តើលោកពូទីននឹងអាចប្រើអាវុធនុយក្លេអ៊ែរតាក់ទិក នៅក្នុងសង្រ្គាមអ៊ុយក្រែនដែរឬទេ?
ចុះផ្សាយនៅថ្ងៃ៖
ស្តាប់ - ០៦:៤៨
ខណៈដែលសង្រ្គាមអ៊ុយក្រែនបានឈានចូលដល់ ៥២ថ្ងៃនាថ្ងៃសៅរ៍នេះ ព័ត៌មានស្តីពីការប្រើអាវុធនុយក្លេអ៊ែរ របស់រុស្ស៊ី កំពុងធ្វើឲ្យគ្រប់គ្នាបារម្ភ។ នៅក្នុងបទសម្ភាសន៍ជាមួយទូរទស្សន៍អាមេរិកាំង CNN កាលពីថ្ងៃសុក្រ ប្រធានាធិបតីអ៊ុយក្រែនលោកហ្សេឡេនស្គីបានបញ្ជាក់ការលើកឡើងរបស់ប្រធានទីភ្នាក់ងារស៊ើបការណ៍អាមេរិកដែលថា ប្រឈមនឹងបរាជ័យរបស់រុស្ស៊ីនៅក្នុងសង្រ្គាមអ៊ុយក្រែន លោកពូទីននឹងអាចសម្រេចចិត្តប្រើអាវុធនុយក្លេអ៊ែរ។ តើលោកពូទីនអាចនឹងហ៊ានប្រើអាវុធនុយក្លេរអ៊ែរដែរឬទេ និងថា តើរុស្ស៊ីនឹងទទួលផលវិបាកអ្វីខ្លះ បើពូទីនសម្រេចប្រើអាវុធនុយក្លេអ៊ែរនៅក្នុងសង្រ្គាមអ៊ុយក្រែន?
រុស្ស៊ីបានធ្វើដូចសំដីព្រមានរបស់ខ្លួនដែលថា នឹងបង្កើនការវាយប្រហារទៅលើអ៊ុយក្រែន នៅក្រោយរុស្ស៊ី បាត់បង់នាវាចម្បាំងដ៏សំខាន់របស់ខ្លួន នៅសមុទ្រខ្មៅ។ នៅថ្ងៃសៅរ៍ទី ១៦ មេសា កងទ័ពរុស្ស៊ីបានបាញ់បំផ្លាញ រោងចក្រយោធាថ្មីមួយទៀតរបស់អ៊ុយក្រែន នៅក្បែររដ្ឋធានីកៀវ។ កាលពីថ្ងៃសុក្រ ក្រសួងការពាររុស្ស៊ីបានអះអាងថា គេបានបាញ់បំផ្លាញ រោងចក្រផលិតមីស៊ីលប្រឆាំងនាវាចម្បាំង ឈ្មោះ Neptune។ មីស៊ីលNeptune ដែលកងទ័ពអ៊ុយក្រែនអះអាងថា គេបានប្រើសម្រាប់បាញ់បំផ្លាញ នាវាចម្បាំងMoskva របស់រុស្ស៊ី ដែលបានលិចចូលទៅក្នុងទឹក កាលពីថ្ងៃព្រហស្បតិ៍។
នៅក្នុងបទសម្ភាសន៍ជាមួយទូរទស្សន៍អាមេរិក CNN ដែលគេដកស្រង់ មកចុះផ្សាយនៅថ្ងៃសៅរ៍ទី១៦ មេសា ប្រធានាធិបតី អ៊ុយក្រែន លោកហ្សេឡេនស្គី បាននិយាយបន្ទរការព្រមានរបស់ប្រធានទីភ្នាក់ងារស៊ើបការណ៍សម្ងាត់អាមេរិកដែលថា ប្រឈមនឹងការខាតបង់ផ្នែកយោធានៅក្នុងសង្រ្គាមអ៊ុយក្រែន ប្រធានាធិបតីរុស្ស៊ីនឹងអាចយកជម្រើសប្រើអាវុធនុយក្លេអ៊ែរ នៅក្នុងសង្រ្គាមអ៊ុយក្រែន។
ក្តីបារម្ភដែលថា រុស្ស៊ីនឹងអាចប្រើអាវុធនុយក្លេអ៊ែរ មានកាន់តែខ្លាំងឡើង។ នៅសប្តាហ៍នេះ រុស្ស៊ីបានព្រមានអាមេរិករួចហើយ ពីផលវិបាកធ្ងន់ធ្ងរ បន្ទាប់ពីអាមេរិកបង្កើនការផ្តល់អាវុធធុនធ្ងន់ទៅឲ្យកងទ័ពអ៊ុយក្រែន។
នៅប៉ុន្មានថ្ងៃក្រោយ បញ្ជូនកងទ័ពឲ្យចូលឈ្លានពានអ៊ុយក្រែន លោកប្រធានាធិបតីរុស្ស៊ី ផ្ទាល់ ធ្លាប់បានបញ្ជាឲ្យកងទ័ពរុស្ស៊ី ប្រុងជើងការអាវុធនុយក្លេអ៊ែរ ក្នុងហេតុថា ប្រទេសលោកខាងលិច កំពុងចាត់វិធានការខ្លាំងប្រឆាំងនឹងរុស្ស៊ី ដែលបើកប្រតិបត្តិការសឹក នៅអ៊ុយក្រែន។
គេវាយតម្លៃថា ការប្រកាសរបស់លោកពូទីន កាលពីជាង ១ខែមុន គឺអាចជាយុទ្ធសាស្រ្តគំរាមតែប៉ុណ្ណោះ ពោលគឺ ដើម្បីកុំឲ្យប្រទេសលោកខាងលិច លូកដៃ អន្តរាគម ជួយអ៊ុយក្រែន ព្រោះថា បើជួយអ៊ុយក្រែន គឺមានន័យស្មើប្រកាសសង្រ្គាមជាមួយរុស្ស៊ី និងអាចផ្ទុះសង្រ្គាមនុយក្លេអ៊ែរ។
ប៉ុន្តែ ដោយសារសង្រ្គាមអ៊ុយក្រែន ចេះតែអូសបន្លាយ ដោយកងទ័ពរុស្ស៊ីមិន អាចវាយបំបាក់អ៊ុយក្រែន ផ្ទុយទៅវិញ គឺ កំពុងប្រឈម នឹងការខាតបង់យោធាធ្ងន់ធ្ងរ ជាពិសេសនៅក្រោយ នាវាចម្បាំងMoskvaរបស់រុស្ស៊ី ត្រូវលិចលង់កាលពីថ្ងៃព្រហស្បតិ៍ ដោយសារការវាយប្រហាររបស់គ្រាប់មីស៊ីលអ៊ុយក្រែន យ៉ាងដូច្នេះ លទ្ធភាពដែលរុស្ស៊ី អាចយកជម្រើស ប្រើអាវុធនុយក្លេអ៊ែរនៅក្នុងសង្រ្គាមអ៊ុយក្រែន គឺមានកាន់តែច្រើន។ តាមអ្នកជំនាញខាងស៊ើបការណ៍សម្ងាត់ រុស្ស៊ីបានបោះបង់ចោលមនោគមវិជ្ជាសូវៀត ដោយងាកមកប្រើមនោគមវិជ្ជារុស្ស៊ី នោះ គឺការប្រើអាវុធនុយក្លេអ៊ែរ សម្រាប់ជម្រើសចុងក្រោយបំផុត។
ប្រធានទីភ្នាក់ងារស៊ើបការណ៍សម្ងាត់អាមេរិក CIA លោក William Burns កំពុងបារម្ភថា ដោយសារតែចាញ់ បង់ខាតផ្នែកយោធាច្រើនពេកនៅក្នុងសង្រ្គាមអ៊ុយក្រែន លោកពូទីន និងថ្នាក់ដឹកនាំជាន់ខ្ពស់រុស្ស៊ីនឹងអាចសម្រេចចិត្តប្រើអាវុធនុយក្លេអ៊ែរតាក់ទិក នៅក្នុងសង្រ្គាមអ៊ុយក្រែន។ លោកPavel Luzin មកពីក្រុមអ្នកវិភាគឈ្មោះ Riddle ដែលមានមូលដ្ឋាន នៅទីក្រុងម៉ូស្គូនិយាយថា រុស្ស៊ីអាចប្រើអាវុធនុយក្លេអ៊ែរ តាក់ទិក នៅក្នុងសមរភូមិ ក្នុងគោលដៅ បំបាក់ស្មារតី ធ្វើឲ្យគូសត្រូវឈប់ប្រយុទ្ធ និងប្រកាសលើកទង់ជ័យស តែម្តង។
អ្វីទៅ ជាអាវុធនុយក្លេអ៊ែរតាក់ទិក?
អាវុធនុយក្លេអ៊ែរតាក់ទិកខុសពីអាវុធនុយក្លេអ៊ែរយុទ្ធសាស្រ្តត្រង់ថា វាមានទំហំតូចជាង។ ជាទូទៅ គ្រាប់បែកនុយក្លេអ៊ែរតាក់ទិកត្រូវបានគេបង្កើតឡើងសម្រាប់ប្រើក្នុងសមរភូមិប្រយុទ្ធ និងក្នុងរយៈចម្ងាយតិច ជាង ៥ពាន់គីឡូម៉ែត្រ។ ចំណែកគ្រាប់នុយក្លេអ៊ែរយុទ្ធសាស្រ្តវិញ ភាគច្រើនគឺគេផ្ទុកនៅលើមីស៊ីលអន្តរទ្វីប សម្រាប់បាញ់ចេញទៅទីកន្លែងឆ្ងាយៗ។
សព្វថ្ងៃនេះ រុស្ស៊ីបានពង្រាយមីស៊ីលដែលមានផ្ទុកក្បាលគ្រាប់នុយក្លេអ៊ែរចំនួន ១៥៨៨ មីស៊ីល ដែលនៅក្នុង ចំនួន ៨១២ដើមបាញ់ចេញពីដីម ៥៧៦ដើមបាញ់ចេញពីនាវាមុជទឹក និង២០០គ្រាប់ នៅក្នុងយន្តហោះទម្លាក់គ្រាប់បែក។
ចំណុចមួយទៀត ដែលខ្ញុំចង់បញ្ជាក់ ទោះគ្រាប់បែកនុយក្លេអ៊ែរតាក់ទិកអាចគេប្រើសម្រាប់ចម្ងាយជិត ឬ ក្នុងសមរភូមិ ប៉ុន្តែ មិនប្រាកដថា វាមានកម្លាំងបំផ្លាញតិចជាង គ្រាប់បែកនុយក្លេអ៊ែរយុទ្ធសាស្រ្តនោះទេ។ វាបង្កមហន្តរាយ សម្លាប់មនុស្សដូចតែគ្នា។
គេបានវាយតម្លៃហើយថា គ្រាប់បែកនុយក្លេអ៊ែរ ដែលប្រទេសមហាអំនាចកំពុងមានក្នុងសព្វថ្ងៃនេះ គឺមានកម្លាំងបំផ្លាញ សម្លាប់មនុស្សខ្លាំងមែនទែន គឺខ្លាំងជាង ការទម្លាក់គ្រាប់បែករបស់អាមេរិកនៅហ៊ីរ៉ូស្ហ៊ីម៉ា នៅសម័យសង្រ្កាមលោកលើកទី២ទៅទៀត។ នៅឆ្នាំ១៩៤៥ គ្រាប់បែកនុយក្លេអ៊ែររបស់អាមេរិក មានផ្ទុកជាតិផ្ទុះ តែ ១៥គីឡូតោនតែប៉ុណ្ណោះ ប៉ុន្តែ វាបានបង្កការខូចខាតដ៏ធំធេង។ ចុះទម្រាប់គ្រាប់បែកនុយក្លេអ៊ែរសព្វថ្ងៃ ដែលផ្ទុកសារធាតុផ្ទុះដល់១០០ គីឡូតោននោះ តើវានឹងបង្កមហន្តរាយសម្លាប់ជីវិតមនុស្សប៉ុណ្ណា?
នឹងមានផលវិបាកអ្វី បើសិនលោកពូទីនសម្រេចប្រើអាវុធនុយក្លេអ៊ែរនៅក្នុងសង្រ្គាមអ៊ុយក្រែន?
ប្រើអាវុធនុយក្លេអ៊ែរ តាក់ទិក អាចជាជម្រើសចុងក្រោយ របស់រុស្ស៊ី ដើម្បី វាយបំបាក់កងទ័ពអ៊ុយក្រែន និងព្រមានកុំឲ្យអាមេរិក និងអូតង់ លូកដៃចូលក្នុងសង្រ្គាម អ៊ុយក្រែន។ ប៉ុន្តែ មិនមែនមានន័យថា រុស្ស៊ី នឹងឈ្នះសង្រ្គាមទាំងស្រុងនោះទេ។ ផ្ទុយទៅវិញ វាបង្កគ្រោះមហន្តរាយ សម្លាប់ជីវិតដ៏ធ្ងន់ធ្ងរ ដែលនឹងអាចទាញទម្លាក់រុស្ស៊ីរបស់លោកពូទីន ឲ្យជួបរឿងអាក្រក់ៗច្រើនយ៉ាង។ ទី១ លោកពូទីនត្រូវអាម៉ាស់ បាត់បង់ប្រជាប្រិយ នៅចំពោះមុខប្រជាជនរុស្ស៊ី ព្រោះថា ការប្រើអាវុធនុយក្លេអ៊ែរសបញ្ជាក់ថា ផែនការយោធារបស់លោក នៅអ៊ុយក្រែន ជួបបរាជ័យ។ ទី ២ ការប្រើអាវុធប្រល័យលោក ទៅលើប្រទេសមួយដែលខ្លួនកំពុងឈ្លានពាន នឹងអាចធ្វើឲ្យរុស្ស៊ីកាន់តែឯកោ នៅឆាកអន្តរជាតិ បាត់បង់ទំនុកចិត្តពីប្រទេស ដែលនៅគាំទ្ររុស្ស៊ី ចុងក្រោយ ដូចជាចិន និងឥណ្ឌា។
អាវុធនុយក្លែអ៊ែរ ត្រូវបង្កើតសម្រាប់ទប់ទល់នឹងកុំឲ្យកើតមានសង្រ្គាមនុយក្លេអ៊ែរ។ បើសិនរុស្ស៊ីហ៊ានប្រើអាវុធនុយក្លេអ៊ែរ ដើម្បីសម្លាប់មនុស្សនៅប្រទេសដែលខ្លួនឈ្លានពាន ប៉ុន្តែ មិនមែនដើម្បីការពារខ្លួន ពីការវាយប្រហាររបស់អ្នកដទៃ នោះរុស្ស៊ីនឹងអាចទាក់ទាញ រឿងអាក្រក់ដាក់ខ្លួន។ សហគមន៍អន្តរជាតិនឹងអាចរួមសំឡេងគ្នា តែមួយ ប្រតិកម្មតបវិញ ដោយមិនបណ្តោយឲ្យរុស្ស៊ី ប្រើអាវុធនុយក្លេអ៊ែរ សម្លាប់មនុស្ស ដូចនៅហ៊ីរ៉ូស្ហ៊ីម៉ានោះទេ។ អាមេរិកមានគ្រាប់បែកនុយក្លេអ៊ែរតាក់ទិក ឈ្មោះ B16 ដែលអាចផ្ទុកសារធាតុផ្ទុះ ពី ០,៣ទៅ ១០០គីឡូតោន។ ក្បាលគ្រាប់នុយក្លេអ៊ែរប្រភេទនេះ ត្រូវអាមេរិកដាក់បន្តុបនៅលើមីស៊ីល ជាង ២០០ដើម ដែលនៅក្នុងនោះ ជាង១០០ដើម ត្រូវគេដាក់ពង្រាយនៅទឹកដីអឺរ៉ុប។ នោះហើយ ជាក្តីបារម្ភដែលថា នឹងអាចកើតមានសង្រ្គាមលោកលើកទី៣ សង្រ្គាមនុយក្លេអ៊ែរ បំផ្លាញមនុស្សជាតិ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ