ស្រីលង្កា៖តើប្រទេសអាស៊ីខាងត្បូងមួយនេះកំពុងផ្តើមភ្លក់រសជាតិបដិវត្តន៍អារ៉ាប់ឬ?
ចុះផ្សាយនៅថ្ងៃ៖
ស្តាប់ - ០៧:០២
នៅក្នុងប្រទេសស្រីលង្កា ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាបានប្រកាសដាក់ប្រទេសក្នុងស្ថានភាពអាសន្ននាយប់ថ្ងៃសុក្រ ទី១ មេសា។ ទន្ទឹមគ្នានេះ លោករ៉ាយ៉ាប៉ាក់សាក៏បានដាក់ពង្រាយកងទ័ពបន្ថែមនៅតាមទីក្រុងធំៗដើម្បីទប់នឹងកំណើនបាតុកម្មរបស់ប្រជាជន។ គួរបញ្ជាក់ថា ប្រជាជនស្រីលង្កាជាច្រើនរយ ពាន់នាក់បាននាំគ្នាធ្វើបាតុកម្មប្រឆាំងនឹងទំនិញឡើងថ្លៃ ពិសេសការខ្វះប្រេងសាំង ថ្នាំពេទ្យ និងអាហារបរិភោគ។ តែរដ្ឋាភិបាលបានលើកឡើងថា បាតុកម្មពេលនេះបានដឹកនាំដោយក្រុមអ្នកជ្រុលនិយមដែលបានអំពាវនាវឲ្យមានបដិវត្តន៍អារ៉ាប់ក្នុងគោលដៅរំលំរដ្ឋាភិបាលសព្វថ្ងៃ។
សម្រាប់ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សា ការប្រកាសដាក់ប្រទេសក្នុងស្ថានភាពអាសន្ន និងការដាក់ពង្រាយកងទ័ពបន្ថែមជារឿងចាំបាច់ និងជាកាតព្វកិច្ចមួយក្នុងការរក្សាសណ្តាប់ធ្នាប់សាធារណៈ រួមទាំងរក្សាការផ្គត់ផ្គង់ និងសេវាសំខាន់ៗសម្រាប់ជីវភាពរស់នៅប្រចាំថ្ងៃរបស់ប្រជាជន។ គួរបញ្ជាក់ថារហូតមកដល់ពេលនេះ ពោលមុននឹងប្រកាសដាក់ប្រទេសក្នុងស្ថានភាពអាសន្ន លោករ៉ាយ៉ាប៉ាក់សាក៏បានប្រើកងទ័ពឲ្យជួយការពារទីតាំងសំខាន់ៗមួយចំនួន ដូចជាស្ថានីយ៍ប្រេងឥន្ធនៈ។ មួយវិញទៀត កងទ័ពមានតួនាទីត្រឹមជួយគាំទ្រកម្លាំងប៉ូលិស ពោលមិនអាចធ្វើសកម្មភាពតែឯងបានទេ។ តែនៅថ្ងៃសៅរ៍ ទី២ មេសា លោករ៉ាយ៉ាប៉ាក់សាបានដាក់ពង្រាយទាហានកាន់តែច្រើន និងបានប្រគល់អំណាចកាន់តែធំឲ្យទាហានក្នុងការធ្វើសកម្មភាពទប់ទល់នឹងក្រុមបាតុករ។
តាមលោករ៉ាយ៉ាប៉ាក់សា ទាហានមានសិទ្ធិចាប់ខ្លួន និងដាក់គុកជនសង្ស័យទាំងអស់ដោយមិនរើសមុខ។ ការប្រគល់អំណាចទូលំទូលាយឲ្យកងទ័ពពេលនេះមិនមែនជារឿងចៃដន្យបានធ្វើឡើង ក្នុងពេលដែលស្ថានការណ៍ហាក់កំពុងបន្តពុះកញ្ជ្រោលកាន់តែខ្លាំង។ ទោះបីជាប្រទេសស្ថិតក្រោមស្ថានភាពអាសន្នភាព និងមានការដាក់ពង្រាយទាហានកាន់តែច្រើនក៏ប្រជាជនបន្តចុះផ្លូវធ្វើបាតុកម្មនៅថ្ងៃសៅរ៍ ទី២ មេសា និងបន្តធ្វើនៅថ្ងៃអាទិត្យ ទី៣ មេសា។ « វាល្មមដល់ពេលដែលរ៉ាយ៉ាប៉ាក់សាចុះចេញពីតំណែង » នេះជាឃ្លាដែលមានសរសេរនៅលើបដារបស់បាតកុរម្នាក់។ « មានអំពើពុករលួយគ្រប់គ្រាន់ ត្រឡប់ទៅផ្ទះឯងវិញទៅ ហ្គោតាបាយ៉ា » នេះជាសម្រែករបស់បាតុករម្នាក់ទៀត។
គួររម្លឹកថាក្នុងយប់ថ្ងៃព្រហស្បតិ៍ ទី៣១ មីនា មានបាតុករជាច្រើនរយនាក់បានព្យាយាមសម្រុកចូលផ្ទះរបស់ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សា។
រូបភាពនៃការផ្ទុះកំហឹងនៅស្រីលង្កាជាបដិវត្តន៍អារ៉ាប់?
រដ្ឋមន្រ្តីក្រសួងដឹកជញ្ជូនបានបញ្ជាក់ថា ក្រុមភេរវជនស្ថិតនៅពីក្រោយក្រុមបាតុករ។ ចំណែកការិយាល័យប្រធានាធិបតីបានបញ្ជាក់នៅក្នុងសេចក្តីប្រកាសព័ត៌មានថា បាតុកម្មកាលពីយប់ថ្ងៃព្រហស្បតិ៍ ទី៣១ មីនាបានរៀបចំដោយក្រុមជ្រុលនិយមដែលអំពាវនាវឲ្យមានបដិវត្តអារ៉ាប់។ តើគេអាចនិយាយបានទេថា អ្វីដែលកំពុងផ្ទុះនៅស្រីលង្កាពេលនេះជារូបភាពនៃបដិវត្តអារ៉ាប់?។ ពិតជាអាចនិយាយបាន ព្រោះដើមចមនៃការផ្ទុះបដិវត្តអារ៉ាប់នៅក្នុងប្រទេសទុយនីស៊ីកាលពីជាង ១០ឆ្នាំមុន គឺកើតចេញពីកំហឹងរបស់ប្រជាជនប្រឆាំងនឹងទំនិញឡើងថ្លៃ និងអំពើពុករលួយរបស់ថ្នាក់ដឹកនាំ។
ស្រីលង្កាដែលមានប្រជាជនរស់នៅចំនួន ២២លាននាក់កំពុងស្គាល់នូវវិបត្តិសេដ្ឋកិច្ចធ្ងន់ធ្ងន់ ពិសេសខ្វះស្បៀងអាហារចាំបាច់ ថ្នាំពេទ្យ និងខ្វះភ្លើងអគ្គិសនីប្រើប្រាស់។ តម្លៃទំនិញគ្រប់សព្វសារពើឡើងថ្លៃខ្ពស់ ហើយអត្រាអតិផរណាកំពុងហក់ឡើងខ្លាំងក្នុងរយៈពេលប៉ុន្មានខែជាប់គ្នា ពិសេសឡើងជាង ១៨% ក្នុងខែមីនាកន្លងទៅនៅក្នុងទីក្រុងកូឡុំបូ។ គួរបញ្ជាក់ថា វិស័យទេសចរណ៍ និងការផ្ញើលុយទៅឲ្យបងប្អូនពីបរទេសជាប្រភពចំណូលសំខាន់សម្រាប់សេដ្ឋកិច្ចស្រីលង្កា។ តែប្រភពចំណូលទាំងនេះបានធ្លាក់ចុះយ៉ាងគំហុកក្នុងសម័យវិបត្តិកូវីដ១៩។
មួយវិញទៀតក្នុងឆ្នាំ ២០២០ រដ្ឋាភិបាលបានដាក់ការហាមនាំចូលពីបរទេសក្នុងគោលដៅសន្សំរូបិយបណ្ណបរទេសសម្រាប់ទុកសងទៅម្ចាស់បំណុលបរទេស ពិសេសចិន និងឥណ្ឌា។ គេអាចនិយាយបានថា ប្រទេសអាស៊ីខាងត្បូងមួយនេះកំពុងឆ្លងកាត់នូវវិបត្តិសេដ្ឋកិច្ចធ្ងន់ធ្ងរមួយដែលមិនធ្លាប់មានគិតតាំងពីទទួលបានឯករាជ្យក្នុងឆ្នាំ ១៩៤៨។
បំណុលលើបំណុល
តាមក្រុមសេដ្ឋវិទូ វិបត្តិសេដ្ឋកិច្ចដែលស្រីលង្កាកំពុងជួបប្រទះពេលនេះជារឿងដែលគេបានរង់ចាំ ឬជារឿងដែលមិនអាចគេផុត។ ពិតណាស់ គេអាចទម្លាក់កំហុសមួយចំណែកលើវិបត្តិកូវីដ១៩ ដែលបានធ្វើឲ្យស្រីលង្កាបាត់ចំណូលជាមូលដ្ឋានពីអ្នកទេសចរណ៍បរទេស និងបាត់ចំណូលពីពលរដ្ឋស្រីលង្ការស់នៅបរទេសដែលតែងផ្ញើលុយទៅឲ្យបងប្អូន ក្រុមគ្រួសារ។ តែក្នុងពេលជាមួយគ្នា ក្រុមសេដ្ឋវិទូបានសម្លឹងឃើញពីការគ្រប់គ្រងសេដ្ឋកិច្ចមិនល្អរបស់រដ្ឋាភិបាល គំនរប្រាក់បំណុលបរទេសកាន់តែច្រើនឡើងៗ និងការកាត់បន្ថយពន្ធមិនចំគោលដៅ។
ក្នុងមួយឆ្នាំៗ ស្រីលង្កាត្រូវសងបំណុលបរទេសប្រមាណ ៧ពាន់លានដុល្លារ។ បច្ចុប្បន្ន ស្រីលង្កាជាប់ប្រាក់បំណុលសរុប៥១ពាន់លានដុល្លារដែលមួយភាគធំខ្ចីពីចិន។ អ្វីដែលក្រុមអ្នកជំនាញបារម្ភខ្លាំង គឺការដែលស្រីលង្កាលែងមានលទ្ធភាពសងបំណុលគេ។ តែនៅចំពោះមុខពេលនេះ រដ្ឋាភិបាលបានថ្លែងពីការព្យាយាមរកជំនួយពីមូលនិធិរូបិយវត្ថុអន្តរជាតិ និងចង់ខ្ចីលុយបន្ថែមពីចិន និងពីឥណ្ឌា។ បើតាមមើលទៅ រដ្ឋាភិបាលហាក់គ្មានជម្រើសអ្វីផ្សេងក្រៅពីរកខ្ចីលុយថែមដើម្បីសងបំណុលគេ។ រូបភាពនេះជាការបន្ថែមបំណុលលើបំណុល។ តើមានថ្ងៃដែលស្រីលង្កាអាចងើបផុតពីវិបត្តិសេដ្ឋកិច្ចពេលនេះដែរ ឬទេ?។
ប្រហែលជាពិបាកបន្តិច ហើយប្រធានាធិបតី រួមទាំងរដ្ឋាភិបាលក៏បានដឹងច្បាស់ណាស់លើបញ្ហានេះ។ ដូច្នេះពេលនេះ បាតុកម្មអាចនឹងមាន និងបន្តមានកាន់តែខ្លាំងដោយគេមិនដឹងថា វានឹងត្រូវចប់តាមរបៀបណាទេ។ អ្វីដែលគេអាចនិយាយបាន អំណាចរបស់ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាកំពុងប្រឈមនឹងហានិភ័យ ពិសេសត្រកូលរ៉ាយ៉ាប៉ាក់សាតែម្តង ព្រោះបងប្រុសរបស់ប្រធានាធិបតីកាន់តំណែងនាយករដ្ឋមន្ត្រី ប្អូនប្រុសកាន់តំណែងរដ្ឋមន្ត្រីហិរញ្ញវត្ថុ បងប្រុសច្បងកាន់តំណែងរដ្ឋមន្ត្រីកសិកម្ម និងក្មួយប្រុសម្នាក់ទទួលបន្ទុកផ្នែកកីឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ