នាយករដ្ឋមន្ត្រីស្រីអង់គ្លេស ប្រឹងទប់ទល់ដើម្បីរក្សាកៅអីរបស់ខ្លួន
នៅអង់គ្លេស, នាយករដ្ឋមន្ត្រីអង់គ្លេស អ្នកស្រី លីស ត្រាស្ស និងបក្សអភិរក្សនិយម ត្រូវប្រឈមមុខនឹងវិបត្តិសេដ្ឋកិច្ច និងនយោបាយកាន់តែខ្លាំងៗ ដែលត្រូវជំរុញឲ្យមានការផ្លាស់ប្តូររដ្ឋមន្ត្រីហិរញ្ញវត្ថុកាលពីសប្តាហ៍មុន។ ការផ្លាស់ប្តូររដ្ឋមន្ត្រីនេះ គឺត្រូវគេរិះគន់ជាបន្ថែមទៀតថា អ្នកស្រីនាយករដ្ឋមន្ត្រី ប្រឹងទប់ទល់ដើម្បីរក្សាកៅអីរបស់ខ្លួន។ បើតាមកាសែតនៅក្នុងស្រុកអង់គ្លេស Sunday Times និង Sunday Express គឺមានសំបុត្រប្រមាណជាមួយរយច្បាប់ ផ្ញើតាមពីអ្នកតំណាងរាស្ត្រ ទៅគណបក្សអភិរក្សនិយម ដែលបានសរសេរថ្លែងពីក្តីមិនទុកចិត្តរដ្ឋាភិបាល និងជំរុញឲ្យគិតគូរដូរនាយករដ្ឋមន្ត្រីចេញទៅ។
ចុះផ្សាយនៅថ្ងៃ៖
ស្តាប់ - ០២:៤៩
ថ្លែងពីថ្ងៃអាទិត្យ អ្នកស្រី លីស ត្រាស្ស ប្រសាសន៍ថា«បានស្តាប់និងបានយល់»ពីសំណូមពរនិងកំហឹងរបស់រាស្ត្រនិងអ្នករិះគន់ហើយ។ នាយករដ្ឋមន្ត្រីអង់គ្លេស បន្តបញ្ជាក់ជំហរថា «បើពឹងផ្អែកលើប្រាក់ចំណូលពន្ធតិចតួច ហើយការគ្មានទំនុកចិត្តនៅក្នុងទីផ្សារហិរញ្ញវត្ថុនោះ គឺយើងមិនអាចនឹងឲ្យសេដ្ឋកិច្ចជាតិមានកំណើនរឹងមាំបានទេ»។ ប្រសាសន៍នេះ គឺជាការកែសម្រួលកំហុសក្នុងបន្ទាត់ហិរញ្ញវត្ថុកន្លងទៅ។ ពោលគឺ ជាមួយនឹងរដ្ឋមន្ត្រីសេដ្ឋកិច្ចហិរញ្ញវត្ថុចាស់ គឺមានគម្រោងកំណត់និងកែសម្រួលវិស័យហិរញ្ញវត្ថុរបស់ក្រសួងរដ្ឋ និងបន្ធូរបន្ថយពន្ធផ្ទះសម្រាប់អ្នកមាន ព្រមទាំងកាត់បន្ថយពន្ធលើក្រុមហ៊ុនឯកជន ជាដើម។ ក៏ប៉ុន្តែ នយោបាយហិរញ្ញវត្ថុ បែបនេះ ពុំបានធ្វើឲ្យពលរដ្ឋសប្បាយចិត្ត ហើយសមាជិកជាច្រើនរបស់គណបក្សអភិរក្សនិយម ជាបក្សកាន់អំណាច មិនពេញចិត្តដែរ។ មិនតែប៉ុណ្ណោះ តម្លៃប្រាក់លីវ្រអង់គ្លេសបានធ្លាក់ចុះ, បំណុលសាធារណៈក៏ឡើង ព្រមទាំងទំនុកចិត្តក្នុងវិស័យទីផ្សារក៏ធ្លាក់ចុះទៀត។ វិបត្តិផ្នែកហិរញ្ញវត្ថុ បង្កប្រែក្លាយទៅជា វិបត្តិផ្នែកនយោបាយ នៅក្នុងជួររង្វង់បក្សអភិរក្សនិយម ខ្លួនឯង រហូតអ្នកស្រីនាយករដ្ឋមន្ត្រី ត្រូវសម្រេចចិត្តផ្លាស់ប្តូររដ្ឋមន្ត្រី។
បន្ទាប់ពីត្រូវតែងតាំងកាលពីថ្ងៃសុក្រ រដ្ឋមន្ត្រីហិរញ្ញវត្ថុថ្មី Jeremy Hunt អះអាងពីការដំឡើងពន្ធ និងកាត់បន្ថយចំណាយនៅតាមក្រសួងរដ្ឋ។ លោកសង្កត់ធ្ងន់ថា ការដំឡើងពន្ធគឺចំពោះតែផ្នែកណាដែលចាំបាច់ត្រូវឡើងប៉ុណ្ណោះ និងមិនដំឡើងទាំងអស់ ជាទូទៅទេ ហើយការដំឡើងពន្ធនេះទៀតសោត ក៏សម្រេចទៅតាមការចង់បានរបស់មនុស្សទូទៅដែរ។ លោក ក៏បានថ្លែងការពារនាយករដ្ឋមន្ត្រីដែរថា អ្នកស្រី លីស ត្រាស្ស គ្រាន់តែ«ប្តូររបៀបដើរតែប៉ុណ្ណោះ តែមិនប្តូរគោលដៅឡើយ»។ នេះបើតាមរដ្ឋមន្ត្រីហិរញ្ញវត្ថុថ្មី Jeremy Hunt ដែលថ្លែងពីថ្ងៃសៅរ៍ ។
ចំពោះអ្នកវិភាគនយោបាយអង់គ្លេស និងចំពោះអ្នកមិនសប្បាយចិត្តនឹងចំណាត់ការរបស់នាយករដ្ឋមន្ត្រី គឺគេបានអះអាងការយល់ឃើញរបស់ខ្លួនថា ការដកតំណែក និងប្តូរតំណែងរដ្ឋមន្ត្រីក្រោមបង្គាប់ គឺដើម្បីឲ្យអ្នកស្រី លីស ត្រាស្ស ខ្លួនឯង អាចបន្តនៅរក្សាកាន់តំណែកនាយករដ្ឋមន្ត្រីតទៅទៀត។
ជុំវិញរឿងនេះ អ្នកស្រី Alicia Kearns ប្រធានគណៈកម្មាធិការកិច្ចការបរទេស នៅសភាអង់គ្លេស និងជាមនុស្សមានឥទ្ធិពលខ្លាំងដែរនៅក្នុងសភាដែរ បានលើកឡើងថា យើងធ្លាប់ជួបប្រទះនឹងវិបត្តិផ្នែកស្មារតីនិងសីលធម៌ ក្រោយអាណត្តិរបស់អតីតនាយករដ្ឋមន្ត្រី បូរីស ចនសុន ហើយតែពេលនេះ ត្រូវប្រឈមមុខនឹងវិបត្តិហិរញ្ញវត្ថុទៅវិញ។ ដូច្នេះ ការបន្តតំណែងនាយករដ្ឋមន្ត្រី ឬមិនបន្ត គឺជាសំណួរមួយលំបាកខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ