អង់គ្លេស៖ កៅអីនាយករដ្ឋមន្រ្តីកំពុងរង្គោះរង្គើ ក្រោយពីរដ្ឋមន្ត្រីមហាផ្ទៃ សុំចុះតំណែង
នៅអង់គ្លេស, អ្នកស្រី លីស ត្រាស្ស ឡើងកាន់តំណែងទើបនឹងបានប៉ុន្មានសប្តាហ៍សោះ ប៉ុន្តែតំណែងកៅអីនាយករដ្ឋមន្រ្តីកំពុងរង្គោះរង្គើ ព្រោះតែបញ្ហាផ្ទៃក្នុងគណៈរដ្ឋមន្រ្តី។ ក្រោយពីប្តូររដ្ឋមន្ត្រីក្រសួងហិរញ្ញវត្ថុនៅសប្តាហ៍មុន, ថ្ងៃពុធ ទី១៩តុលា រដ្ឋមន្ត្រីក្រសួងមហាផ្ទៃ ក៏បានប្រកាសសុំចុះចេញពីតំណែងទៀត។ ទន្ទឹមនឹងគ្នានេះ គណបក្សប្រឆាំង កាន់តែបានដៃ និងទាមទារឲ្យអ្នកស្រីនាយករដ្ឋមន្ត្រីអង់គ្លេសចុះចេញពីតំណែងដែរ។
ចុះផ្សាយនៅថ្ងៃ៖
ស្តាប់ - ០២:២៤
ពីថ្ងៃពុធ រដ្ឋមន្ត្រីមហាផ្ទៃ អ្នកស្រី ស៊ុយអេល្លា ប្រាវ័រម៉ាន់ (Suella Braverman) បានសុំលាឈប់ពីតំណែង ដោយទទួលស្គាល់កំហុស ថាបានប្រើប្រាស់ប្រព័ន្ធសារអេឡិចត្រូនិចអ៊ីម៉ែលផ្ទាល់ខ្លួន សម្រាប់ផ្ញើឯកសារផ្លូវការរបស់រដ្ឋ ទៅកាន់អ្នកតំណាងរាស្ត្រម្នាក់នៅសភា។ អ្នកស្រីរដ្ឋមន្ត្រីរូបនេះទទួលបន្ទុកសំខាន់ខាងមើលការខុសត្រូវជនភៀសខុសច្បាប់ ដែលលួចឆ្លងដែនតាមសមុទ្រពីស្រុកបារាំងទៅអង់គ្លេស។ អ្នកស្រីក៏ធ្លាប់ត្រូវគេស្គាល់ថាជាអ្នកគ្រប់គ្រងនយោបាយអន្តោប្រវេសន៍យ៉ាងតឹងរឹង តួយ៉ាងករណីបញ្ជូនជនភៀសខ្លួនទៅកាន់ប្រទេសដើមវិញ ដូចជា សំណុំរឿង បញ្ចូនជនភៀសទៅប្រទេសរ៉វាន់ដា នាពេលកន្លងទៅ។
ការសុំលាឈប់របស់រដ្ឋមន្ត្រីមហាផ្ទៃ គឺបណ្តាលឲ្យបរិយាកាសនយោបាយអង់គ្លេសកាន់តែអាប់អួរចំពោះអ្នកស្រីនាយករដ្ឋមន្ត្រី លីស ត្រាស្ស ដែលទើបតែចូលកាន់តំណែងបាន៦សប្តាហ៍ តែពេលនេះ ពីរក្រសួងទៅហើយ ត្រូវរុះរើ។ រដ្ឋមន្ត្រីម្នាក់ត្រូវដកចេញ និងម្នាក់ទៀត សុំចុះចេញ។ ព្រឹត្តិការណ៍នេះ នាំឲ្យខាងក្រុមគណបក្សប្រឆាំង គឺបក្សពលករ ទាមទារឲ្យអ្នកស្រីនាយករដ្ឋមន្ត្រីចុះចេញពីតំណែងដែរ។ ការទាមទារឲ្យចុះចេញពីតំណែងនេះ ក៏មានដែរ ពី អ្នកតំណាងរាស្ត្រ ដល់ទៅ ៦ រូប មកពីគណបក្សអភិរក្សនិយម បក្សរួមគ្នារបស់អ្នកស្រីនាយករដ្ឋមន្ត្រីដែរ។
តាមការស្ទង់មតិរបស់ YouGov, ក្នុងចំណោមពលរដ្ឋអង់គ្លេស១០នាក់ គឺមានតែមួយនាក់ប៉ុណ្ណោះដែលបញ្ចេញមតិវិជ្ជមានចំពោះអ្នកស្រីនាយករដ្ឋមន្ត្រីអង់គ្លេស។ ជាមួយគ្នានេះ ក្នុងចំណោមម្ចាស់ឆ្នោត៥នាក់ដែលបោះឆ្នោតឲ្យបក្សអភិរក្សនិយម គឺម្នាក់ប៉ុណ្ណោះនៅដកជាប់ចិត្តនឹងអ្នកស្រីលីស ត្រាស្ស។ លើសពីនេះទៀត ៥៥% នៃសមាជិកបក្សកាន់អំណាច គឺយល់ឃើញថាអ្នកស្រីគួរតែចុះពីតំណែង។ នេះបើតាមតាមការស្ទង់មតិដដែល។ ប៉ុន្តែ គណបក្សអភិរក្សនិយម ក៏បានដឹងច្បាស់ហើយថា ដំណើរការដោះដូរនាយករដ្ឋមន្ត្រីត្រូវស៊ីពេលយូរ ឆ្លងនីតីវិធីច្រើន និងស្មុគស្មាញ ខណៈដែលអាណត្តិរដ្ឋាភិបាល នៅសល់តែប្រមាណ២ឆ្នាំទៀតប៉ុណ្ណោះ។
ទោះជាយ៉ាងម្តេចក្តី អ្នកស្រី លីស ត្រាស្ស នៅតែប្រកាន់ជំហរមាំ។ ក្នុងសវនាការសួរដេញដោរប្រចាំសប្តាហ៍ នៅរដ្ឋសភា អ្នកស្រីអះអាងថាខ្លួនជាអ្នកប្រយុទ្ធ និងមិនមែនមនុស្សដែលបោះបង់ដោយងាយៗទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ