វេទិកាសេដ្ឋកិច្ចពិភពលោក៖ប្រមុខអង្គការអូតង់ព្រមានរុស្ស៊ី និងអំពាវនាវឲ្យទាញយកមេរៀនពីសង្រ្គាមអ៊ុយក្រែន
វេទិកាសេដ្ឋកិច្ចពិភពលោកកំពុងបន្តធ្វើនៅក្នុងទីក្រុងដាវ៉ូស ប្រទេសស៊្វីស។ ថ្លែងនាឱកាសនោះ អគ្គលេខាធិការអង្គការអូតង់លោកយែន ស្តុលទែនប៊ែរបានបញ្ជូនសារថ្មីយ៉ាងម៉ឺងម៉ាត់ទៅកាន់ប្រធានាធិបតីរុស្ស៊ីលោកវ្ល៉ាឌីមៀរ ពូទីន។ លោកយែន ស្តុលទែនប៊ែរបានរម្លឹកប្រាប់លោកពូទីនថា កងកម្លាំងសន្ធិសញ្ញាអាត្លង់ទិកខាងជើងកំពុងមានវត្តមានច្រើនជាងពេលណាៗទាំងអស់នៅជាប់ព្រំដែនរបស់ប្រទេសរុស្ស៊ី។ ក្រៅពីរុស្ស៊ី ប្រមុខអង្គការអូតង់ក៏បាននិយាយពីចិនដែលជាប្រទេសផ្តាច់ការមួយទៀតដែលមានគោរពច្បាប់ជាមូលដ្ឋានដែលផ្អែកលើសណ្តាប់ធ្នាប់អន្តរជាតិ។ ទន្ទឹមគ្នានេះ លោកយែន ស្តុលទែនប៊ែរបានអំពាវនាវឲ្យអ្នកចូលរួមនៅក្នុងវេទិកាសេដ្ឋកិច្ចក្រុងដាវ៉ូសទាំងអស់ទាញយកមេរៀនពីសង្រ្គាមរុស្ស៊ីឈ្លានពានអ៊ុយក្រែនពេលនេះ។ មេរៀននោះ គឺគេមិនត្រូវធ្វើសម្បទានសន្តិសុខសម្រាប់រយៈពេលយូរអង្វែងដើម្បីតែផលប្រយោជន៍សេដ្ឋកិច្ចរយៈពេលខ្លីនោះទេ។
ចុះផ្សាយនៅថ្ងៃ៖
ស្តាប់ - ០១:២១
« សង្រ្គាមក្នុងប្រទេសអ៊ុយក្រែនបានបង្ហាញឲ្យឃើញយ៉ាងច្បាស់ក្រឡែតថា ទំនាក់ទំនងសេដ្ឋកិច្ចជាមួយរបបផ្តាច់ការអាចបង្កើតឲ្យមានភាពងាយរងគ្រោះ។ យើងបានឃើញសម្ព័ន្ធភាពគ្មានសមាមាត្រសម្រាប់ការនាំចូលទំនិញយុទ្ធសាស្ត្រដូចជាថាមពល ហានិភ័យដែលបានបង្កើតឡើងដោយការនាំចេញបច្ចេកវិទ្យាជឿនលឿនដូចជាបញ្ញាសិប្បនិមិត្ត និងការចុះខ្សោយនៃភាពធន់របស់យើងដែលបណ្តាលមកពីការគ្រប់គ្រងរបស់បរទេសលើហេដ្ឋារចនាសម្ព័ន្ធយុទ្ធសាស្ត្រដូចយ៉ាងបណ្តាញទូរគមនាគមន៍ 5G។
ត្រង់ចំណុចនេះ ខ្ញុំចង់និយាយសំដៅប្រទេសរុស្ស៊ី រួមទាំងប្រទេសចិនដែលជារបបផ្តាច់ការមួយទៀតដែលមិនចែករំលែកតម្លៃរបស់យើង និងមិនបានគោរពច្បាប់ជាមូលដ្ឋានដែលផ្អែកលើសណ្តាប់ធ្នាប់អន្តរជាតិ។ ពិតណាស់ ពាណិជ្ជកម្មអន្តរជាតិប្រហែលបាននាំមកនូវវិបុលភាពដ៏ធំសម្បើមអស្ចារ្យ។ តែយើងត្រូវហ៊ានទទួលស្គាល់ថា ជម្រើសសេដ្ឋកិច្ចរបស់យើងបានជះផលវិបាកដល់សន្តិសុខរបស់យើង ហើយថា ការពារតម្លៃរបស់យើងគឺវាសំខាន់ជាងទទួលបានផលចំណេញទៅទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ