រុស្ស៊ីប្រឈមសាជាថ្មីនឹងសេចក្តីសម្រេចរបស់អ.ស.ប.ទាក់ទងនឹងការកាត់យកទឹកដីអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៣២
តាំងពីថ្ងៃចន្ទ ទី១០តុលា មហាសន្និបាតអង្គការសហប្រជាជាតិបានបើកកិច្ចប្រជុំវិសាមញ្ញ ដើម្បីជជែកពី ការកាត់យកទឹកដីអ៊ុយក្រែន ចំនួន ៤បន្ថែមទៀតពីសំណាក់រុស្ស៊ី។ មហាសន្និបាតអង្គការសហប្រជាជាតិរៀបចំកិច្ចប្រជុំវិសាមញ្ញ នៅសប្តាហ៍នេះ បន្ទាប់ពី ក្រុមប្រឹក្សាសន្តិសុខអង្គការសហប្រជាជាតិ បរាជ័យ មិនអាចបោះឆ្នោត ចេញសេចក្តីសម្រេចថ្កោលទោស រុស្ស៊ី ចំពោះការកាត់យកទឹកដីអ៊ុយក្រែន កាលពីដើមខែតុលា។ ម្យ៉ាងវាធ្វើឡើងនៅចំថ្ងៃដែលរុស្ស៊ីបានបាញ់មីស៊ីលយ៉ាងសន្ធប់ទៅលើទីក្រុងធំៗរបស់អ៊ុយក្រែន ដោយបានសម្លាប់ប្រជាជនស៊ីវិលយ៉ាងតិច ១១នាក់និងរបួសជិត ១០០នាក់។
តាំងពីថ្ងៃចន្ទ មហាសន្និបាតអង្គការសហប្រជាជាតិនៅទីក្រុងញូវយ៉ក ចាប់ជជែកគ្នា ពីសេចក្តីសម្រេចថ្កោលទោសការកាត់យកទឹកដីអ៊ុយក្រែន ចំនួន៤បន្ថែមទៀត ពីសំណាក់រុស្ស៊ី នៅបន្ទាប់ពី រុស្ស៊ីលើកដៃវេតូ ប្រឆាំងមិនឲ្យក្រុមប្រឹក្សាសន្តិសុខចេញសេចក្តីសម្រេច ថ្កោលទោសរុស្ស៊ី ពីរឿងនេះ កាលពីចុងខែកញ្ញា។
នៅទីក្រុងញូវយ៉ក បន្ទាប់ពីការជជែក នៅថ្ងៃចន្ទ និងថ្ងៃអង្គារ ប្រទេសសមាជិកចំនួន ១៩៣របស់អង្គការសហប្រជាជាតិគ្រោងនឹងបោះឆ្នោត នៅថ្ងៃពុធទី ១២ តុលាលើសេចក្តីសម្រេចដែលអ៊ុយក្រែនជាអ្នកដាក់ឲ្យគេពិភាក្សា នៅមហាសន្និបាត។
សេចក្តីសម្រេចដែលចងក្រងឡើងដោយសហភាពអឺរ៉ុប មានចែងពីការថ្កោលទោសលើការកាត់យកដោយខុសច្បាប់ ទឹកដី តំបន់ចំនួន៤របស់អ៊ុយក្រែន ក្រោមលេស បោះឆ្នោតប្រជាមតិរបស់រុស្ស៊ី។ សេចក្តីសម្រេចខាងលើបានចាត់ទុកសកម្មភាពកាត់យកទឹកដីអ៊ុយក្រែន ពីសំណាក់រុស្ស៊ី ថា ជាការផ្ទុយនឹងច្បាប់អន្តរជាតិ។ ដូច្នេះ គ្មានអ្នកណាម្នាក់ ត្រូវទទួលស្គាល់ ទឹកដីទាំង៤ របស់អ៊ុយក្រែនដែលរុស្ស៊ីទើបកាត់យកថ្មីៗនេះ ថា ជាទឹកដីរបស់រុស្ស៊ីនោះទេ។ ជាចុងក្រោយ សេចក្តីសម្រេចដែលមហាសន្និបាតអង្គការសហប្រជាជាតិគ្រោងបោះឆ្នោត នៅថ្ងៃស្អែក បានអំពាវនាវផងដែរឲ្យរុស្ស៊ី ដកទ័ពជាបន្ទាន់ពីអ៊ុយក្រែន។
ការអំពាវនាវឲ្យរុស្ស៊ីដកទ័ព ធ្លាប់មាននៅក្នុងសេចក្តីសម្រេចលើកទី ១ដែលមហាសន្និបាតអង្គការសហប្រជាជាតិ បានបោះឆ្នោត អនុម័តកាលពីថ្ងៃទី ២មីនា ពោលគឺនៅប៉ុន្មានថ្ងៃក្រោយរុស្ស៊ី បើកធ្វើសង្រ្គាមអ៊ុយក្រែន។
សេចក្តីសម្រេចលើកទី៤របស់មហាសន្និបាតអង្គការសហប្រជាជាតិ ទាក់ទងនឹងសង្រ្គាមរុស្ស៊ីឈ្លានពានអ៊ុយក្រែន
នៅឆ្នាំ ២០១៤ មហាសន្និបាតអង្គការសហប្រជាជាតិ ចេញសេចក្តីសម្រេចថ្កោលទោសការកាត់យកទឹកដីគ្រីមេរបស់អ៊ុយក្រែនពីសំណាក់រុស្ស៊ី។ ដូចករណីគ្រីមេ សេចក្តីសម្រេចលើកទី ៤ របស់មហាសន្និបាតអង្គការសហប្រជាជាតិគ្រាន់តែថ្កោលទោសការកាត់យកទឹកដីចំនួន៤ទៀត របស់អ៊ុយក្រែន ពីសំណាក់រុស្ស៊ី ប៉ុន្តែ គ្មានលក្ខណៈបង្ខំឲ្យរុស្ស៊ីឈប់ធ្វើសង្រ្គាម ឬប្រគល់ទឹកដីទាំង៤មកឲ្យអ៊ុយក្រែន។
យ៉ាងណាក៏ដោយ សេចក្តីសម្រេចរបស់មហាសន្និបាត អង្គការសហប្រជាជាតិ ជាសារបញ្ជាក់ថា មានប្រទេសច្រើន នៅក្នុងពិភពលោកដែលមិនយល់ស្របឲ្យរុស្ស៊ី កាត់លេបយកទឹកដីអ៊ុយក្រែន។ សម្រាប់ក្រុមប្រទេសលោកខាងលិច និងអ៊ុយក្រែន គោលដៅសំខាន់របស់ពួកគេ គឺចង់ឲ្យរុស្ស៊ី រឹតតែឯកោ គ្មានអ្នកណារាប់រក នៅក្នុងឆាកអន្តរជាតិ។
អ៊ុយក្រែនផ្ទាល់បានបើកយុទ្ធនាការការទូតសម្បើមណាស់ ជាពិសេស នៅទឹកដីអាហ្វ្រិក ដើម្បីបញ្ចុះបញ្ចូល បណ្តាប្រទេសដែលធ្លាប់បោះឆ្នោតអនុប្បវាទ និងប្រទេសដែលមិនចូលរួមបោះឆ្នោត នៅក្នុងសេចក្តីសម្រេចមុនៗ ឲ្យទៅបោះឆ្នោត គាំទ្រសេចក្តីសម្រេចថ្កោលទោស ការកាត់យកទឹកដីអ៊ុយក្រែនពីសំណាក់រុស្ស៊ីលើកនេះ។ អ៊ុយក្រែន ត្រូវតែខំប្រឹងប្រែងស្វែងរកសំឡេងគាំទ្រ ព្រោះថា ការបោះឆ្នោត របស់មហាសន្និបាត កន្លងមក ទាក់ទងនឹងវិបត្តិអ៊ុយក្រែន បង្ហាញថា សំឡេងគាំទ្រសេចក្តីសម្រេចបានធ្លាក់ថយចុះបន្តិចម្តងៗ ចំនួន ពី១៤១ មកនៅ៩៣។ អ្នកទទួលខុសត្រូវអឺរ៉ុបម្នាក់ព្យាករថា សំឡេងគាំទ្រសេចក្តីសម្រេច របស់មហាសន្និបាតនឹងមានក្នុងចន្លោះ ១០០ និង១៤០។ សម្រាប់អ្នកជំនាញ ក្រុមប្រទេសកំពុងអភិវឌ្ឍមួយចំនួន ដែលមិនសប្បាយចិត្តនឹងក្រុមប្រទេសលោកខាងលិច ពីរឿងដែលផ្តោតសំខាន់តែទៅលើបញ្ហា អ៊ុយក្រែន និងភ្លេចអស់ហើយ បញ្ហានៅកន្លែងផ្សេង ជាពិសេស រឿងវិបត្តិថាមពលឡើងថ្លៃ ទំនងជានឹងបោះឆ្នោត អនុប្បវាទ ឬមិនចូលរួមក្នុងការបោះឆ្នោតតែម្តង។ ការណ៍នេះនឹងធ្វើឲ្យប្រទេសលោកខាងលិច មិនអាចសម្រេចគោលដៅដើម្បី ធ្វើឲ្យរុស្ស៊ី ឯកោ។
ប៉ុន្តែ អ្នកជំនាញខ្លះទៀត វាយតម្លៃថា ហេតុការណ៍បាញ់មីស៊ីលរបស់រុស្ស៊ី សំដៅ ទីក្រុងហេដ្ឋារចនាសម្ព័ន្ធដែលសម្លាប់ប្រជាជនស៊ីវិលអ៊ុយក្រែន កាលពីថ្ងៃចន្ទ ដែលសូម្បី អគ្គលេខាធិការអង្គការសហប្រជាជាតិក៏ចេញមុខថ្កោលទោស នឹងអាចចាត់ទុកជាឧក្រិដ្ឋកម្មសង្រ្គាម ទំនងជានឹងមានប្រទេសច្រើន ដែលនឹងលែងឈរនៅខាងរុស្ស៊ី ដែលកាន់តែសាហាវ ឃោឃៅនៅក្នុងសង្រ្គាមឈ្លានពានអ៊ុយក្រែន។
ប្រទេសមហាអំណាចឧស្សាហកម្ម G7ជួបប្រជុំបន្ទាន់ នៅក្រោយរុស្ស៊ីបាញ់មីស៊ីលបំផ្លាញទីក្រុងកៀវ
ក្រុមប្រទេសមហាអំណាចឧស្សាហកម្ម G7 បើកកិច្ចប្រជុំបន្ទាន់ នៅបន្ទាប់ពី រុស្ស៊ីបើកការវាយប្រហារ បាញ់មីស៊ីល បំផ្លាញ ទីក្រុងធំៗរបស់អ៊ុយក្រែន ដូចជារដ្ឋធានី កៀវ ដើម្បីជាការសងសឹកនឹងការបំផ្ទុះបំផ្លាញ ស្ពានគ្រីមេ ដែលលោកពូទីនចោទទម្លាក់កំហុស ថា ជាសកម្មភាពភេរវកម្មរបស់អ៊ុយក្រែន។
នៅក្នុងកិច្ចប្រជុំG 7 ដែលផ្តួចផ្តើមគំនិតដោយនាយករដ្ឋមន្រ្តីអង់គ្លេស លោកស្រីលីស្ហ ត្រាស្ហ ប្រធានាធិបតីអ៊ុយក្រែន លោកហ្សេឡេនស្គី នឹងមានវត្តមាន នៅក្នុងកិច្ចប្រជុំតាមវីដេអូនៅថ្ងៃអង្គារដែរ។
នៅមុនការសម្រេចរួមរបស់ក្រុមប្រទេសG7 ដើម្បីចាត់វិធានការ នៅក្រោយ ការវាយប្រហារមីស៊ីលទៅលើទីក្រុងអ៊ុយក្រែន ប្រទេសសមាជិកមួយៗរបស់G7 កាលពីថ្ងៃចន្ទ បានប្រកាសជំនួយ ឥតចុះថយសម្រាប់អ៊ុយក្រែន។
នៅក្រោយប្រធានាធិបតី អាមេរិកនិយាយទូរស័ព្ទជាមួយ ប្រធានាធិបតីអ៊ុយក្រែន នៅក្រោយទីក្រុងកៀវរងការវាយប្រហារមីស៊ីល នៅថ្ងៃ ចន្ទ សេតវិមានប្រកាសថា នឹងបញ្ជូនប្រព័ន្ធខែលមីស៊ីលបន្ថែមទៀត ទៅអ៊ុយក្រែន។ អាល្លឺម៉ង់ដែលជាសមាជិកG7 ក៏ប្រកាសបញ្ជូនប្រព័ន្ធប្រឆាំងមីស៊ីលទៅជួយអ៊ុយក្រែនដែរ។ សម្រាប់នាយករដ្ឋមន្រ្តីអង់គ្លេស គេមិនត្រូវចុះញ៉ម បាក់ស្បាត ដោយសារការវាយប្រហារមីស៊ីលរបស់រុស្ស៊ី កាលពីថ្ងៃចន្ទ។ គេត្រូវបន្តជួយអ៊ុយក្រែន ដើម្បីយកឈ្នះលើរុស្ស៊ីវិញ។
មន្រ្តីស៊ើបការណ៍សម្ងាត់អង់គ្លេសម្នាក់បាននិយាយថា បើសិនរុស្ស៊ី នៅបន្ត វាយប្រហារបាញ់មីស៊ីល ដូចកាលពីថ្ងៃចន្ទ នោះ មិនយូរទេ រុស្ស៊ី នឹងអស់សព្វាវុធពីក្នុងឃ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ