អង់គ្លេសប្រារព្ធខួប៧០ឆ្នាំនៃការគ្រងរាជ្យរបស់ព្រះមហាក្សត្រីយ៍
នៅថ្ងៃព្រហស្បត្តិ៍ ប្រទេសអង់គ្លេស ផ្តើមប្រារព្ធខួប៧០ឆ្នាំនៃការគ្រងសោយរាជ្យសម្បត្តិរបស់ព្រះមហាក្សត្រីយ៍។ ពិធីបុណ្យដ៏ឱឡារិកនេះ មានចំនួន៤ថ្ងៃ ចាប់ពីថ្ងៃទី២មិថុនា រហូតដល់ថ្ងៃអាទិត្យ ទី៥មិថុនា។ មានព្រះជន្មាយុ៩៦ឆ្នាំ ព្រះមហាក្សត្រីយ៍ Elizabeth ទី២ បានចេញសម្តែងព្រះភក្ត្រដ៏កម្រ នៅក្នុងឱកាសនេះ។
ចុះផ្សាយនៅថ្ងៃ៖
ស្តាប់ - ០២:២៦
ព្រះមហាក្សត្រីយ៍ Elizabeth ទី២ ជានិមិត្តរូបនៃការរួបរួមជាតិ និងនិរន្តរភាពជាតិ ហើយជាផ្លូវការ ទ្រង់គឺជាព្រះប្រមុខរដ្ឋសម្រាប់ប្រទេសនិងរាជាណាចក្រ ចំនួន ១៥ រាប់ចាប់តាំងពី អង់គ្លេស កាណាដា រហូតដល់ នូវេសេឡង់ ជាដើម។
ព្រះមហាក្សត្រីយ៍ Elizabeth ទី២ កាលពីខែតុលាឆ្នាំមុន ទ្រង់ធ្លាក់ព្រះកាយប្រឈួនចូលសម្រាកព្យាបាលនៅមន្ទីរមួយរាត្រី ហើយតាំងពីពេលនោះមក គេកម្រនឹងឃើញទ្រង់បង្ហាញព្រះភក្ត្រជាសាធារណៈណាស់។ ដូច្នេះ ការយាងចេញព្រះភក្ត្រនៅក្នុងឱកាសបុណ្យខួប៧០ឆ្នាំនៃការសោយរាជ្យសម្បត្តិនេះ គឺជាការទន្ទឹងរង់ចាំចង់ឃើញពីសំណាក់ប្រជានុរាស្ត្រអង់គ្លេស។ អង់គ្លេសដែលដាក់ចងទង់ជាតិពាសពេញផ្លូវ ហើយអាណាប្រជានុស្ត្រមានទឹកមុខរីករាយចេញពីផ្ទះទស្សនាព្រះរាជពិធី ដែលគេហែក្បួនសន្ធឹកសន្ទាប់តាមដងវិថី នៅក្រុងឡុង។
កម្មវិធីអបអរមានជាប់គ្នារដឹកចាប់ពីថ្ងៃនេះដល់ថ្ងៃអាទិត្យ។ ថ្ងៃសុក្រ មានការជួបជុំព្រះរាជវង្សានុវង្ស។ នារាត្រីថ្ងៃសៅរ៍ មានការសម្តែងមហាតន្ត្រី នៅព្រះបរមរាជវាំង និងបញ្ជាំងបន្តតាមកញ្ចក់ទូរទស្សន៍ ដែលគេរំពឹងថានឹងមានអ្នកមើលប្រមាណ ២២ ០០០នាក់។ ថ្ងៃអាទិត្យ មនុស្សប្រមាណ១ម៉ឺននាក់ នឹងធ្វើក្បួនដង្ហែ នៅកណ្តាលក្រុងឡុង ទៀតផង។
សូមរំឮកជូនថា ព្រះមហាក្សត្រីយ៍ Elizabeth ទី២ បានឡើងសោយរាជ្យបល្លង្ក នៅឆ្នាំ ១៩៥២។ ៧ទសវត្សរ៍ នៃរាជ្យសម្បត្តិ ក្នុងសតវត្សរ៍ទី២០និង២១ ដែលទ្រង់ឆ្លងកាត់សង្គ្រាមក៏ច្រើន វិបត្តិសកលលោកក៏ខ្លាំង។ ទ្រង់ក៏ត្រូវគេចាត់ទុកថា ជាស្តេចដែលគ្រងរាជ្យយូរជាងគេបំផុតក្នុងពិភពលោក នៅក្នុងចំនួន៣ព្រះអង្គ។ ២អង្គផ្សេងទៀត គឺ ស្តេចបារាំង ល្វីទី១៣ និងព្រះរាជសៀម រាម ទី៩ (Rama IX)។
មួយរយៈធំចុងក្រោយនេះ ព្រះមហាក្សត្រីយ៍ Elizabeth ទី២ ទ្រង់កម្រនឹងចេញសម្តែងព្រះភក្រនៅក្នុងឱកាសផ្សេងៗ។ ពិធីផ្លូវការមួយចំនួនត្រូវលុបចោលនិងលើកពេល ឬក៏ត្រូវជំនួសដោយព្រះរាជទាយាទរបស់ព្រះអង្គ។ ពីព្រោះថា ទ្រង់មានព្រះរាជសុខភាពពុំសូវល្អប៉ុន្មាននោះទេ ហើយស្តេចយាងដោយព្រះហត្ថកាន់ឈើច្រតទប់ជានិច្ច។ បើទោះជាយ៉ាងនេះក្តី ព្រះមហាក្សត្រីយ៍ Elizabeth ទី២ ក៏ពុំបានសម្តែងព្រះទ័យថា ចង់ដាក់រាជ្យសម្បត្តិ ឬលាលែងពីរាជបល្លង្ក ក៏ទេដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ