កូរ៉េខាងជើងចាប់ផើ្តមបាញ់សាកល្បងមីស៊ីលដែលមានកម្លាំងខ្លាំង ដូចកាលពីឆ្នាំ ២០១៧
ចុះផ្សាយនៅថ្ងៃ៖
ស្តាប់ - ០៨:២៦
នៅថ្ងៃអាទិត្យ ទី ៣០មករា កូរ៉េខាងជើងបាញ់សាកល្បងមីស៊ីលដ៏មានកម្លាំងខ្លាំងមិនធ្លាប់មាន នៅក្នុងរយៈពេល៥ឆ្នាំចុងក្រោយនេះ។ គិតចាប់តាំងពីដើមខែមករា នេះជាលើកទី៧ដែលរបបកុម្មុយនិស្តព្យុងយ៉ាងបាញ់សាកល្បងសមត្ថភាពមីស៊ីលរបស់ខ្លួន។ ការបាញ់សាកល្បងមីស៊ីលជាច្រើនលើក យ៉ាងដូច្នេះ សបញ្ជាក់ពីការអភិវឌ្ឍសមត្ថភាពផលិតមីស៊ីលរបស់កូរ៉េខាងជើង នៅក្នុងខណៈពេលដែលការចរចាស្តីពីអាវុធនុយក្លេអ៊ែរកូរ៉េខាងជើងនៅតែជាប់គាំង។ ដោយបាញ់មីស៊ីលដែលមានកម្លាំងខ្លាំង នៅថ្ងៃអាទិត្យនេះ តើកូរ៉េខាងជើងចង់បញ្ជូនសញ្ញាអ្វីទៅពិភពលោក?
អាមេរិក ជប៉ុន និងកូរ៉េខាងត្បូង បានប្រតិកម្មថ្កោលទោសកូរ៉េខាងជើងដែលបានបាញ់សាកល្បងមីស៊ីល នៅព្រឹកថ្ងៃអាទិត្យនេះ។ ចាប់ពីដើមខែមករា នេះជាលើកទី៧ ដែលកូរ៉េខាងជើងបាញ់សាកល្បងមីស៊ីលរបស់ខ្លួន។
នៅក្នុងការបាញ់សាកល្បងមីស៊ីល៦លើកកន្លងមក មានផងដែរ ការបាញ់មីស៊ីលអ៊ីពែរសូនិក ដែលជាមីស៊ីលហោះលឿនជាងសំឡេង ដល់ទៅ៥ដង។ ក៏ប៉ុន្តែ មីស៊ីលដែលកូរ៉េខាងជើងបាញ់សាកល្បងនៅព្រឹកថ្ងៃអាទិត្យនេះ គឺមានកម្លាំងខ្លាំងជាងមីស៊ីលមុនៗ។
ជាក់ស្តែង មីស៊ីលដែលកូរ៉េខាងជើងធ្លាប់បានបាញ់សាកល្បងកាលពីពាក់កណ្តាលខែនេះ ដែលជប៉ុន និងកូរ៉េខាងត្បូងវាយតម្លៃថា ជាមីស៊ីលបាលីស្ទិក គឺហោះបាន ៣៨០គីឡូម៉ែត្រក្នុងរយៈកម្ពស់អតិបរមា ៤២ គីឡូម៉ែត្រ។ ប៉ុន្តែ មីស៊ីលនៅថ្ងៃអាទិត្យនេះ បានហោះទៅក្នុងអាកាស ក្នុងកំពស់ ២០០០គីឡូម៉ែត្រ និងហោះបានចម្ងាយ ៨០០គីឡូម៉ែត្រសម្រាប់រយៈពេល ៣០នាទី។
តាមក្រសួងការពារជាតិកូរ៉េខាងត្បូង វាអាចជាមីស៊ីលបាលីស្ទិកចម្ងាយមធ្យម ដែលកូរ៉េខាងជើង មិនធ្លាប់បាញ់សាកល្បងទេ នៅ៥ឆ្នាំមកនេះ។ ការបាញ់សាកល្បងមីស៊ីលបាលីស្ទិក ចម្ងាយមធ្យម ឬចម្ងាយឆ្ងាយ របស់កូរ៉េខាងជើង ធ្លាប់កើតឡើង ចុងក្រោយបំផុត នៅឆ្នាំ ២០១៧ នៅក្នុងបរិបទដ៏តានតឹងខ្លាំងរវាងកូរ៉េខាងជើង និងអាមេរិក។
សម្រាប់អ្នកជំនាញ មីស៊ីលបាលីស្ទិកដែលកូរ៉េខាងជើងបាញ់សាកល្បងនៅថ្ងៃនេះ ស្រដៀងគ្នានឹងមីស៊ីល Hwasong-12 (IRBM) ដែលកូរ៉េខាងជើងធ្លាប់បាញ់ នៅឆ្នាំ ២០១៧។ គេវាយតម្លៃថា មីស៊ីលបាលីស្ទិកចម្ងាយមធ្យម Hwasong-12 (IRBM) មានសមត្ថភាព អាចវាយប្រហារទឹកដីកោះ Guam របស់អាមេរិក នៅមហាសមុទ្រប៉ាស៊ីហ្វិក។ ដោយសារតែហេតុហ្នឹងហើយ បានជាអាមេរិក ចេញមុខថ្កោលទោសខ្លាំងជាងគេ និងចាត់ទុកសកម្មភាពបាញ់មីស៊ីលរបស់កូរ៉េខាងជើងថា ជាការរំលោភសេចក្តីសម្រេចរបស់ក្រុមប្រឹក្សាសន្តិសុខ ដែលបានហាមកូរ៉េខាងជើងមិនឲ្យសាកល្បងអាវុធនុយក្លេអ៊ែរ និងមីស៊ីលបាលីស្ទិក។
មេដឹកនាំកូរ៉េខាងជើងធ្លាប់បានគំរាមថា នឹងធ្វើតេស្តសាកល្បងឡើងវិញ មីស៊ីលផ្ទុកក្បាលគ្រាប់នុយក្លេអ៊ែរ និង មីស៊ីលបាលីស្ទីកចម្ងាយឆ្ងាយ
នៅក្នុងកិច្ចប្រជុំនយោបាយ របស់បក្សពលករកាលពីថ្ងៃទី ២០មករាកន្លងមក មេដឹកនាំកូរ៉េខាងជើង បានបញ្ជាឲ្យការិយាល័យនយោបាយ នៃគណកម្មាធិការមជ្ឈឹមបក្សកុម្មុយនីស្តិកូរ៉េខាងជើង សិក្សាពីលទ្ធភាព សាកល្បងអាវុធមីស៊ីល និងអាវុធនុយក្លេអ៊ែរឡើងវិញ បន្ទាប់ពីបានផ្អាកអស់រយៈពេល ៥ឆ្នាំ។
នៅដើមឆ្នាំ២០១៨ កូរ៉េខាងជើងបានប្រកាសផ្អាកដោយខ្លួន ការបាញ់សាកល្បងអាវុធនុយក្លេអ៊ែរ និងមីស៊ីលបាលីស្ទិក ដើម្បីបើកផ្លូវចរចាការទូតជាមួយអាមេរិក ក្រោមអាណត្តិរបស់លោកដូណាល់ត្រាំ។ ប៉ុន្តែ នៅក្រោយ ជំនួប ទ្វេភាគី ដល់ទៅ៣លើកជាមួយប្រធានាធិបតីអាមេរិក លោកដូណាល់ ត្រាំ បរាជ័យ ដោយមិនអាចឈានទៅដល់ការដកទណ្ឌកម្ម ដែលជាការទាមទាររបស់កូរ៉េខាងជើង កូរ៉េខាងជើង បានត្រលប់មកសាកល្បងជាបន្តបន្ទាប់ មីស៊ីលរបស់ខ្លួន នៅឆ្នាំ ២០១៩ ប៉ុន្តែ មិនមែនជាមីស៊ីលបាលីស្ទិក ដែលមានកម្លាំងខ្លាំង ដូចថ្ងៃ អាទិត្យ។
ដោយបាញ់សាកល្បងមីស៊ីលបាលីស្ទីកឡើងវិញ គេជឿថា កូរ៉េខាងជើងកំពុងត្រលប់ទៅបង្កើតភាពតានតឹងដូចកាលពីឆ្នាំ ២០១៧ ដែលនៅពេលនោះ កូរ៉េខាងជើងបានបោះជំហានលឿនមែនទែន ក្នុងផ្នែកបច្ចេកវិទ្យា ផលិតមីស៊ីល បាលីស្ទិក និងអាវុធនុយក្លេអ៊ែរ។ នៅឆ្នាំ ២០១៧ កូរ៉េខាងជើង បានប្រកាសខ្លួនជាមហាអំណាចនុយក្លេអ៊ែរ បន្ទាប់ពី បានបាញ់សាកល្បងដោយជោគជ័យ មីស៊ីលបាលីស្ទិក ដែលមានសមត្ថភាពបំពាក់ក្បាលគ្រាប់នុយក្លេអ៊ែរ។ កាលណោះ កូរ៉េខាងជើង អះអាងថា មីស៊ីលបាលីស្ទិកចម្ងាយឆ្ងាយរបស់ខ្លួន គឺអាចមានសមត្ថភាពទៅកម្ទេចរដ្ឋធានីវ៉ាស៊ីនតោនរបស់អាមេរិកទៀតផង។ ប៉ុន្តែ ការបាញ់សាកល្បងមីស៊ីល និងនុយក្លេអ៊ែររបស់កូរ៉េខាងជើងនៅឆ្នាំ ២០១៧ បានធ្វើឲ្យកូរ៉េខាងជើងជាប់ទណ្ឌកម្មសេដ្ឋកិច្ចជាលើកទី១០របស់ក្រុមប្រឹក្សាសន្តិសុខអង្គការសហប្រជាជាតិ។
ហេតុផលនៅពីក្រោយការបាញ់សាកល្បងមីស៊ីលបាលីស្ទិករបស់កូរ៉េខាងជើង
មានហេតុផលច្រើនយ៉ាងដែលអាចធ្វើឲ្យកូរ៉េខាងជើងបាញ់សាកល្បងមីស៊ីលដល់ទៅ ៧ដង ក្នុងរយៈពេល១ខែ ហើយចុងក្រោយ គឺជាអាចជាមីស៊ីលបាលីស្ទិក ដែលហាមប្រាមដោយក្រុមប្រឹក្សាសន្តិសុខអង្គការសហប្រជាជាតិ។
ដោយបង្កើនការបាញ់មីស៊ីលញឹកញាប់មែនទែន កូរ៉េខាងជើងពិតណាស់ ចង់ដាក់សម្ពាធឲ្យអាមេរិកត្រលប់មកចរចា និងបន្ធូរបន្ថយការទណ្ឌកម្មសេដ្ឋកិច្ចលើកូរ៉េខាងជើង។ កូរ៉េខាងជើងមិនត្រឹមតែដាក់សម្ពាធលើអាមេរិកតែប៉ុណ្ណោះទេ ប៉ុន្តែ សំដៅផងដែរ ប្រទេសផ្សេងទៀត ដូចជាកូរ៉េខាងត្បូង និងចិន ដែលជាសម្ព័ន្ធមិត្តតែមួយរបស់កូរ៉េខាងជើង។ ជាក់ស្តែង កូរ៉េខាងជើង បាញ់សាកល្បងមីស៊ីល ដើម្បីបង្កើនភាពតានតឹងនៅក្នុងតំបន់ នៅតែ ១សប្តាហ៍មុន ការប្រកួតកីឡាអូឡាំពិករដូវរងា ដែលមានចិនធ្វើជាម្ចាស់ផ្ទះ។ កូរ៉េខាងជើងអាចផ្តល់សញ្ញាទៅសម្ព័ន្ធមិត្តចិនថា ត្រូវជួយគិតគូរ ជំរុញឲ្យកូរ៉េខាងជើងអាចរួចផុតពីទណ្ឌកម្មដែលកំពុងកៀប សង្កត់ ដង្ហើមសេដ្ឋកិច្ចរបស់កូរ៉េខាងជើង។
ម្យ៉ាងទៀត កូរ៉េខាងជើងបាញ់សាកល្បងមីស៊ីលដែលមានកម្លាំងខ្លាំង ដូចដែលខ្លួន បានធ្វើកាលពី៥ឆ្នាំមុន គឺដើម្បីដាក់សម្ពាធសាជាថ្មីលើប្រជាជន អ្នកនយោបាយរបស់កូរ៉េខាងត្បូង ដែលត្រូវរៀបចំការបោះឆ្នោតជ្រើសរើសប្រធានាធិបតីនៅប៉ុន្មានខែខាងមុខ។
កូរ៉េខាងជើង ចង់ផ្ញើសារទៅកាន់អាមេរិក និងសហគមន៍អន្តរជាតិឲ្យបានដឹងថា ថ្វីត្បិតសេដ្ឋកិច្ចកូរ៉េខាងជើង ចុះទន់ខ្សោយ ប្រជាជនជួបគ្រោះអត់ឃ្លាន ដោយសារទណ្ឌកម្មសេដ្ឋកិច្ច ប៉ុន្តែ គេមិនអាចយកលេសវិបត្តិដឹកនាំនយោបាយក្នុងស្រុកដើម្បីផ្តួលរំលំរបបកុម្មុយនិស្ត។ ការប៉ុនប៉ងបែបនេះ គឺគ្រោះថ្នាក់ណាស់ ជាមួយកូរ៉េខាងជើង ដែលមានអាវុធនុយក្លេអ៊ែរ។
មួយវិញទៀត បើមើលឲ្យស៊ីជម្រៅជាងនេះទៀត មហិច្ឆតាបាញ់សាកល្បងមីស៊ីលរបស់កូរ៉េខាងជើង មិនមានត្រឹម ទាមទារឲ្យគេដកទណ្ឌកម្មសេដ្ឋកិច្ចពីខ្លួនតែប៉ុណ្ណោះទេ។ ការសាកល្បងសាជាថ្មី មីស៊ីលបាលីស្ទីក ក៏ជាឱកាសបង្ហាញសមត្ថភាព បច្ចេកវិទ្យាផលិតសព្វាវុធរបស់កូរ៉េខាងជើង សម្រាប់អតិថិជនទាំងឡាយណា ដែលចាប់អារម្មណ៍ សព្វាវុធរបស់កូរ៉េខាងជើង។
ហេតុផលចុងក្រោយដែលធ្វើឲ្យកូរ៉េខាងជើងបង្កើនការសាកល្បងមីស៊ីលបន្តបន្ទាប់គ្នា គឺដើម្បីបញ្ចុះបញ្ចូលមតិក្នុងស្រុក ឲ្យជឿជាក់លើសមត្ថភាពដឹកនាំរបស់លោកគីម ជីងអ៊ុន នៅចំពោះមុខការដាក់សម្ពាធ ការដាក់ទណ្ឌកម្មពីអន្តរជាតិ។ របបកុម្មុយនិស្ត ព្យុងយ៉ាងអាចចង់បង្ហាញទៅប្រជាជនរបស់ខ្លួនថា ទោះ កូរ៉េខាងជើងជាប់ទណ្ឌកម្មសេដ្ឋកិច្ច ប្រជាជនជួបការលំបាក គ្រោះអត់ឃ្លាន មែន ប៉ុន្តែ រដ្ឋអំណាចកូរ៉េខាងជើងបានព្យាយាម ផលិតអាវុធនុយក្លេអ៊ែរ និងមីស៊ីលបាលីស្ទីកទាល់តែបានដើម្បីការពារអធិបតេយ្យភាព ការពារខ្លួន ពីការឈ្លានពាន ពីបរទេស ដែលនេះគឺជាមោទនភាព ខ្លាំងណាស់សម្រាប់ប្រជាជនកូរ៉េខាងជើង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ