សង្រ្គាមប្រឆាំងក្រុមភេរវនិយម៖ បន្ទាប់ពីអាមេរិកដកទ័ព ពីអាហ្វហ្កានីស្ថាន បារាំងដកទ័ពចេញពីម៉ាលី
ចុះផ្សាយនៅថ្ងៃ៖
ស្តាប់ - ០៨:០៥
នៅក្រោយទំនាក់ទំនងរកាំរកូសជាមួយរបបសឹកម៉ាលី បារាំងនិងប្រទេសដៃគូនៅអឺរ៉ុបបានសម្រេចជាផ្លូវការដកទ័ពចេញពីប្រទេសម៉ាលី។ នៅក្នុងសន្និសីទកាសែត នៅព្រឹកថ្ងៃព្រហស្បតិ៍ទី ១៧ កុម្ភៈ ប្រធានាធិបតីបារាំង លោកអេម៉ានុយអែល ម៉ាក្រុងបានប្រកាសថា ការដកកងទ័ពបារាំង អឺរ៉ុប និងកាណាដា ចេញពីប្រទេសម៉ាលី ត្រូវចាប់ផ្តើម ពីពេលនេះ ទៅប៉ុន្មានខែខាងមុខ។ សម្រាប់អ្នកនាំពាក្យរបស់បេសកកម្មក្រុមមួកខៀវ នៃអង្គការសហប្រជាជាតិ ការដកកងទ័ពបារាំង ចេញពីម៉ាលី នឹងអាចជះឥទ្ធិពលអាក្រក់ទៅលើការងាររបស់ក្រុមមួកខៀវ នៅប្រទេសម៉ាលី
បារាំងនិងប្រទេសអឺរ៉ុបដៃគូ រួមជាមួយកាណាដា បានចេញសេចក្តីថ្លែងការណ៍រួម នៅថ្ងៃព្រហស្បតិ៍ នេះ ដើម្បីប្រកាសជាផ្លូវការ ការដកទ័ពរបស់ខ្លួន ចេញពីប្រទេសម៉ាលី។ បារាំងរួមជាមួយប្រទេសដៃគូនៅអឺរ៉ុបសម្រេចដកទ័ពចេញពីម៉ាលី។ នេះមិនមែនជារឿងភ្ញាក់ផ្អើល បារាំង ដែលដឹកនាំប្រតិបត្តិការកងទ័ពអឺរ៉ុប សម្រាប់ប្រយុទ្ធប្រឆាំងនឹងក្រុមភេរវនិយម នៅ តំបន់សាហ៊ែល នៅទឹកដីអាហ្វ្រិក បានពន្លយឲ្យដឹងរួចហើយ ពីការដកទ័ពចេញពីប្រទេសម៉ាលី។ បារាំងសម្រេចដកទ័ពចេញពីម៉ាលី នៅបន្ទាប់ពីរបបសឹកម៉ាលី បណ្តេញ ឯកអគ្គរដ្ឋទូតបារាំង កាលពីចុងខែមករា នៅក្រោយ រដ្ឋមន្រ្តីការបរទេសបារាំង ចាត់ទុកការកាន់អំណាចខុសច្បាប់របស់កងទ័ពនៅម៉ាលី។
ភាពរកាំរកូស រវាងបារាំង និងម៉ាលី កើតឡើងដោយសារបារាំង បានដំឡើងសំឡេងរិះគន់ កងទ័ពម៉ាលី ដែលបានធ្វើរដ្ឋប្រហារ ដល់ទៅ២ដង ហើយបដិសេធមិនព្រមរៀបចំការបោះឆ្នោតជ្រើសរើសរដ្ឋាភិបាលស៊ីវិល នៅចុងខែកុម្ភៈ នេះ ប៉ុន្តែ បែរជាលើកពេលទៅធ្វើ នៅឆ្នាំ ២០២៥ទៅវិញ។ មួយវិញ ទៀត បារាំងក៏ចាប់អន់ចិត្ត ថ្នាំងថ្នាក់ ដែលឃើញរបបសឹកម៉ាលីចាប់ដៃ សហការជាមួយទាហានស៊ីឈ្នួល រុស្ស៊ី របស់ក្រុមហ៊ុនWagner ដែលបារាំងចោទប្រកាន់ថា កំពុងពង្រាយវត្តមានក្នុងទឹកដី ម៉ាលី ដើម្បីការពារកន្លែងអាជីវកម្មរ៉ែ ដែលជាផលប្រយោជន៍ជំនួញរបស់ខ្លួន ពោលគឺផ្ទុយពីបេសកកម្មរបស់កងទ័ពបារាំង ដែលមានទិសដៅ វាយបណ្តេញ ក្រុមភេរវនិយមចេញពីទឹកដីម៉ាលី។
នៅក្នុងរឿងដកទ័ពចេញពីម៉ាលី ផ្ទុយពីអាមេរិកដែលប្រកាសដកទ័ពចេញពីអាហ្វហ្កានីស្ថាន ដោយអត្តនោម័ត គ្មានពិភាក្សាជាមួយប្រទេសសម្ព័ន្ធមិត្តផ្សេងទៀត បារាំងមិនចង់ឲ្យគេចោទថា ខ្លួនធ្វើការផ្តាច់មុខតែម្នាក់ឯងនៅ ម៉ាលីនោះទេ។ នៅមុនសម្រេចដកទ័ពពីម៉ាលី បារាំង បានពិភាក្សា ជាប់ជានិច្ច ជាមួយប្រទេសដៃគូ ក្នុងតំបន់អាហ្វ្រិក និងជាពិសេស បណ្តាប្រទេសអឺរ៉ុប ក៏ដូចជាកាណាដា ដែលបានចូលរួមជាមួយបារាំង ក្នុងបេសកកម្មប្រយុទ្ធប្រឆាំងក្រុមភេរវនិយម នៅតំបន់សាហ៊ែល។
នៅក្នុងសេចក្តីថ្លែងការណ៍រួម ជាផ្លូវការ នៅថ្ងៃនេះ បារាំង និងប្រទេសដៃគូអឺរ៉ុបបានពន្យល់ថា ដោយសារតែជួបឧបសគ្គច្រើនយ៉ាង ដែលបង្កឡើងដោយរបបសឹកម៉ាលី កាណាដា បណ្តាប្រទេសនៅអឺរ៉ុប ដែលចូលរួមក្នុងកងកម្លាំង Takuba និងធ្វើការជាមួយប្រតិបត្តិការ បារកានរបស់បារាំងបានសម្រេចចិត្តដកកងទ័ពរបស់ខ្លួនចេញពីម៉ាលី។ សម្រាប់ក្រុមប្រទេសលោកខាងលិច លក្ខខណ្ឌនៅប្រទេសម៉ាលី សព្វថ្ងៃនេះ មិនអនុញ្ញាតឲ្យគេប្រយុទ្ធប្រឆាំងក្រុមភេរនិយមដោយមានប្រសិទ្ធិភាព ជោគជ័យនោះទេ។ ដូច្នេះ គេសម្រេចដកទ័ព និងមធ្យោបាយយោធាផ្សេងទៀត ដែលគេបានបញ្ជូនទៅប្រទេសម៉ាលី។
បារាំងនឹងអឺរ៉ុប ដកទ័ពចេញពីម៉ាលី តើប្រតិបត្តិការបាកកាន របស់បារាំង ដែលដាក់បញ្ចូលម៉ាលីផងដែរ នឹងប្រែក្លាយ ទៅជាយ៉ាងណា?
សព្វថ្ងៃនេះ បារាំងពង្រាយកងទ័ពរបស់ខ្លួន ប្រមាណ ៤៦០០នាក់ នៅតំបន់សាហ៊ែល សម្រាប់ ប្រតិបត្តិការបារកាន និងមួយចំនួន សម្រាប់ប្រតិបត្តិការក្រុមមួកខៀវរបស់អង្គការសហប្រជាជាតិ។ ក្នុងចំណោមទាហានបារាំង ៤៣០០នាក់ ដែលធ្វើការសម្រាប់ប្រតិបត្តិការបារកាន នៅតំបន់សាហ៊ែលអាហ្វ្រិក មាន២៥០០នាក់ កំពុងធ្វើប្រតិបត្តិការនៅប្រទេសម៉ាលី។
តាមបញ្ជាការដ្ឋានទ័ពបារាំង នៅពេលបារាំង ដកទ័ពចេញពីម៉ាលី ចប់សព្វគ្រប់ ចំនួនទ័ពរបស់បារាំង សម្រាប់ប្រតិបត្តិការបារកាន ដែលបានបារាំងបានរួមសហការជាមួយប្រទេសអាហ្វ្រិក៥ នៅតំបន់សាហ៊ែលនឹងធ្លាក់ថយចុះ មកនៅត្រឹម ប្រមាណ ៣ពាន់នាក់។
ជារួម ទោះបារាំង និងប្រទេសដៃគូអឺរ៉ុបដកទ័ពចេញពីម៉ាលី ប៉ុន្តែ ប្រតិបត្តិការបារកាន និងTokuba របស់ទ័ពអឺរ៉ុប សម្រាប់ប្រយុទ្ធប្រឆាំង នឹងក្រុមភេរវនិយមនៅទឹកដីអាហ្វ្រិក នៅតែបន្តទៅមុខ។ គេលែងធ្វើប្រតិបត្តិការទ័ពក្នុងទឹកដីម៉ាលី ដូចមុន ប៉ុន្តែ ប្រតិបត្តិការបារកាន របស់បារាំង និងអឺរ៉ុបនឹងនៅបន្តមាននៅប្រទេសអាហ្វ្រិក៤ផ្សេងទៀតនៅតំបន់សាហ៊ែលអាហ្រ្វិក ដែលធ្លាប់បានសហការជាមួយបារាំង រហូតមក ដើម្បីប្រយុទ្ធប្រឆាំងនឹងក្រុមភេរវនិយម ក្រុមអាល់កៃដា នៅទឹកដីអាហ្វ្រិក ដែលមានដូចជានីហ្សេ ម៉ូរីតានី ឆាដ និងបៀរគីណាហ្វាសូជាដើម។
ដោយសារដកទ័ពចេញពីម៉ាលី ប្រតិបត្តិការបារកានរបស់បារាំង និងអឺរ៉ុប សម្រាប់ប្រយុទ្ធប្រឆាំងក្រុមភេរវនិយមនៅអាហ្វ្រិក អាចផ្លាស់ប្តូរទម្រង់ថ្មី ដោយនឹងអាចទៅប្រមូលផ្តុំកម្លាំងនៅប្រទេសជិតខាងម៉ាលី ដូចជានៅនីហ្សេជាដើម ពោលគឺដើម្បីបន្ទុចបង្អាក់កុំឲ្យក្រុមជីហាតអ៊ីស្លាមជ្រុលនិយម និងក្រុមអាល់កៃដា ពង្រីកដែនឥទ្ធិពលរបស់ខ្លួន ទៅក្នុងតំបន់អាហ្វ្រិកាខាងលិច។
ម្យ៉ាង ដោយកាត់បន្ថយវត្តមានទ័ពជើងគោក នៅទឹកដីអាហ្វ្រិក បារាំងអាចពិចារណាប្រើមធ្យោបាយវាយប្រហារពីលើអាកាសដូចជាយន្តហោះដ្រូន ដែលអាមេរិក កំពុងប្រើក្នុងទឹកដីស៊ីរី ឬយេម៉ែន ដើម្បីប្រយុទ្ធប្រឆាំងនឹងក្រុមអាល់កៃដា ឬក្រុមជីហាតភេរវនិយម។
គ្មានទាហានបារាំង និងទាហានអឺរ៉ុប នៅចាំជួយ តើរបបសឹកម៉ាលី មានសមត្ថភាពដើម្បីទប់ទល់នឹងក្រុមភេរវនិយម?
បារាំងដកទ័ពចេញពីម៉ាលី ធ្វើឲ្យគេនឹកឃើញទៅដល់អាមេរិកដែលដកកងទ័ពដោយប្រថុចញ៉ុចបំផុត ពីអាហ្វហ្កានីស្ថាន កាលពីពាក់កណ្តាលឆ្នាំមុន។
នៅប៉ុន្មានខែក្រោយអាមេរិកដកទ័ពចេញពីអាហ្វហ្កានីស្ថាន នៅក្រោយសង្រ្គាម ២០ឆ្នាំប្រយុទ្ធប្រឆាំងពួកតាលីបង់ ដែលអាមេរិកចោទថាគាំទ្រក្រុមអាល់កៃដា បារាំងដកទ័ពចេញពីម៉ាលី ជាទីដែលបារាំងបានបើកប្រតិបត្តិការប្រយុទ្ធប្រឆាំងនឹងក្រុមភេរវនិយម នៅតំបន់សាហ៊ែល ៩ឆ្នាំមកនេះ។ ចង់ឬមិនចង់ រឿងនេះបានសបញ្ជាក់សាជាថ្មី ថា ប្រទេសលោកខាងលិច បរាជ័យ ក្នុងប្រតិបត្តិការយោធារបស់ខ្លួន នៅទឹកដីបរទេស។
ការដកទ័ពរបស់អាមេរិក ចេញពីអាហ្វហ្កានីស្ថាន និងការដកទ័ពរបស់បារាំង ចេញពីម៉ាលី ក៏អាចជាសញ្ញាលើកទឹកចិត្តផងដែរ ក្រុមជីហាតជ្រុលនិយម ក្រុមភេរវនិយម ឲ្យនៅតែមានការអត់ធ្មត់ ដើម្បីវាយឆ្មក់ចូលវាតទីទឹកដី នៅតាមតំបន់ដែលពួកគេចង់បាន ព្រោះថា នៅទីបំផុតកងកម្លាំងបរទេស មិនអាចឈរជើងនៅយូរជារៀងរហូត ដើម្បីប្រយុទ្ធប្រឆាំងក្រុមភេរវនិយមនោះទេ។ នៅម៉ាលី ប្រតិបត្តិការបារកានរបស់បារាំងបានសម្លាប់មេដឹកនាំចលនាភេរវនិយមសំខាន់ៗជាច្រើនរូប និងបានវាយបណ្តេញ បោសសម្អាតក្រុមភេរវនិយមចេញពីតំបន់ជាច្រើន ប៉ុន្តែ ជាទូទៅ រដ្ឋាភិបាលម៉ាលី ក៏ដូចជាកងទ័ពម៉ាលី គ្មានសមត្ថភាពទៅគ្រប់គ្រងធានាសន្តិសុខ ឲ្យតំបន់ ដែលកងទ័ពបារាំង បោសសម្អាតអស់ពីក្រុមភេរវនិយមនោះទេ។
ដោយសារតែគ្មានសមត្ថភាព មធ្យោបាយគ្រប់គ្រាន់ដើម្បីគ្រប់គ្រងទឹកដីម៉ាលី គេបារម្ភថា ម៉ាលីនឹងធ្លាក់ក្នុងអសន្តិសុខ សាជាថ្មី ដោយសារការវាយប្រហាររបស់ពួកជីហាត បណ្តាញអាល់កៃដានៅអាហ្វ្រិក នៅក្រោយ បារាំងដកកងទ័ពចេញពីម៉ាលី។ របបសឹកម៉ាលី សព្វថ្ងៃបានរត់ទៅពឹងក្រុមទាហានស៊ីឈ្នួលរុស្ស៊ី ពិតមែន ប៉ុន្តែ ក្រុមនេះ មានទិសដៅតែមួយគត់ គឺការងារប្រយោជន៍សេដ្ឋកិច្ចរបស់ក្រុមហ៊ុនរុស្ស៊ីនៅម៉ាលីតែប៉ុណ្ណោះ។
ក្រុមទាហានស៊ីឈ្នួលរុស្ស៊ីនឹងមិនទៅចំណាយកម្លាំងដើម្បីប្រយុទ្ធប្រឆាំងនឹងក្រុមភេរវនិយម ដែលវាយប្រហារគំរាមកំហែងសន្តិសុខរបស់ប្រជាជនម៉ាលីនោះទេ។ ដូចប្រធានាធិបតីបារាំងបានលើកឡើងនៅថ្ងៃនេះអីចឹង។ របបសឹកម៉ាលីបានរត់ទៅពឹងជំនួយ ទាហានស៊ីឈ្នួលរុស្ស៊ី គឺគ្រាន់តែដើម្បីការពារ ក្រាញអំណាចរបស់ខ្លួន នៅម៉ាលី ពោលគឺមិនបានគិតដល់សុខសុវត្ថិភាព សន្តិសុខរបស់ប្រជាជនម៉ាលីជាទូទៅនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ