កិច្ចប្រជុំកំពូលរបស់អង្គការកិច្ចសហប្រតិបត្តិការសៀងហៃគ្របដណ្តប់ដោយជំនួបមេដឹកនាំ ចិន និងរុស្ស៊ី
ចុះផ្សាយនៅថ្ងៃ៖
ស្តាប់ - ០៨:០៩
ប្រធានាធិបតីរុស្ស៊ី និងប្រធានាធិបតីចិន នឹងបើកជំនួបកំពូលរួមគ្នា នៅល្ងាចថ្ងៃព្រហស្បតិ៍ទី១៥កញ្ញា នៅក្រៅក្របខណ្ឌកិច្ចប្រជុំកំពូលអង្គការសហប្រតិបត្តិការសៀងហៃ ដែលត្រូវបើកទ្វារជាផ្លូវការនៅថ្ងៃ នេះ នៅប្រទេសអ៊ូសបេគីស្ថាន។ នៅពេល កិច្ចប្រជុំរបស់អង្គការកិច្ចសហប្រតិបត្តិការសៀងហៃ ត្រូវផ្តោតទៅលើសន្តិសុខរួម និងទំនាក់ទំនងពាណិជ្ជកម្មរវាងប្រទេសសមាជិក សង្រ្គាមអ៊ុយក្រែន និងអាហ្វហ្កានីស្ថានជាសំណុំរឿងសំខាន់នៅក្នុងកិច្ចប្រជុំលើកនេះ។ កិច្ចប្រជុំដែលត្រូវបាំងលុបជិតផងដែរ ដោយជំនួបទ្វេភាគី រវាងប្រធានាធិបតីចិន លោកស៊ី ជីនពីង និងប្រធានាធិបតី រុស្ស៊ី លោកវ្លាឌីមៀរ ពូទីន។ តើជំនួបទ្វេភាគីរវាងលោកស៊ី ជីនពីង លោកពូទីនមានអត្ថន័យយ៉ាងណាខ្លះ? តើប្រធានាធិបតី រុស្ស៊ី លោកពូទីន ទន្ទឹងចង់បានអ្វីពីជំនួបជាមួយប្រធានាធិបតីចិនលើកនេះ?
ប្រធានាធិបតី ចិន លោកស៊ី ជីនពីង និងប្រធានាធិបតីរុស្ស៊ី លោកវ្លាឌីមៀរ ពូទីននឹងបើកជំនួបកំពូលទ្វេភាគី ចិន រុស្ស៊ី នៅថ្ងៃព្រហស្បតិ៍ ទី ១៥ កញ្ញា នៅក្រៅក្របខ័ណ្ឌកិច្ចប្រជុំសហប្រតិបត្តិការសៀងហៃ ដែលត្រូវបើកទ្វារជាផ្លូវការនៅថ្ងៃព្រហស្បតិ៍ នៅទីក្រុងសាម៉ាកង់របស់ប្រទេសអ៊ូសបេគីស្ថាន។
នៅក្នុងកិច្ចប្រជុំរបស់អង្គការកិច្ចសហប្រតិបត្តិការសៀងហៃ នឹងមានការចូលរួមពីថ្នាក់ដឹកនាំរបស់ប្រទេសសមាជិកទាំង៨ ដូចជាចិន រុស្ស៊ី ឥណ្ឌា ប៉ាគីស្ថាន និងប្រទេសនៅអាស៊ីកណ្តាលចំនួន៤ កាហ្សាក់ស្ថាន តាហ្ស៊ីគីស្ថាន អ៊ូសបេគីស្ថាន កៀហ្ស៊ីគីស្ថាន ហើយនិងមេដឹកនាំប្រទេសតួកគី និងអ៊ីរ៉ង់។
នៅក្នុងដំណើរទស្សនកិច្ចចេញទៅបរទេសជាលើកទី១ ចាប់តាំងពីវិបត្តិកូវីដ លោកស៊ី ជីនពីងនឹងបើកជំនួបកំពូលផ្ទាល់ជាមួយ មេដឹកនាំរុស្ស៊ី លោកវ្លាឌីមៀរ ពូទីនដែលកំពុងរងការដាក់ទណ្ឌកម្មពីលោកខាងលិច ដោយសារសង្រ្គាមឈ្លានពានអ៊ុយក្រែន។
មេដឹកនាំចិន និងរុស្ស៊ី ធ្លាប់បានប្រកាសទំនាក់ទំនងដ៏រលូន និងចំណងមិត្តភាពគ្មានព្រំដែន រវាងប្រទេសទាំងពីរ ម្តងហើយ នៅពេល លោកស៊ី ជីនពីង និងលោកពូទីនបានជួបពិភាក្សាគ្នាផ្ទាល់ នៅទីក្រុងប៉េកាំង កាលពីរដូវប្រកួតកីឡាអូឡាំពិក កាលពីខែកុម្ភៈ ពោលគឺនៅប៉ុន្មានថ្ងៃមុនដែលរុស្ស៊ីបើកសង្រ្គាមឈ្លានពានអ៊ុយក្រែន។
ចិន មហាអំណាចសេដ្ឋកិច្ចទី២ ក្នុងពិភពលោក ចំណែករុស្ស៊ី ជាមហាអំណាចនុយក្លេអ៊ែរធំទី២ នៅក្នុងពិភពលោក។ ប្រទេសទាំងពីរបានខិតចូលជិតស្និទ្ធគ្នាជាងពេលណាទាំងអស់ ដើម្បីរួមគ្នាទប់ទល់ឥទ្ធិពលអាមេរិកដែលជាគូប្រជែង សត្រូវរួមរបស់ប្រទេសទាំងពីរ។
ក្នុងករណីចិន ចិនមិនត្រឹមតែមានជម្លោះថ្នាំងថ្នាក់ជាមួយអាមេរិក ក្នុងវិស័យពាណិជ្ជកម្ម និងបញ្ហាសិទ្ធិមនុស្សតែប៉ុណ្ណោះទេ ប៉ុន្តែ ចិនបានខឹងឆេះដុំ ក្តៅក្រហាយខ្លាំង ដែលឃើញ អាមេរិក បង្កើនការលក់អាវុធ ហើយនិងបញ្ជូនថ្នាក់ដឹកនាំជាន់ខ្ពស់ទៅកោះតៃវ៉ាន់។ សម្រាប់ចិន នយោបាយរបស់អាមេរិកកំពុងរំលោភដែនអធិបតេយ្យភាពរបស់ចិន។ ត្រលប់មកនិយាយពីរុស្ស៊ី វិញ រុស្ស៊ីបានរងការដាក់ទណ្ឌកម្មរបស់ប្រទេសលោកខាងលិច នាំមុខដោយអាមេរិក បន្ទាប់ពីរុស្ស៊ី ធ្វើសង្រ្គាមឈ្លានពានអ៊ុយក្រែន។
រុស្ស៊ីរបស់លោកពូទីនឯណោះវិញ បន្លឺសំឡេងគាំទ្រចិន ដែលដំឡើងសំឡេងរិះគន់អាមេរិកក្នុងរឿងតៃវ៉ាន់ នៅបន្ទាប់ពីចិន មិនថ្កោលទោស រុស្ស៊ី ដែលធ្វើសង្រ្គាមឈ្លានពានអ៊ុយក្រែន ប៉ុន្តែ ផ្ទុយទៅវិញ ចិនស្តីបន្ទោស ប្រទេសលោកខាងលិច និងអាមេរិក ដែល ដាក់ទណ្ឌកម្ម លើរុស្ស៊ី ហើយនិងការលក់អាវុធទៅឲ្យអ៊ុយក្រែន។
ជំនួបកំពូលជាមួយលោកស៊ី ជីនពីង នឹងមានន័យយ៉ាងណាសម្រាប់លោកពូទីន?
ជំនួបកំពូលជាមួយប្រធានាធិបតីចិន មានសារៈសំខាន់ អត្ថន័យខ្លាំងណាស់សម្រាប់ប្រធានាធិបតីរុស្ស៊ី លោកពូទីន ដែលកំពុងរងការដាក់ទណ្ឌកម្មរបស់ប្រទេសលោកខាងលិច ហើយនិងនៅក្នុងកាលៈទេសៈមួយ ដែលកងទ័ពរុស្ស៊ី កំពុងចាញ់ដៃ ធ្វើសង្រ្គាមនៅអ៊ុយក្រែន បន្ទាប់ពីទាហានអ៊ុយក្រែនវាយដណ្តើមយកបានទឹកដីរបស់ខ្លួន ជាច្រើនមកវិញ នៅប៉ុន្មានសប្តាហ៍នេះ។
ប៉ុន្តែមុននឹងនិយាយដល់សារៈសំខាន់នៃជំនួបជាមួយប្រមុខរដ្ឋចិន លោកពូទីនចង់បញ្ជាក់ប្រាប់ទៅប្រទេសលោកខាងលិចថា រុស្ស៊ីមិនឯកោនោះទេ។ វត្តមានរបស់លោក នៅក្នុងកិច្ចប្រជុំសហប្រតិបត្តិការសៀងហៃ ដែលមានការចូលរួមពីមហាយក្សអាស៊ី ដូចជាចិន ឥណ្ឌា ប៉ាគីស្ថាន និងប្រទេសអាស៊ីកណ្តាលផ្សេងទៀត បង្ហាញថា រុស្ស៊ី នៅតែមានដៃគូ ធ្វើពាណិជ្ជកម្មជាមួយ ដោយមិននៅឯកោ ទៅតាមការប៉ុនប៉ងរបស់ប្រទេសលោកខាងលិច ដែលបានដាក់ទណ្ឌកម្ម សេដ្ឋកិច្ចរុស្ស៊ីនោះទេ។
ដោយសារតែការដាក់ទណ្ឌកម្មរបស់អឺរ៉ុប អាមេរិក និងសម្ព័ន្ធមិត្ត ដែលឈប់ទិញ និងបានកម្រិតតម្លៃប្រេង ឧស្ម័នរុស្ស៊ី ដើម្បីដាក់សម្ពាធលើរុស្ស៊ី លោកពូទីនចង់ប្រើកិច្ចប្រជុំសហប្រតិបត្តិការសៀងហៃ លើកនេះ ដើម្បី បែរទិសដៅ ពង្រឹងការធ្វើជំនួញពាណិជ្ជកម្មជាមួយបណ្តាប្រទេសអាស៊ី ដែលនាំមុខដោយចិន។
គួរបញ្ជាក់ដែរថា ក្រៅពីជួបទ្វេភាគីជាមួយប្រធានាធិបតីចិន លោកពូទីននឹងបើកជំនួបទ្វេភាគីជាមួយនាយករដ្ឋមន្រ្តីតួកគី ប៉ាគីស្ថាន និងជាមួយនាយករដ្ឋមន្រ្តីឥណ្ឌា ដែលជាអ្នកទិញប្រេង សំខាន់មួយដែររបស់រុស្ស៊ី បន្ទាប់ពីចិន។
ចាប់តាំងពីរងដាក់ទណ្ឌកម្មរបស់ប្រទេសលោកខាងលិច ដោយសារសង្រ្គាមឈ្លានពានអ៊ុយក្រែន ចិនគឺជាអ្នកទិញប្រេង និងឧស្ម័នរបស់រុស្ស៊ី ច្រើនជាងគេ។ ថ្មីៗនេះទៀត ប្រទេសទាំងពីរបានប្រកាសលែងប្រើលុយដុល្លារ ប៉ុន្តែ លុយរូប្លិ៍របស់រុស្ស៊ី និងលុយយ័នរបស់ចិន សម្រាប់ការទិញប្រេង និងឧស្ម័នរបស់រុស្ស៊ី។
ក្រៅពីត្រូវការចិន ជាអតិថិជនធំ ដើម្បីទិញប្រេង និងឧស្ម័ន ដែលរុស្ស៊ីមិនអាចបញ្ចេញលក់ទៅអឺរ៉ុប ដោយសារការដាក់ទណ្ឌកម្ម រុស្ស៊ី កំពុងចង់បានការគាំទ្រផងដែរ ពីខាងចិន ជាពិសេសផ្នែកយោធា នៅក្នុងខណៈពេលកងទ័ពរុស្ស៊ី កំពុងបរាជ័យ កាន់តែច្រើន នៅក្នុងសមរភូមិប្រយុទ្ធជាមួយកងទ័ពអ៊ុយក្រែន នៅប៉ុន្មានថ្ងៃចុងក្រោយនេះ។
កន្លងមកមានដំណឹងថា រុស្ស៊ីបានទិញអាវុធ ពីកូរ៉េខាងជើង និងប៉ាគីស្ថានសម្រាប់យកទៅធ្វើសង្រ្គាមនៅអ៊ុយក្រែន ប៉ុន្តែ គេនៅមិនទាន់ដឹងច្បាស់ថា តើចិនមានបានលក់អាវុធទៅឲ្យរុស្ស៊ីដែរឬទេ។
នៅក្នុងជំនួបជាមួយប្រធានាធិបតីរុស្ស៊ី លោកប្រធានាធិបតីចិន ទំនងអាចត្រឹមបង្ហាញ សមានចិត្ត គាំទ្ររុស្ស៊ី និងទិញប្រេង និងទំនិញ ដែលមិនជាប់ក្នុងទណ្ឌកម្ម ប៉ុន្តែ មិនដល់ថា្នក់យកក ល អន្ទាក់ ដោយសុខចិត្តជួយផ្តល់សព្វាវុធទៅឲ្យរុស្ស៊ី ដែលអាចធ្វើឲ្យចិន ប្រឈមនឹងការដាក់ទណ្ឌកម្ម របស់ប្រទេសលោកខាងលិច ដែលធ្វើឲ្យចិន ខាតបង់ផលប្រយោជន៍ផ្ទាល់ខ្លួនរបស់ចិននោះទេ។
ប្រធានាធិបតីចិនទន្ទឹងចង់បានអ្វីពីជំនួបជាមួយប្រធានាធិបតីរុស្ស៊ី?
ក្នុងទំនាក់ទំនងជាមួយរុស្ស៊ី ចិនបានសំឡឹងឃើញ ផលប្រយោជន៍ពីរ គឺផលប្រយោជន៍សេដ្ឋកិច្ច និងភូមិសាស្រ្តនយោបាយ។
រុស្ស៊ី ជាមហាអំណាចនុយក្លេអ៊ែរធំទី២បន្ទាប់ពីអាមេរិក។ ដូច្នេះ មានរុស្ស៊ី ជាដៃគូ ប៉ុន្តែ មិនមែនជាសម្ព័ន្ធមិត្ត ចិនកក់ក្តៅក្នុងចិត្ត ដើម្បីចេញមុខតទល់ជាមួយមហាអំនាចយោធាដូចជាអាមេរិក។ ប៉ុន្តែ ការរំពឹងរបស់ចិន ទៅលើមុខមាត់មហាអំណាចយោធារបស់រុស្ស៊ី ត្រូវបានធ្លាក់ចុះបន្តិច នៅក្រោយ កងទ័ពរុស្ស៊ី បរាជ័យ ក្នុងសមរភូមិប្រយុទ្ធជាមួយកងទ័ពអ៊ុយក្រែន ដែលវាយដណ្តើមយកបានមកវិញ ជាបន្តបន្ទាប់ដែនដី ដែលកងទ័ពរុស្ស៊ី បានឈ្លានពានកន្លងមក។
ចិន មិនអាចរំពឹងទាំងស្រុងលើរុស្ស៊ី ខាងឥទ្ធិពលយោធា ប៉ុន្តែ ចិននៅតែត្រូវការពឹងផ្អែកលើរុស្ស៊ី នៅផ្នែកសេដ្ឋកិច្ច។ និយាយពីផលប្រយោជន៍សេដ្ឋកិច្ចវិញ ចិនបានប្រយោជន៍ច្រើនណាស់ ចាប់តាំងពីរុស្ស៊ីជាប់ទណ្ឌកម្ម ដោយលែងអាចលក់ប្រេង និងឧស្ម័នទៅអឺរ៉ុប។ ចិនបាននាំចូលដោយគំហុកនិងក្នុងតម្លៃថោក ប្រេង និងឧស្ម័ន ដែលរុស្ស៊ី មិនបានលក់ទៅឲ្យអឺរ៉ុបដោយសារការដាក់ទណ្ឌកម្ម។
ដោយសារតែរុស្ស៊ីនៅជាប់ទណ្ឌកម្ម របស់ប្រទេសលោកខាងលិច រុស្ស៊ីចាញ់ប្រៀបច្រើននៅក្នុងការចរចាធ្វើជំនួញជាមួយចិន។ គេវាយតម្លៃថា ដោយសារតែរុស្ស៊ី មិនសូវមានជម្រើសច្រើន ចិនដែលមានប្រៀបក្នុងការចរចា នឹងអាចទាមទារឲ្យរុស្ស៊ីធ្វើសម្បទានច្រើន ដូចជាបើកផ្លូវ អនុញ្ញាតឲ្យក្រុមហ៊ុនចិនចូលទៅបោះទុនវិនិយោគនៅកន្លែងធ្វើអាជីវកម្មប្រេង និងឧស្ម័នរបស់រុស្ស៊ី ដែលតាមពិត រុស្ស៊ីបានបិទខ្ទប់រហូតមក មិនឲ្យមានការលូកដៃ វិនិយោគរបស់ក្រុមហ៊ុនបរទេស។
មួយវិញទៀត លោកប្រធានាធិបតីចិន ចង់ប្រើជំនួបជាមួយមេដឹកនាំអាស៊ីផ្សេងទៀត នៅកិច្ចប្រជុំសហប្រតិបត្តិការសៀងហៃ និងជំនួបកំពូលជាមួយប្រធានាធិបតីរុស្ស៊ី ដែលជាមហាអំណាចនុយក្លេអ៊ែរដែលជាសត្រូវរបស់អាមេរិក សម្រាប់ផលប្រយោជន៍នយោបាយក្នុងស្រុក ក្នុងបរិបទដែលលោកកំពុងរកសំឡេងគាំទ្រនៅក្នុងមហាសន្និបាតរបស់បក្សកុម្មុយនិស្តលើកទី២០ ដើម្បីឲ្យលោកអាចដឹកនាំប្រទេសអាណត្តិទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ