WTOព្រមានពីការបែងចែកប្លុកសេដ្ឋកិច្ចដែលអាចកើតចេញពីសង្គ្រាមអ៊ុយក្រែន
សង្គ្រាមអ៊ុយក្រែនបានបង្កជាទុក្ខវេទនាយ៉ាងច្រើនសម្បើមដល់មនុស្សជាតិ និងបានជះផលអាក្រក់ផងដែរដល់សេដ្ឋកិច្ចពិភពលោក។ អគ្គនាយិកាអង្គការពាណិជ្ជកម្មពិភពលោក (WTO) អ្នកស្រី អូកុនហ្សូ អ៊ីវេឡា មានប្រសាសន៍ថាសង្គ្រាមរបស់រុស្ស៊ីនៅអ៊ុយក្រែនបានក្លាយជាដុំពពកខ្មៅសម្រាប់ពាណិជ្ជកម្មពិភពលោកនិងបានទាញសញ្ញាអាសន្នពីការបែងចែកប្លុកសេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:១៩
សង្រ្គាមអ៊ុយក្រែននឹងធ្វើឲ្យប៉ះពាល់ដល់កំណើនពាណិជ្ជកម្មពិភពលោកក្នុងឆ្នាំ ២០២២នេះ និងទាញទម្លាក់កំណើនសេដ្ឋកិច្ចរបស់ពិភពលោកផងដែរ។ នៅក្នុងសន្និសីទសារព័ត៌មានឯទីក្រុងហ្សឺណែវនាថ្ងៃអង្គារ ១២មេសាម្សិលមិញ អ្នកស្រីអគ្គនាយិកា អូកុនហ្សូ អ៊ីវេឡា និយាយថាក្នុងពេលមានវិបត្តិមួយ គេត្រូវការធ្វើពាណិជ្ជកម្មកាន់តែច្រើន និងថាការរឹតត្បិតពាណិជ្ជកម្មនឹងគំរាមកំហែងដល់សុខុមាលភាពរបស់ក្រុមគ្រួសារនិងអាជីវកម្ម ព្រមទាំងធ្វើឲ្យសេដ្ឋកិច្ចពិភពលោកកាន់តែលំបាកក្នុងការងើបចេញពីវិបត្តិដែលបង្កឡើងដោយជំងឺកូវីដ១៩។
ក្នុងកាលៈទេសៈបែបនេះ អគ្គនាយិកាអង្គការពាណិជ្ជកម្មពិភពលោកថា បណ្តាប្រទេសនិងអង្គការស្ថាប័នអន្តរជាតិនានាត្រូវតែធ្វើការរួមគ្នា ដើម្បីសម្រួលដល់ការដោះដូរពាណិជ្ជកម្ម នៅចំពេលដែលបញ្ហាអតិផរណាកំពុងតែដាក់សម្ពាធយ៉ាងខ្លាំងទៅលើខ្សែសង្វាក់ផ្គត់ផ្គង់សំខាន់ៗ។
ប្រវត្តិសាស្ត្របានបង្រៀនយើងហើយថាការបែងចែកសេដ្ឋកិច្ចពិភពលោកទៅជាប្លុកប្រកួតប្រជែងគ្នា និងការបែរខ្នងដាក់ប្រទេសក្រីក្របំផុត មិនបាននាំពិភពលោកដើរឆ្ពោះទៅរកភាពរុងរឿង ឬសន្តិភាពឡើយ។ អ្នកស្រីអគ្គនាយិកាបានបន្ថែម។
គួរជ្រាបថា យោងតាមការព្យាករណ៍របស់អង្គការ WTO សេដ្ឋកិច្ចពិភពលោកនឹងកើនឡើង ២,៨% ក្នុងឆ្នាំ ២០២២នេះ ពោលគឺធ្លាក់ចុះ ១,៣%ពីការព្យាករណ៍មុនដែលមានចំនួន ៤,១%។
ការដាក់ទណ្ឌកម្មរបស់ក្រុមប្រទេសលោកខាងលិចលើរុស្ស៊ីនិងមហាសេដ្ឋីរុស្ស៊ីដែលស្និទ្ធនឹងលោកពូទីន ហាក់មានឥទ្ធិពលខ្លាំងលើការដោះដូរពាណិជ្ជកម្ម។ យ៉ាងណាក៏ដោយ អង្គការ WTO ថា សង្រ្គាមនៅអ៊ុយក្រែន មិនមែនជាកត្តាតែមួយគត់ដែលមានឥទ្ធិពលលើពាណិជ្ជកម្មពិភពលោកនាពេលបច្ចុប្បន្ននោះទេ។
វិធានការហ្សេរ៉ូកូវីដ-ការបិទខ្ទប់ដ៏តឹងរ៉ឹងនៅក្នុងប្រទេសចិន ក៏ជាកត្តារំខានដល់ការដឹកជញ្ជូនតាមផ្លូវទឹកមួយដែរ ដែលអាចនាំឲ្យមានការខ្វះខាតជាថ្មីនូវវត្ថុធាតុដើម ឬផលិតផលនានា និងធ្វើឲ្យមានអតិផរណាខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ