នាយករដ្ឋមន្រ្តីអង់គ្លេស លាចុះពីតំណែង ក្រោយពីកាន់អំណាច បានតែ៤៤ថ្ងៃ
-នៅអង់គ្លេស, នាយករដ្ឋមន្រ្តីអង់គ្លេស អ្នកស្រី លីស ត្រាស្ស ប្រកាសលាឈប់ចុះចេញពីតំណែង។ ជាការប្រកាសតែ២៤ម៉ោងប៉ុណ្ណោះ ក្រោយពីអ្នកស្រីអះអាងថានឹងតស៊ូឲ្យដល់ទីបំផុត និងថាខ្លួនមិនមែនជាមនុស្សដែលបោះបង់ចោលងាយៗទេ។ ទោះជាយ៉ាងណាក៏ដោយចុះ អ្នកស្រី លីស ត្រាស្ស បានបំណែកកំណត់ត្រា ជានាយករដ្ឋមន្ត្រីអង់គ្លេស ដែលកាន់អំណាចបានតិចថ្ងៃជាងគេបំផុត ពោលគឺអ្នកស្រីកាន់តំណែងនាយករដ្ឋមន្ត្រី បានតែ៤៤ថ្ងៃប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៥
«បើផ្អែកមើលលើស្ថានភាពបច្ចុប្បន្ន ខ្ញុំមិនអាចនឹងបំពេញអាណត្តិនាយករដ្ឋមន្ត្រី ដែលបក្សអភិរក្សនិយមបានបោះឆ្នោតឲ្យខ្ញុំ បានចប់អាណត្តិទេ ហើយការសុំលាចុះពីតួនាទីនេះ ខ្ញុំបានទូលថ្វាយព្រះមហាក្សត្ររួចហើយ»។ នេះជាប្រសាសន៍របស់អ្នកស្រី លីស ត្រាស្ស និងដែលបានប្រកាសទៀតថា ការបោះឆ្នោតផ្ទៃក្នុងបក្ស ដើម្បីជ្រើសរើសក្បាលម៉ាស៊ីនដឹកនាំរដ្ឋាភិបាល អាចនឹងត្រូវរៀបចំធ្វើ ទៅក្នុងសប្តាហ៍ថ្មីខាងមុខ។ ក៏ប៉ុន្តែ ចំពោះប្រមុខគណបក្សប្រឆាំង បក្សពលករ គឺលោក Keir Starmer ទាមទារឲ្យប្រញាប់បោះឆ្នោតរើសនាយករដ្ឋមន្ត្រី ឲ្យបានឆាប់ គឺក្នុងពេលឥឡូវនេះតែម្តង។
ក្រោយការប្រកាសចុះពីក្បាលម៉ាស៊ីនរដ្ឋាភិបាលអង់គ្លេស ប្រតិកម្មបានធ្លាក់ចុះមកភ្លាមៗពីប្រទេសសម្ព័ន្ធមិត្ត។ ប្រធានាធិបតីបារាំង ដែលបានជជែកគ្នាកាលពីសប្តាហ៍មុន ជាមួយអ្នកស្រី លីស ត្រាស្ស និងបានចាត់ទុកថា ការដោះដូរយោបល់នោះ ប្រកបដោយក្តីស្ថាបនា ហើយលោក អេមានុយអែល ម៉ាក្រុង ក៏បានជូនពរនិងសង្ឃឹមថា អង់គ្លេស អាចឆាប់បានរកច្រកផ្លូវ វិលទៅរកស្ថានភាពប្រក្រតីភាពជាធម្មតាវិញ និងឆាប់បានបោះពួយទៅមុខ។
ជាការរំឭក អ្នកស្រី លីស ត្រាស្ស ចូលកាន់តួនាទីជាប្រមុខរដ្ឋាភិបាល នៅថ្ងៃទី៦កញ្ញា បានតែ២ថ្ងៃ ព្រះមហាក្សត្រិយ អេលីហ្សាប៊ែត ទី២ ស្តេចយាងសោយទីវង្គត ហើយអង់គ្លេសត្រូវធ្វើបុណ្យកាន់ទុក្ខជាតិ អស់១០ថ្ងៃ។ ថ្ងៃទី២៣កញ្ញា អតីតរដ្ឋមន្ត្រីហិរញ្ញវត្ថុ បានប្រកាសគម្រោងចាត់ចែងថវិកាជាតិ ដើម្បីជំរុញកំណើនសេដ្ឋកិច្ច និងចុះបន្ថយពន្ធ។ ក៏ប៉ុន្តែ គម្រោងការនេះ ត្រូវធ្វើឲ្យទីផ្សារសេដ្ឋកិច្ចអង់គ្លេស ដាំក្បាលចុះ ហើយរូបិយប័ណ្ណជាតិក៏ធ្លាក់ចុះអាក្រក់មិនធ្លាប់ជួប ដែលជំរុញឲ្យមានវិបត្តិហិរញ្ញវត្ថុ និងដរជាវិបត្តិនយោបាយ រហូតរដ្ឋមន្ត្រីហិរញ្ញវត្ថុ ត្រូវដកចេញ ហើយអ្នកស្រីនាយករដ្ឋមន្ត្រីខ្លួនឯង ក៏ទទួលស្គាល់កំហុស ដែលត្រូវលុបចោលកំណែទម្រង់សេដ្ឋកិច្ច ដែលខ្លួនបានសន្យា។
ការសុំលាឈប់ពីតំណែងរបស់រដ្ឋមន្ត្រីមហាផ្ទៃនៅថ្ងៃពុធ ទៀតសោត ក៏ជាកម្លាំងចលករបន្ថែម ជំរុញដាក់សម្ពាធធ្វើឲ្យអ្នកស្រីនាយករដ្ឋមន្ត្រី ត្រូវប្រកាសសុំចុះពីតំណែងដែរ។ ការប្រកាសនេះ បន្ទាប់ពីអ្នកស្រី លីស ត្រាស្ស បានជួបពិភាក្សាជាមួយប្រធានក្រុមប្រឹក្សាកែទម្រង់ផ្ទៃក្នុងបក្ស ហ្គ្រាហាំ ប្រាឌី (Graham Brady) នៅព្រឹកថ្ងៃព្រហស្បតិ៍។ អ្នកនយោបាយទាំងពីរបានឯកភាពគ្នាថា ត្រូវរៀបចំបោះឆ្នោតនៅសប្តាហ៍ក្រោយដើម្បីជ្រើសរើសមេដឹកនាំថ្មី។ ធ្វើដូច្នេះ ដើម្បីឲ្យមានពេលអនុវត្តគម្រោងថវិកា និងធានាបានស្ថិរភាពសេដ្ឋកិច្ចនិងសន្តិសុខជាតិផង។ នេះបើតាមការពន្យល់របស់អ្នកស្រី លីស ត្រាស្ស។
ចំពោះមុខតំណែងនាយករដ្ឋមន្ត្រីថ្មី កាសែតក្នុងស្រុកអង់គ្លេសជាច្រើនរួមទាំង BBC ផង យល់ឃើញថា រដ្ឋមន្ត្រីហិរញ្ញវត្ថុ Jeremy Hunt នឹងមិនដាក់បេក្ខភាពទេ។ ចំណែកសារព័ត៌មាន Sky News រាយការណ៍ថា អតីតរដ្ឋមន្ត្រីហិរញ្ញវត្ថុ លោកសេដ្ឋី រីស្សី ស៊ុនណាក់ (Rishi Sunak) ជាបុគ្គលទី១ ដែលគណបក្សអភិរក្សនិយម ពេញចិត្តជាងគេ។ ម្នាក់ទៀត អតីតរដ្ឋមន្ត្រីការពារជាតិ អ្នកស្រី ផែន្នី ម័រដូនត៍ (Penny Mordaunt)។ អ្នកទាំងពីរនេះ ធ្លាប់ចាញ់ក្នុងដៃអ្នកស្រី លីស ត្រាស្ស ម្តងហើយកាលពីរដូវក្តៅ តែពេលនេះ កំពុងតែរកផ្លូវប្រកួតប្រជែងអំណាចជាថ្មី ម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ