សង្រ្គាមអ៊ុយក្រែន៖ប្រមុខរដ្ឋាភិបាលអឺរ៉ុបចំនួន ៣ប្រទេសបំពេញទស្សនកិច្ចក្នុងទីក្រុងកៀវ
ខណៈដែលសង្រ្គាមនៅអ៊ុយក្រែនកំពុងបន្តមានយ៉ាងខ្លាំងក្លា ប្រមុខរដ្ឋាភិបាលអឺរ៉ុបមកពី ៣ប្រទេស គឺប៉ូឡូញ សាធារណរដ្ឋឆែក និងស្លូវេនីទៅបំពេញទស្សនកិច្ចនៅក្នុងទីក្រុងកៀវនាថ្ងៃអង្គារ ទី១៥ មីនា។ កម្មវត្ថុនៃទស្សនកិច្ច គឺដើម្បីបង្ហាញការគាំទ្ររបស់អឺរ៉ុបដល់ប្រទេស និងប្រជាជនអ៊ុយក្រែននៅចំពោះមុខការឈ្លានពានរបស់រុស្ស៊ី។ តាំងពីរុស្ស៊ីបើកការវាយប្រហារលើអ៊ុយក្រែនក្នុងថ្ងៃទី២៤ កុម្ភៈមក នេះជាលើកទី១ ដែលមានក្រុមមេដឹកនាំបរទេសធ្វើដំណើរទៅកាន់ទីក្រុងកៀវ។
ចុះផ្សាយនៅថ្ងៃ៖
ប្រមុខរដ្ឋាភិបាលនៃប្រទេសប៉ូឡូញ ឆែក និងស្លូវេនីបានធ្វើដំណើរទៅកាន់ទីក្រុងកៀវដោយជិះរថភ្លើងចេញពីប្រទេសប៉ូឡូញ។ នាយកខុទ្ទកាល័យនៃនាយករដ្ឋមន្រ្តីប៉ូឡូញបានបញ្ជាក់ថា រថភ្លើងដែលដឹកប្រមុខរដ្ឋាភិបាលអឺរ៉ុបទាំង ៣រូបរួមទាំងក្រុមគណៈប្រតិភូបានបរឆ្លងកាត់ព្រំដែនប៉ូឡូញ និងអ៊ុយក្រែននៅវេលាម៉ោង ៨ព្រឹកម៉ោងក្នុងប្រទេសប៉ូឡូញ។ នាយកខុទ្ទកាល័យនៃនាយករដ្ឋមន្រ្តីប៉ូឡូញបានឲ្យដឹងបន្ថែមថា ដំណើរទៅកាន់ទីក្រុងកៀវរបស់ប្រមុខរដ្ឋាភិបាលប៉ូឡូញ សាធារណរដ្ឋឆែក និងស្លូវេនីបានធ្វើឡើងតាមការសម្រេចចិត្តរួមគ្នានាឱកាសជំនួបកំពូលអឺរ៉ុបរយៈពេល ២ថ្ងៃក្នុងប្រទេសបារាំងកាលពីសប្តាហ៍កន្លងទៅ។
« នៅក្នុងកាលៈទេសៈដ៏សំខាន់សម្រាប់ពិភពលោក វាជាកាតព្វកិច្ចរបស់យើងដែលត្រូវរួមសាមគ្គីគ្នា។ មិនមែនសម្រាប់តែយើងប៉ុណ្ណោះទេ តែក៏សម្រាប់អនាគតរបស់កូនៗយើងដែលសក្តិសមនឹងរស់នៅក្នុងពិភពលោកមួយដែលគ្មានអំណាចផ្តាច់ការ និងការជិះជាន់ » នេះសំណេររបស់នាយករដ្ឋមន្រ្តីប៉ូឡូញលោក Mateusz Morawiecki នៅក្នុងទំព័រហ្វេសប៊ុក។ ទន្ទឹមគ្នានេះ លោក Mateusz Morawiecki បានចាត់ទុកការវាយប្រហាររបស់រុស្ស៊ីលើអ៊ុយក្រែនជាទង្វើឈ្លានពានឧក្រិដ្ឋកម្មប្រឆាំងអ៊ុយក្រែន។ « ទស្សនកិច្ចរបស់ប្រមុខរដ្ឋាភិបាលអឺរ៉ុបទាំង ៣រូបមានគោលដៅបញ្ជាក់ពីការគាំទ្រពេញលេញរបស់សហភាពអឺរ៉ុបចំពោះអធិបតេយ្យភាព និងឯករាជ្យភាពរបស់អ៊ុយក្រែន » នេះជាការថ្លែងរបស់នាយករដ្ឋមន្រ្តីឆែកលោក Petr Fiala។
ដំណើរទៅកាន់ទីក្រុងកៀវរបស់ប្រមុខរដ្ឋាភិបាលនៃប្រទេសប៉ូឡូញ ឆែក និងស្លូវេនីធ្វើឡើង ខណៈដែលទីក្រុងរដ្ឋបាលអ៊ុយក្រែនមួយនេះកំពុងរងការវាយប្រហារដោយគ្រាប់មីស៊ីល និងការទម្លាក់គ្រាប់បែករុស្ស៊ី។ គួរបញ្ជាក់ថា តាំងពីរុស្ស៊ីបើកការវាយប្រហារលើអ៊ុយក្រែនក្នុងថ្ងៃទី២៤ កុម្ភៈ នេះជាលើកទី១ ដែលមានក្រុមមេដឹកនាំបរទេសធ្វើដំណើរទៅកាន់ទីក្រុងកៀវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ