រុស្ស៊ីពង្រឹងសន្តិសុខលើស្ពានគ្រីមេ នៅមួយថ្ងៃក្រោយហេតុការណ៍បំផ្ទុះរថយន្តនៅលើស្ពាន
ស្ពានគ្រីមេ បានចាប់បើកដំណើរការឡើងវិញ តាំងពីថ្ងៃសៅរ៍ នៅប៉ុន្មានម៉ោងក្រោយហេតុការណ៍បំផ្ទុះរថយន្ត ដែលបានសម្លាប់មនុស្ស៣នាក់ និងបានបំផ្លាញស្ពានអស់មួយភាគ។ តាមទីភ្នាក់ងារព័ត៌មានរុស្ស៊ី ដោយបញ្ជាឲ្យបើកការស៊ើបអង្កេតបន្ទាន់ លោកពូទីនបានបញ្ជាផងដែរឲ្យក្រុមភ្នាក់ងារសន្តិសុខសហព័ន្ធ ដែលជាក្រុមភ្នាក់ងារសម្ងាត់រុស្ស៊ីទទួលបន្ទុកធានាសុវត្ថិភាពស្ពានគ្រីមេដែលជាហេដ្ឋារចនាសម្ព័ន្ធគន្លឹះ និងនិមិត្តរូបនៃការកាត់យកទឹកដីអ៊ុយក្រែនពីសំណាក់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:០២
ចរាចរណ៍រថយន្ត និងរទេះភ្លើងនៅលើស្ពានគ្រីមេបានចាប់ដំណើរការធម្មតាឡើងវិញ នៅរសៀលថ្ងៃសៅរ៍ ដោយអាជ្ញាធរសម្រេចបិទតែស្ពានផ្លូវរថយន្តដែលរងខូចខាតមួយផ្នែកនិង បាក់ធ្លាក់ចូលសមុទ្រ ដោយសារកម្លាំងបំផ្ទុះរថយន្ត។
រូបភាពវីដេអូរបស់កាំម៉េរ៉ាសន្តិសុខដែលគេឃើញបង្ហោះផ្សាយនៅលើបណ្តាញសង្គមបានបង្ហាញកម្លាំងផ្ទុះមហាសាលនៅលើស្ពានគ្រីមេ នៅព្រឹកព្រលឹមថ្ងៃសៅរ៍ នៅពេលរថយន្តតូចធំកំពុងបើកឆ្លងទៅមករវាងដែនដីរុស្ស៊ី និងទៀបកោះគ្រីមេ ដែលរុស្ស៊ីបានកាត់យកពីអ៊ុយក្រែននៅឆ្នាំ ២០១៤។ តាមក្រុមស៊ើបអង្កេត កម្លាំងផ្ទុះរបស់រថយន្តធុនធ្ងន់មួយគ្រឿងបានទៅរាលដាលឆេះស៊ីទែនប្រេងនៅលើផ្លូវរទេះភ្លើងក្បែរនោះ។ មនុស្ស៣នាក់បានស្លាប់ ដោយ១នាក់ ជាម្ចាស់បើករថយន្តធុនធ្ងន់ ចំណែក២នាក់ទៀតជាអ្នកបើកនិងអ្នកធ្វើដំណើរនៅក្នុងរថយន្តធុនតូច ដែលបើកជិតរថយន្តកំពុងផ្ទុះ។
នៅក្រោយហេតុការណ៍ផ្ទុះបំផ្លាញស្ពានគ្រីមេដែលជាច្រកសំខាន់របស់រុស្ស៊ីសម្រាប់ការដឹកជញ្ជូនទ័ព និងសព្វាវុធ ទៅធ្វើសង្រ្គាមនៅអ៊ុយក្រែន រុស្ស៊ីមិនបាននិយាយចោទប្រកាន់អ៊ុយក្រែន ហើយភាគីអ៊ុយក្រែនក៏មិនបានចេញមុខទទួលខុសត្រូវថា ហេតុការណ៍បំផ្ទុះបំផ្លាញស្ពានគ្រីមេជាស្នាដែរបស់ខ្លួនដែរ។
ខណៈពេលដែលរុស្ស៊ីកំពុងរង់ចាំលទ្ធផលស៊ើបអង្កេត មុនការសន្និដ្ឋានយ៉ាងណានោះ វិមានប្រធានាធិបតីអ៊ុយក្រែនចេញផ្សាយសេចក្តីប្រកាសព័ត៌មានរបស់ទីប្រឹក្សាសន្តិសុខរបស់លោកហ្សេឡេនស្គី ដែលលើកឡើងថា ហេតុការណ៍បំផ្ទុះរថយន្តនៅលើស្ពានគ្រីមេកើតចេញមកពីជម្លោះផ្ទៃក្នុងរវាងកងទ័ពរុស្ស៊ី និងក្រុមភ្នាក់ងារស៊ើបការណ៍សម្ងាត់រុស្ស៊ី។ តាមទីប្រឹក្សាសន្តិសុខជាតិអ៊ុយក្រែន រថយន្តដែលផ្ទុះឆេះនៅលើស្ពានគ្រីមេមានប្រភពចេញមកពីដែនដីរុស្ស៊ី។ ដូច្នេះ គឺនៅក្នុងទឹកដីរុស្ស៊ី ដែលគេត្រូវផ្តោតតាមដានស៊ើបអង្កេត។
គណៈកម្មាធិការស៊ើបអង្កេតរុស្ស៊ីបានអះអាងថា គេបានកំណត់អត្តសញ្ញាណរបស់ម្ចាស់រថយន្តធុនធ្ងន់ ដែលជាប្រជាជនរស់នៅភាគខាងត្បូងរុស្ស៊ី និងថា គេកំពុងចុះឆែកឆេផ្ទះរបស់ជនសង្ស័យខាងលើ។
តាមការចុះផ្សាយរបស់ទីភ្នាក់ងារព័ត៌មានរុស្ស៊ី Ria Novsti ឧបនាយករដ្ឋមន្រ្តីរុស្ស៊ី លោកMarat Khousnoullineបានបញ្ជាឲ្យគេស្រង់បំណែករបស់ស្ពានចេញពីទឹកជាបន្ទាន់ ក្នុងពេលដែលក្រុមជំនាញមុជក្រោមទឹកចាប់សិក្សាពីទំហំខូចខាតរបស់ស្ពាន នៅព្រឹកថ្ងៃអាទិត្យ។ ដោយអះអាងពីសមត្ថភាពបច្ចេកទេសនាំមុខរបស់រុស្ស៊ី ឧបនាយករដ្ឋមន្រ្តីរុស្ស៊ីបញ្ជាក់ថា ស្ពានគ្រីមេនឹងត្រូវជួសជុល ហើយនឹងអាចដំណើរការពេញលេញឡើងវិញនាពេលឆាប់ៗខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ