កៅអីនាយករដ្ឋមន្ត្រីរបស់លោក បូរីស ចនសុន រង្គោះរង្គើខ្លាំងដោយសារតែកម្មវិធីជប់លៀងផ្ទួនៗ
ខ្យល់ព្យុះកំពុងតែបោកបក់ ខ្លាំងទៅៗ លើរដ្ឋាភិបាលអង់គ្លេស ដឹកនាំដោយលោកនាយករដ្ឋមន្ត្រី បូរីស ចនសុន។ រឿងអាស្រូវជាបន្តបន្ទាប់ ត្រូវបានទម្លាយ ទាក់ទិននឹងការរៀបចំកម្មវិធីជប់លៀងផ្ទួនៗគ្នា នៅក្នុងនិវេេសនដ្ឋានរបស់លោកនាយករដ្ឋមន្ត្រីរូបនេះ កាលពីឆ្នាំ២០២០ ខណៈដែលប្រទេសអង់គ្លេសទាំងមូល កំពុងស្ថិតនៅក្នុងការបិទខ្ទប់ទាំងស្រុង ដោយសារវិបត្តិកូវីដ។ អ្នកនយោបាយ ក៏ដូចជាប្រជាពលរដ្ឋអង់គ្លេស កំពុងរងចាំតាមដានលទ្ធផលស៊ើបអង្កេតផ្ទៃក្នុង ដែលនឹងអាចកំណត់ ពីវាសនាតំណែង របស់លោកបូរីស ចនសុន។
ចុះផ្សាយនៅថ្ងៃ៖
ស្តាប់ - ០២:៣២
ក្នុងអំឡុងពេលនេះ គឺជារដូវធ្លាក់ព្រឹលទឹកកកនៅអឺរ៉ុប តែសីតុណ្ហភាពនៅក្នុងអាគាររដ្ឋសភាអង់គ្លេស បានឡើងកំដៅកាន់តែខ្លាំងឡើង។ នៅក្នុងអង្គប្រជុំ សមាជិកសភាបក្សពលករ ដែលជាបក្សប្រឆាំង បានស្រែកស្តីបន្ទោសក្តែងៗ ទៅកាន់លោលនាយករដ្ឋមន្ត្រីបូរីស ចនសុន ដែលមកឆ្លើយការពារខ្លួន និងបានបដិសេធមិនព្រមចុះចេញពីតំណែង។
លោកបូរីស ចនសុន បានអះអាងថា រដ្ឋាភិបាលលោកមានការងារសំខាន់ៗត្រូវធ្វើច្រើនណាស់ នៅពេលនេះ ដូចជាការផ្តល់សន្ទុះសេដ្ឋកិច្ច និងការដោះស្រាយសំណុំរឿងអ៊ុយក្រែន ប្រឈមជាមួយរុស្ស៊ីជាដើម។ តែពាក្យដោះសាររបស់លោកបូរីស ចនសុន ត្រូវបានលោក Keir Starmer ប្រធានក្រុមសមាជិកសភាបក្សពលករ ចាត់ទុកថាជាការមាក់ងាយ មកលើប្រជាជាតិអង់គ្លេសទាំងមូល។
គួរបញ្ជាក់ថា ប៉ុន្មានសប្តាហ៍ចុងក្រោយនេះ បណ្តាញព័ត៌មានអង់គ្លេសបានចុះផ្សាយរឿងអាស្រូវ មួយហើយមួយទៀត ទាក់ទិននឹងការរៀបចំកម្មវិធីជប់លៀងផ្ទួនៗគ្នា នៅក្នុងនិវេសនដ្ឋានរបស់លោកនាយករដ្ឋមន្ត្រីបូរីស ចនសុន ក្នុងឆ្នាំ២០២០កន្លងទៅ។ កម្មវិធីជប់លៀងសប្បាយ ដែលធ្វើឲ្យមតិសាធារណៈអង់គ្លេស មិនអាចទទួលយកបាន ព្រោះអំឡុងពេលនោះ រដ្ឋាភិបាលលោកបូរីស ចនសុន បានដាក់ចុះនូវវិធានការតឹងតែងបំផុត ហាមឃាត់ប្រជាពលរដ្ឋមិនឲ្យចេញក្រៅ ឬជួបជុំគ្នាទេ ដើម្បីកាត់ផ្តាច់ការឆ្លងរាលដាលកូវីដ។
កាលពីសប្តាហ៍កន្លងទៅ លោកបូរីស ចនសុន បានថ្លែងសូមអភ័យទោសនៅចំពោះមុខអង្គសភា។ តែព្យុះសង្ឃរានេះមិនបានស្ងប់ទេ រឿងអាស្រូវមួយទៀត ត្រូវបានបើកទម្លាយដោយបណ្តាញទូរទស្សន៍ ITV ដែលអះអាងថា ភរិយាលោកបូរីស ចនសុន បានរៀបចំកម្មវិធីជប់លៀងខួបកំណើតឲ្យលោក នៅក្នុងបន្ទប់ប្រជុំគណរដ្ឋមន្ត្រីតែម្តង កាលពីខែមិថុនាឆ្នាំ២០២០ ដោយមានមនុស្សចូលរួមប្រមាណ៣០នាក់។ រឿងអាស្រូវថ្មីបន្ថែមទៀតនេះ បានរុញច្រានឲ្យមានការបើកការស៊ើបអង្កេតផ្ទៃក្នុង ដឹកនាំដោយលោកស្រី Sue Gray។ កាលពីថ្ងៃទី២៥មករា នគរបាលទីក្រុងឡុងដ៍ ក៏បានបើកការស៊ើបអង្កេតមួយដែរ ទាក់ទិននឹងកម្មវិធីជប់លៀងបំពានវិធានសុខាភិបាលទាំងនេះ។
សំឡេងទាមទារឲ្យលោកបូរីស ចនសុន ចុះចេញពីតំណែង បានបន្លឺឡើងកាន់តែច្រើន រួមទាំងមនុស្សក្នុងបក្សរបស់លោកផងដែរ។ របាយការណ៍សន្និដ្ឋានរបស់លោកស្រី មន្ត្រីជាន់ខ្ពស់ Sue Gray ដែលនឹងចេញផ្សាយក្នុងពេលឆាប់ៗនេះ អាចនឹងជំរុញឲ្យសមាជិកសភា បក្សរបស់លោកបូរីស ចនសុន ដែលមិនទាន់សម្រេចចិត្ត អាចប្រមូលគ្នាបានគ្រប់៥៤នាក់ ដើម្បីអាចបើកនីតិវិធីបោះឆ្នោតទំលាក់លោក ចេញពីកៅអីនាយករដ្ឋមន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ