ប្រមុខអង្គការពាណិជ្ជកម្មពិភពលោកអបអរការព្រមព្រៀងបឋមព្យួរកម្មសិទ្ធិបញ្ញាវ៉ាក់សាំងកូវីដ
ប្រទេសជាតួអង្គសំខាន់ៗខាងផលិតវ៉ាក់សាំងកូវីដ១៩ ទាំង៤ បានស្រុះស្រួលគ្នា ជាលើកទីមួយ លើកកម្មសិទ្ធិបញ្ញាស្តីពីការផលិតវ៉ាក់សាំងកូវីដ១៩។ នេះបើតាមការអបអររបស់លោកស្រីអគ្គនាយិកាអង្គការពាណិជ្ជកម្មពិភពលោក អិនហ្កូហ្ស៊ី អូកុនហ្សូ អ៊ីវេឡា (Ngozi Okonjo-Iweala) ដែលអំពាវនាវឱ្យប្រទេសទាំងបួនជួយបញ្ចុះបញ្ចូលសមាជិកអង្គការផ្សេងទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
បន្ទាប់ពីបានចរចាគ្នាយ៉ាងយូរ និងឆ្លងកាត់ការលំបាកៗជាច្រើនមក សហភាពអឺរ៉ុប សហរដ្ឋអាមេរិក ឥណ្ឌា និងអាហ្វ្រិកខាងត្បូង បានព្រមព្រៀងគ្នា លើកកម្មសិទ្ធិបញ្ញា ជាករណីលើកលែង រាល់គ្រប់ពាណិជ្ជកម្មដែលមានពាក់ព័ន្ធនឹងការផលិតវ៉ាក់សាំងប្រឆាំងកូវីដ១៩។ នេះបើតាមសេចក្តីថ្លែងការណ៍អបអររបស់លោកស្រីអគ្គនាយិកាអង្គការពាណិជ្ជកម្មពិភពលោក ដោយជំរុញឱ្យ ភាគីទាំងបួនត្រូវបន្តធ្វើការច្រើនទៀត ដើម្បីបានធានាថា គ្រប់ប្រទេសជាសមាជិកអង្គការពាណិជ្ជកម្មពិភពលោកព្រមគាំទ្រគម្រោងរបស់ពួកគេ។
តាមទម្លាប់ អង្គការពាណិជ្ជកម្មពិភពលោកតែងសម្រេចកិច្ចការនានាតាមរយៈការសម្រុះសម្រួល ឱ្យមានការព្រមព្រៀងគ្នា។ ប្រធានបទលើកកម្មសិទ្ធិបញ្ញាថ្នាំវ៉ាក់សាំងកូវីដ និងផ្តល់ឱ្យប្រទេសក្រីក្រមានថ្នាំបង្ការ ធ្លាប់លើកមកជជែកក្នុងវេទិកាអង្គការពាណិជ្ជកម្មពិភពលោកដែរ នៅពេលឥណ្ឌានិងអាហ្វ្រិកខាងត្បូងធ្វើសំណើកាលពីឆ្នាំ២០២០ ប៉ុន្តែ ប្រទេសស្វីសបានបង្ហាញជំហរជំទាស់ដាច់ខាត។ ហើយក្រុមអ្នកការពារប្រយោជន៍ក្រុមហ៊ុនឱសថ ក៏មានជំហរដូចស្វីសដែរ។ ដោយគ្មានការជឿនលឿនទៅមុខ នៅទីបំផុត ប្រទេសទាំងពីរដដែល (ឥណ្ឌានិងអាហ្វ្រិកខាងត្បូង) សម្រេចចរចាជាក្រុមតូចៗវិញ ដោយមានការចូលរួមពីសហរដ្ឋអាមេរិក និងសហភាពអឺរ៉ុប។ ប៉ុន្មានសប្តាហ៍មកនេះ នៅសល់តែប្រទេសស្វីសមួយទេដែលបន្តរិះគន់ដោយចំហ ដំណើរការចរចានេះ ព្រោះសំអាងថាទម្រង់នៃការចរចាមិនស្របតាមគោលការណ៍គ្រឹះរបស់អង្គការ។
ផ្ទុយពីស្វីស លោកស្រីអគ្គនាយិកាអង្គការពាណិជ្ជកម្មពិភពលោកគាំទ្រ និងចាត់ទុកការប្រឹងសម្រុះសម្រួលរបស់ប្រទេសទាំងបួន ជាដំណើរបែបបទឈានទៅសម្រេចកិច្ចព្រមព្រៀង ចុងក្រោយ។ តែលោកស្រីបានព្រមានឱ្យសហភាពអឺរ៉ុប សហរដ្ឋអាមេរិក ឥណ្ឌា និងអាហ្វ្រិកខាងត្បូង ត្រូវបើកការពិគ្រោះយោបល់ ដោះស្រាយចំណុចលម្អិតឱ្យអស់ និងត្រូវផ្តើមយកគម្រោងកិច្ចព្រមព្រៀងទៅពិភាក្សាជាមួយគ្រប់សមាជិកអង្គការពាណិជ្ជកម្មពិភពលោក។
ប្រទេសកំពុងអភិវឌ្ឍន៍ជាច្រើន គាំទ្រដោយអង្គការក្រៅរដ្ឋាភិបាល រាប់ទាំងអង្គការសុខភាពពិភពលោក យល់ថាការលើកកម្មសិទ្ធិបញ្ញា នឹងសម្រួលឱ្យមានការចែករំលែកចំណេះដឹងនិងបង្កើនមណ្ឌលផលិតវ៉ាក់សាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ