កូរ៉េខាងជើងបន្តផ្គើនសហគមន៍អន្តរជាតិដោយបន្តបាញ់សាកល្បងគ្រាប់មីស៊ីល
ចុះផ្សាយនៅថ្ងៃ៖
ស្តាប់ - ០៧:១៨
នៅកូរ៉េខាងជើង ទីភ្នាក់ងារសារព័ត៌មានផ្លូវការឈ្មោះ KCNA បានប្រាប់ឲ្យដឹងនាថ្ងៃអាទិត្យ ទី១៧ មេសាថា លោកគីម ជុងអ៊ុនបានចូលរួមត្រួតពិនិត្យលើការបាញ់សាកល្បងប្រកបដោយជោគជ័យនូវប្រព័ន្ធអាវុធថ្មី។ ការបាញ់សាកល្បងនេះបានធ្វើឡើង ចំពេលដែលរបបក្រុងព្យុងយ៉ាងទើបប្រារព្ធខួបកំណើត ១១០ឆ្នាំរបស់លោកគីម អ៊ីលស៊ុងក្នុងថ្ងៃសុក្រ ទី១៥ មេសា។ បន្ទាប់មកនៅថ្ងៃទី២៥ មេសា កូរ៉េខាងជើងនឹងប្រារព្ធខួបកំណើតកងទ័ពប្រជាមានិតកូរ៉េ។
ទីភ្នាក់ងារសារព័ត៌មានផ្លូវការកូរ៉េខាងជើង KCNA មិនបានប្រាប់ពីប្រភេទអាវុធដែលបានសាកល្បង និងបានត្រឹមបញ្ជាក់ជាប្រព័ន្ធអាវុធថ្មីតាក់ទិកដែលមានបំពាក់ប្រព័ន្ធនាំផ្លូវ និងដែលត្រូវបង្កើនប្រសិទ្ធិភាពអាវុធនុយក្លេអ៊ែរតាក់ទិក។ បន្ទាប់មក និងបើតាម KCNA ដដែល មេដឹកនាំកូរ៉េខាងជើងគីម ជុងអ៊ុនដែលបានចូលរួមត្រួតពិនិត្យលើការបាញ់សាកល្បងបានផ្តល់ឲ្យក្រុមអ្នកស្រាវជ្រាវយោធានូវការណែនាំសំខាន់ៗស្តីពីការបន្តពង្រឹងសមត្ថភាពការពារ និងកម្លាំងប្រយុទ្ធនុយក្លេអ៊ែរ។ KCNA បានអះអាងបន្តទៀតថា ការបាញ់សាកល្បងទទួលបានជោគជ័យ និងមិនបានបញ្ជាក់ពីចំនួនអាវុធ ពីថ្ងៃ និងទីកន្លែងបាញ់សាកល្បងពិតប្រាកដទេ។
ទោះជាយ៉ាងនេះក្តី អគ្គសេនាធិការដ្ឋានកងទ័ពកូរ៉េខាងត្បូងបានបញ្ជាក់ពីការចាប់បាននូវរូបភាពគ្រាប់ចំនួន ២គ្រាប់ដែលបានបាញ់ចេញនៅយប់ជ្រៅក្នុងថ្ងៃសៅរ៍ ទី១៦ មេសា និងថា គ្រាប់នោះបានហោះក្នុងចម្ងាយ ១១០គីឡូម៉ែត្រ ក្នុងកម្ពស់ ២៥គីឡូម៉ែត្រ និងក្នុងល្បឿនជិត ៥ ០០០គីឡូម៉ែត្រក្នុងមួយម៉ោង។ ពីខាងអាមេរិក អ្នកនាំពាក្យក្រសួងការពារជាតិបានត្រឹមបញ្ជាក់ពីការដឹងព័ត៌មានស្តីពីការបាញ់សាកល្បងអាវុធថ្មីរបស់កូរ៉េខាងជើង និងថា អាមេរិកតាមដានលើស្ថានការណ៍នេះ។ តែសម្រាប់ក្រុមអ្នកវិភាគឯណោះវិញពួកគេហាក់បានអះអាងដោយមិនអល់អែកថា ប្រព័ន្ធអាវុធថ្មីដែលកូរ៉េខាងជើងទើបបានបាញ់សាកល្បងនេះ គឺជាគ្រាប់មីស៊ីលបាលីស្ទិកថ្មីបាញ់ចម្ងាយជិត។
សាទរថ្ងៃកំណើតលោកគីម អ៊ីលស៊ុង ឬបន្តផ្គើនសហគមន៍អន្តរជាតិ?
មានការកត់សម្គាល់ចំនួនពីរនៅក្នុងការបាញ់សាកល្បងអាវុធថ្មីរបស់កូរ៉េខាងជើងពេលនេះ ទី១ ចំពេលខួបកំណើត ១១០ឆ្នាំរបស់លោកគីម អ៊ីលស៊ុងដែលជាជីតារបស់គីម ជុងអ៊ុន និងទី២ ចំពេលដែលក្រុងព្យុងយ៉ាងត្រៀមប្រារព្ធថ្ងៃកំណើតកងទ័ពប្រជាមានិតកូរ៉េនៅថ្ងៃទី២៥ មេសាខាងមុខ។ គេអាចនិយាយបានថា ការបាញ់សាកល្បងនេះជាការសាទរលើព្រឹត្តិការណ៍ទាំងពីរ និងការបន្តផ្គើនសហគមន៍អន្តរជាតិ។ សម្រាប់មេដឹកនាំគីម ជុងអ៊ុន ព្រឹត្តិការណ៍ថ្ងៃខួបកំណើតលោកគីម អ៊ីលសុស៊ុងជាព្រឹត្តិការណ៍មួយសំខាន់ខ្លាំងណាស់ដែលគេមិនអាចមើលរំលងដោយមិនរៀបចំពិធីអបអរសាទរបានទេ ព្រោះលោកគីម អ៊ីលស៊ុងជាជីតាបង្កើត និងជាស្ថាបនិកកូរ៉េខាងជើង។
នៅក្នុងពិធីសាទរតែងត្រូវបានក្រុងព្យុងយ៉ាងរៀបចំជាក្បួនព្យុះយាត្រាស៊ីវិល កងទ័ព រួមទាំងគ្រឿងសព្វាវុធគ្រប់ប្រភេទ។ នេះដោយមិនភ្លេចនិយាយពីការសាទរតាមរយៈការសាកល្បងនុយក្លេអ៊ែរ ឬការបាញ់សាកល្បងគ្រាប់មីស៊ីល។ ក្នុងថ្ងៃសុក្រ ទី១៥ មេសាដែលចំថ្ងៃកំណើតលោកគីម អ៊ីលស៊ុង ក្រុងព្យុងយ៉ាងបានរៀបចំត្រឹមក្បួនព្យុះហយាត្រាស៊ីវិល ពិធីរាំកំសាន្ត និងការបាញ់កាំជ្រួច ពោលមិនមានព្យុះហយាត្រាកងទ័ពដូចដែលក្រុមអ្នកសង្កេតការណ៍បានរង់ចាំទេ។ ទន្ទឹមគ្នានេះ ក្រុមអ្នកវិភាគ រួមទាំងក្រុមអ្នកទទួលខុសត្រូវកូរ៉េខាងត្បូង និងអាមេរិកថែមទាំងបានគិតថា កូរ៉េខាងជើងអាចធ្វើការសាកល្បងនុយក្លេអ៊ែរ ឬបាញ់សាកល្បងគ្រាប់មីស៊ីលនៅចំថ្ងៃខួបកំណើតលោកគីម អ៊ីលស៊ុងថ្ងៃទី១៥ មេសា។
លើសពីនេះ ពួកគេថែមទាំងបានគិតទៀតថា បើគីម ជុងអ៊ុនមិនធ្វើចំថ្ងៃកំណើតជីតាទេ គីម ជុងអ៊ុនអាចធ្វើសរុបនៅថ្ងៃទី២៥ មេសាដែលជាថ្ងៃកំណើតកងទ័ពប្រជាមានិតកូរ៉េ។ តែនៅទីបំផុត គីម ជុងអ៊ុនមិនបានរង់ចាំធ្វើសរុបនៅថ្ងៃទី២៥ មេសាឯណា។ គ្រាន់តែថា គីម ជុងអ៊ុនបានបាញ់សាកល្បងគ្រាប់មីស៊ីលក្នុងថ្ងៃទី១៧ មេសា ពោលនៅមួយថ្ងៃក្រោយថ្ងៃកំណើតរបស់ជីតា។
គីម ជុងអ៊ុនសាកល្បងនុយក្លេអ៊ែរ ឬគ្រាប់មីស៊ីលនៅថ្ងៃទី២៥ មេសា?
ជាមួយអ្នកណាមិនដឹងទេ តែបើជាមួយគីម ជុងអ៊ុន អ្វីៗអាចទៅរួចទាំងអស់ និងពេលខ្លះមិនបានព្រៀងទុកទៀតផង។ វាអាចថានៅថ្ងៃទី២៥ មេសា ក្រុងព្យុងយ៉ាងនឹងរៀបចំព្រឹត្តិការណ៍ធំសម្បើមអស្ចារ្យជាមួយនឹងក្បួនព្យុះហយាត្រាកងទ័ពដោយបង្ហាញគ្រឿងសព្វាវុធគ្រប់ប្រភេទ រួមទាំងការសាកល្បងនុយក្លេអ៊ែរ និងការបាញ់សាកល្បងគ្រាប់មីស៊ីលចម្ងាយឆ្ងាយ ឬចម្ងាយជិត។ ចូរកុំភ្លេចថាសម្រាប់កូរ៉េខាងជើង នុយក្លេអ៊ែរជាអាយុជីវិត និងជាភាពស្ថិតនៅរបស់របបកុម្មុយនិស្ត។ នៅក្នុងសមាជគណបក្សកុម្មុយនិស្តកាលពីខែមករា ឆ្នាំ ២០២១ គីម ជុងអ៊ុនបានបង្ហាញផែនការអភិវឌ្ឍលើវិស័យការពារ។
អ្វីដែលគីម ជុងអ៊ុនចង់បាន គឺការអភិវឌ្ឍន៍បច្ចេកវិទ្យានុយក្លេអ៊ែរកម្រិតខ្ពស់ និងការផលិតអាវុធនុយក្លេអ៊ែរខ្នាតតូច និងមានទម្ងន់ស្រាល។ កាលពី ៣សប្តាហ៍មុននេះ កូរ៉េខាងជើងបានបាញ់សាកល្បងគ្រាប់មីស៊ីលបាលីស្ទិកអន្តរទ្វីបដែលមានកម្លាំងខ្លាំងមិនធ្លាប់មានគិតតាំងពីឆ្នាំ ២០១៧។ ចំណែកការសាកល្បងអាវុធនុយក្លេអ៊ែរត្រូវបានកូរ៉េខាងជើងធ្វើចំនួន ៦ដងគិតតាំងពីឆ្នាំ ២០០៦។ បើតាមក្រុមអ្នកវិភាគ កូរ៉េខាងជើងអាចនឹងធ្វើការសាកល្បងលើកទី៧ នៅប៉ុន្មានសប្តាហ៍ខាងមុខ។ ជាមួយនឹងការសាកល្បងជាយថាហេតុនេះត្រូវបានក្រុមអ្នកជំនាញយល់ថា កូរ៉េខាងជើងនឹងព្យាយាមផលិតក្បាលនុយក្លេអ៊ែរខ្នាតតូចដើម្បីបំពាក់លើគ្រាប់មីស៊ីលបាលីស្ទិកអន្តរទ្វីប ICBM។
ក្រុមអ្នកទទួលខុសត្រូវកូរ៉េខាងត្បូងបានថ្លែងថា ក្រុងព្យុងយ៉ាងអាចនឹងរៀបចំក្បួនព្យុះហយាត្រាកងទ័ព ឬសាកល្បងនុយក្លេអ៊ែរនៅចំថ្ងៃ ឬក្បែរថ្ងៃទី២៥ មេសាដែលជាកំណើតកងទ័ពប្រជាមានិតកូរ៉េ។ គេអាចអាចនិយាយជារឿងចៃដន្យ ព្រោះថ្ងៃកំណើតកងទ័ពកូរ៉េខាងជើងចំពេលដែលអាមេរិក និងកូរ៉េខាងត្បូងរៀបចំសមយុទ្ធចាប់ពីថ្ងៃចន្ទ ទី១៨ មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ