បារាំងបញ្ជាក់ពីការគាំទ្រ និងផ្តល់កិច្ចការពារឲ្យស្រ្តីអ្នកកាសែតរុស្ស៊ីដែលប្រឆាំងសង្រ្គាមនៅអ៊ុយក្រែន
ប្រធានាធិបតីបារាំងលោកអេម៉ានុយអែល ម៉ាក្រុងបានថ្លែងក្នុងថ្ងៃអង្គារ ទី១៥ មីនាថា បារាំងបានត្រៀមខ្លួនរួចជាស្រេចក្នុងការគាំទ្រ និងផ្តល់កិច្ចការពារឲ្យស្រ្តីអ្នកកាសែតរុស្ស៊ីម្នាក់ដែលប្រឆាំងសង្រ្គាមនៅអ៊ុយក្រែនឈ្មោះ Marina Ovsiannikova។ លោកម៉ាក្រុងបានថ្លែងដូចនេះនៅចំពោះមុខក្រុមអ្នកកាសែតនាឱកាសដែលលោកអញ្ជើញទៅមើលកន្លែងទទួលជនភៀសខ្លួនអ៊ុយក្រែនមួយកន្លែង។ គួររម្លឹកថានៅយប់ថ្ងៃចន្ទ ទី១៤ មីនា ស្រ្តីអ្នកកាសែតរុស្ស៊ី Marina Ovsiannikova បានសម្រុកចូលទៅក្នុងស្ទូឌីយោរបស់ទូរទស្សន៍រុស្ស៊ីមួយ។ នៅពីក្រោយខ្នងពិធីការនីទូរទស្សន៍ម្នាក់ដែលកំពុងនិយាយព័ត៌មាន នាង Marina បានលើកបដាសរសេរពាក្យ « NOWAR »។ ក្រៅពីបញ្ជាក់ពីការគាំទ្រ និងផ្តល់កិច្ចការពារដល់នាង Marina ប្រមុខរដ្ឋបារាំងលោកម៉ាក្រុងបានថ្លែងពីការគាំទ្ររបស់បារាំងដោយគ្មានលក្ខខណ្ឌចំពោះអ្នកកាសែតទាំងអស់ រួមទាំងអ្នកកាសែតដែលចុះទៅយកព័ត៌មានរឿងសង្រ្គាមនៅអ៊ុយក្រែន និងអ្នកកាសែតដែលផ្តល់ព័ត៌មាននៅរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៤១
« ប្រទេសបារាំងគាំទ្រអ្នកកាសែតទាំងអស់ដោយគ្មានលក្ខខណ្ឌ។ អ្នកកាសែតដែលបានចុះទៅយកព័ត៌មានស្តីពីសង្រ្គាមនៅក្នុងប្រទេសអ៊ុយក្រែន និងអ្នកកាសែតដែលបានធ្វើការផ្តល់ព័ត៌មាននៅក្នុងប្រទេសរុស្ស៊ី រួមទាំងអ្នកកាសែតនៅក្នុងបណ្តាប្រទេសផ្សេងទៀតដែលស្ថិតក្រោមគំនាបនយោបាយដោយបានរារាំងពួកគេមិនឲ្យបំពេញការងារជាអ្នកកាសែត។
ខ្ញុំចង់និយាយនៅទីនេះពីសាមគ្គីភាពរបស់យើងដូចដែលខ្ញុំបាននិយាយកាលពីថ្ងៃអាទិត្យកន្លងទៅចំពោះការស្លាប់មិត្តរួមអាជីពរបស់អស់លោកនាការវាយប្រហារក្នុងថ្ងៃអាទិត្យ និងការស្លាប់របស់អ្នកកាសែតអ៊ុយក្រែន។ ដូច្នេះ បារាំងថ្កោលទោសខ្លាំងក្លាលើការចាប់រូបស្រ្តីអ្នកកាសែតរុស្ស៊ីក៏ដូចជាការបំពារបំពានគ្រប់យ៉ាងទាំងអស់លើរូបគាត់។
ប្រាកដណាស់ យើងនឹងផ្តើមនីតិវិធីផ្លូវទូតក្នុងការផ្តល់កិច្ចការពារដល់ស្រ្តីអ្នកកាសែតរុស្ស៊ីដោយទទួលរូបគាត់ឲ្យជ្រកកោននៅក្នុងស្ថានទូតបារាំង ឬមួយក៏ផ្តល់ឲ្យគាត់នូវសិទ្ធិជ្រកកោន។ នៅក្នុងឱកាសនៃកិច្ចសន្ទនារវាងខ្ញុំជាមួយប្រធានាធិបតីពូទីននាពេលខាងមុខ ខ្ញុំនឹងស្នើដំណោះស្រាយមួយនេះទៅលោកពូទីនដោយផ្ទាល់ និងត្រង់ៗដូចដែលខ្ញុំធ្លាប់ធ្វើរាល់ដង។
ទោះក្នុងករណីណាក៏ដោយខ្ញុំសង្ឃឹមថានាពេលឆាប់ៗ យើងអាចទទួលបានព័ត៌មានទាំងអស់ស្តីពីស្ថានភាពផ្ទាល់ខ្លួនរបស់គាត់ និងសមត្ថភាពរបស់គាត់ក្នុងការបន្តការងារ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ