តើអ្នកណានឹងចូលមកកាន់តំណែងនាយករដ្ឋមន្រ្តីអង់គ្លេសបន្តពីលោកស្រីលីហ្ហ ត្រាស្ស?
ចុះផ្សាយនៅថ្ងៃ៖
ស្តាប់ - ០៧:៤៩
នៅប្រទេសអង់គ្លេសគណបក្សកាន់អំណាចកំពុងចាប់ផ្តើមនីតិវិធីបោះឆ្នោតបន្ទាន់ ដើម្បីស្វែងរកមនុស្សថ្មីមកកាន់តំណែងនាយករដ្ឋមន្រ្តី បន្តពីលោកស្រីលីហ្ហ ត្រាស្ស ដែលបានប្រកាសចុះចេញពីតំណែង ដ៏ប្រថុចញ៉ុច បំផុត កាលពីថ្ងៃព្រហស្បតិ៍ទី២០តុលា។ នៅក្នុងចំណោមបេក្ខជន អាចមានផងដែរ អតីតនាយករដ្ឋមន្រ្តី លោកបូរីស ចនសុន ដែលទើបលាលែងពីមុខតំណែង ដោយសាររឿងអាស្រូវកាលពីរដូវក្តៅ។ គណបក្សកាន់អំណាចត្រូវចូលមកកាន់តំណែង នាយករដ្ឋមន្រ្តីថ្មី ដឹកនាំរដ្ឋាភិបាល នៅក្នុងកាលៈទេសៈ ដែលអង់គ្លេសកំពុងវិបត្តិហិរញ្ញវត្ថុ និងវិបត្តិនយោបាយ។
ជាលើកទី១ក្នុងប្រវត្តិសាស្រ្ត អង់គ្លេសមាននាយករដ្ឋមន្រ្តីដែលកាន់អំណាចបានតិចថ្ងៃបំផុត នោះ គឺលោកស្រីលីហ្ស ត្រាស្ស ដែលបានបំណែកកំណត់ត្រា ក្នុងនាមជានាយករដ្ឋមន្រ្តីអង់គ្លេសដែលកាន់អំណាច បានត្រឹម ៤៤ថ្ងៃប៉ុណ្ណោះ។ បន្ទាប់ពីលោកស្រី ប្រកាសលាចុះពីតំណែងប្រមុខរដ្ឋាភិបាលអង់គ្លេស គណបក្សអភិរក្សនិយមដែលជាបក្សកាន់អំណាចបានចាប់ផ្តើមនីតិវិធី នៅថ្ងៃសុក្រនេះ ដើម្បីជ្រើសរើសនាយករដ្ឋមន្រ្តី ថ្មី មកជំនួស លោកស្រី លីហ្ហ ត្រាស្ស។ ប្រធានក្រុមប្រឹក្សាកែទម្រង់ផ្ទៃក្នុងបក្ស លោកហ្គ្រាហាំ ប្រាឌី (Graham Brady)បានសន្យាថា អង់គ្លេស នឹងមាននាយករដ្ឋមន្រ្តីថ្មី នៅចុងសប្តាហ៍ក្រោយ។
ដូចកាលបោះឆ្នោតកាលពីខែកក្កដាកន្លងទៅ ការបោះឆ្នោតជ្រើសរើសនាយករដ្ឋមន្រ្តីថ្មី នេះ មិនមែនជាការបោះឆ្នោត ថ្នាក់ជាតិ ដែលប្រជាជនអង់គ្លេសទូទាំងប្រទេស ទៅបោះឆ្នោតជ្រើសរើសនាយករដ្ឋមន្ត្រីថ្មីនោះទេ។ វាគឺជាការបោះឆ្នោតក្នុងជួរបក្សអភិរក្សនិយម ព្រោះថា បក្សនេះកំពុងសំឡេងភាគច្រើន នៅក្នុងសភាស្រាប់ទៅហើយ។ ក្នុងករណីដែលនាយករដ្ឋមន្ត្រីលាឈប់ពីតំណែង មុនចប់អាណត្តិយ៉ាងដូច្នេះ គឺគណបក្សអភិរក្សនិយម ដែលជាបក្សកាន់អំណាច ដែលមានសិទ្ធិសម្រេចជ្រើសនាយករដ្ឋមន្ត្រីថ្មី តាមរយៈ ការបោះឆ្នោតផ្ទៃក្នុង ដើម្បីជ្រើសរើសមេដឹកនាំបក្សថ្មី។ មេដឹកនាំបក្សថ្មីនឹងចូលកាន់តំណែងជានាយករដ្ឋមន្រ្តីដោយស្វ័យប្រវត្តិ។
អាចថា ក្នុងរយៈពេល តែ ៤ខែ គណបក្សអភិរក្សនិយមអង់គ្លេស បានបោះឆ្នោតផ្លាស់ប្តូរមេដឹកនាំបក្សដល់ទៅ ២ដង។ លើកទី១ គឺ នៅពេលលោកបូរីស ចនសុន ប្រកាសលាចុះពីតំណែងប្រធានបក្ស ដោយសារតែរឿងអាស្រូវភូតកុហក លួចជប់លៀង នៅក្នុងពេលប្រទេសកំពុងបិទខ្ទប់ ក្នុងអំឡុងវិបត្តិកូវីដ។ លើកទី២នេះ គឺ លោកស្រី លីហ្ហ ត្រាស្ស ដែលប្រកាសចុះចេញពីតំណែងនាយករដ្ឋមន្រ្តី ដោយសារតែ គម្រោងច្បាប់ហិរញ្ញវត្ថុ ដ៏អប្រជាប្រិយភាពរបស់លោកស្រី។
មួយវិញទៀត ខុសពីការបោះឆ្នោតផ្ទៃក្នុងបក្សកាលពីខែកក្កដា ដែលត្រូវការពេលវេលា រាប់ខែ ការបោះឆ្នោតជ្រើសរើសបេក្ខជនប្រធានបក្សថ្មី ដែលនឹងចូលកាន់តំណែងជានាយករដ្ឋមន្រ្តីថ្មីបន្តពីលោកស្រី លីហ្ហ ត្រាស្ស លើកនេះ នឹងពង្រួញពេលវេលាមកនៅត្រឹម ១សប្តាហ៍ប៉ុណ្ណោះ។
ដើម្បីអាចចូលរួមក្នុងការប្រកួតប្រជែងយកតំណែងប្រធានបក្ស ឬនាយករដ្ឋមន្រ្តី បេក្ខជនត្រូវរកសំឡេងគាំទ្ររបស់សមាជិកសភា មកពីគណបក្ស អភិរក្សនិយម យ៉ាងតិច ១០០សំឡេង ឲ្យបានត្រឹមថ្ងៃចន្ទដើមសប្តាហ៍ក្រោយ។ ដោយសារគណបក្សអភិរក្សនិយមមានសំឡេង៣៥៧ នៅក្នុងសភា ដូច្នេះ គេវាយតម្លៃថា នឹងមានបេក្ខជនតែ ៣នាក់ ប៉ុណ្ណោះ។ នៅថ្ងៃយប់ថ្ងៃចន្ទ សមាជិកសភាមកពីគណបក្សអភិរក្សនិយមដដែល នឹងបោះឆ្នោត ជ្រើសរើសបេក្ខជនពីររូប។ ក្នុងករណីដែលបេក្ខជន១នាក់ទទួលបានសំឡេងគាំទ្រផ្តាច់មុខ នៅសភា នោះ បេក្ខជន១នាក់នោះនឹងត្រូវជ្រើសរើសជានាយករដ្ឋមន្រ្តីភ្លាមតែម្តង។ ប៉ុន្តែ ក្នុងករណីមានបេក្ខជន២រូប ដែលអាចមានសំឡេងគាំទ្រប្រកៀកប្រកើយគ្នា នោះសមាជិកទាំងអស់របស់បក្សអភិរក្សនិយម ដែលមានចំនួន ជាង ១៧០ ០០០នាក់ នឹងមានពេលបោះឆ្នោត អេឡិចត្រូនិក រហូតដល់ថ្ងៃសុក្រ ចុងសប្តាហ៍ក្រោយ។ មានន័យថា នៅថ្ងៃសុក្រទី ២៨ តុលា គេនឹងដឹងថា តើអ្នកណាដែលចូលមកកាន់តំណែងនាយករដ្ឋមន្រ្តី អង់គ្លេសបន្តពីលោកស្រី លីហ្ហ ត្រាស្ស។
បេក្ខជនបីរូបដែលលេចធ្លោ
គិតរហូតមកដល់ថ្ងៃសុក្រ នៅមិនទាន់បេក្ខជនណាម្នាក់ ចេញមុខប្រកាសជាផ្លូវការសម្រាប់ការប្រកួតប្រជែងដណ្តើមតំណែងប្រធានបក្ស ឬតំណែងនាយករដ្ឋមន្រ្តីនៅឡើយទេ។ ប៉ុន្តែ គេសង្កេតឃើញមានបេក្ខជនដែលមានសក្តានុពល បីរូប។
ទីមួយ គឺលោក រីស្សី ស៊ុនណាក់(Rishi Sunak) ដើមកំណើតឥណ្ឌា ដែលជាមហាសេដ្ឋី និងធ្លាប់ជាអតីតរដ្ឋមន្ត្រីហិរញ្ញវត្ថុរបស់រដ្ឋាភិបាល លោកបូរីស ចនសុន។ លោករីស្សី ស៊ុនណាក់នេះ ធ្លាប់ជាបេក្ខជនប្រកួតប្រជែងទឹកចុងក្រោយ ជាមួយ លោកស្រី លីហ្ហ ត្រាស្ស។ លោកជាបុគ្គលទី១ ដែលសមាជិកសភា មកពីគណបក្សអភិរក្សនិយម ពេញចិត្តជាងគេ ប៉ុន្តែ លោកបានចាញ់លោកស្រី ត្រាស្ស កាលពីខែ កក្កដា ដោយសារលោកទទួលសំឡេងគាំទ្រតិច ក្នុងចំណោមសមាជិកបក្ស។ អ្នកវិភាគមួយចំនួនវាយតម្លៃ ថា ដោយមកពីមានការគាំទ្រច្រើនរបស់សមាជិកសភា មកពីគណបក្សអភិរក្សនិយម លោក រីស្សី ស៊ុនណាក់ នឹងអាចជាប់ឆ្នោត ក្លាយជាមេដឹកនាំបក្ស និងក្លាយជានាយករដ្ឋមន្រ្តី ដោយស្វ័យប្រវត្តិតែម្តង។
បេក្ខជនម្នាក់ទៀត គឺ អតីតរដ្ឋមន្ត្រីការពារជាតិ អ្នកស្រី ផែន្នី ម័រដូនត៍ (Penny Mordaunt)។ ដូច លោករីស្សី ស៊ុនណាក់ លោកស្រី ន្នី ម័រដូនត៍ ក៏ធ្លាប់ឈរឈ្មោះ និងធ្លាប់ចាញ់ក្នុងដៃអ្នកស្រី លីស ត្រាស្ស ម្តងហើយកាលពីរដូវក្តៅ។
ចុងក្រោយគេ គឺលោក អតីតនាយករដ្ឋមន្រ្តី បូរីសចនសុនតែម្តង។ តាមកាសែតអង់គ្លេស លោកបូរីស ចនសុន ដែលបានប្រកាសលាចុះពីតំណែង ដោយសារតែរឿងអាស្រូវ ក៏កំពុងតែរកផ្លូវ មកប្រកួតប្រជែងចង់កាន់អំណាចជាថ្មី ម្តងទៀតដែរ។
លោកបូរីស ចនសុនមិនទាន់ប្រកាសផ្លូវការបេក្ខភាពរបស់លោកនោះទេ ប៉ុន្តែ សមាជិកបក្សអភិរក្សនិយមមួយចំនួនកំពុងធ្វើយុទ្ធនាការចង់ឲ្យលោកបូរីស ចនសុនត្រលប់មកវិញ ព្រោះគេយល់ថា មានតែលោកចនសុនម្នាក់គត់ ដែលអាចបង្រួបបង្រួមសមាជិកបក្ស ហើយលោកមានសមត្ថភាពដើម្បីជំរុញឲ្យបក្សឈ្នះឆ្នោត នៅ២ឆ្នាំខាងមុខ។
ប៉ុន្តែ សម្រាប់ មន្រ្តីបក្សកាន់អំណាចផ្សេងទៀត លោកបូរីស ចនសុន ដែលកំពុងជាប់ក្នុងការស៊ើបអង្កេតរបស់សភា ទាក់ទងនឹងការចោទប្រកាន់លើរឿងអាស្រូវរៀបចំជប់លៀង ក្នុងពេលប្រទេសកំពុងត្រូវបិទខ្ទប់ ដោយសារជំងឺរាតត្បាតកូវីដ គួរ តែនៅឃ្លាតឆ្ងាយពីឆាកនយោបាយមួយរយៈសិន ព្រោះថា បើលោកចនសុនចង់ត្រលប់មកកាន់អំណាចវិញ នោះ វាជាការអាម៉ាស់ខ្លាំងណាស់ និងអាចគំរាមកំហែងអនាគតកេរ្តិ៍ឈ្មោះរបស់បក្ស នៅក្នុងការបោះឆ្នោតនៅអាណត្តិក្រោយ។
បញ្ហាគ្រប់ជំពូកកំពុងរង់ចាំអនាគតនាយករដ្ឋមន្រ្តីអង់គ្លេស
លោកស្រី លីហ្ហ ត្រាស្ស បានកាន់តំណែងជានាយករដ្ឋមន្រ្តីអង់គ្លេស បែបផ្លេកបន្ទោរ គឺមានរយៈពេល តែ៤៤ថ្ងៃប៉ុណ្ណោះ ប៉ុន្តែ វាបានធ្វើឲ្យអង់គ្លេសជួបវិបត្តិហិរញ្ញវត្ថុខ្លាំងមែនទែន។
គម្រោងច្បាប់កាត់បន្ថយពន្ធដ៏អប្រជាប្រិយភាពរបស់រដ្ឋាភិបាលលោកស្រី ត្រូវបានលុបចោលទៅវិញមែន ប៉ុន្តែ វាបានធ្វើឲ្យអ្នកវិនិយោគ បាត់បង់ជំនឿទុកចិត្តលើរដ្ឋាភិបាល និងសេដ្ឋកិច្ចរបស់អង់គ្លេស។ ដោយសារតែកង្វល់របស់អ្នកវិនិយោគ អត្រាការប្រាក់បំណុលរបស់អង់គ្លេស បានហក់ឡើងរហូតដល់៥% មុននឹងធ្លាក់ចុះមកវិញ នៅជាង ៣% នៅក្រោយ លោកស្រី ត្រាស្ស ប្រកាសចុះចេញពីតំណែងនាយករដ្ឋមន្រ្តី។
បន្ថែមពីលើនោះ វិបត្តិប្រាក់បំណុល កើនឡើង គឺវិបត្តិថាមពលឡើងថ្លៃ និងវិបត្តិអតិផរណាដែលកំពុងដាក់សម្ពាធខ្លាំងលើប្រជាជនអង់គ្លេស។
ដូច្នេះ មិនថា បេក្ខជនណានឹងចូលមកកាន់តំណែងនាយករដ្ឋមន្រ្តីអង់គ្លេសបន្តពីលោកស្រី ត្រាស្សនោះទេ បេក្ខជននោះត្រូវរៀនសូត្របទពិសោធន៍របស់លោកស្រី ត្រាស្ស ព្រោះថា ដោយសារតែច្បាប់កាន់បន្ថយពន្ធ លើអ្នកមាន ដោយគ្មានផែនការច្បាស់លាស់ដើម្បី ជំរុញ សេដ្ឋកិច្ច លោកស្រី ត្រាស្សត្រូវខ្ទាតចេញពីអំណាច ដែលលោកស្រីទើបចូលកាន់បានតែ ៤៤ថ្ងៃប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ