អង់គ្លេសប្រកាសថាមេដឹកនាំហ្សេ៧នឹងជួបពិភាក្សាគ្នាពីបញ្ហាអាហ្វហ្កានីស្ថាន
មេដឹកនាំនៃក្រុមប្រទេសមហាអំណាចឧស្សាហកម្មទាំង៧ (G7) នឹងបើកកិច្ចពិភាក្សាអនឡាញស្តីអំពីវិបត្តិនៅអាហ្វហ្កានីស្ថាននាថ្ងៃអង្គារ ទី២៤ សីហាស្អែក។ នេះបើតាមការប្រកាសរបស់នាយករដ្ឋមន្រ្តីអង់គ្លេសលោកបូរីស ចនសុន នៅមួយសប្តាហ៍បន្ទាប់ពីក្រុងកាប៊ុលធ្លាក់ក្នុងដៃក្រុមតាលីបង់។
ចុះផ្សាយនៅថ្ងៃ៖
ស្តាប់ - ០២:២៥
កម្មវត្ថុនៃកិច្ចពិភាក្សារបស់មេដឹកនាំប្រទេសមហាអំណាចឧស្សាហកម្មទាំង៧ គឺដើម្បីរិះរកវិធីដោះស្រាយបញ្ហាដែលកំពុងកើតមាននៅព្រលានយន្តហោះក្រុងកាប៊ុល និងស្វែងរកវិធីកាពារកុំឲ្យស្ថានការណ៍នៅអាហ្វហ្កានីស្ថានកាន់តែធ្លាក់ដុនដាបខ្លាំង។
រយៈពេល១សប្តាហ៍ តាំងពីរដ្ឋធានីកាប៊ុលធ្លាក់ក្នុងដៃពួកតាលីបង់មក មានជនបរទេស ជនជាតិអាហ្វហ្កានីស្ថាន និងអ្នកធ្លាប់ធ្វើការឲ្យកងកម្លាំងបរទេសយ៉ាងច្រើន ព្យាយាមរត់ភៀសខ្លួនដើម្បីសុវត្ថិភាព។ នៅឯព្រលានយន្តហោះក្រុងកាប៊ុល មួយថ្ងៃៗគេឃើញពេញព្រៀបទៅដោយមនុស្សជាច្រើនពាន់នាក់។
នាយករដ្ឋមន្ត្រីអង់គ្លេសលោកបូរីស ចនសុន បានឲ្យដឹងថាវាមានសារៈសំខាន់ណាស់ដែលសហគមន៍អន្តរជាតិធ្វើការរួមគ្នាដើម្បីធានាដល់ការជម្លៀសប្រកបដោយសុវត្ថិភាព ទប់ស្កាត់វិបត្តិមនុស្សធម៌ និងជួយដល់ប្រជាជនអាហ្វហ្កានីស្ថាន។
គួរជ្រាបថា សម្ព័ន្ធមិត្តលោកខាងលិចកំពុងប្រឈមនឹងការរិះគន់យ៉ាងខ្លាំងទាក់ទងចំណាត់ការដោះស្រាយវិបត្តិនៅអាហ្វហ្កានីស្ថាន ជាពិសេសនៅបន្ទាប់ពីភាពច្របូកច្របល់នៅឯព្រលានយន្តហោះក្រុងកាប៊ុល បានបណ្តាលឲ្យជនស៊ីវិលអាហ្វហ្កានីស្ថានជាច្រើននាក់ស្លាប់។
ប្រធានាធិបតីអាមេរិក លោកចូ បៃដិនដែលកំពុងរងការរិះគន់ជុំទិសនឹងជួបជាមួយមេដឹកនាំ G7 ដើម្បីសម្របសម្រួលគោលនយោបាយ ពិភាក្សាអំពីប្រតិបត្តិការជម្លៀស និងជំនួយមនុស្សធម៌។
កាលពីថ្ងៃអាទិត្យម្សិលមិញ អាមេរិករបស់លោកបៃដិន ក៏បានឲ្យដឹងដែរថានឹងប្រើយន្តហោះពាណិជ្ជកម្មប្រមាណ ១៨ គ្រឿងដើម្បីជួយក្នុងប្រតិបត្តិការដឹកជម្លៀសជនជាតិអាមេរិក និងសម្ព័ន្ធមិត្តអាហ្វហ្កានីស្ថានចេញពីទីក្រុងកាប៊ុល។
ប្រមុខការពារជាតិអាមេរិក លោក ឡយដ៍ អូស្ទីន បានគូសបញ្ជាក់ថាក្រុងវ៉ាស៊ីនតោននឹងព្យាយាមឲ្យអស់ពីសមត្ថភាពដើម្បីជួយអ្នករាល់គ្នា គ្រប់ពលរដ្ឋអាមេរិកដែលចង់ចាកចេញពីអាហ្វហ្កានីស្ថាន។ ហើយវិធានការរបស់ក្រុងវ៉ាស៊ីនតោននេះនឹងអនុវត្តដូចគ្នាដែរ ចំពោះ ជនជាតិអាហ្វហ្កានីស្ថានដែលធ្លាប់ធ្វើការឲ្យអាមេរិក។
បើតាមមន្ទីរបញ្ចកោណ មានជនជាតិអាមេរិករហូតដល់ប្រមាណ ១៥ ០០០ នាក់ និងសម្ព័ន្ធមិត្តអាហ្វហ្កានីស្ថានខ្ទង់ ៥០ ០០០ ទៅ ៦០ ០០០នាក់ដែលគេត្រូវជម្លៀសចេញពីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ