អគ្គលេខាធិការអូតង់ព្រមានថាសង្រ្គាមអ៊ុយក្រែននឹងអូសបន្លាយច្រើនឆ្នាំទៀត
ចុះផ្សាយនៅថ្ងៃ៖
ស្តាប់ - ០៧:៣៥
ប្រធានាធិបតីអ៊ុយក្រែនបានសន្យានៅថ្ងៃអាទិត្យទី១៩ មិថុនាថា អ៊ុយក្រែននឹងវាយដណ្តើមយកឲ្យបានមកវិញនូវតំបន់ភាគខាងត្បូងពីកណ្តាប់ដៃរុស្ស៊ី។ នៅក្នុងបទសម្ភាសន៍ដែលចុះផ្សាយក្នុងកាសែតអាល្លឺម៉ង់ នៅថ្ងៃអាទិត្យ អគ្គលេខាធិការអង្គការអូតង់ លោកបានព្រមានថា សង្រ្គាមអ៊ុយក្រែននឹងអូសបន្លាយពេលវែង យូរតទៅទៀត។ អ៊ុយក្រែនមានសមត្ថភាពវាយដណ្តើមយកទឹកដីរបស់ខ្លួនពីដៃរុស្ស៊ីវិញ ដែរឬទេ?
សង្រ្គាមឈ្លានពានរបស់រុស្ស៊ីនៅទឹកដីអ៊ុយក្រែនបានឈានចូលដល់ថ្ងៃទី ១១៦ គិតមកត្រឹមថ្ងៃអាទិត្យទី ១៩មិថុនានេះ។ នៅបន្ទាប់ពីដំណើរទៅជួបកងទ័ពនៅសមរភូមិប្រយុទ្ធនៅភាគខាងត្បូង ប្រធានាធិបតីអ៊ុយក្រែន លោកហ្សេឡេនស្គី បានសន្យាថា នឹងមិនព្រមព្រលែងចោលទឹកដីភាគខាងត្បូងសោះឡើយ។ អ៊ុយក្រែននឹងប្រយុទ្ធដណ្តើមយកទឹកដីរបស់ខ្លួនមកវិញ។
ប្រធានាធិបតីអ៊ុយក្រែន លោកហ្សេឡេនស្គីបានសន្យាយ៉ាងដូច្នេះ នៅបន្ទាប់ពីលោកធ្វើដំណើរជាលើកទី១ ទៅកាន់សមរភូមិជួរមុខ នៅទីក្រុងMykolaiv ភាគខាងត្បូង ប្រទេសអ៊ុយក្រែន កាលពីថ្ងៃសៅរ៍ទី ១៨មិថុនា។ ទីក្រុងMykolaivដែលកំពុងស្ថិតក្រោមការកាន់កាប់របស់អ៊ុយក្រែន ជាទីតាំងយុទ្ធសាស្រ្ត ព្រោះវាស្ថិតនៅចន្លោះទីក្រុងKherson ដែលធ្លាក់ក្រោមការកាន់កាប់របស់កងទ័ពរុស្ស៊ី និងទីក្រុងឆ្នេរសមុទ្រOdessa ដែលមានកំពង់ផែសេដ្ឋកិច្ច កន្លែងស្តុកស្រូវសាលីដ៏ធំរបស់អ៊ុយក្រែន។
អ៊ុយក្រែនប្រហែលគ្មានសមត្ថភាពកងទ័ព និងគ្រឿងសព្វាវុធដើម្បីយកឈ្នះរុស្ស៊ីដែលជាមហាអំណាចរុស្ស៊ី ប៉ុន្តែ អ៊ុយក្រែនមានប្រជាជនដែលទឹកចិត្តមោះមុតដើម្បីប្រយុទ្ធការពារទឹកដីរបស់ខ្លួន។ ជាក់ស្តែង គឺប្រធានាធិបតីអ៊ុយក្រែន លោកហ្សេឡេនស្គីតែម្តងដែលបានបង្ហាញជំហរមិនចុះញ៉មរុស្ស៊ី។ នៅពេលធ្វើដំណើរទៅជួបកងកម្លាំងប្រដាប់អាវុធនៅតំបន់សមរភូមិប្រយុទ្ធនៅភាគខាងត្បូងអ៊ុយក្រែន ក្បែរសមុទ្រខ្មៅ កាលពីថ្ងៃសៅរ៍ម្សិលមិញ ប្រធានាធិបតីអ៊ុយក្រែនបាននិយាយលើកទឹកចិត្តកងទ័ព ដោយថា ដរាបណាពួកគេនៅតែមានជីវិត ពួកគេជាជញ្ជាំងដ៏រឹងមាំដែលអាចការពារអ៊ុយក្រែន។ រុស្ស៊ីជាមហាអំណាចយោធា មានសព្វាវុធ និងកងទ័ពច្រើនមែនហើយ ប៉ុន្តែ សម្រាប់ប្រធានាធិបតីអ៊ុយក្រែន ចំនួនគ្រាប់មីស៊ីលរបស់រុស្ស៊ី មានមិនស្មើនឹងទឹកចិត្តចង់រស់រានមានជីវិតរបស់ប្រជាជនអ៊ុយក្រែននោះទេ។
នៅក្រោយធ្វើដំណើរទៅទីក្រុងMykolaiv ដែលជាកំពុងក្លាយជាទីតាំងសមរភូមិប្រយុទ្ធជាយុទ្ធសាស្រ្តនៅតំបន់ភាគខាងត្បូង ប្រធានាធិបតីអ៊ុយក្រែន បានសន្យាហើយថា អ៊ុយក្រែននឹងវាយដណ្តើមយកទឹកដីទាំងអស់របស់ខ្លួនមកកាន់កាប់វិញ នោះបើទោះបីជាទឹកដីខាងត្បូងមួយផ្នែកធំរបស់ខ្លួន ដូចជាទីក្រុងKhersonម៉ារីយូប៉ូលជាដើមបានធា្លក់ក្នុងដៃរបស់កងទ័ពរុស្ស៊ីរួចហើយក៏ដោយ។
តាមការវាយតម្លៃរបស់ Tony Radakin ប្រធានសេនាធិការកងទ័ពអង់គ្លេស ដែលចុះផ្សាយដោយទីភ្នាក់ងារព័ត៌មានអង់គ្លេស PA កាលពីថ្ងៃសុក្រ រុស្ស៊ីអាចបោះជំហានទៅមុខមែន ក្នុងសមរភូមិភាគខាងកើតអ៊ុយក្រែន ប៉ុន្តែ រុស្ស៊ីតាមពិតកំពុងបរាជ័យ ក្នុងផ្នែកយុទ្ធសាស្រ្តធ្វើសង្រ្គាម ព្រោះថារុស្ស៊ីរបស់លោកពូទីនបានចំណាយកងទ័ព និងសព្វាវុធប្រមាណ២៥%របស់ខ្លួនសម្រាប់គ្រាន់តែដណ្តើមបានទឹកដីតិចតួចរបស់អ៊ុយក្រែន។ តាមមន្រ្តីយោធាអង់គ្លេសដដែល អ៊ុយក្រែនអាចយ៉ាប់ច្រើន ព្រោះត្រូវធ្វើសង្រ្គាមរយៈពេលយូរតទៅទៀត ប៉ុន្តែ អ៊ុយក្រែននៅតែមានជំនួយគាំទ្រពីប្រទេសអឺរ៉ុប ក្នុងនោះមានផងដែរអង់គ្លេស។
លោកJens Stoltenbergថា សង្រ្គាមអ៊ុយក្រែននឹងអូសបន្លាយពេលវែងយូរឆ្នាំតទៅទៀត
អគ្គលេខាធិការអូតង់និយាយថា សង្រ្គាមអ៊ុយក្រែននឹងអូសបន្លាយវែងយូរឆ្នាំ ព្រោះលោកចង់ឲ្យគេត្រៀមខ្លួន ដោយមិនត្រូវចុះទន់ដៃចុះខ្សោយនោះទេ។ តាមអគ្គលេខាធិការអង្គការអូតង់ ជំនួយគាំទ្រអ៊ុយក្រែនដែលកំពុងរងការឈ្លានពានពីរុស្ស៊ី មិនមែនគ្មានផលវិបាកនោះទេ។ វានឹងធ្វើឲ្យគេចំណាយច្រើនផ្នែកសព្វាវុធសម្រាប់ជួយអ៊ុយក្រែន ហើយលើសពីនោះទៀត ពិភពលោកក៏មកត្រូវប្រឈមវិបត្តិខ្វះថាមពល ទំនិញឡើងថ្លៃ ដោយសារតែសង្រ្គាមអូសបន្លាយពេលនៅអ៊ុយក្រែន។ បើតាមប្រមុខអូតង់ ផលវិបាកនឹងកាន់តែធ្ងន់ធ្ងរជាងនេះទៀត បើសិនគេបណ្តោយឲ្យរុស្ស៊ីរបស់លោកពូទីនសម្រេចគោលដៅ នៅអ៊ុយក្រែន ដូចដែលលោកពូទីនបានសម្រេចកាត់យកទឹកដីគ្រីមេរបស់អ៊ុយក្រែន កាលពីឆ្នាំ ២០១៤។
ទោះជាត្រូវជួបផលវិបាកដូចសព្វថ្ងៃនេះ គេត្រូវតែនៅបន្តជួយផ្តល់អាវុធដែលអ៊ុយក្រែនត្រូវការ។ សម្រាប់អគ្គលេខាធិការអូតង់ ជំនួយសព្វាវុធទំនើបរបស់ប្រទេសលោកខាងលិចនឹងអាចជួយឲ្យអ៊ុយក្រែនមានឱកាស សមត្ថភាពវាយរុញច្រានកងទ័ពរុស្ស៊ីនៅក្នុងសមរភូមិនៅតំបន់ដុនបាស់ ភាគខាងកើតអ៊ុយក្រែន។
នៅថ្ងៃពុធសប្តាហ៍នេះ អាមេរិកទើបបានប្រកាសផ្តល់ជំនួយយោធា ១ពាន់លានដុល្លារបន្ថែមទៀតសម្រាប់ជួយកងទ័ពអ៊ុយក្រែន។ នៅក្នុងកិច្ចប្រជុំកំពូលរបស់អូតង់នៅអេស្ប៉ាញ នៅចុងខែមិថុនា ប្រទេសសមាជិកអូតង់ទាំង ៣០ប្រទេស រួមជាមួយអូស្ត្រាលី ជប៉ុនកូរ៉េខាងត្បូង នឹងត្រូវពិភាក្សាគ្នាដើម្បីសម្រេចផ្តល់កញ្ចប់ជំនួយយោធាថ្មីបន្ថែមសម្រាប់ជួយអ៊ុយក្រែន ដើម្បីធ្វើសង្រ្គាមទប់ទល់នឹងការវាយប្រហារឈ្លានពានរបស់រុស្ស៊ី។
អ៊ុយក្រែនត្អូញត្អែរថា ការបញ្ជូនអាវុធរបស់ប្រទេសអូតង់យឺត មិនទាន់សភាពការណ៍
ចាប់តាំងពីត្រូវរុស្ស៊ី ចូលធ្វើសង្រ្គាមឈ្លានពាន ជាង៣ខែនេះ អ៊ុយក្រែនបានបាត់បង់សព្វាវុធប្រមាណ៥០%របស់ខ្លួនដោយសារតែការបាញ់បំផ្លាញរបស់គ្រាប់មីស៊ីលរុស្ស៊ី។ នៅសប្តាហ៍នេះ មន្រ្តីយោធាអាមេរិកក៏ធ្លាប់និយាយដែរថា អ៊ុយក្រែនបានប្រើអស់គ្មានសល់សព្វាវុធដែលផលិតតាំងពីសម័យសហភាពសូវៀត។ ដូច្នេះ ឥលូវនេះ អ៊ុយក្រែនត្រូវការសព្វាវុធទាំងស្រុងពីប្រទេសលោកខាងលិច។ ជាការពិត ប្រទេសលោកខាងលិចបានប្រកាសបន្តបន្ទាប់បញ្ជូនជំនួយសព្វាវុធទៅឲ្យអ៊ុយក្រែន ប៉ុន្តែ អ៊ុយក្រែនត្អូញត្អែរថា ខ្លួនបានទទួលប្រមាណតែ ១០%ប៉ុណ្ណោះ ពោលគឺមិនគ្រប់គ្រាន់ ឆ្លើយតបនឹងតម្រូវការរបស់អ្នកប្រយុទ្ធអ៊ុយក្រែន ដែលកំពុងប្រចាំការនៅសមរភូមិប្រយុទ្ធនៅតំបន់ភាគខាងកើត ដែលមានប្រវែង ជាង១ពាន់គីឡូម៉ែត្រ។ តាមមន្រ្តីយោធាអ៊ុយក្រែន អ្នកប្រយុទ្ធអ៊ុយក្រែនសព្វថ្ងៃ ដែលចូលដល់ចំនួនរាប់លាននាក់ កំពុងរង់ចាំអាវុធពីប្រទេសលោកខាងលិច។
នៅក្នុងសារទ្វីតរបស់រដ្ឋមន្រ្តីការពារជាតិអ៊ុយក្រែន អ៊ុយក្រែនត្រូវការបន្ទាន់ ពីប្រទេសសមាជិកអូតង់ ដូចជា ប្រព័ន្ធរ៉ុកកែតជាង៣០០គ្រឿង រថក្រោះ២ពាន់គ្រឿង និងយន្តហោះដ្រូនជាង១ពាន់គ្រឿង។
ប៉ុន្តែ ពីខាងភាគីអាមេរិកដែលនាំមុខគេខាងផ្តល់ជំនួយយោធាឲ្យអ៊ុយក្រែន ការបញ្ជូនសព្វាវុធទៅអ៊ុយក្រែន ត្រូវការពេលវេលាយូរ ព្រោះថា ដំបូងគេត្រូវបង្ហាត់បង្រៀនអ៊ុយក្រែន ចេះប្រើអាវុធដ៏ទំនើបរបស់អាមេរិកជាមុនសិន។ កន្លងមក កងទ័ពអ៊ុយក្រែន ចេះប្រើតែសព្វាវុធដែលផលិតឡើងនៅសម័យសហភាពសូវៀត ប៉ុន្តែ ពួកគេមិនធ្លាប់ប្រើសព្វាវុធទំនើបរបស់ប្រទេសលោកខាងលិចនោះទេ។ គេត្រូវការបង្ហាត់បង្រៀនឲ្យកងទ័ពអ៊ុយក្រែនជាមុនសិន ដើម្បីឲ្យច្បាស់ក្នុងចិត្តថា សព្វាវុធរបស់អូតង់នឹងមិនត្រូវគេប្រើដោយឥតប្រយោជន៍ ខាតការណ៍នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ