អូស្ត្រាលីលុបទិដ្ឋាការរបស់កំពូលកីឡាករវាយកូនបាល់“ចូកូវីក”មិនឲ្យចូលអូស្ត្រាលី
នៅថ្ងៃព្រហស្បតិ៍ ទី៦ មករានេះ ជើកឯកកីឡាវាយកូនបាល់ (Tennis) ពិភពលោក ណូវ៉ាក់ ចូកូវីក (Novak Djokovic) បានខំតស៊ូប្រឆាំងនឹងចំណាត់ការបណ្តេញរូបលោកចេញពីប្រទេសអូស្តាលី ក្រោយមន្ត្រីព្រំដែនបញ្ចប់សុពលភាពទិដ្ឋាការរបស់លោក ដោយហេតុខកខានមិនបានបំពេញតាមតម្រូវការវ៉ាក់សាំងកូវីដ។
ចុះផ្សាយនៅថ្ងៃ៖
កំពូលកីឡាករវាយកូនបាល់សញ្ជាតិស៊ែរប៊ីបានធ្វើដំណើរទៅដល់ទីក្រុងមែលប៊នប្រទេសអូស្ត្រាលីកាលពីល្ងាចថ្ងៃពុធ និងត្រូវបានឃាត់ខ្លួនជាច្រើនម៉ោងក្នុងព្រលានយន្តហោះមុនពេលដែលមន្ត្រីព្រំដែនអូស្ត្រាលី ប្រកាសថាលោកមិនបានបំពេញតាមលក្ខខណ្ឌដើម្បីចូលទឹកដីនៃប្រទេសអូស្ត្រាលី។
បន្ទាប់មកទៀត កីឡាករល្បីឈ្មោះរូបនេះត្រូវបានគេបញ្ជូនទៅកន្លែងឃុំខ្លួនជនអន្តោប្រវេសន៍ និងកំពុងតែប្រឈមនឹងការបណ្តេញចេញពីអូស្ត្រាលី។ ជើកឯកកីឡាវាយកូនបាល់ចូកូវីកបានជិះយន្តហោះសំដៅទៅកាន់អាកាសយានដ្ឋាន Tullamarine ក្នុងទីក្រុងមែលប៊នដើម្បីចូលរួមក្នុងព្រឹត្តិការណ៍ប្រកួតកីឡាវាយកូនបាល់ Australian Open ដែលជាកម្មវិធីធ្វើឡើងជារៀងរាល់ឆ្នាំក្នុងខែមករានៅទីក្រុងមែលប៊នប្រទេសអូស្ត្រាលី។
កីឡាករស៊ែរប៊ីដែលប្រឆាំងនឹងការចាក់វ៉ាក់សាំងរូបនេះ ធ្លាប់បានអះអាងនៅលើបណ្តាញសង្គមធ្វីតទ័រថាលោកបានទទួលការលើកលែងវ៉ាក់សាំង សម្រាប់ចូលរួមក្នុងការប្រកួតដែលនឹងចាប់ផ្តើមនាថ្ងៃទី១៧ មករាខាងមុខ។ ការលើកលែងនេះបង្កឲ្យមានការរិះគន់ជាច្រើននៅប្រទេសអូស្ត្រាលី។
ទាក់ទងរឿងនេះ នាយករដ្ឋមន្ត្រីអូស្ត្រាលីស្កុត ម៉ូរីសុន និយាយថាកីឡាករចូកូវីកបានបរាជ័យក្នុងការផ្តល់ឲ្យមន្ត្រីព្រំដែននូវភស្តុតាងនៃការចាក់វ៉ាក់សាំងចំនួនពីរដង ឬការលើកលែងផ្នែកវេជ្ជសាស្រ្តគ្រប់គ្រាន់។ ចំណែកតុលាការអូស្ត្រាលីវិញនឹងសម្រេចលើការបណ្តេញកីឡាករវាយកូនបាល់ដ៏ល្បីឈ្មោះស៊ែរប៊ីនៅថ្ងៃចន្ទ ទី១០ មករា។ មេធាវីរបស់លោកចូកូវីកវិញ ឥឡូវនេះកំពុងតែដុតដៃដុតជើងធ្វើការតវ៉ាប្រឆាំងដោយសង្ឃឹមថានឹងមិនមានការបណ្តេញរូបលោកកើតឡើងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ