បោះឆ្នោតសភាស៊ុយអែត ៖ បក្សជាតិនិយមជ្រុល កំពុងត្រៀមឈ្នះ ?
ចុះផ្សាយនៅថ្ងៃ៖
ស្តាប់ - ០៧:២៥
នៅថ្ងៃអាទិត្យទី ១១ កញ្ញានេះ ពលរដ្ឋស៊ុយអែត ជាង៧លាននាក់កន្លះ ត្រូវចេញទៅបោះឆ្នោតសភា។ ក្នុងបរិបទនៃវិបត្តិអន្តរជាតិដ៏ធ្ងន់ធ្ងរ ផ្តើមដោយសង្គ្រាមនៅអ៊ុយក្រែន និងក្នុងខណៈដែលស៊ុយអែតកំពុងរង់ចាំចូលជាសមាជិកអង្គការអូតង់ ការបោះឆ្នោតសភាថ្ងៃនេះ មានទម្រង់និងអត្ថន័យពិសេសគួរឱ្យកត់សម្គាល់ ៖ គូប្រជែងមានសំឡេងប្រកៀកប្រកិតគ្នាខ្លាំង គណបក្សប្រជាធិបតេយ្យស៊ុយអែត ដែលជាគណបក្សជាតិនិយមជ្រុល បានឡើងសំឡេងជាគំហុក។ តើស៊ុយអែតនឹងក្លាយជាប្រទេសនៅអឺរ៉ុបថ្មីមួយទៀត ដែលមានរដ្ឋាភិបាលកើតចេញពី គណបក្សជាតិនិយមជ្រុល ? ឬក៏រដ្ឋាភិបាលកំពុងកាន់អំណាចអាចបន្តដឹកនាំប្រទេសជាគម្រប់អាណត្តិទីបី ?
ការបោះឆ្នោតសភានៅស៊ុយអែតថ្ងៃនេះ ស្ទើរតែអាចនិយាយបានថាប្រជាពលរដ្ឋជាម្ចាស់ឆ្នោត ត្រូវទៅជ្រើសរើសរវាងប្លុកនយោបាយពីរ រវាងសម្ព័ន្ធពីរ។ ម្ខាងជាប្លុក បក្សសង្គមប្រជាធិបតេយ្យ ដែលដឹកនាំដោយលោកស្រីនាយករដ្ឋមន្ត្រីផុតអាណត្តិ Magdalena andersson ឬ សម្ព័ន្ធអ្នកឆ្វេងនិយមនិងអ្នកបរិស្ថាននិយម។ ម្ខាងទៀត ជាក្រុមអ្នកស្តាំនិយម ដឹកនាំដោយប្រមុខបក្សអភិរក្សនិយម មិនតឹងតែង លោក Ulf Kristersson ដែលជាលើកទីមួយក្នុងប្រវត្តិសាស្ត្របានប្រកាសត្រៀមចងសម្ព័ន្ធភាពជាមួយគណបក្សជាតិនិយមជ្រុល ប្រជាធិបតេយ្យស៊ុយអែតរបស់លោក Jimmie AKesson។
ពិតជាមិនធ្លាប់មានពីមុនមកសោះ ! តាំងពីដើមមក គណបក្សអភិរក្សស្តាំនិយមស៊ុយអែត មិនដែលមានគំនិតគិតចង់សហការដឹកនាំរដ្ឋាភិបាល ដោយផ្ទាល់ ឬដោយប្រយោល ឬត្រូវការការគាំទ្រពីក្រុមជាតិនិយមជ្រុលទេ។
តាំងពីឆ្នាំ២០១៤មក ស៊ុយអែតមានលេចចរន្តអ្នកកណ្តាលបែបស្តាំនិយម អ្នកកណ្តាលងាកឆ្វេង ដែលគេពិបាកបែងចែងជាប្លុក ឱ្យបានច្បាស់លាស់។ នេះបើតាមការពន្យល់របស់ លោក Yohann Aucante សាស្ត្រាចារ្យនៅសាលាសិក្សាវិទ្យាសាស្ត្រសង្គមជាន់ខ្ពស់ EHESS។ អ្នកវិភាគរូបនេះបានលម្អិត តាមរយៈក្បាលមីក្រូរបស់វិទ្យុបារាំងអន្តរជាតិទៀតថា អ្វីដែលថ្មី ដែលអាចចាត់ទុកថាមាន លក្ខណៈជាប្រវត្តិសាស្ត្រគួរសម នៅក្នុងការបោះឆ្នោតសភាលើកនេះ គឺមានការរំកិលប្តូរផ្លាស់នៅផ្ទៃក្នុងប្លុកនីមួយៗ និងជាលើកមួយ គណបក្សជាតិនិយមជ្រុលបានងាកខិតមកជិតក្រុមអ្នកស្តាំនិយម។ ដល់អ៊ីចឹងទៅ ក្រុមកណ្តាលនិយម ក៏ទោរទៅខាងឆ្វេង បង្កើតជាប្លុកពីរ ដែលសំឡេងប្រដេញគ្នា យ៉ាងកៀកកិតបំផុត ដែលគេពិបាកស្មានថាតើនរណាជាអ្នកឈ្នះក្នុងសម័យបោះឆ្នោតនេះ។
បក្សជាតិនិយមជ្រុលចេះកែប្រែមុខមាត់
គណបក្សជាតិនិយមជ្រុលប្រជាធិបតេយ្យស៊ុយអែត ដឹកនាំដោយលោក Jimmie Akesson អាយុ៤៣ឆ្នាំ តាំងពីឆ្នាំ២០០៥មក ចេះប្រែក្លាយរូបភាពបក្ស ផ្តាច់ចេញពីប្រវត្តិចាស់គំរិល និងកាត់ផ្តាច់ឫសគល់ពីសៃស្រឡាយចលនាណាហ្ស៊ីស្ទើរអស់រលីង។ ជាងម្ភៃឆ្នាំមកនេះ គណបក្សបានដុះខាត់មុខមាត់ជាប្រចាំ ដើម្បីក្លាយជាចរន្តនយោបាយដែលអាចទទួលយកបាន និងដែលអាចបន្ស៊ីជាមួយនឹងក្រុមអ្នកអភិរក្សនិយម អ្នកស្តាំនិយម អ្នកមិនជ្រុលនិយមផ្សេងៗ។ មានឈ្មោះជាអ្នកជាតិនិយមជ្រុល តែមិនស្អប់អឺរ៉ុប រហូតដល់ចង់ដកប្រទេសចេញសហភាពអឺរ៉ុប ហើយគាំទ្របេក្ខភាពស៊ុយអែត ជាសមាជិកអង្គការអូតង់ទៀត។
ធ្លាប់មានសំឡេងគាំទ្រតែប្រមាណ១%កាលពីម្ភៃឆ្នាំមុន នៅក្នុងសម័យបោះឆ្នោតលើកនេះ គណបក្សប្រជាធិបតេយ្យស៊ុយអែត បានឡើងប្រជាប្រិយភាពខ្ពស់ដល់ទៅប្រមាណ២០% កំពុងក្លាយទៅជាចរន្តនយោបាយលំដាប់ទីពីរបស់ប្រទេស និងជាចរន្តនយោបាយលំដាប់ទីមួយក្នុងប្លុកស្តាំនិយមផង។ ជាបក្សដែលមានអ្នកចង់បោះឆ្នោតឱ្យច្រើនជាងគេទៀត។ ជាអ្នកកំណត់ប្រធានបទនៅពេលឃោសនាបោះឆ្នោត ជុំវិញបញ្ហាក្តៅគគុកមួយចំនួន មានជាអាទិ៍ បញ្ហាឧក្រិដ្ឋកម្ម វិបត្តិអតិផរណា ទំនិញ ប្រេង ឧស្ម័នឡើងថ្លៃ និងបញ្ហាអន្តោប្រវេសន៍មិនសម្របខ្លួនក្នុងសង្គមស៊ុយអែត ...
គណបក្សកាន់អំណាចនាំមុខតែដោយប្រផុតប្រផើយ
គណបក្សកំពុងកាន់អំណាច ដែលជាអ្នកឆ្វេងនិយម និងធ្លាប់នាំមុខគេក្នុងឆាកនយោបាយស៊ុយអែត តាំងពីឆ្នាំ១៩៣០មកវិញនៅតែនាំមុខគេ ដោយមានសំឡេងគាំទ្រប្រមាណ ពី២៨,៥ទៅ៣០%។
ចំណែកប្រមុខដឹកនាំបក្ស ដែលជានាយករដ្ឋមន្ត្រីផុតអាណត្តិ រូបលោកស្រី Magdalena Andersson ផ្ទាល់មានប្រជាប្រិយភាពរឹងមាំ និងខ្ពស់ជាងគូប្រជែងនៃក្រុមស្តាំនិយម និងជាតិនិយមជ្រុល ទាំងអស់។ ជាអតីតជើងឯកហែលទឹក បានក្លាយជានាយករដ្ឋមន្ត្រីកាលពីខែវិច្ឆិកា ២០២១ មានវ័យ៥៥ឆ្នាំ លោកស្រី អាឌែរសាន់ បានស្តារបក្ស និងបានបញ្ចេញស្នាដៃគួរជាទីកត់សម្គាល់ ជាពិសេសគឺការសម្រេចចិត្តសុំចូលជាសមាជិកអង្គការអូតង់ នៅពេលផ្ទុះសង្គ្រាមនៅអ៊ុយក្រែនភ្លាម។
គ្រប់ការស្ទង់មតិសុទ្ធតែយល់ថា ក្រុមអ្នកឆ្វេងនិយម ដឹកនាំដោយលោកស្រី អាន់ឌែរសាន់ ជានាំមុខទាំងអស់ តែជាការនាំមុខដ៏ប្រផុតប្រផើយ។
៣៤៩អាសនៈ
បើគណបក្សជាតិនិយមជ្រុលប្រជាធិបតេយ្យជាអ្នកឈ្នះ នៅល្ងាចនេះ នោះស៊ុយអែត នឹងបើកទំព័រនយោបាយថ្មី សម្រាប់ប្រទេសស៊ុយអែតផ្ទាល់ខ្លួនផង និងសម្រាប់អឺរ៉ុបផង ព្រោះចាប់ពីថ្ងៃទី ១មករា២០២៣ទៅស៊ុយអែត នឹងធ្វើជាប្រធានផ្លាស់វេនអឺរ៉ុប និងម្យ៉ាងទៀត រដ្ឋាភិបាលថ្មីត្រូវមានភារៈចាត់ចែងបញ្ចប់បេក្ខភាពជាប្រវត្តិសាស្ត្ររបស់ស៊ុយអែតក្នុងអង្គការអូតង់។
តាមប្រពៃណី តួនាទីនាយករដ្ឋមន្ត្រីនឹងត្រូវប្រគល់ទៅឱ្យបក្សសម្ព័ន្ធដែលមានសំឡេងភាគច្រើននៅក្នុងសភា។ តែក្រុមគណបក្សស្តាំនិយម ថ្វីបើចងសម្ព័ន្ធជាមួយបក្សប្រជាធិបតេយ្យមែន តែមិនចង់របូតតួនាទីនាយករដ្ឋមន្ត្រីទេ។
បើក្រុមអ្នកឆ្វេងនិយមឈ្នះ ដូចការស្ទង់មតិមែនវិញ នោះយុទ្ធសាស្ត្រខិតចូលជិតក្រុមជាតិនិយមជ្រុលរបស់អ្នកស្តាំនិយម ត្រូវបរាជ័យ។ ឯការបង្កើតរដ្ឋាភិបាលចម្រុះ ក៏អាចនឹងមិនជាក់លាក់ដែរ។ តែអ្នកនយោបាយជាច្រើនយល់ថា ស៊ុយអែតទំនងជាគ្មានវិបត្តិនយោបាយក្រោយការបោះឆ្នោត ដូចនៅឆ្នាំ២០១៨ ដែលកាលណោះគេត្រូវការពេលវេលាដល់ទៅបួនខែទម្រាំអាចបង្កើតរដ្ឋាភិបាលទេ។
នៅស៊ុយអែត សភាមានអាសនៈសរុប៣៤៩ ដែលបែងចែងឱ្យបក្សមានសំឡេងគាំទ្រចាប់ពី៤%ទៅ តាមសមមាត្រ។ ដើម្បីអាចទទួលបានការតែងតាំងជានាយករដ្ឋមន្ត្រី គេមិនចាំបាច់ត្រូវមានសំឡេងគាំទ្រភាគច្រើនដាច់ខាតពីសភាទេ តែកុំឱ្យមានសំឡេងប្រឆាំងចាប់ពី១៧៥ឡើងទៅ បានហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ