កីឡាអូឡាំពិករដូវរងារប៉េកាំង ចាប់បើក ក្នុងបរិយាកាសនយោបាយតានតឹង
ចុះផ្សាយនៅថ្ងៃ៖
ស្តាប់ - ០៧:០៤
ចិននឹងបង្អួតពិភពលោក ជាមួយនឹងកម្មវិធីបើកកីឡាអូឡាំពិករដូវរងារ២០២២ វេលាម៉ោង៨យប់ម៉ោងនៅទីក្រុងប៉េកាំង ត្រូវជាម៉ោង១២ថ្ងៃត្រង់ម៉ោងសកល ដ៏ធំ ប្រណិត អស្ចារ្យ។ ប៉ុន្តែ កម្មវិធីកីឡានេះ ប្រព្រឹត្តទៅក្នុងបរិបទព្រួយបារម្ភខ្លាំងបង្កឡើងដោយវិបត្តិកូវីដ និងនយោបាយដ៏តានតឹង។ បណ្តាប្រទេសធំៗជាច្រើននាំមុខដោយសហរដ្ឋអាមេរិកបានធ្វើពហិការការទូតមិនចូលរួមក្នុងកម្មវិធីនេះ។ តែចិនបានទទួលភ្ញៀវពិសេសម្នាក់គឺ លោកប្រធានាធិបតីរុស្ស៊ី វ្លាដេមៀ ពូទីន។
នេះជាកម្មវិធីប្រកួតកីឡាអូឡាំពិករដូវរងារលើកទី២៤។ ចាប់ពីថ្ងៃសុក្រទី ៤ កុម្ភៈនេះទៅ ប៉េកាំងបានក្លាយជាក្រុងដំបូងគេបង្អស់នៅលើលោក ដែលបានទទួលរៀបចំកីឡាអូឡាំពិករដូវក្តៅផង (២០០៨) និងអូឡាំពិករដូវរងារ(២០២២) ផង។ កម្មវិធីនឹងចាប់បើកជាផ្លូវការនៅពេលប្រធានាធិបតីចិន លោក ស៊ីជីនពីង ថ្លែងសុន្ទរកថាប្រកាសបើកកម្មវិធី។
ស្តាតជាតិ ដ៏ល្បីល្បាញ មានទម្រង់ជាសម្បុកសត្វបក្សី នឹងរះត្រចះត្រចង់បង្អួតរាងជាលើកទីពីរ បន្ទាប់ពីកម្មវិធីអូឡាំពិករដូវក្តៅកាលពីឆ្នាំ២០០៨។ ដូចកាលពី១៤ឆ្នាំមុន ចិននឹងប្រារព្វពិធីឱ្យអស្ចារ្យ តែដោយហេតុវិបត្តិសុខភាពកូវីដ សិល្បករ អ្នកសម្តែង ត្រឹមតែ ៣០០០នាក់ប៉ុណ្ណោះ ភាគច្រើនជាក្មេងជំទង់ មិនមែនដល់ទៅ ១៤០០០នាក់ ដូចកាលឆ្នាំ ២០០៨ទេ មកសម្តែងផ្ទាំងទស្សនីយភាពដ៏រស់រវើក អមដោយការបាញ់កាំជ្រួចលម្អយ៉ាងប្រណិត។
បើនិយាយអំពីអត្ថន័យវិញ ជាមួយនឹងពាក្យស្លោក “រួមគ្នាដើម្បីចែករំលែកអនាគត” ប៉េកាំង ចង់ផ្ញើសារប្រាប់ពលរដ្ឋចិនថា ពួកគេអាចមានមោទនភាពនឹងប្រទេសរបស់ពួកគេ នឹងបក្សកុម្មុយនិស្តដែលដឹកនាំប្រទេស។ ប្រធានាធិបតីចិន ស៊ីជិនពីង ក៏ចង់ប្រើឱកាសនេះ សម្រាប់ប្រាប់អត្តពលិកបរទេសទាំងអស់ អំពីមហិទ្ធិរិទ្ធរបស់ចិនលើឆាកអន្តរជាតិ។
វិធានការទប់ទល់កូវីដ សម្រួលការគ្រប់គ្រង
ដោយហេតុកូវីដនិងនយោបាយសូន្យកូវីដរបស់ប៉េកាំង កីឡាករទាំងអស់ មិនអាចមានទំនាក់ទំនងជាមួយពិភពខាងក្រៅ និងជាមួយទស្សនិកជនទេ។ ពួកគេត្រូវនៅតែក្នុងរង្វង់អូឡាំពិកដែលរដ្ឋាភិបាលគូសនិងកំណត់ឱ្យ និងដោយត្រូវឆ្លងកាត់ការធ្វើតេស្តជារៀងរាល់ថ្ងៃ។ នេះជាលក្ខខណ្ឌសុខាភិបាលសម្រាប់ទប់ទល់នឹងជំងឺរាតត្បាតកូវីដ១៩ ដែលត្រូវចំចិត្តអាជ្ញាធរចិនតែម្តង។ វិធានការនេះបានសម្រួលឱ្យចិនកាន់តែងាយ និងអាចគ្រប់គ្រង អ្វីដែលនៅក្នុងរង្វង់អូឡាំពិកបានទាំងស្រុងតែម្តង។ សូម្បីតែកូនបាតុកម្មតូចមួយក៏អាចកើតឡើងបានដែរ ហើយសកម្មជនសិទ្ធិមនុស្ស ប្រជាធិបតេយ្យទាំងឡាយត្រូវបិទទ្ទប់បង្ឃាំងអស់ហើយ។
នៅលើវេទិកាកត្តិយសវិញ ក៏មិនដូចឆ្នាំ២០០៨ ដែលមានប្រមុខរដ្ឋ រដ្ឋាភិបាលជាច្រើនបង្ហាញវត្តមាន អបអរការបើកកម្មវិធីឡើយ។ ឆ្នាំនេះ វេទិកាទូលាយ និងស្រលះល្អណាស់ ព្រោះក្រុមប្រទេសលោកខាងលិច នាំមុខដោយសហរដ្ឋអាមេរិក ព្រមទាំងសម្ព័ន្ធមិត្ត កាណាដា អូស្ត្រាលី អង់គ្លេស ជប៉ុន បាននាំគ្នាធ្វើពហិការការទូតមិនបញ្ជូនតំណាងប្រទេសឱ្យមកចូលរួមក្នុងពិធីបើកកម្មវិធីថ្ងៃនេះ ដើម្បីប្រឆាំងនឹងការរំលោភសិទ្ធិមនុស្សលើជនជាតិភាគតិចអ៊ុយហ្គួរ ទីបេ ហុងកុង ...។ អង្គការក្រៅរដ្ឋាភិបាល ចំនួន ២៤៣ ក៏បានបរិហារដូចគ្នា និងបានចាត់ទុក កីឡាអូឡាំពិកប៉េកាំងនេះជាល្បែងគួរឱ្យខ្មាសអៀន។
ចិននិងរុស្ស៊ី បង្ហាញទស្សនវិស័យរួម
ប៉ុន្តែចិនមិនខ្វល់ទេ ចិនរំពឹងថា នៅពេលការប្រកួតកីឡាចាប់ផ្តើម នោះកីឡានឹងធ្វើឱ្យភ្លេចភាពតានតឹងនយោបាយហើយ។ សម្រាប់ពេលនេះ មុននឹងឈានដល់ការបើកកម្មវិធីកីឡាអូឡាំពិក ប្រធានាធិបតីចិន កំពុងប្រញឹកស្វាគមន៍ភ្ញៀវដ៏សំខាន់ៗ ជាប្រមុខដឹកនាំប្រទេសនៅឈូងសមុទ្ទពែក្ស ដូចយ៉ាងរាជបុត្រស្នងរាជអារ៉ាប៊ី បេនសាល់ម៉ាន នាយករដ្ឋមន្ត្រី អ៊ីមរ៉ាន ខាន់ មិត្តជំនិតជាប់របងប៉ាគីស្ថាន ប្រធានាធិបតី កាហ្សាក់ស្ថាន និងពិសេសគឺរូបលោកប្រធានាធិបតីរុស្ស៊ី វ្លាដេមៀ ពូទីន តែម្តង។ លោកពូទីនដែលកំពុងប្រឈមជាមួយបស្ចិមលោក ក្នុងវិបត្តិអ៊ុយក្រែន ធ្វើដំណើរមកប៉េកាំងដើម្បីគាំទ្រចិនក្នុងពេលមានកីឡាអូឡាំពិក តែក៏ចង់ឱ្យចិនបង្ហាញសាមគ្គីភាពរុស្ស៊ីក្នុងវិបត្តិជាមួយអូតង់ដែរ។
នៅទីបំផុត ប្រទេសទាំងពីរបានសម្តែងការគាំទ្រគ្នាទៅវិញទៅមក ដូចប្រាថ្នាមែន។ ចិន-រុស្ស៊ី បានឈានចូលក្នុងសករាជនៃទំនាក់ទំនងអន្តរជាតិថ្មី។ ក្រោយជំនួបពិភាក្សាទល់មុខគ្នា មួយទល់នឹងមួយ មេដឹកនាំទាំងពីរបានចេញសេចក្តីថ្លែងការណ៍រួម បរិហារឥទ្ធិពលអាមេរិក និងតួនាទីរបស់សម្ព័ន្ធយោធា អូតង់/ណាតូ និងសម្ព័ន្ធ AUKUS មកលើអឺរ៉ុបនិងមកលើអាស៊ី។ លោកពូទីន និងលោកស៊ីជីនពីង បានបង្ហាញទស្សនៈវិស័យរួម ប្រកាសប្រឆាំងនឹងការពង្រីកសមាជិកភាពអង្គការអូតង់ ហើយចាត់ទុកការពង្រីកឥទ្ធិពលរបស់អាមេរិក នៅក្នុងតំបន់យុទ្ធសាស្ត្រឥណ្ឌូប៉ាស៊ីហ្វិក ជាសញ្ញាអវិជ្ជមានសម្រាប់សន្តិភាពនិងស្ថិរភាពតំបន់។ សម្រាប់រុស្ស៊ីនិងចិន ការបង្កើតសម្ព័ន្ធត្រីភាគីអាមេរិកអង់គ្លេសនិងអូស្ត្រាលី នៅឆ្នាំ២០២១ ប៉ះពាល់ដល់ចំណោទស្ថិរភាពយុទ្ធសាស្ត្រ។
ប្រទេសទាំងពីរ រុស្ស៊ី-ចិន បានចុះកិច្ចព្រមព្រៀងពាណិជ្ជកម្មជាយុទ្ធសាស្ត្រ តែមិនបានទម្លាយឱ្យដឹងអំពីទំហំនៃកិច្ចព្រមព្រៀងនោះទេ។
ជាចុងក្រោយដោយមិនបានរង់ចាំ ចិនបានទទួលការអបអរលើកសរសើរពីកូរ៉េខាងជើង។ កូរ៉េខាងជើងមិនអាចចូលរួមក្នុងកីឡាអូឡាំពិកប៉េកាំងនេះបានទេ ព្រោះព្យុងយ៉ាងបដិសេធមិនបញ្ជូនប្រតិភូ កាលពីកីឡាអូឡាំពិកតូក្យូ២០២១។ ប៉ុន្តែថ្ងៃនេះ លោកគីមជុងអ៊ុន បានសរសេរសារយ៉ាងវែង សរសើរការរៀបចំកីឡាអូឡាំពិក។ សារបែបនេះ បើតាមអ្នកវិភាគ គឺកូរ៉េខាងជើងចង់ព្រលយប្រាប់ថាមិនបាញ់សាកល្បងមីស៊ីលក្នុងអំឡុងពេលប្រកួតកីឡាអូឡាំពិកទេ។ បើដូច្នេះមែន វាពិតជាការសម្រាលសម្ពាធមួយសម្រាប់ប៉េកាំង ដែលទើសទាល់មែនទែនពេលព្យុងយ៉ាងសាកល្បងមីស៊ីលម្តងៗ។ ចិនមិនចង់ឃើញមានភាពតានតឹងយោធាក្នុងពេលមានព្រឹត្តិការណ៍កីឡាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ