ព្រឹទ្ធសភាអាមេរិកបោះឆ្នោតផ្តល់សច្ចាប័ន ទទួលយកស៊ុយអែត និងហ្វាំងឡង់ជាសមាជិកអូតង់
កាលពីថ្ងៃពុធ ទី៣សីហា ព្រឹទ្ធសភាអាមេរិក បានបោះឆ្នោតផ្តល់សច្ចាប័ន លើសេចក្តីសម្រេចចិត្ត ព្រមទទួលបេក្ខភាពរបស់ប្រទេសស៊ុយអែត និងហ្វាំងឡង់ ចូលជាសមាជិកថ្មីរបស់អង្គការសម្ព័ន្ធមិត្តអូតង់។ ស៊ុយអែត និងហ្វាំងឡង់ បានសម្រេចចិត្តបោះបង់ចោលភាពអព្យាក្រិត្យរបស់ខ្លួន ហើយងាកមកសុំចូលជាសមាជិកអូតង់ បន្ទាប់ពីបានឃើញអំពើឈ្លានពានរបស់រុស្ស៊ី ទៅលើអ៊ុយក្រែន។ តែយ៉ាងណាបេក្ខភាពរបស់ប្រទេសទាំង២នេះ ត្រូវការការអនុម័តផ្តល់សច្ចាប័ន ពីប្រទេសសមាជិកអូតង់ទាំង៣០ប្រទេស។
ចុះផ្សាយនៅថ្ងៃ៖
ស្តាប់ - ០២:១៦
ព្រឹទ្ធសភាអាមេរិក បានបោះឆ្នោត ៩៥សំឡេងយល់ព្រម ទល់នឹង១សំឡេងប្រឆាំង។ សេចក្តីសម្រេចចិត្តទទួលយកបេក្ខភាពរបស់ស៊ុយអែត និងហ្វាំងឡង់ ឲ្យចូលជាសមាជិកថ្មីរបស់អង្គការអូតង់ ត្រូវបានសហរដ្ឋអាមេរិកផ្តល់សច្ចាប័នជាផ្លូវការ។
លោក Chuck Schumer ប្រធានក្រុមសមាជិកព្រឹទ្ធសភាបក្សប្រជាធិបតេយ្យ បានថ្លែងថា “ប្រធានាធិបតីរុស្ស៊ី វ្លាឌីមៀរ ពូទីន មានបំណងប្រើប្រាស់សង្គ្រាមនៅអ៊ុយក្រែន ដើម្បីបំបែកបំបាក់សម្ព័ន្ធភាពលោកខាងលិច។ តែផ្ទុយទៅវិញ ការបោះឆ្នោតនៅថ្ងៃនេះ បានបង្ហាញថា សម្ព័ន្ធភាពនេះកាន់តែរឹងមាំ រួមសាមគ្គីគ្នាជាធ្លុងមួយ”។
គួរបញ្ជាក់ថា រដ្ឋបាលរបស់លោកចូ បៃដិន បានគាំទ្រនិងជំរុញឲ្យសភាអាមេរិក ផ្តល់សច្ចាប័នលើសេចក្តីសម្រេចចិត្តនេះ ដើម្បីបើកផ្លូវ ទទួលប្រទេសហ្វាំងឡង់ និងស៊ុយអែត ឲ្យចូលជាសមាជិកថ្មីនៅក្នុងអង្គការសម្ព័ន្ធមិត្តអាត្លង់ទិកខាងជើង ឬហៅកាត់ថាអូតង់។ ហ្វាំងឡង់ និងស៊ុយអែត កន្លងមកបានព្យាយាមរក្សាអព្យាក្រិត្យភាព នៅចន្លោះសម្ព័ន្ធមិត្តលោកខាងលិច និងរុស្ស៊ី។ ក៏ប៉ុន្តែ ក្រោយការធ្វើសង្គ្រាមឈ្លានពាននៅអ៊ុយក្រែន ហ្វាំងឡង់ និងស៊ុយអែត បានសំឡឹងឃើញពីគ្រោះថ្នាក់ ដែលខ្លួនអាចប្រឈម ប្រសិនបើគ្មានបង្អែកការពារទេនោះ។ យោងតាមមាត្រា៥ នៃសន្ធិសញ្ញាអាត្លង់ទិកខាងជើង គឺនៅពេលប្រទេសសមាជិកណាមួយ រងការវាយប្រហារ នោះសមាជិកអូតង់ទាំងអស់នឹងរួមកម្លាំងគ្នាអន្តរាគមន៍ ដើម្បីការពារ។
សូមរំលឹកថា រាល់ការបញ្ជូលសមាជិកថ្មី គឺប្រទេសសមាជិកអូតង់ទាំងអស់ត្រូវតែយល់ព្រម និងផ្តល់សច្ចាប័នជាឯកច្ឆ័ន្ទ។ កាលពីថ្ងៃពុធម្សិលមិញ គឺសភាបារាំង និងអ៊ីតាលី ដែលបានបោះឆ្នោតផ្តល់សច្ចាប័ន។ គិតមកត្រឹមពេលនេះ ដោយរាប់ទាំងសហរដ្ឋអាមេរិក គឺមានប្រទេសសមាជិកអូតង់ចំនួន២៣ប្រទេសហើយ ដែលបានផ្តល់សច្ចាប័នក្នុងចំណោម៣០ប្រទេស។
តែយ៉ាងណាក៏ដោយ នៅមានឧបសក្គមួយដ៏ធំ ចំពោះបេក្ខភាពរបស់ហ្វាំងឡង់ និងស៊ុយអែត គឺការជំទះរារាំងរបស់តួកគី។ លោកប្រធានាធិបតីតួកគី កំពុងតែឆក់ឱកាសនេះ កេងចំណេញនយោបាយផ្ទៃក្នុង ដោយបានទាមទារឲ្យ ហ្វាំងឡង់ និងជាពិសេសស៊ុយអែត ត្រូវតែជួយខ្លួនក្នុងការប្រយុទ្ធប្រឆាំងនឹងក្រុមចលនានយោបាយ “គណបក្សពលករគួកឌីស្ថាន PKK” ដែលប្រធានាធិបតីតួកគី ចាត់ទុកថាជាក្រុមភេរវកម្ម និងជាសត្រូវនយោបាយដ៏ធំមួយរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ