មហាសន្និបាតអង្គការសហប្រជាជាតិបើកកិច្ចប្រជុំវិសាមញ្ញជជែកពីសង្គ្រាមអ៊ុយក្រែន
រុស្ស៊ី និងអ៊ុយក្រែនជួបចរចាគ្នានៅព្រំដែនបេឡារុសនាថ្ងៃចន្ទ ២៨កុម្ភៈនេះដែលជាថ្ងៃទី៥នៃសង្គ្រាមនៅអ៊ុយក្រែន។ ក្នុងពេលជាមួយគ្នានេះ ក្រុមប្រឹក្សាសន្តិសុខបានកោះប្រជុំបន្ទាន់ទៅតាមសំណើរបស់បារាំងដើម្បីទាមទារឲ្យមានបទឈប់បាញ់ និងអាចបញ្ជូនជំនួយមនុស្សធម៌ទៅអ៊ុយក្រែន។ ចំណែកមហាសន្និបាតអង្គការសហប្រជាជាតិវិញក៏នឹងបើកកិច្ចប្រជុំវិសាមញ្ញដ៏កម្រមួយដែរដើម្បីពិភាក្សាថាតើត្រូវថ្កោលទោសរុស្ស៊ីដែលចូលឈ្លានពានអ៊ុយក្រែនឬយ៉ាងណា?
ចុះផ្សាយនៅថ្ងៃ៖
ស្តាប់ - ០៧:០១
មហាសន្និបាតអង្គការសហប្រជាជាតិបើកកិច្ចប្រជុំវិសាមញ្ញដើម្បីជជែកពីវិបត្តិអ៊ុយក្រែន
សង្គ្រាមនៅអ៊ុយក្រែនដែលបានចាប់ផ្ទុះឡើងកាលពីថ្ងៃទី ២៤កុម្ភៈ ឆ្នាំ២០២២ កំពុងបន្តជាបច្ចុប្បន្នភាពដ៏ក្តៅគគុកដែលពិភពលោកកំពុងតែបើកភ្នែកតាមដានមើលយ៉ាងយកចិត្តទុកដាក់ជាទីបំផុត។
នៅថ្ងៃចន្ទនេះ គណៈប្រតិភូរុស្ស៊ីនិងអ៊ុយក្រែនជួបចរចាគ្នាជាលើកដំបូងក្រោយការផ្ទុះសង្គ្រាម រីឯក្រុមប្រឹក្សាសន្តិសុខអង្គការសហប្រជាជាតិវិញបានកោះប្រជុំបន្ទាន់ទៅតាមសំណើរបស់ប្រទេសបារាំងដើម្បីទាមទារឲ្យមានបទឈប់បាញ់និងបញ្ជូនជំនួយមនុស្សធម៌ទៅកាន់ប្រទេសអ៊ុយក្រែន។
ក្នុងពេលជាមួយគ្នានេះ មហាសន្និបាតអង្គការសហប្រជាជាតិក៏នឹងបើកកិច្ចប្រជុំវិសាមញ្ញដ៏កម្រមួយដើម្បីជជែកអំពីវិបត្តិអ៊ុយក្រែន។ កម្មវត្ថុសំខាន់នៃកិច្ចប្រជុំនេះគឺដើម្បីសម្រេចថាគួរតែថ្កោលទោសការវាយប្រហាររបស់ទីក្រុងមូស្គូលើអ៊ុយក្រែនដែរឬយ៉ាងណា? និងមួយទៀតគឺដើម្បីទាមទារឲ្យរុស្ស៊ីបញ្ចប់ប្រតិបត្តិការសឹករបស់ខ្លួនជាបន្ទាន់។
នេះគឺជាលើកទី ១១នៅក្នុងប្រវត្តិសាស្ត្ររបស់អង្គការសហប្រជាជាតិដែលសម័យប្រជុំបន្ទាន់បែបនេះត្រូវបានរៀបចំឡើង។ កិច្ចប្រជុំក៏កម្ររបស់មហាសន្និបាតអង្គការសហប្រជាជាតិស្តីអំពីជម្លោះនៅអ៊ុយក្រែននឹងចាប់ផ្តើមនៅវេលាម៉ោង ១០ព្រឹកថ្ងៃចន្ទនេះ ម៉ោងនៅក្នុងទីក្រុងញូវយ៉កនៃសហរដ្ឋអាមេរិក (ម៉ោង១០យប់នៅក្នុងប្រទេសខ្មែរ) ជាមួយនឹងសុន្ទរកថារបស់ប្រធានសភាលោក Abdulla Shahid និងអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គូទែរស៍។
នៅក្នុងកិច្ចប្រជុំនេះ សមាជិកទាំងអស់របស់អង្គការសហប្រជាជាតិដែលមានចំនួន ១៩៣ ប្រទេសនឹងត្រូវសម្រេចចិត្តថាតើពួកគេគាំទ្រឬមិនគាំទ្រលើសេចក្តីសម្រេចឲ្យថ្កោលទោសរុស្ស៊ីដែលចូលវាយឈ្លានពានអ៊ុយក្រែន។
តើUNអាចនឹងចេញសេចក្តីសម្រេចថ្កោលទោសរុស្ស៊ីបានទេ?
គួររំឭកថា កិច្ចប្រជុំវិសាមញ្ញនៃមហាសន្និបាតអង្គការសហប្រជាជាតិនៅពេលនេះបានកើតឡើង នៅបន្ទាប់ពីក្រុមប្រឹក្សាសន្តិសុខអង្គការសហប្រជាជាតិដែលកាលពីថ្ងៃយប់ថ្ងៃសុក្រទី ២៥ កុម្ភៈបានទទួលបរាជ័យមិនអាចចេញសេចក្តីសម្រេចថ្កោលទោសរុស្ស៊ីចំពោះការឈា្លនពានលើអ៊ុយក្រែនបាន ដោយសាររុស្ស៊ីប្រើសិទ្ធិវេតូប្រឆាំង។
កាលណោះ ក្នុងចំណោមសមាជិកអចិន្ត្រៃយ៍និងមិនអចិន្ត្រៃយ៍នៃក្រុមប្រឹក្សាសន្តិសុខទាំង១៥ប្រទេស មាន១១ប្រទេសបានបោះឆ្នោតគាំទ្រ តែ៣ប្រទេសបានបោះឆ្នោតអនុប្បវាទ។ ប្រទេសទាំងបីនោះសុទ្ធតែជាអ្នកដែលមានទំនាក់ទំនងល្អជាមួយរុស្ស៊ីគឺចិន ឥណ្ឌា និងអេមីរ៉ាតអារ៉ាប់រួម។
ក្នុងករណីដែលសមាជិកអចិន្ត្រៃយ៍ទាំង៥ រួមមានសហរដ្ឋអាមេរិក រុស្ស៊ី អង់គ្លេស បារាំង និងចិន ប្រើសិទ្ធិវេតូប្រឆាំងនឹងការធ្វើសកម្មភាពរួមគ្នាដើម្បីរក្សាសន្តិភាពពិភពលោក នោះសមាជិកក្រុមប្រឹក្សាសន្តិសុខ អាចមានសិទ្ធិស្នើឲ្យមហាសន្និបាតអង្គការសហប្រជាជាតិបើកសម័យប្រជុំពិសេសមួយបានដូចជាកិច្ចប្រជុំនៅថ្ងៃនេះអីចឹង។
សម្រាប់កិច្ចប្រជុំវិសាមញ្ញានេះ ទោះបីប្រទេសរួមមានស៊ីរី ចិន គុយបា និងឥណ្ឌាត្រូវបានគេរំពឹងថានឹងបោះឆ្នោតគាំទ្ររុស្ស៊ី ឬបោះឆ្នោតអនុប្បវាទក្តី ក៏មហាសន្និបាតអង្គការសហប្រជាជាតិសង្ឃឹមថានឹងអាចទទួលបានសំឡេងគាំទ្រលើសពី ១០០ សំឡេងឡើងទៅដើម្បីឈានទៅចេញសេចក្តីសម្រេចថ្កោលទោសការឈ្លានពានរបស់រុស្ស៊ីលើអ៊ុយក្រែន និងដើម្បីទាមទារឲ្យរុស្ស៊ីដកថយកងទ័ពចេញជាបន្ទាន់។
ក្នុងករណីមហាសន្និបាតអង្គការសហប្រជាជាតិទទួលបានសំឡេងគាំទ្រគ្រប់គ្រាន់ នោះសេចក្តីប្រកាសថ្កោលទោសរុស្ស៊ីទំនងជានឹងអាចចេញជាផ្លូវការបាននៅថ្ងៃអង្គារស្អែកនេះ។
កិច្ចចរចារវាងរុស្ស៊ីនិងអ៊ុយក្រែន
នៅថ្ងៃចន្ទះនេះមានព្រឹត្តិការណ៍សំខាន់ៗគួរឲ្យកត់សម្គាល់ចំនួន ៣ទាក់ទងនឹងសង្គ្រាមរុស្ស៊ី-អ៊ុយក្រែនដូចបានបញ្ជាក់មុននេះបន្តិចរួចហើយដែលទី១ នោះគឺកិច្ចប្រជុំបន្ទាន់ស្តីអំពីស្ថានភាពមនុស្សធម៌ក្នុងប្រទេសអ៊ុយក្រែនរបស់ក្រុមប្រឹក្សាសន្តិសុខដែលគ្រោងបើកនៅយប់នេះ។ ទី២ កិច្ចប្រជុំវិសាមញ្ញពិភាក្សាពីសង្គ្រាមអ៊ុយក្រែនរបស់មហាសន្និបាតអង្គការសហប្រជាជាតិ និងទី៣ចុងក្រោយគេគឺជំនួបចរចារវាងគណៈប្រតិភូរស្ស៊ី និងអ៊ុយក្រែននៅឯព្រំដែនបេឡារុស។
យោងតាមព័ត៌មានដែលទើបធ្លាក់មកមុននេះបន្តិច បេឡារុសដែលជាម្ចាស់អ្នករៀបចំជំនួបខាងលើនិយាយថាខ្លួនបានរៀបចំទីតាំងប្រជុំរួចរាល់អស់ហើយ ហើយកិច្ចចរចានឹងចាប់ផ្តើមភ្លាមតែម្តងនៅពេលដែលគណៈប្រតិភូនៃភាគីជម្លោះទាំងពីរទៅដល់បន្ទប់ប្រជុំ។
មានសេចក្តីរាយការណ៍ថាគណៈប្រតិភូរបស់អ៊ុយក្រែនបានទៅដល់ព្រំដែនជាប់ប្រទេសបេឡារុសហើយដើម្បីពិភាក្សាជាមួយតំណាងអ្នកចរចារបស់រុស្ស៊ីនៅថ្ងៃទីប្រាំនៃការវាយលុករបស់វិមានក្រឹមឡាំង។
ជាការគួរឲ្យកត់សម្គាល់ ទាំងរុស្ស៊ីនិងអ៊ុយក្រែនសុទ្ធតែបានបង្ហាញពីចេតនាចង់សម្រេចបានកិច្ចព្រមព្រៀងនឹងគ្នាឲ្យបានឆាប់។ ខាងអ៊ុយក្រែនបានបញ្ជាក់ពីការទាមទាររបស់ខ្លួនឲ្យមានបទឈប់បាញ់ភ្លាមៗជាមួយរស្ស៊ី និងបានទាមទារឲ្យរុស្ស៊ីដកកងទ័ពខ្លួនចេញពីទឹកដីអ៊ុយក្រែននៅថ្ងៃចន្ទនេះតែម្តង។
ចំណែក ខាងរុស្ស៊ីវិញក៏ចង់ឈានទៅសម្រេចកិច្ចព្រមព្រៀងជាមួយអ៊ុយក្រែនដើម្បីបញ្ចប់ជម្លោះនឹងគ្នាដែរ។ នេះបើតាមការលើកឡើងរបស់តំណាងអ្នកចរចានៃវិមានក្រេមឡាំង។
នៅខណៈពេលនេះ គេនៅមិនទាន់ដឹងនៅឡើយនោះទេអំពីលទ្ធផលនៃកិច្ចចរចាខាងលើ ហើយពិភពលោកក៏កំពុងទន្ទឹងរង់ចាំមើលយ៉ាងអន្ទះសាដែរថាតើកិច្ចចរចារវាងភាគីរុស៊្សីនិងអ៊ុយក្រែនទទួលលទ្ធផលយ៉ាងណានោះ។ តែយ៉ាងណាគេសង្ឃឹមថាកិច្ចចរចារវាងរុស្ស៊ី និងអ៊ុយក្រែននឹងទទួលបានលទ្ធផលវិជ្ជមានដើម្បីឈានទៅបញ្ចៀសសង្គ្រាម និងបញ្ចប់ការបាត់បង់ជីវិតមនុស្ស ព្រមទាំងបញ្ចប់វិបត្តិជនភៀសខ្លួនដែលកំពុងរីករាលដាលខ្លាំង។
យ៉ាងហោចណាស់មានជនស៊ីវិលជាង ១០០ក្នុងនោះមានកុមារ៧នាក់ត្រូវបានសម្លាប់នៅក្នុងប្រទេសអ៊ុយក្រែន តាំងពីរុស្ស៊ីបើកការវាយប្រហារ៥ ថ្ងៃមកនេះ។ ក្រៅពីនេះ មានមនុស្សជាងកន្លះលាននាក់ហើយដែលបានរត់ភៀសខ្លួនចេញពីអ៊ុយក្រែនទៅកាន់ប្រទេសអឺរ៉ុបជិតខាង។ នេះបើតាមការបញ្ជាក់របស់ប្រធានទទួលបន្ទុកកិច្ចការសិទ្ធិមនុស្ស UN ដោយថែមទាំងព្រមានទៀតថាចំនួនមនុស្សស្លាប់និងជនភៀសខ្លួននឹងកើនឡើងខ្លាំងបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ