អង់គ្លេស៖នាយករដ្ឋមន្រ្តីលោកបូរីស ចនសុនកំពុងអង្គុយលើកៅអីដែលកំពុងបន្តជ្រុះខ្ចៅ
ចុះផ្សាយនៅថ្ងៃ៖
ស្តាប់ - ០៧:១៨
នៅក្នុងប្រទេសអង់គ្លេស ក្រោយរដ្ឋមន្រ្តីក្រសួងសុខាភិបាល និងរដ្ឋមន្រ្តីក្រសួងហិរញ្ញវត្ថុបានលាចុះពីតំណែងគួរឲ្យភ្ញាក់ផ្អើលនាយប់ថ្ងៃអង្គារ ទី៥ កក្កដា រដ្ឋលេខាធិការទទួលបន្ទុកកុមារ និងគ្រួសារបានលាចុះពីតំណែងក្នុងថ្ងៃពុធ ទី៦ កក្កដា។ ការលាចុះពីតំណែងរបស់ឥស្សរជនទាំង ៣រូបពេលនេះបានធ្វើឲ្យនាយករដ្ឋមន្រ្តីលោកបូរីស ចនសុនចុះខ្សោយមួយកម្រិតទៀត ខណៈដែលលោកកំពុងរួមរឹតដោយរឿងអាស្រូវជាច្រើន។ តែទោះជាយ៉ាងនេះក្តី លោកចនសុនបានបន្តបដិសេធមិនចុះចេញពីកៅអីនាយករដ្ឋមន្រ្តីទេនៅពេលនេះ។
មូលហេតុសំខាន់ដែលបានធ្វើឲ្យសមាជិករដ្ឋាភិបាលទាំង ៣រូបសម្រេចចិត្តលាចុះពីតំណែងពេលនេះ គឺមិនពេញចិត្តនឹងការដឹកនាំរបស់លោកបូរីស ចនសុន។ នៅក្នុងលិខិតលាលែងផ្ញើទៅឲ្យលោកចនសុន រដ្ឋមន្រ្តីក្រសួងសុខាភិបាលលោកសាយីដ យ៉ាវីដបានបញ្ជាក់ថា លោកមានការសោកស្តាយដែលស្ថានការណ៍របស់ប្រទេសគ្មានការផ្លាសប្តូរនៅក្រោមការដឹកនាំរបស់លោកចនសុន និងថា លោកលែងជឿទុកចិត្តលើលោកចនសុនទៀតឡើយ។ ហេតុផលស្រដៀងគ្នានេះក៏មាននៅក្នុងលិខិតលាលែងរបស់រដ្ឋមន្រ្តីក្រសួងហិរញ្ញវត្ថុលោករីស្ហ៊ី ស៊ូណាក់ដែរ។ « ពលរដ្ឋអង់គ្លេសកំពុងរង់ចាំឲ្យរដ្ឋាភិបាលដឹកនាំប្រទេសឲ្យបានត្រឹមត្រូវ ឲ្យមានប្រសិទ្ធិភាព និងឲ្យបានប្រាកដប្រជា » នេះជាខ្លឹមសារនៅក្នុងសំបុត្រលាលែងរបស់លោករីស្ហ៊ី ស៊ូណាក់។
គួរបញ្ជាក់ថាសម្រាប់លោកចនសុន ការលាចុះពីតំណែងរបស់រដ្ឋមន្រ្តីទាំងពីររូបនេះជាការបាត់បង់ទម្ងន់មួយធំនៅក្នុងរដ្ឋាភិបាលរបស់លោក។ ឆ្លៀតក្នុងឱកាសនេះ គណបក្សពលករដែលជាបក្សប្រឆាំង រួមទាំងឥស្សរជននយោបាយខ្លះក្នុងគណបក្សអភិរក្សនិយមរបស់លោកចនសុនបានអំពាវនាវជាថ្មីឲ្យលោកចនសុនចុះចេញពីតំណែង។ « ក្រោយផ្ទុះរឿងអាស្រូវ និងកំហុសឆ្គង វាច្បាស់ណាស់ថា រដ្ឋាភិបាលកំពុងដួលរលំហើយ » នេះជាចំណាប់អារម្មណ៍របស់ប្រធានគណបក្សប្រឆាំងលោក Keir Starmer។ ចំណែកលោក David Frost អតីតរដ្ឋលេខាធិការទទួលបន្ទុក Brexit ដែលបានលាចុះពីតំណែងក្នុងខែធ្នូ ឆ្នាំ ២០២១ បានយល់ឃើញថា ការលាចុះពីតំណែងរបស់រដ្ឋមន្រ្តីសុខាភិបាល និងរដ្ឋមន្រ្តីហិរញ្ញវត្ថុជារឿងត្រឹមត្រូវ និងបានទាមទារឲ្យលោកចនសុនចុះចេញពីតំណែងដូចគ្នា។
កុំថាឡើយគណបក្សប្រឆាំង និងឥស្សរជនក្នុងគណបក្សអភិរក្សនិយមដែលជាបក្សកាន់អំណាច សូម្បីតែកាសែតដែលមានលក្ខណៈអភិរក្សមនិយមខ្លាំងក៏បានដាក់ចំណងជើងនៅក្នុងបទវិចារណកថាបែបដៀមដាមឲ្យលោកចនសុនថា « Game over »។
រឿងអាស្រូវនៅក្នុងរឿងអាស្រូវ
គេអាចនិយាយបានថា ការលាចុះពីតំណែងរបស់រដ្ឋមន្រ្តីសុខាភិបាល និងរដ្ឋមន្រ្តីហិរញ្ញវត្ថុពេលនេះជារឿងភ្ញាក់ផ្អើល និងមិនភ្ញាក់ផ្អើល។ មិនភ្ញាក់ផ្អើល ព្រោះវារឿងដែលគេបានរង់ចាំ ហើយភ្ញាក់ផ្អើល ព្រោះគេមិននឹកស្មានថា សមាជិករដ្ឋាភិបាលទាំង ៣រូបបានសម្រេចលាចុះពីតំណែងក្នុងពេលតែមួយ។ តាមពិតទៅ ការលាចុះពីតំណែងរបស់រដ្ឋមន្រ្តីសុខាភិបាល និងរដ្ឋមន្រ្តីហិរញ្ញវត្ថុគ្រាន់ជាដំណក់ទឹកមួយដែលបានទៅបំពេញនៅក្នុងកែវមួយដែលពេញប្រៀបហូរហៀរទៅហើយប៉ុណ្ណោះ មានន័យថា ជារឿងអាស្រូវនៅក្នុងរឿងអាស្រូវដែលបានធ្វើឲ្យលោកបូរីស ចនសុនវិលមុខ ឈឺក្បាលកាន់តែខ្លាំង។
គួរបញ្ជាក់ថា លោកចនសុនកំពុងរួមរឹតដោយរឿងអាស្រូវជាច្រើនឡើងល្វីងមុខ។ មុនគេ គឺរឿងអាស្រូវដែលលោកបានរៀបចំពិធីជប់លៀងនៅក្នុងគេហដ្ឋាននាយករដ្ឋមន្រ្តី ខណៈដែលប្រទេសកំពុងស្ថិតក្នុងការបិទខ្ទប់ដោយកូវីដ១៩ កាលពីឆ្នាំ ២០២១។ បន្ទាប់មក រឿងអាស្រូវផ្លូវភេទជាច្រើននៅក្នុងសភា ក្នុងនោះ មានតំណាងរាស្រ្តម្នាក់ដែលជាប់ចោទពីបទចាប់រំលោភត្រូវបានចាប់ខ្លួន រួចត្រូវបានដោះលែងបណ្តោះអាសន្ននៅពាក់កណ្តាលខែឧសភា និងតំណាងរាស្រ្តម្នាក់ទៀតបានលាចុះពីតំណែងក្នុងខែមេសា ក្រោយពីបានមើលកុនអាសអាភាសលើទូរស័ព្ទដៃនៅក្នុងសភា។
ទោះជាយ៉ាងនេះក្តី លោកចនសុនបានបន្តបដិសេធមិនលាចុះពីតំណែង។ ក្នុងថ្ងៃពុធ ទី៦ កក្កដា លោកចនសុនបានការពារខ្លួននៅក្នុងសភានាវេទិកាចោទសួរប្រចាំសប្តាហ៍។
ចុះចេញដោយខ្លួនឯង ឬត្រូវគេទម្លាក់ចេញ?
រហូតមកដល់ពេលនេះ លោកចនសុនហាក់មិនទាន់បានត្រៀមខ្លួនដើម្បីលាចុះពីតំណែងទេ។ តែគេអាចនិយាយបានថា លោកប្រហែលជាកំពុងបន្តតស៊ូដើម្បីដង្ហើមជីវិតនយោបាយជានាយករដ្ឋមន្រ្តីរបស់លោកជាលើកចុងក្រោយ។ ចូរកុំភ្លេចថា ជាមួយនឹងរឿងអាស្រូវរួមរឹតច្រើនរាប់មិនអស់ នាយករដ្ឋមន្រ្តីអង់គ្លេសរូបនេះបាន និងកំពុងបន្តបាត់បង់ការគាំទ្រ និងបាត់បង់ការជឿទុកចិត្តពីក្រុមឥស្សរជនក្នុងជួររដ្ឋាភិបាល រួមទាំងនៅផ្ទៃក្នុងគណបក្សអភិរក្សនិយមរបស់លោក។ ទន្ទឹមគ្នានេះ លោកចនសុនក៏ផ្តើមបាត់បង់ប្រជាប្រិយភាពពីប្រជាជនអង់គ្លេសដែរ។
តាមលទ្ធផលស្ទង់មតិរបស់វិទ្យាស្ថាន YouGov ចេញផ្សាយនៅយប់ថ្ងៃអង្គារ ទី៥ កក្កដា មានអ្នកបោះឆ្នោតអង់គ្លេសចំនួន ៦៩% ចង់ឃើញលោកចនសុនចុះចេញពីតំណែង។ ចំណែកនៅក្នុងចំណោមអ្នកបោះឆ្នោតឲ្យគណបក្សអភិរក្សនិយមក្នុងឆ្នាំ ២០១៩ ទាំង ៥៤% មានជាងពាក់កណ្តាលយល់ថា លោកចនសុនត្រូវចុះពីកៅអីនាយករដ្ឋមន្រ្តី។ គួររម្លឹកថា លោកចនសុនធ្លាប់បានរួចខ្លួនយ៉ាងប្រផុតប្រផើយនៅក្នុងការបោះឆ្នោតដកសេចក្តីទុកចិត្តនៅក្នុងសភាកាលពីដើមខែមិថុនាកន្លងទៅ។ តែលើកនេះ និងបើតាមមើលទៅ អនាគតជីវិតនយោបាយជានាយករដ្ឋមន្រ្តីរបស់លោកចនសុនបានដើរមកដល់ផ្លូវទាល់មួយដែលពិបាកបត់ស្តាំ ឬបត់ឆ្វេង។
ក្រៅពីការលាចុះពីតំណែងរបស់សមាជិករដ្ឋាភិបាលចំនួន ៣រូបក្នុងរយៈពេល ២ថ្ងៃគឺនឹងអាចមានអ្នកផ្សេងលាលែងជាបន្តបន្ទាប់ទៀត និងដែលអ្នកចុងក្រោយប្រហែលជាលោកបូរីស ចនសុនខ្លួនឯងតែម្តង។ ដូច្នេះគេអាចនិយាយបានថា រឿងលោកចនសុនចុះចេញដោយខ្លួនឯង ឬត្រូវគេបង្ខំជារឿងមិនអាចចៀសរួច។ សំណួរដែលកំពុងចោទឡើងគឺថា តើនៅពេលណា និងចុះចេញយ៉ាងម៉េច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ