អង្គការសហប្រជាជាតិថា ការចរចារវាងអ៊ុយក្រែន រុស្ស៊ី ស្តីពីការនាំចេញស្រូវសាលី មានការរីកចម្រើនទៅមុខ
ខណៈដែលពិភពលោកកំពុងប្រឈមនឹងបញ្ហាខ្វះខាតស្បៀង ដោយសារសង្រ្គាម អ៊ុយក្រែន គ្រប់ក្រសែភ្នែកផ្តោតទៅលើជំនួបរុស្ស៊ី អ៊ុយក្រែន នៅទីក្រុងអ៊ីស្តង់ប៊ូល នៅក្រោមការជួយសម្របសម្រួលរបស់ប្រទេសតួកគី និងអង្គការសហប្រជាជាតិ។ នៅក្រោយការចរចា រយៈពេល ៣ម៉ោង កាលពីថ្ងៃពុធទី ១៣កក្កដា អគ្គលេខាធិការអង្គការសហប្រជាជាតិ បានថ្លែងថា ការចរចារុស្ស៊ីអ៊ុយក្រែនស្តីពីការបើកផ្លូវសមុទ្រខ្មៅសម្រាប់ការនាំចេញស្រូវសាលី អ៊ុយក្រែនបានរីកចម្រើនទៅមុខ។
ចុះផ្សាយនៅថ្ងៃ៖
ស្តាប់ - ០២:៥៦
ទទួលភារៈពីអង្គការសហប្រជាជាតិ ឲ្យសម្របសម្រួលការនាំចេញស្រូវសាលីអ៊ុយក្រែន ដែលកំពុងនៅជាប់គាំងនៅកំពង់ផែភាគខាងត្បូងអ៊ុយក្រែន តួកគីបានធ្វើជាម្ចាស់ផ្ទះរៀបចំកិច្ចប្រជុំ កាលពីថ្ងៃ ពុធ ដែលមានការចូលរួមពីមន្រ្តីយោធាអ៊ុយក្រែន និងរុស្ស៊ី។
នេះជាលើកទី២ ដែលរុស្ស៊ី និងអ៊ុយក្រែនបានជួបទល់មុខគ្នា ដើម្បីនិយាយពីការបញ្ចេញស្រូវសាលីរបស់អ៊ុយក្រែន បន្ទាប់ពីការចរចាបានបរាជ័យម្តង កាលពីខែមីនា។ នៅក្រោយកិច្ចប្រជុំបិទបញ្ចប់នៅទីក្រុងអ៊ីស្តង់ប៊ូល អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរក៍ បាននិយាយប្រាប់អ្នកកាសែតថា ការចរចាបានរីកចម្រើនទៅមុខ ដើម្បីធានាការនាំចេញផលិតផលស្បៀង របស់អ៊ុយក្រែន ប្រកបដោយសុវត្ថិភាព នៅសមុទ្រខ្មៅ។ អគ្គលេខាធិការអង្គការសហប្រជាជាតិបន្ថែមថា ក្រុមរបស់លោកមានក្តីសង្ឃឹមថា នឹងអាចទៅជួយសម្រាលទុក្ខសោករបស់មនុស្ស ហើយនិងកាត់បន្ថយភាពអត់ឃ្លាន នៅក្នុងពិភពលោក។
កិច្ចព្រមព្រៀងរវាងអ៊ុយក្រែន និងរុស្ស៊ី សំខាន់ និងបន្ទាន់ ព្រោះថា អ៊ុយក្រែនជាប្រទេសធំសំខាន់ខាងនាំចេញស្រូវសាលី និងគ្រាប់ធញ្ញជាតិ។ ចាប់តាំងពីកើតមានសង្រ្គាមនៅអ៊ុយក្រែន ពិភពលោកប្រឈមនឹងការខ្វះស្បៀង តម្លៃចំណីអាហារកាន់តែឡើងថ្លៃ ដែលជាហេតុធ្វើឲ្យគេបារម្ភពីការកើតមានគ្រោះអត់ឃា្លន ជាពិសេសនៅអាហ្រ្វិក។
រដ្ឋមន្រ្តីការបរទេសអ៊ុយក្រែនវិញ បានអះអាងថា នៅមិនយូរប៉ុន្មានទេ រុស្ស៊ី និងអ៊ុយក្រែននឹងអាចរកឃើញកិច្ចព្រមព្រៀងសម្រាប់ការនាំចេញស្រូវសាលីអ៊ុយក្រែន ដែលកំពុងជាប់គាំងនៅកំពង់ផែ ដោយសារតែសង្រ្គាមឈ្លានពានរបស់រុស្ស៊ី។
នៅ២ខែមកនេះ អង្គការសហប្រជាជាតិ បានព្យាយាមនិយាយបញ្ចុះបញ្ចូលដើម្បីបង្កើតឲ្យមានកិច្ចព្រមព្រៀងមួយ ដែលបើកផ្លូវសម្រាប់ការនាំចេញស្រូវសាលី ជាង ២០លានតោនរបស់អ៊ុយក្រែន ចេញពីកំពង់ផែ នៅអូដេសា។ កិច្ចព្រមព្រៀងស្នើឡើងដោយអគ្គលេខាធិការអង្គការសហប្រជាជាតិជំរុញផងដែរ ឲ្យមានការនាំចេញស្រូវសាលីរបស់រុស្ស៊ី ដែលត្រូវកកស្ទះ ដោយសារទណ្ឌកម្មសេដ្ឋកិច្ចរបស់អាមេរិក និងអឺរ៉ុប។
រដ្ឋមន្រ្តីការពារជាតិតួកគី ដែលជាអ្នកសម្របសម្រួលភាគីអ៊ុយក្រែន និងរុស្ស៊ី បានបង្ហាញសុទិដ្ឋិនិយម បន្ទាប់ពីលឺថា អ្នកជំនាញយោធារុស្ស៊ី និងអ៊ុយក្រែនបាននិយាយយល់ស្របគ្នាលើចំនុចមួយចំនួន ដូចជា ការចូលត្រួតពិនិត្យរួមគ្នានៅកំពង់ផែរ ហើយនិងមធ្យោបាយដើម្បីធានាសន្តិសុខផ្លូវដឹកជញ្ជូនស្រូវសាលី នៅសមុទ្រខ្មៅ។ តាមប្រមុខការពារជាតិតួកគី ភាគីអ៊ុយក្រែន និងរុស្ស៊ីនឹងជួបគ្នាម្តងទៀត នាពេលខាងមុខ។
នៅមុនជួបចរចាជាមួយអ៊ុយក្រែន និងមន្រ្តីអង្គការសហប្រជាជាតិ រុស្ស៊ីធ្លាប់បានដាក់លក្ខខណ្ឌថា អ៊ុយក្រែនមិនត្រឹមជួយដោះមីនក្នុងសមុទ្រខ្មៅ ប៉ុន្តែ រុស្ស៊ីត្រូវមានសិទ្ធិចូលទៅត្រួតពិនិត្យ ឆែកឆេរនៅលើកប៉ាល់ដែលចេញចូលកំពង់ផែនៅអូដេសារបស់អ៊ុយក្រែន។ ប៉ុន្តែ តាមមន្រ្តីទូតបរទេស ដែលស្រង់សំដីដោយទីភ្នាក់ងារព័ត៌មានបារាំង AFP ការដោះមីននៅសមុទ្រខ្មៅលែងចាំបាច់ ព្រោះថា គេនៅមានផ្លូវទឹកដែលគ្មានគ្រាប់មីន ប៉ុន្តែ ដែលស្ថិតក្រោមការយាមល្បាតរបស់កងទ័ពរុស្ស៊ី។ សម្រាប់អង្គការសហប្រជាជាតិ ភាគីជម្លោះទាំងពីរត្រូវអនុវត្តបទឈប់បាញ់ សម្រាប់តំបន់ដែលមានការដឹកជញ្ជូនស្បៀង ចំណែក តួកគីនិងមន្រ្តីអង្គការសហប្រជាជាតិជាអ្នកទទួលបន្ទុកឆែកឆេរលើកប៉ាល់ដើម្បីធានាដល់រុស្ស៊ីថា នឹងគ្មានការដឹកជញ្ជូនអាវុធតាមកប៉ាល់ចូលកំពង់ផែអ៊ុយក្រែន។
ការចរចាដើម្បីអាចនាំចេញស្រូវសាលីអ៊ុយក្រេន ជាប្រធានបទសំខាន់នៅក្នុងជំនួបពិភាក្សារវាងប្រធានាធិបតីរុស្ស៊ី និងប្រធានាធិបតីតួកគី ដែលធ្វើឡើង នៅថ្ងៃទី ១៩ កក្កដា នៅក្រៅក្របខ័ណ្ឌប្រជុំត្រីភាគី រុស្ស៊ីតួកគី អ៊ីរ៉ង់ស្តីពីប្រទេសស៊ីរី។
ភាគីអ៊ុយក្រែនធ្លាប់សង្ឃឹមច្រើនថា នឹងអាចដំណោះស្រាយ សម្រាប់ការនាំចេញស្រូវសាលីរបស់ខ្លួន ប៉ុន្តែ អ៊ុយក្រែននៅតែមិនទាន់ទុកចិត្តលើរុស្ស៊ី ដែលអ៊ុយក្រែនបានចោទប្រកាន់ថា បានលួចនាំចេញស្រូវសាលី ចេញពីទឹកដីអ៊ុយក្រែន ដែលរុស្ស៊ីបានចូលឈ្លានពានកាន់កាប់។ ម្យ៉ាងសម្រាប់អ៊ុយក្រែន រុស្ស៊ីនឹងមិនងាយសម្រួលបើកផ្លុវឲ្យអ៊ុយក្រែននាំចេញស្រូវសាលីនោះទេ ព្រោះថា រុស្ស៊ីច្រណែន និងចង់ឲ្យអ៊ុយក្រែនបាត់បង់ប្រាក់ចំណូល ធ្លាក់ខ្លួនក្រីក្រដោយសារសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ