សង្រ្គាមរុស្ស៊ីឈ្លានពានអ៊ុយក្រែនបានធ្វើឲ្យអង្គការអូតង់ភ្លឺភ្នែក និងភ្ញាក់ខ្លួន
ចុះផ្សាយនៅថ្ងៃ៖
ស្តាប់ - ០៦:៥០
អង្គការនៃសន្ធិសញ្ញាអាត្លង់ទិកខាងជើង ឬហៅកាត់ជាភាសាបារាំង « អូតង់ » បានបើកកិច្ចប្រជុំកំពូលរយៈពេល ៣ថ្ងៃនៅក្នុងប្រទេសអេស្ប៉ាញដោយចាប់ផ្តើមពីថ្ងៃអង្គារ ទី២៨ មិថុនា។ កិច្ចប្រជុំកំពូលនេះបានធ្វើឡើង ខណៈដែលរុស្ស៊ីកំពុងបន្តសង្រ្គាមឈ្លានពាននៅអ៊ុយក្រែន និងចំពេលដែលតួកគីកំពុងបន្តរារាំងប្រទេសស៊ុយអែត និងប្រទេសហ្វាំងឡង់មិនឲ្យចូលជាសមាជិកអូតង់។ សម្រាប់ប្រមុខអង្គការអូតង់លោកយែន ស្តុលទែនប៊ែរ អូតង់បានធ្វើដំណើរមកដល់ផ្លូវរបត់ដើម និងថា កិច្ចប្រជុំកំពូលពេលនេះជាឱកាសមួយដើម្បីកំណត់ចេញនូវគោលយុទ្ធសាស្រ្តថ្មី។
សង្រ្គាមរុស្ស៊ីឈ្លានពានអ៊ុយក្រែនបានធ្វើឲ្យអង្គការអូតង់ភ្លឺភ្នែក និងភ្ញាក់ខ្លួន។ តាមរយៈសង្រ្គាមមួយនេះ អង្គការអូតង់ត្រូវបង្ខំចិត្តធ្វើកំណែទម្រង់ស៊ីជ្រៅដើម្បីសម្របខ្លួនទៅនឹងបរិបទពិភពលោកបច្ចុប្បន្នដែលខុសគ្នាឆ្ងាយពីពិភពលោកកាលពីជាង ៧០ឆ្នាំមុន។ ពិភពលោកបច្ចុប្បន្នកំពុងទទួលការគំរាមកំហែងថ្មីចំនួនពីរ គឺសង្រ្គាមកូនកាត់ និងការវាយប្រហារតាមអ៊ីធឺនែត។ ចូរកុំភ្លេចថា អង្គការនៃសន្ធិសញ្ញាអាត្លង់ទិកខាងជើងបានបង្កើតឡើងតាំងពីឆ្នាំ ១៩៤៩ ពោលក្នុងសម័យសង្រ្គាមត្រជាក់ដើម្បីប្រឈមទប់នឹងសហភាពសូវៀត។ ក្រោយការដួលរលំសហភាពសូវៀតក្នុងឆ្នាំ ១៩៩១ អូតង់ហាក់លែងចាត់ទុករុស្ស៊ីជាអ្នកបង្ករឿង និងជាការគំរាមកំហែងសន្តិសុខនៅអឺរ៉ុបទៀតឡើយ។
ផ្ទុយទៅវិញ អូតង់ថែមបានសំឡឹងឃើញរុស្ស៊ីជាដៃគូយុទ្ធសាស្រ្តដ៏សំខាន់មិនអាចខ្វះបានក្នុងការចូលរួមបង្កើតលំហសន្តិសុខ សន្តិភាព និងស្ថិរភាពនៅអឺរ៉ុបទៀតផង។ ជាក់ស្តែងនៅក្នុងកិច្ចប្រជុំកំពូលកាលពីឆ្នាំ ២០១០ ក្នុងប្រទេសព័រទុយហ្កាល់ អូតង់បានអនុម័តនូវគោលយុទ្ធសាស្រ្តចុងក្រោយរបស់ខ្លួនដោយបានបោះដៃរករុស្ស៊ី និងចាត់ទុករុស្ស៊ីជាដៃគូយុទ្ធសាស្រ្ត។ តែនៅ ១២ឆ្នាំក្រោយមក រុស្ស៊ីបែរជាបានបង្ហាញជំហរថ្មី និងមុខផ្សេងដែលផ្ទុយនឹងការមើលឃើញរបស់អូតង់ទៅវិញ។ ក្រោយពីបានក្រសោកយកតំបន់គ្រីមេរបស់អ៊ុយក្រែនក្នុងឆ្នាំ ២០១៤ រុស្ស៊ីបានលើកទ័ពចូលឈ្លានពានអ៊ុយក្រែនទាំងមូល។
ប្រមុខអង្គការអូតង់លោកយែន ស្តុលទែនប៊ែរមិនញញើតនិយាយថា ជាង ៧០ឆ្នាំក្រោយមក អូតង់បានដើរមកដល់ផ្លូវដើមជាថ្មីដែលរុស្ស៊ីបានក្លាយជាអ្នកបង្ករឿង និងជាការគំរាមកំហែងសន្តិសុខនៅអឺរ៉ុបដូចកាលសម័យសហភាពសូវៀត។
ប្រធានរឿងអាទិភាពនៅចំពោះមុខ
អង្គការអូតង់ត្រូវសើរើពិនិត្យមើលឡើងវិញនូវគោលយុទ្ធសាស្រ្តរបស់ខ្លួនដើម្បីសម្របខ្លួនទៅនឹងបរិបទពិភពលោកសព្វថ្ងៃ។ តែមានចំណុចស្នូលមួយដែលអូតង់មិនត្រូវប៉ះពាល់ គឺមាត្រា៥ ដែលចែងពីកាតព្វកិច្ចរបស់អូតង់ក្នុងការចូលជួយសមាជិករបស់ខ្លួនដែលទទួលរងការវាយប្រហារពីប្រទេសផ្សេង។ គួរបញ្ជាក់ថាសព្វថ្ងៃ អូតង់មានសមាជិកចំនួន ៣០ប្រទេស។ ក្រៅពីមិនប៉ះពាល់លើមាត្រា ៥ អូតង់ត្រូវស្វែងរកគោលយុទ្ធសាស្រ្តថ្មី ឬរូបមន្តថ្មីដែលអាចទទួលយកបានពីសមាជិកទាំងអស់នៅក្នុងកិច្ចប្រជុំកំពូលរយៈពេល ៣ថ្ងៃនៅក្នុងប្រទេសអេស្ប៉ាញ។
ខ្លឹមសារនៅក្នុងគោលយុទ្ធសាស្រ្តថ្មី ឬរូបមន្តថ្មីដែលអូតង់ត្រូវលើកយកទៅជជែករួមមាន ការឲ្យនិយមន័យពិតប្រាកដលើការគំរាមកំហែងរបស់រុស្ស៊ី ការដាក់បញ្ចូលចិនជាប្រទេសប្រឈម ឬជាប្រទេសគំរាមកំហែង ការកំណត់ឲ្យបានច្បាស់ពីទំនាក់ទំនងរវាងអូតង់ និងសហភាពអឺរ៉ុប ការកំណត់កញ្ចប់ថវិកាចំណាយក្នុងវិស័យការពាររបស់ប្រទេសសមាជិកនីមួយៗ ការកំណត់វិភាគទានដែលប្រទេសសមាជិកនីមួយៗត្រូវបង់ ការបង្កើនចំនួនកម្លាំងទ័ព និងគ្រឿងសព្វាវុធ ឬមួយក៏ការបន្ថែមសមាជិកថ្មីដែលខណៈនេះមានបេក្ខភាព ២ប្រទេស គឺស៊ុយអែត និងហ្វាំងឡង់។
ទាំងនេះដោយមិនភ្លេចនិយាយទេពីការបន្តគាំទ្រ និងជួយអ៊ុយក្រែនជាអាវុធដើម្បីបន្ត ត តាំងនឹងរុស្ស៊ី។ ឃើញថា មិនខ្វះទេប្រធានរឿងដែលសមាជិកទាំង ៣០ប្រទេសត្រូវលើកយកទៅជជែក និងត្រូវស្វែងរកកុងសង់ស៊ុសរួម។
បន្តគាំទ្រអ៊ុយក្រែន និងទប់រុស្ស៊ីកុំឲ្យឆ្លងហួសព្រំដែនអ៊ុយក្រែន
គេនៅមិនទាន់អាចនិយាយពីលទ្ធផលដែលអូតង់នឹងសម្រេចបានទេ ព្រោះអ្វីៗអាស្រ័យលើការប្តេជ្ញាចិត្ត និងឆន្ទៈរបស់ប្រទេសសមាជិកម្នាក់ៗ។ អ្វីដែលគេអាចនិយាយបាន មានប្រធានរឿងអាទិភាព និងបន្ទាន់មួយចំនួនដែលអូតង់មិនអាចបន្តអូសបន្លាយបានទៀតឡើយ។ ជាក់ស្តែងមានប្រធានរឿង ៣សំខាន់ ទី១ ការបន្ថែមប្រទេសស៊ុយអែត និងប្រទេសហ្វាំងឡង់ជាសមាជិកថ្មី។ រហូតមកដល់ពេលនេះ មានតែប្រទេសតួកគីម្នាក់គត់ដែលកំពុងយកជើងរាទឹក។ តាមពិត ប្រធានាធិបតីតួកគីលោកអ៊ែរដូហ្កានបានស្តីបន្ទោសស៊ុយអែត និងហ្វាំងឡង់ពីបទបានគាំទ្រ និងផ្តល់ជម្រកឲ្យក្រុមសកម្មជនរបស់គណបក្សពលករគួដឌីស្ថាន PKK ដែលតួកគីចាត់ទុកជាអង្គការភេរវនិយម។
មានកត្តាចំនួនពីរដែលអាចពន្លឿនបញ្ចូលស៊ុយអែត និងហ្វាំងឡង់ទៅក្នុងអង្គការអូតង់ ទី១ ការធានាពិតប្រាកដ និងច្បាស់លាស់ពីថ្នាក់ដឹកនាំស៊ុយអែត និងហ្វាំងឡង់ចំពោះតួកគីក្នុងរឿងការចោទប្រកាន់របស់តួកគី និងទី២ អន្តរាគមន៍របស់អាមេរិកដោយសន្យាលើកទណ្ឌកម្មចេញពីតួកគី។ ប្រធានរឿងសំខាន់ទី២ អូតង់គ្រោងបង្កើនកម្លាំងអន្តរាគមន៍របស់ខ្លួនពី ៤០ ០០០នាក់ដល់ ៣០០ ០០០នាក់។ កម្លាំងអន្តរាគមន៍ពហុជាតិដែលបំពាក់ដោយបច្ចេកវិទ្យាទំនើបនេះមានកម្លាំងជើងគោក ជើងទឹក និងជើងអាកាស រួមទាំងកម្លាំងពិសេសដែលអាចដាក់ពង្រាយយ៉ាងឆាប់រហ័ស។ ចំណែកប្រធានរឿងសំខាន់ទី៣ ចុងក្រោយ គឺបង្កើនទំនាក់ទំនងរវាងអូតង់ និងសហភាពអឺរ៉ុប។
ពិតណាស់ អឺរ៉ុបគ្មានរចនាសម្ព័ន្ធការពាររួមនៅឡើយទេ។ តែបារាំងចង់ឲ្យអូតង់បញ្ចូលអឺរ៉ុបជាកម្លាំងមួយដើម្បីចូលរួមពង្រឹងកម្លាំងរបស់អូតង់។ សរុបមកវិញ មានកិច្ចការច្រើនណាស់ដែលអូតង់ត្រូវដោះស្រាយដោយមិនអាចពន្យារពេលបានទៀតឡើយ។ បើពុំនោះសោតទេ រុស្ស៊ីនឹងបន្តវាតទីឥទ្ធិពលយោធាកាន់តែធំលើសពីព្រំដែនអ៊ុយក្រែនទៅទៀត។ នេះដោយនៅមិនទាន់រាប់បញ្ចូលពីកំណើនឥទ្ធិពលរបស់ចិននៅកន្លែងផ្សេងទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ