បីៗ អ្នកមាន ប្រជាជនអូស្ត្រាលី ដែលធ្លាប់រស់នៅក្រោមការរឹតត្បិតរបស់រដ្ឋាភិបាលកន្លងមក ប្រាកដជាមិនសប្បាយចិត្ត និងបានរិះគន់រដ្ឋាភិបាលថា លំអៀង ផ្តល់សិទ្ធិទៅឲ្យតែអ្នកល្បី អ្នកមាន។ រដ្ឋាភិបាលរបស់លោកម៉ូរីសុនសព្វថ្ងៃ រងការរិះគន់ខ្លាំងណាស់។ បើសិន លោកនាយករដ្ឋមន្រ្តី ម៉ូរីសុននៅតែបណ្តោយឲ្យកីឡាករចូកូវីកបន្តស្ថិតនៅ អូស្ត្រាលី នោះលោកត្រូវប្រឈមនឹងការបាត់បង់សំឡេងគាំទ្រ នៅក្នុងការបោះឆ្នោត នៅប៉ុន្មានខែខាងមុខ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ