អាល្លឺម៉ង់៖G៧ បើកកិច្ចប្រជុំកំពូលប្រចាំឆ្នាំនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:១០
ក្រុមប្រទេសមហាអំណាចឧស្សាហកម្មទាំង ៧ប្រទេសក្នុងលោកហៅកាត់ G៧ បានបើកកិច្ចប្រជុំកំពូលរយៈពេល ៣ថ្ងៃនៅក្នុងប្រទេសអាល្លឺម៉ង់ដោយចាប់ផ្តើមនៅថ្ងៃអាទិត្យ ទី២៦ មិថុនា។ មានការកត់សម្គាល់ចំនួនពីរនៅក្នុងកិច្ចប្រជុំកំពូល G៧ ឆ្នាំ ២០២២ នេះ ទី១ ការចូលរួមដោយផ្ទាល់របស់មេដឹកនាំទាំង ៧ប្រទេស និងទី២ សង្រ្គាមរុស្ស៊ីឈ្លានពានអ៊ុយក្រែនបានឈានចូលដល់ខែទី៥។ តាមគម្រោង ប្រធានាធិបតីអ៊ុយក្រែនលោកហ្សេឡេនស្គីនឹងថ្លែងតាមវីដេអូទៅកាន់មេដឹកនាំ G៧ នៅថ្ងៃចន្ទ ទី២៧ មិថុនា។
មានសំណុំរឿងច្រើនដែល G៧ គ្រោងលើកយកទៅជជែកនៅក្នុងកិច្ចប្រជុំកំពូលប្រចាំឆ្នាំរយៈពេល ៣ថ្ងៃ ក្នុងនោះមានសង្រ្គាមរុស្ស៊ីឈ្លានពានអ៊ុយក្រែន បញ្ហាអាកាសធាតុ បញ្ហាអតិផរណាដែលកំពុងកើនឡើងខ្លាំងនៅក្នុងប្រទេសមួយចំនួនរួមទាំងប្រទេសសមាជិក G៧ ផង វិបត្តិថាមពល ឬមួយក៏វិបត្តិស្បៀងអាហារ។ តែគេមិនត្រូវភ្លេចនិយាយទេថា បញ្ហាអតិផរណា វិបត្តិថាមពល ឬមួយក៏វិបត្តិស្បៀងអាហារបានកើតកាន់តែខ្លាំងដោយសារសង្រ្គាមរុស្ស៊ីឈ្លានពានអ៊ុយក្រែន។ នៅក្នុងសង្រ្គាមមួយនេះ ក្រុមប្រទេសបស្ចិមលោកបានពួតដៃគ្នាជួយអ៊ុយក្រែនគ្រប់យ៉ាង និងដាក់ទណ្ឌកម្មសេដ្ឋកិច្ចចាស់ដៃប្រឆាំងរុស្ស៊ី។ គោលដៅរបស់បស្ចិមលោក គឺខ្ទប់ដង្ហើមសេដ្ឋកិច្ចរុស្ស៊ី។
តែបញ្ហានៅត្រង់ថា វិធានការទណ្ឌកម្មសង្កត់ ក រុស្ស៊ីរបស់បស្ចិមលោកមិនបានធ្វើឲ្យរុស្ស៊ីលានអណ្តាតតែម្នាក់ទេ ពោលបាន និងកំពុងជះផលវិបាកខ្លាំងដល់ពិភពលោកទាំងមូល។ កំណើនអតិផរណា ប្រេងសាំងឡើងថ្លៃ គ្រាប់ធញ្ញជាតិ និងស្រូវសាលីឡើងថ្លៃសុទ្ធសឹងជាវិបត្តិដែលកើតចេញពីសង្រ្គាមរុស្ស៊ីឈ្លានពានអ៊ុយក្រែន និងដែលក្រុមប្រទេស G៧ ត្រូវដោះស្រាយជាបន្ទាន់នៅក្នុងកិច្ចប្រជុំកំពូលរយៈពេល ៣ថ្ងៃនៅក្នុងប្រទេសអាល្លឺម៉ង់។ ក្រៅពីនេះ មេដឹកនាំ G៧ ក៏កំពុងព្យាយាមពង្រីកប្លុកប្រជាធិបតេយ្យមួយដើម្បីទប់នឹងប្លុកបង្កើតឡើងដោយរុស្ស៊ី និងចិន។
នៅក្នុងន័យនេះ G៧ បានអញ្ជើញមេដឹកនាំប្រទេសឥណ្ឌូណេស៊ី ឥណ្ឌា សេណេហ្កាល់ អាហ្រ្វិកខាងត្បូង និងប្រទេសអាហ្សង់ទីនឲ្យចូលរួមនៅក្នុងកិច្ចប្រជុំកំពូលពេលនេះ។
មាសរុស្ស៊ីជាផ្ទាំងស៊ីបទណ្ឌកម្មរបស់ G៧
សង្រ្គាមរុស្ស៊ីឈ្លានពានអ៊ុយក្រែនបានគ្របដណ្តប់ខ្លាំងនៅក្នុងកិច្ចប្រជុំកំពូល G៧។ ក្រៅពីទណ្ឌកម្មប្រឆាំងរុស្ស៊ីនៅក្នុងវិស័យប្រេង ឧស្ម័ន ឬប្រព័ន្ធទូទាត់ហិរញ្ញវត្ថុអន្តរជាតិ G៧ កំពុងសំឡឹងឃើញមាសរុស្ស៊ីមួយទៀត។ រហូតមកដល់ពេលនេះ និងបើតាមសំណេររបស់ប្រធានាធិបតីអាមេរិកលោកចូ បៃដិននៅក្នុងទំព័រ tweeter របស់លោក មានប្រទេសសមាជិក G៧ ចំនួន ៤ប្រទេស គឺអាមេរិក អង់គ្លេស កាណាដា និងជប៉ុនបានប្រកាសពីការមិនទិញមាសរុស្ស៊ី។ ចំណែកប្រទេសសមាជិកចំនួន ៣ប្រទេសទៀត គឺបារាំង អ៊ីតាលី និងអាល្លឺម៉ង់ក៏ប្រហែលនឹងដើរតាមផ្លូវសមាជិកទាំង ៤ ប្រទេសដែរ។
ចូរកុំភ្លេចថា រុស្ស៊ីជាប្រទេសជង្រុករ៉ែមាសដ៏សំខាន់មួយក្នុងលោកដែលការនាំចេញមាសក្នុងឆ្នាំ ២០២១ មានទឹកប្រាក់ជិត ១៥ ០០០លានដុល្លារ។ សម្រាប់រុស្ស៊ី មាសជាផលិតផលនាំចេញលំដាប់ទី២ បន្ទាប់ពីប្រេង និងឧស្ម័ន។ នៅក្នុងបរិមាណមាសដែលរុស្ស៊ីបាននាំចេញមានដល់ទៅ ៩០% បានលក់ទៅឲ្យក្រុមប្រទេស G៧ ក្នុងនោះ អង់គ្លេសបានទិញច្រើនជាងគេ។ ដូច្នេះ ការឈប់ទិញមាសរុស្ស៊ីនឹងធ្វើឲ្យរុស្ស៊ីបាត់បង់ចំណូលថ្មីមួយទៀតដើម្បីចិញ្ចឹមសង្រ្គាមនៅអ៊ុយក្រែន។
នេះជាកម្មវត្ថុដែល G៧ ចង់បាន។ តែក៏ដូចជាទណ្ឌកម្មលើប្រេង និងឧស្ម័ន រុស្ស៊ីមិនឈឺក្បាល និងគ្មានជម្រើសអ្វីក្រៅពីលក់ទៅឲ្យប្រទេសផ្សេងទេ ទោះត្រូវលក់ក្នុងតម្លៃថោកក៏ដោយ។
ការសន្យាមានច្រើននៅលើក្រដាស
ក្រៅពីបន្តការគាំទ្រអ៊ុយក្រែននៅចំពោះមុខការឈ្លានពានរបស់រុស្ស៊ី G៧ ត្រូវបន្តដោះស្រាយវិបត្តិអាកាសធាតុដែលពិភពលោកកំពុងប្រឈមសព្វថ្ងៃ។ តាមពិត វិបត្តិអាកាសធាតុនេះមិនមែនជារឿងថ្មីដែលទ្រឹស្តីមានច្រើនជាងការអនុវត្តន៍ជាក់ស្តែង។ គ្រោះទឹកជំនន់ កម្ពស់ទឹកមានកាន់តែខ្ពស់ និងគ្រោះរាំងស្ងួតសុទ្ធសឹងជាបាតុភូតដែលកំពុងកើតមានច្រើន និងញឹកញាប់នៅក្នុងប្រទេសជាច្រើននារយៈពេលរយៈពេលចុងក្រោយនេះ។ ជាក់ស្តែងនៅអាហ្រ្វិក គ្រោះរាំងស្ងួតបានធ្វើឲ្យប្រជាជនជាង ១៨លាននាក់កំពុងប្រឈមនឹងវិបត្តិអសន្តិសុខស្បៀងអាហារ។ នេះដោយនៅមិនទាន់រាប់បញ្ចូលពីវិបត្តិខ្វះស្បៀងដែលបង្កឡើងដោយសង្រ្គាមរុស្ស៊ីឈ្លានពានអ៊ុយក្រែន។
លោកអូឡាហ្វ ស្ហុលស៍ នាយករដ្ឋមន្រ្តីអាល្លឺម៉ង់ និងជាម្ចាស់ផ្ទះរៀបចំកិច្ចប្រជុំកំពូល G៧ បានធានាថា G៧ បន្តគាំទ្រកិច្ចព្រមព្រៀងក្រុងប៉ារីសស្តីពីអាកាសធាតុដែលបានចែង ២ចំណុចសំខាន់ ទី១ មិនឲ្យកម្តៅនៅក្នុងផែនដីកើនលើសពី ១,៥អង្សារធៀបនឹងសម័យមុនឧស្សាហកម្ម និងទី២ ឈានទៅមានអព្យាក្រឹត្យកាបូននៅឆ្នាំ ២០៥០។ តែគោលដៅមួយនេះអាចពិបាកសម្រេចដោយសារតែសង្រ្គាមរុស្ស៊ីឈ្លានពានអ៊ុយក្រែន។ ខណៈដែលអឺរ៉ុបបានកាត់បន្ថយការទិញប្រេង ឧស្ម័នរុស្ស៊ី និងចំពេលដែលតម្លៃប្រេងកំពុងឡើងថ្លៃខ្លាំង មានប្រទេសអឺរ៉ុបខ្លះបានងាកទៅប្រើធ្យូងថ្មជំនួសវិញ។ រីឯក្រុមសកម្មជនបរិស្ថានបានមើលឃើញផ្ទុយទៅវិញថា ប្រេងឡើងថ្លៃជាឱកាសអនុញ្ញាតឲ្យ G៧ ពន្លឿនការអភិវឌ្ឍន៍លើថាមពលបៃតង។
ក្នុងរឿងវិបត្តិអាកាសធាតុនេះដដែល G៧ ត្រូវពិនិត្យមើលឡើងវិញលើការសន្យារបស់ខ្លួនដើម្បីជួយក្រុមប្រទេសកំពុងអភិវឌ្ឍដែលកំពុងប្រឈមនឹងការប្រែប្រួលអាកាសធាតុ។ G៧ ធ្លាប់បានសន្យាជួយចំនួន ១០០ ០០០លានដុល្លារក្នុងមួយឆ្នាំចាប់ពីឆ្នាំ ២០២០ ដើម្បីឲ្យប្រទេសទាំងនេះសម្របខ្លួនទៅនឹងបម្រែបម្រួលអាកាសធាតុ។ តែមកដល់ពេលនេះ ការសន្យានៅមិនបានគោរពត្រឹមត្រូវទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ