វ៉ាស៊ីនតោនថា អ៊ុយក្រែនប្រើអស់ គ្មានសល់សព្វាវុធសម័យសហភាពសូវៀត
នៅក្នុងសង្រ្គាមរុស្ស៊ីឈ្លានពានអ៊ុយក្រែនជាង៣ខែមកនេះ គ្រឿងសព្វាវុធរបស់អ៊ុយក្រែន ដែលនៅ សល់ ផលិត តាំងពីសម័យសហភាពសូវៀត ត្រូវបានកងទ័ពអ៊ុយក្រែនប្រើប្រាស់អស់គ្មានសល់។ ចំណែកស្តុកសព្វាវុធ មួយចំនួនទៀតត្រូវបំផ្លាញខ្ទេចខ្ទី នៅក្នុងការវាយប្រហាររបស់កងទ័ពរុស្ស៊ី។ តាមមន្រ្តីយោធាអាមេរិក ដែលដកស្រង់សំដីដោយទីភ្នាក់ងារព័ត៌មានបារាំង AFP កងទ័ពអ៊ុយក្រែនសព្វថ្ងៃកំពុងពឹងអាស្រ័យទាំងស្រុងលើអាវុធយុទ្ធភ័ណ ដែលក្រុមប្រទេសលោកខាងលិចបានផ្តល់ឲ្យអ៊ុយក្រែន សម្រាប់ធ្វើសង្រ្គាមទប់ទល់រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ធ្លាប់ជាប្រទេសក្នុងលំហសហភាពសូវៀត កងទ័ពនិងឧស្សាហកម្មការពារជាតិអ៊ុយក្រែនត្រូវបានកសាងឡើង ដោយយកទៅតាម ខ្នាត ស្តង់ដាសូវៀត និង រុស្ស៊ី ដូចជា អាវុធធុនតូច រថក្រោះ និងកាំភ្លើងធំសម្រាប់បាញ់យន្តហោះជាដើម។ សព្វាវុធរបស់អ៊ុយក្រែនខុសប្លែកទាំងស្រុងពីសព្វាវុធដែលប្រទេសជិតខាងរបស់អ៊ុយក្រែន នៅអឺរ៉ុបខាងលិច ប្រើសម្រាប់បំពាក់ឲ្យកងទ័ពរបស់ខ្លួន។
គ្រាដំបូងដែលរុស្ស៊ីចូលធ្វើសង្រ្គាមឈ្លានពានអ៊ុយក្រែន អូតង់ដែលនាំមុខដោយអាមេរិកបានរារែកមិនបញ្ជូនអាវុធទៅឲ្យអ៊ុយក្រែន ដោយខ្លាចនឹងអាចធ្លាក់ចូលក្នុងសង្រ្គាមផ្ទាល់ជាមួយរុស្ស៊ី។ មានមូលហេតុមួយទៀត ដែលអាមេរិក និងប្រទេសអឺរ៉ុបដទៃទៀត មិនចង់បញ្ជូនសព្វាវុធរបស់ខ្លួនទៅតាមការទទូចសុំរបស់អ៊ុយក្រែន។ នោះគឺកងទ័ពអ៊ុយក្រែន មិនចេះប្រើសព្វាវុធរបស់ប្រទេសលោកខាងលិច។ ម្យ៉ាង ដើម្បីបង្ការ ការពារកុំឲ្យសព្វាវុធ និងបច្ចេកវិទ្យាយោធារបស់ខ្លួន ធ្លាក់ក្នុងដៃរបស់កងទ័ពរុស្ស៊ី អូតង់ និងអាមេរិកបានដើរបញ្ចុះបញ្ចូលប្រទេសអតីតសហសូវៀត ឲ្យបញ្ជូនទៅជួយកងទ័ពអ៊ុយក្រែន។
តាមមន្រ្តីយោធាអាមេរិក នៅក្នុងសង្រ្គាមអ៊ុយក្រែន ជាង៣ខែមកនេះ សព្វាវុធផលិតឡើងនៅសម័យសហភាពសូវៀត បានបាត់មុខពីសមរភូមិ ដោយសារទី១ កងទ័ពអ៊ុយក្រែនប្រើអស់គ្មានសល់ និងទី២ ដោយសារទីតាំងស្តុកសព្វាវុធភាគច្រើនរបស់អ៊ុយក្រែន ត្រូវរុស្ស៊ីបាញ់បំផ្លាញខ្ទេចខ្ទី។
ក្នុងហេតុផលជួយគាំទ្រអ៊ុយក្រែន ដើម្បីប្រយុទ្ធការពារទឹកដីនៅចំពោះមុខការឈ្លានពានរបស់រុស្ស៊ី ប្រទេសលោកខាងលិចគ្មានជម្រើសអ្វីក្រៅពីបញ្ជូនសព្វាវុធទំនើបថ្មីទៅឲ្យកងទ័ពអ៊ុយក្រែន។ នៅដើមខែមិថុនានេះ អាមេរិកបានប្រកាសជំនួយយោធាតម្លៃ ៧០០លានដុល្លារ ទៅជួយអ៊ុយក្រែន។ ប៉ុន្តែ អ៊ុយក្រែនតែងត្អូញត្អែរថា ជំនួយសព្វាវុធរបស់ប្រទេសលោកខាងលិច យឺតយ៉ាវ មិនទាន់សភាពការណ៍សង្រ្គាមដែលកំពុងក្តៅគគុក នៅភាគខាងកើតអ៊ុយក្រែន។
តាមមន្រ្តីអាមេរិក ដែលដកស្រង់សំដីដោយទីភ្នាក់ងារព័ត៌មានបារាំង AFP អាមេរិកផ្តល់សព្វាវុធទៅឲ្យអ៊ុយក្រែន ដោយសន្សឹមៗ មិនប្រញាប់ពេកនោះទេ ព្រោះដើម្បីឲ្យប្រាកដច្បាស់ក្នុងចិត្តថា កងទ័ពអ៊ុយក្រែនចេះប្រើអាវុធ ដ៏មានទំនើបរបស់អាមេរិក ដូចជា មីស៊ីលប្រឆាំងយន្តហោះ ឬប្រព័ន្ធបាញ់គ្រាប់មីស៊ីលចម្ងាយឆ្ងាយ ឈ្មោះHimars ដែលអ៊ុយក្រែនចង់បាន។ បើតាម មេបញ្ជាការកងទ័ពអាមេរិក លោកMark Milley អាមេរិកកំពុងត្រៀមបញ្ជូនប្រព័ន្ធមីស៊ីលHimars ៤គ្រឿងទៅឲ្យអ៊ុយក្រែន ប៉ុន្តែ ដំណើរការបញ្ជូនត្រូវការពេលវេលាយ៉ាងហោច ៧សប្តាហ៍។ ក្នុងដំណាក់កាលនេះ អាមេរិកត្រូវការបណ្តុះបណ្តាលទាហានអ៊ុយក្រែន ឲ្យចេះប្រើវាឲ្យមានប្រសិទ្ធិភាព ជាមុនសិន។ មួយវិញទៀត ដោយបញ្ជូនអាវុធ ជាដំណាក់កាល អាមេរិក និងសម្ព័ន្ធមិត្ត មិនចង់ឲ្យអាវុធរបស់ខ្លួនមានស្តុកច្រើនក្នុងទឹកដី អ៊ុយក្រែន ដែលនឹងអាចក្លាយជាគោលដៅបាញ់បំផ្លាញ របស់កងទ័ពរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ