ក្រុមប្រទេសសមាជិកអង្គការពាណិជ្ជកម្មពិភពលោករួមគ្នាប្រឆាំងថាមពលផូស៊ីល និងប្លាស្ទិក
ថ្នាក់រដ្ឋមន្រ្តីក្រសួងពាណិជ្ជកម្មនៃក្រុមប្រទេសសមាជិកអង្គការពាណិជ្ជកម្មពិភពលោកបានបើកកិច្ចប្រជុំតាមអនឡាញនាថ្ងៃពុធ ទី១៥ ធ្នូ។ នៅក្នុងកិច្ចប្រជុំ ប្រទេសសមាជិកបានប្តេជ្ញាពន្លឿនការចរចាលើប្រធានបទចំនួន ៣ ទី១ ការបំពុលដោយប្លាស្ទិក ទី២ ការបញ្ឈប់ជួយគាំទ្រថាមពលផូស៊ីល និងទី៣ លើកដំកើងពាណិជ្ជកម្មប្រកបដោយនិរន្តរភាពអេកូឡូស៊ី។ ប្រធានបទទាំង ៣ នេះត្រូវបានអនុម័តតាមរយៈសេចក្តីថ្លែងការណ៍ចំនួន ៣ ដាច់ពីគ្នា។
ចុះផ្សាយនៅថ្ងៃ៖
ស្តាប់ - ០២:០១
« ជាព្រឹត្តិការណ៍ប្រវត្តិសាស្រ្តសម្រាប់អង្គការពាណិជ្ជកម្មពិភពលោក » នេះជាការថ្លែងសាទររបស់អគ្គនាយិកា WTO លោកស្រីអិនហ្កូហ្ស៊ី អូកុនហ្សូ អ៊ីវេឡា មុននឹងបន្ថែមយ៉ាងដូច្នេះថា « ពាណិជ្ជកម្មអាច និងត្រូវតែធ្វើឡើងដើម្បីផ្តល់លទ្ធផលដល់ការអភិវឌ្ឍន៍យូរអង្វែងសម្រាប់មនុស្សនៅទូទាំងពិភពលោក »។ តែលោកស្រីអ៊ីវេឡាមិនភ្លេចព្រមានថា នេះគ្រាន់ជាការចាប់ផ្តើមប៉ុណ្ណោះដោយបានអំពាវនាវឲ្យគ្រប់ប្រទេសទាំងអស់ផ្តើមសកម្មភាពចាប់ពីឆ្នាំ ២០២២ ដោយរៀបចំតាក់តែងនូវផែនការការងារ និងសំណើច្បាស់លាស់។
ប្រធានបទទាំង ៣ ស្តីពីការបំពុលដោយប្លាស្ទិក ការបញ្ឈប់ជួយគាំទ្រថាមពលផូស៊ីល និងការលើកដំកើងពាណិជ្ជកម្មប្រកបដោយនិរន្តរភាពអេកូឡូស៊ីត្រូវបានអនុម័តដោយសេចក្តីថ្លែងការណ៍ចំនួន ៣ ដាច់ពីគ្នា។ សេចក្តីថ្លែងការណ៍ទី១ ស្តីពីរឿងប្លាស្ទិកបានចុះហត្ថលេខាដោយ ៦៧ប្រទេសសមាជិក ក្នុងនោះមានចិន រុស្ស៊ី សហភាពអឺរ៉ុប តែគ្មានសហរដ្ឋអាមេរិក។ នៅក្នុងសេចក្តីថ្លែងការណ៍នេះ ក្រុមប្រទេសហត្ថលេខីបានប្តេជ្ញាជំរុញឲ្យមានការប្រើប្រាស់ប្លាស្ទិកដែលប្រើរួច និងប្លាស្ទិកដែលកែច្នៃឡើងវិញ រួមទាំងប្រើបច្ចេកវិទ្យាដែលចូលរួមកាត់បន្ថយការបំពុលដោយប្លាស្ទិក។
សេចក្តីថ្លែងការណ៍ទី២ ស្តីពីការបញ្ឈប់ជួយគាំទ្រថាមពលផូស៊ីលបានចុះហត្ថលេខាដោយក្រុម ៤៥ប្រទេសសមាជិក ក្នុងនោះមានសហភាពអឺរ៉ុប តែគ្មានចិន និងសហរដ្ឋអាមេរិកទេ។ កម្មវត្ថុនៃសេចក្តីថ្លែងការណ៍នេះសំដៅកាត់បន្ថយបណ្តើរៗនូវជំនួយជួយគាំទ្រថាមពលផូស៊ីល។ ចំណែកសេចក្តីថ្លែងការណ៍ទី៣ ស្តីពីការលើកដំកើងពាណិជ្ជកម្មប្រកបដោយនិរន្តរភាពអេកូឡូស៊ីបានចុះហត្ថលេខាដោយក្រុម ៧១ប្រទេសសមាជិក ក្នុងនោះមានចិន និងសហរដ្ឋអាមេរិក។ លោក Valdis Dombrovskis អនុប្រធានគណៈកម្មការអឺរ៉ុបបានថ្លែងថា ការប្រែប្រួលអាកាសធាតុ និងការខូតខាតបរិស្ថានជាបញ្ហាប្រឈមរួមដ៏ធំបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ