អង្គការពាណិជ្ជកម្មពិភពលោកបានអនុម័តនូវកញ្ចប់វិធានការជាប្រវត្តិសាស្រ្តដែលមិនធ្លាប់មាន
ចុះផ្សាយនៅថ្ងៃ៖
ស្តាប់ - ០៦:២៧
អង្គការពាណិជ្ជកម្មពិភពលោកហៅកាត់ជាភាសាអង់គ្លេស WTO បានបិទបញ្ចប់កិច្ចប្រជុំថ្នាក់រដ្ឋមន្រ្តីលើកទី១២ រយៈពេល ៥ថ្ងៃក្នុងទីក្រុងហ្សឺណែវ ប្រទេសស៊្វីស។ នៅទីបំផុត និងក្រោយពីបានជជែកគ្នាយ៉ាងតានតឹង ក្រុមសមាជិក WTO ទាំង ១៦៤ប្រទេសបានអនុម័តលើកញ្ចប់វិធានការមួយដែលមាន ៤ចំណុចសំខាន់។ ភ្លាមៗនៅក្រោយការអនុម័តលើកញ្ចប់វិធានការ អគ្គនាយិកា WTO លោកស្រីអិនហ្កូហ្ស៊ី អូកុនហ្សូ អ៊ីវេឡាបានថ្លែងសាទរ និងបញ្ជាក់ថា លទ្ធផលនេះជាសក្ខីកម្មដែលឆ្លុះបញ្ចាំងពីសមត្ថភាពរបស់ WTO ក្នុងការជំនះលើភាពមិនចុះសម្រុងគ្នា។
តាមកម្មវិធីដែលបានគ្រោងទុក កិច្ចប្រជុំថ្នាក់រដ្ឋមន្រ្តីនៃក្រុមប្រទេសសមាជិក WTO លើកទី១២ ត្រូវរៀបចំរយៈពេល ៥ថ្ងៃ និងត្រូវបិទបញ្ចប់តាំងពីថ្ងៃពុធ ទី១៥ មិថុនា។ ក៏ប៉ុន្តែ កិច្ចប្រជុំមួយនេះបានអូសបន្លាយពេលបន្ថែមរហូតដល់ ៣៦ម៉ោង។ គឺទើបនៅវេលាម៉ោង ៣ព្រឹកថ្ងៃសុក្រ ទី១៧ មិថុនាម៉ោងក្នុងប្រទេសស៊្វីសដែលកញ្ចប់វិធានការមួយមាន ៤ចំណុចសំខាន់ត្រូវបានអនុម័តនៅនាទីចុងក្រោយ។ វិធានការទាំង ៤ចំណុចសំខាន់ រួមមាន ទី១ កម្មសិទ្ធិបញ្ញាលើវ៉ាក់សាំងបង្ការកូវីដ១៩ ទី២ ឧបត្ថម្ភកធនលើការនេសាទ ទី៣ អសន្តិសុខស្បៀងអាហារ និងទី៤ កំណែទម្រង់ WTO។
បញ្ហាកម្មសិទ្ធិបញ្ញាលើវ៉ាក់សាំងបង្ការកូវីដ១៩ ត្រូវបាន WTO ឯកភាពព្យួរបណ្តោះអាសន្នរយៈពេល ៥ឆ្នាំសម្រាប់ក្រុមប្រទេសកំពុងអភិវឌ្ឍន៍ មានន័យថា ក្រុមប្រទេសកំពុងអភិវឌ្ឍន៍មានសិទ្ធិផលិតវ៉ាក់សាំងកូវីដ១៩ ដោយយករូបមន្តពីមន្ទីរពិសោធន៍ដែលបានរកឃើញវ៉ាក់សាំងកូវីដ១៩។ ការសម្រេចព្យួរកម្មសិទ្ធិបញ្ញាវ៉ាក់សាំងនេះមានគោលដៅជួយសម្រួល និងបង្កើនការផលិតវ៉ាក់សាំងឲ្យបានច្រើនសម្រាប់បំពេញតម្រូវការក្នុងលោក។ ក្រៅពីរឿងកម្មសិទ្ធិបញ្ញាលើវ៉ាក់សាំងកូវីដ១៩ WTO ក៏បានឯកភាពគ្នាសម្រួលឲ្យមានការធ្វើចរាចរណ៍ និងការផលិតវ៉ាក់សាំង ថ្នាំព្យាបាល សម្ភារៈបរិក្ខារពេទ្យ និងឧបករណ៍វិភាគចាំបាច់សម្រាប់ប្រយុទ្ធប្រឆាំងនឹងកូវីដ១៩។
ឧបត្ថម្ភកធនលើការនេសាទ
សំណុំរឿងនេសាទត្រូវបានគេចាត់ទុកជាប្រធានបទស្នូលនៃកិច្ចប្រជុំថ្នាក់ក្រសួងរបស់អង្គការពាណិជ្ជកម្មពិភពលោកលើកទី១២។ រហូតដល់កិច្ចប្រជុំនាទីចុងក្រោយ គេស្មានតែមិនអាចមានកិច្ចព្រមព្រៀងមួយផង។ តែនៅទីបំផុត កិច្ចព្រមព្រៀងមួយត្រូវបានរកឃើញ នោះបើទោះបីជាមានចំណុចខ្លះនៅក្នុងកិច្ចព្រមព្រៀងត្រូវបានគេកែសម្រួល បន្ថែមបន្ថយពីអ្វីដែលគេចង់បានពីដំបូងក៏ដោយ។ នៅក្នុងកិច្ចព្រមព្រៀងដែលបានអនុម័ត WTO បានលុបចោល និងហាមមិនឲ្យមានការផ្តល់ឧបត្ថម្ភកធនមួយចំនួនដែលអាចជំរុញឲ្យមានការនេសាទខុសច្បាប់ និងការនេសាទច្រើនហួសហេតុដែលនាំឲ្យអន្តរាយសត្វសមុទ្រ។
បន្ទាប់មក និងដើម្បីជួយក្រុមអ្នកនេសាទនៅក្នុងប្រទេសកំពុងអភិវឌ្ឍន៍ WTO ចង់បង្កើតឲ្យមានមូលនិធិមួយសម្រាប់ជួយផ្នែកហិរញ្ញវត្ថុ និងបច្ចេកទេសដើម្បីឲ្យពួកអ្នកនេសាទងាកទៅរកការនេសាទប្រកបដោយចីរភាព។ ទាក់ទងនឹងបញ្ហាអសន្តិសុខស្បៀងអាហារដែលជាបច្ចុប្បន្នភាពក្តៅសព្វថ្ងៃ កិច្ចព្រមព្រៀងរបស់ WTO មិនបានសរសេរចំពីសង្រ្គាមរុស្ស៊ីឈ្លានពានអ៊ុយក្រែនទេ នោះបើទោះបីជាគេដឹងថា សង្រ្គាមមួយនេះកំពុងបង្កឲ្យមានវិបត្តិខ្វះស្បៀងក៏ដោយ។
កិច្ចព្រមព្រៀងរបស់ WTO បានផ្តោតសំខាន់លើ ៣ចំណុច ទី១ មិនត្រូវហាមឃាត់ ឬរឹតបន្តឹងលើការនាំចេញផលិតផលស្បៀង ទី២ វិធានការបន្ទាន់របស់រដ្ឋាភិបាលនីមួយៗដើម្បីឆ្លើយតបនឹងក្តីបារម្ភទាក់ទងនឹងសន្តិសុខស្បៀងអាហារ ដូចជាផ្អាកការនាំចេញត្រូវជាវិធានការបណ្តោះអាសន្ន និងមានតម្លាភាព ហើយចំណុចទី៣ ផ្តោតលើការការពារ និងជួយសម្រួលលើការបញ្ជាទិញម្ហូបអាហាររបស់អង្គការកម្មវិធីស្បៀង និងកសិកម្មពិភពលោក។
WTO មានសមត្ថភាពក្នុងការឆ្លើយតបនឹងស្ថានភាពអាសន្ន
អ្វីដែល WTO សម្រេចបាននៅក្នុងកិច្ចប្រជុំថ្នាក់ក្រសួងរយៈពេល ៥ថ្ងៃនេះត្រូវបានគេចាត់ទុកជារឿងប្រវត្តិសាស្រ្ត។ កត្តាដែលបានអនុញ្ញាតឲ្យ WTO អាចឈានដល់ការព្រមព្រៀងគ្នារបៀបនេះ គឺការឲ្យតម្លៃ និងការឲ្យសារៈសំខាន់លើប្រធានរឿងដែលបានលើកយកទៅចរចា។ មួយវិញទៀត គេអាចនិយាយបានថា ជំងឺកូវីដ១៩ និងសង្រ្គាមរុស្ស៊ីឈ្លានពានអ៊ុយក្រែនហាក់ជាមេរៀនមួយដែលបានធ្វើឲ្យប្រទេសសមាជិកនីមួយៗរបស់ WTO ភ្ញាក់ខ្លួនច្រើនជាងមុខ។ ឧទាហរណ៍ជាក់ស្តែង កង្វះវ៉ាក់សាំងបង្ការកូវីដ១៩ រួមទាំងគ្រឿងសម្ភារៈបរិក្ខារពេទ្យជាច្រើនផ្សេងទៀត និងវិបត្តិកង្វះស្បៀងនៅពេលនេះ។
មិនដែលមានទេនៅក្នុងប្រវត្តិរបស់ WTO ដែលអនុម័តបាននូវកិច្ចព្រមព្រៀងច្រើនក្នុងកិច្ចប្រជុំតែមួយដូចលើកនេះ។ នេះស បញ្ជាក់ឲ្យឃើញថា ទោះបីជាមានភាពតានតឹង និងភាពខ្វែងគំនិតគ្នាលើប្រធានរឿងនៅក្នុងការចរចាក៏ដោយក៏ប្រទេសសមាជិកនីមួយៗមិនបោះបង់ការចរចា ព្យាយាមសម្រុះសម្រួល និងស្វែងរកការចុះសម្រុងនៅទីបំផុត។ នេះក៏ស បញ្ជាក់ឲ្យឃើញផងដែរថា នៅពេលដែលត្រូវដោះស្រាយរឿងបន្ទាន់ និងបើមានឆន្ទៈចង់ដោះស្រាយ ប្រទេសសមាជិកនីមួយៗមានសមត្ថភាពដោះស្រាយ ទុកប្រយោជន៍ផ្ទាល់ខ្លួនមួយអន្លើ និងឈានទៅសម្រេចកិច្ចព្រមព្រៀងមួយ ទោះបីជាកិច្ចព្រមព្រៀងនោះមិនមែនជាអ្វីដែលគេចង់បាន ១០០% ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ