បូរីស ចនសុន ទទួលកំហុសនិងសូមអភ័យទោស ដែលបានរៀបចកម្មវិធីជប់លៀងក្នុងពេលដែលប្រទេសត្រូវបិទខ្ទប់ដោយសារកូវីដ
កាលពីថ្ងៃពុធទី១២មករា នៅចំពោះអង្គសភាអង់គ្លេស លោកនាយករដ្ឋមន្ត្រីបូរីស ចនសុន បានថ្លែងទទួលស្គាល់កំហុស និងបានសូមអភ័យទោស ចំពោះការដែលលោកបានរៀបចំកម្មវិធីជប់លៀង នៅគេហដ្ឋានលោក កាលពីខែឧសភា ឆ្នាំ២០២០ ខណៈដែលប្រទេសអង់គ្លេសទាំងមូល ត្រូវបិទខ្ទប់ទាំងស្រុងដោយសារតែកូវីដ១៩។ ទោះយ៉ាងណា ការថ្លែងសូមអភ័យទោសពីសំណាក់លោកបូរីស ចនសុន គឺនៅមិនគ្រប់គ្រាន់ទេ ដោយសមាជិកសភាបានទាមទារឲ្យលោក លាចុះពីតំណែង។
ចុះផ្សាយនៅថ្ងៃ៖
ស្តាប់ - ០២:៥០
នៅចំពោះមុខអង្គសភា ក្នុងបរិកាសដ៏ក្តៅក្រេវក្រោធ លោកនាយករដ្ឋមន្ត្រីអង់គ្លេសបូរីស ចនសុន បានថ្លែងទទួលស្គាល់កំហុស និងបានសូមអភ័យទោសទៅកាន់ប្រជាពលរដ្ឋអង់គ្លេស។ ទន្ទឹមគ្នានេះដែរ លោកចសុន បានអះអាងថា កម្មវិធីជប់លៀង ដែលលោកបានរៀបចំ កាលពីថ្ងៃទី២០ឧសភា ឆ្នាំ២០២០ នៅក្នុងសួនច្បារនៃនិវេសនដ្ឋានរបស់លោកនោះ គឺជាការជួបជុំគ្នានិយាយពីការងារផង និងដោយបានគោរពវិធានរក្សាគម្លាតសង្គម។
ទោះយ៉ាងណាក៏ដោយ លោក ចនសុន បានទទួលស្គាល់កំហុស ដោយមិនបានគិតឲ្យបានវែងឆ្ងាយ ថាកម្មវិធីជួបជុំនោះ វាអាចធ្វើឲ្យប៉ះពាល់ដល់ទឹកចិត្ត របស់ប្រជាពលរដ្ឋអង់គ្លេស ក្នុងអំឡុងពេលនោះ ព្រោះប្រទេសកំពុងស្ថិតនៅក្នុងការបិទខ្ទប់ទាំងស្រុង ដោយសារតែបញ្ហាជំងឺឆ្លងកូវីដ១៩។
គួររំលឹកថា នៅក្នុងអំឡុងពេលខែឧសភា ឆ្នាំ២០២០ គឺជាពេលដែលអង់គ្លេសបានរងនូវរលកឆ្លងរាលដាលកូវីដ ដ៏ខ្លាំងក្លា។ រដ្ឋាភិបាលលោកបូរីស ចនសុន បានសម្រេចចេញវិធានការបិទខ្ទប់យ៉ាងតឹងតែងបំផុត ដោយមិនឲ្យមនុស្សលើសពី២នាក់ ជួបគ្នានៅខាងក្រៅទេ។ មានប្រជាជនអង់គ្លេសជាច្រើននាក់ ដែលមិនត្រូវបានគេអនុញ្ញាត ឲ្យចូលទៅសួរសុខទុក្ខ បងប្អូនសាច់ញាតិខ្លួន ដែលឈឺឆ្លងកូវីដ ឬដែលហៀបនឹងស្លាប់នៅនាទីចុងក្រោយជាដើម។
គួរបញ្ជាក់ថា ដំណឹងបែកធ្លាយ ដែលថាលោកនាយករដ្ឋមន្ត្រីអង់គ្លេសបានរៀបចំកម្មវិធីជប់លៀង យ៉ាងសប្បាយក្អាកក្អាយ នៅក្នុងអំឡុងពេលនេះ បានបង្កឲ្យប្រជាពលរដ្ឋអង់គ្លេស និងអ្នកនយោបាយបក្សប្រឆាំង តវ៉ារិះគន់ជាខ្លាំង។ កាលពីថ្ងៃចន្ទ ទី១០មករាថ្មីៗនេះ បណ្តាញទូរទស្សន៍ ITV បានផ្សាយអត្ថបទអ៊ីមែលមួយ ដែលលេខារបស់លោកបូរីន ចនសុន បានផ្ញើទៅកាន់មនុស្សប្រមាណ១០០នាក់ អញ្ជើញឲ្យពួកគេ មកចូលរួមជប់លៀង ដោយបញ្ជាក់ថា កុំភ្លេចយកភេសជ្ជៈមកផង ដើម្បីញ៉ាំកម្សាន្តសប្បាយជាមួយនឹងធាតុអាកាសល្អស្រស់បំព្រង។
លោក Keir Starmer ប្រធានក្រុមនយោបាយបក្សពលករ ដែលជាបក្សប្រឆាំង បានលើកឡើងថា ហេតុផល ក៏ដូចជាពាក្យសូមទោសរបស់លោកបូរីន ចនសុន គឺប្រៀបបីដូចជាពាក្យជេរប្រមាថមាក់ងាយ មកលើប្រជាជនអង់គ្លេសទាំងមូល។ យោងតាមបណ្តាញព័ត៌មានអង់គ្លេស គឺលោកបូរីស ចនសុន អាចនឹងត្រូវតែបង្ខំចិត្តលាលែងចេញពីតំណែង ក្នុងពេលខាងមុខនេះហើយ ព្រោះថាសូម្បីតែមនុស្សក្នុងបក្សអភិរក្សនិយមរបស់លោក ក៏ចាប់ផ្តើមលែងគាំទ្រដែរ បន្ទាប់ពីមានរឿងអាស្រូវជាបន្តបន្ទាប់។ ក្រៅពីករណីរៀបចំកម្មវិធីជប់លៀង ខណៈប្រទេសត្រូវបិទខ្ទប់ទាំងស្រុងនេះ លោកបូរីន ចនសុន ត្រូវបានគេចោទថាអំពីករណីក្លែងបន្លំប្រាក់ចំណាយ ជួសជុលនិវេសនដ្ឋានលោក ព្រមទាំងករណីបក្សពួកនិយមផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ