អូតង់ចុះហត្ថលេខាលើពិធីសារបញ្ចូលស៊ុយអែតនិងហ្វាំងឡង់ជាសមាជិក
ក្រុមប្រទេសជាសមាជិកសម្ព័ន្ធអាត្លង់ទិក (អូតង់) បានចុះហត្ថលេខានៅថ្ងៃអង្គារទី ៥កក្កដា លើពិធីសារបញ្ចូលសមាជិកថ្មី ហ្វាំងឡង់និងស៊ុយអែត។ នៅពេលប្រទេសទាំង៣០ផ្តល់សច្ចាប័នទាំងអស់គ្នាហើយ អូតង់អាចនឹងរៀបចំដែនការពាររួមតជាប់រហូតពីសមុទ្ទមេឌីទែរ៉ាណេ ដល់សមុទ្ទអាកទិក ដើម្បីប្រឈមនឹងការគំរាមកំហែងរបស់រុស្ស៊ី តែអ្វីៗក៏អាស្រ័យផងដែរលើតួកគី។
ចុះផ្សាយនៅថ្ងៃ៖
ស្តាប់ - ០២:០១
“ជាថ្ងៃប្រវត្តិសាស្ត្រ ! ពេលនេះអូតង់បានរីកធំធាត់ខ្លាំងបំផុត ដោយមានសមាជិកឡើងដល់៣២ប្រទេស”។ នេះជាប្រសាសន៍របស់លោកអគ្គលេខាអង្គការអូតង់ ក្នុងពិធីចុះហត្ថលេខាលើពិធីសារបញ្ជូលសមាជិកថ្មី ហ្វាំងឡង់ និងស៊ុយអែត ដោយឆ្លៀតជំរុញឱ្យសមាជិកទាំងអស់ រួសរាន់ ផ្តល់សច្ចាប័នដល់ពិធីសារបញ្ចូលសមាជិក ឱ្យបានឆាប់ៗបំផុត។
ចាប់ពីថ្ងៃនេះតទៅ ហ្វាំងឡង់និងស៊ុយអែត អាចចូលរួមប្រជុំ និងអាចទទួលបានព័ត៌មានសម្ងាត់ ប៉ុន្តែដរាបណាសមាជិកអូតង់ទាំងអស់មិនផ្តល់សច្ចាប័នគ្រប់គ្នាទេ ប្រទេសទាំងពីរនៅមិនទាន់អាចទទួលបាននូវការការពារពីអូតង់ ដូចមានចែងក្នុងច្បាប់អូតង់ថា បើការវាយប្រហារលើប្រទេសជាសមាជិកណាមួយមានន័យស្មើនឹងការវាយប្រហារលើអូតង់ទាំងមូល ឡើយ។ អេស្តូនី ប្រកាសរៀបចំផ្តល់សច្ចាប័ន លើពិធីសារបញ្ចូលសមាជិកថ្មីនៅថ្ងៃពុធ ប៉ុន្តែទោះសម្ព័ន្ធមិត្តភាគច្រើនមិនអែរអង់ក៏ដោយ ក៏ដំណើរការផ្តល់សច្ចាប័នអាចប្រើពេលរហូតដល់មួយឆ្នាំដែរ និងអាស្រ័យទាំងស្រុងទៅលើតួកគី។
លោកប្រធានាធិបតីតួកគី អ៊ែរដូហ្កាន បានផ្តល់ការព្រមព្រៀងកាលពីថ្ងៃព្រហស្បតិ៍មុន ឱ្យអូតង់ផ្តើមសំណុំបែបបទបញ្ចូលហ្វាំងឡង់និងស៊ុយអែតជាសមាជិកហើយ ប៉ុន្តែបានព្រមានប្រទេសទាំងពីរឱ្យគោរពអនុស្សារណៈរួម បើពុំនោះទេតួកគីនឹងមិនផ្តល់សច្ចាប័នលើពិធីសារបញ្ចូលសមាជិកថ្មីទេ។ លោក អ៊ែរដូហ្កានបានព្រលយថា នៅក្នុងកិច្ចសន្យា ស៊ុយអែតត្រូវធ្វើបត្យាប័នមេភេរវជនគួឌីស្ថាន៧៣នាក់ដែលប៉ុនប៉ងធ្វើរដ្ឋប្រហារទម្លាក់រដ្ឋាភិបាលតួកគីកាលពីឆ្នាំ២០១៦។ ប៉ុន្តែរដ្ឋមន្ត្រីការបរទេស ស៊ុយអែត បានច្រានចោលនៅថ្ងៃអង្គារ៍ទី ៥កក្កដានេះថាមិនបាននិយាយពីចំនួន ឬបញ្ជីឈ្មោះជនត្រូវធ្វើបត្យាប័នទេ។ រដ្ឋាភិបាលហ្វាំងឡង់និងស៊ុយអែត គោរពសេចក្តីសម្រេចរបស់តុលាការក្នុងការធ្វើបត្យាប័ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ