លោកពូទីន ចោទបស្ចិមលោកជាថ្មីថាលេងល្បែងគ្រោះថ្នាក់ តែបង្ហើបទ្វារចរចា
ចុះផ្សាយនៅថ្ងៃ៖
ស្តាប់ - ០៧:៤២
ពិភពលោកបច្ចុប្បន្ន កំពុងធ្លាក់ក្នុងទសវត្សរ៍ដ៏គ្រោះថ្នាក់បំផុត មិនធ្លាប់មានទេគិតចាប់តាំងពីសង្គ្រាមលោកទីពីរបិទបញ្ចប់មក។ នេះជាពាក្យព្រមានថ្មីរបស់លោកពូទីន នាឱកាសថ្លែងសុន្ទរកថាទៅកាន់ក្លឹបពិភាក្សាអន្តរជាតិនៅទីក្រុងមូស្គូ នាថ្ងៃទី ២៧តុលា២០២២។ ប្រធានាធិបតីរុស្ស៊ី បានទម្លាក់កំហុសលើក្រុមបស្ចិមលោកជាថ្មីទៀត ដោយចោទសហរដ្ឋអាមេរិកនិងសម្ព័ន្ធមិត្តថា កំពុងលេងល្បែងភូមិសាស្ត្រនយោបាយដ៏ខ្មៅកខ្វក់ និងគ្រោះថ្នាក់ ប៉ុន្តែមិនថ្វីឡើយព្រោះបើតាមលោកពូទីន យូរឬឆាប់ ក្រុមលោកខាងលិចគង់នឹងមកចរចាជាមួយរុស្ស៊ីទេ។
បើតាមលោកពូទីន ពេលនេះ ពិភពលោកកំពុងឈានចូលដំណាក់កាលដ៏គ្រោះថ្នាក់ ខ្លាំង និងពិបាកស្មានបំផុត តាំងពីឆ្នាំ១៩៤៥មក។ ទាំងអស់នេះ គឺដោយហេតុតែក្រុមអ្នកគាំទ្រនិងបំពាក់អាវុធឱ្យអ៊ុយក្រែន ប្រឆាំងនឹងប្រតិបត្តិការយោធាពិសេសរបស់រុស្ស៊ី ក្នុងសង្គ្រាមនៅអ៊ុយក្រែន។ សម្រាប់លោកប្រធានាធិបតីរុស្ស៊ី ជម្លោះនៅអ៊ុយក្រែន ជាការតស៊ូប្រឆាំងនឹងការត្រួតត្រារបស់បស្ចិមលោក ដែលគ្មានសាមគ្គីភាពជាក់លាក់ តែចង់ដឹកនាំ ពិភពលោក ហើយប្រជាពលរដ្ឋមួយភាគធំមិនអាចទទួលយកបាន។
ហេតុដូច្នេះ ហើយបានជាពិភពលោកធ្លាក់ក្នុងស្ថានភាពធ្វើបដិវត្ត ! ការវាយលុកនៅអ៊ុយក្រែនធ្វើឡើងក្នុងក្របខ័ណ្ឌនៃកម្មវត្ថុចង់ប្តូរផ្លាស់សណ្តាប់ធ្នាប់ពិភពលោក។ ជាការប្តូរផ្លាស់សណ្តាប់ធ្នាប់ពិភពលោកដោយចៀសមិនបានពីព្រោះរុស្ស៊ីមិនអាចទ្រាំទ្រនឹងចរិកកាចសាហាវ និង អាណានិគមបែបថ្មីរបស់ក្រុមលោកខាងលិចបាន។ អ្វីដែលរុស្ស៊ីធ្វើមិនមែនដើម្បីផ្គើនបំបាក់លោកខាងលិចទេ តែដើម្បីការពារសិទ្ធិនិងវត្តមានរុស្ស៊ីនៅលើផែនដី។ លោកពូទីនបានចោទអាមេរិកនិងសម្ព័ន្ធមិត្តថាចង់បំផ្លាញ និងលុបរុស្ស៊ី ពីផែនទី តាមរយៈល្បែងភូមិសាស្ត្រយុទ្ធសាស្ត្រដ៏ខ្មៅកខ្វក់ គឺធ្វើឱ្យមានវិបត្តិទ្រង់ទ្រាយធំ។
គ្រាន់តែដើម្បីរក្សាវត្តមានលើផែនដី
ជាវិបត្តិយោធានិងនយោបាយផង ជាវិបត្តិសេដ្ឋកិច្ចនិងមនុស្សធម៌ទៀត។ លោកខាងលិចបានចាត់វិធានការមួយចំនួនធំដែលនាំមកនូវតែភាពប្រឈម ដំឡើងឱ្យមានភាពតានតឹងជាប់ជានិច្ច និងមិនមែនជាទង្វើថ្មីទេ។ ពន្យុះលើកទឹកចិត្តឱ្យអ៊ុយក្រែនធ្វើសង្គ្រាម បង្កហេតុនៅតៃវ៉ាន់ បង្កអស្ថិរភាពទីផ្សារចំណីអាហារ និងថាមពលពិភពលោក។ ទាំងនេះជាលទ្ធផលនៃការចង់គ្រប់គ្រងអំណាចរបស់លោកខាងលិចដែលលោកពូទីន អះអាងបានធ្លាប់និយាយរួចហើយ។ តែក្រុមលោកខាងលិច នៅតែយកមកធ្វើល្បែងលេង ដោយមិនខ្វល់អំពីបញ្ហាបូរណភាពប្រទេស និងជាតិ ឬផលប្រយោជន៍របស់ជាតិដទៃទេ។
ប៉ុន្តែសម្រាប់លោកពូទីន ល្បែងទាំងនេះ បានផ្តល់ផលល្អមកឱ្យរុស្ស៊ី និងសម្រាប់អនាគតរុស្ស៊ី ព្រោះរុស្ស៊ីបានឆ្លងកាត់ការលំបាកខ្លាំងផ្នែកសេដ្ឋកិច្ចរួចហើយ។ ហើយជាចុងក្រោយ លោកពូទីន បានគូសបញ្ជាក់ថា យូរនិងឆាប់ ក្រុមលោកខាងលិចនឹងងាកមករកចរចាជាមួយរស្ស៊ី ដើម្បីដោះស្រាយវិបត្តិដែលអង្រួនពិភពលោកប៉ុន្មានខែមកនេះ។
ចង់បំបាត់ដានគ្រាប់បែកវិទ្យុសកម្ម
លោកពូទីនបានបកស្រាយ ថារុស្ស៊ីមិនដែលនិយាយអំពីលទ្ធភាពប្រើអាវុធនុយក្លេអ៊ែរទេ។ អ្វីដែលរុស្ស៊ីលើកឡើង គឺគ្រាន់តែជាចម្លើយតបទៅនឹងការគំរាមកំហែងរបស់គូប្រជែង ជាពិសេសសេចក្តីថ្លែងការណ៍របស់ប្រទេសខ្លះប៉ុណ្ណោះ។ សម្រាប់លោកពូទីន គឺអ៊ុយក្រែននិងក្រុមលោកខាងលិចទេ ដែលជាអ្នកអះអាងថារុស្ស៊ីគំរាមប្រើអាវុធនុយក្លេអ៊ែរ ដើម្បីអូសទាញប្រទេសអព្យាក្រិត្យកុំឱ្យរាប់អានរុស្ស៊ី។ គឺមានតែសហរដ្ឋអាមេរិកមួយគត់ ដែលបានប្រើអាវុធនុយក្លេអ៊ែរប្រឆាំងនឹងប្រទេសគ្មាននុយក្លេអ៊ែរ “ជប៉ុន” កាលពីឆ្នាំ ១៩៤៥។
បើតាមលោកពូទីន គឺអ៊ុយក្រែនជាអ្នកចង់ប្រើអាវុធវិទ្យុសកម្ម ដើម្បីអាចនិយាយបាននៅពេលក្រោយថារុស្ស៊ីជាអ្នកវាយប្រហារនុយក្លេអ៊ែរ។
អ៊ីចឹងហើយបានជាម្ចាស់វិមានក្រេមឡាំងបានស្នើសុំនិងជំរុញឱ្យទីភ្នាក់ងារថាមពលបរមាណូអន្តរជាតិ AIEA ត្រូវប្រញាប់រួសរាន់ចុះទៅស៊ើបអង្កេតនៅអ៊ុយក្រែនឱ្យបានឆាប់រហ័ស និងឱ្យបានទូលំទូលាយបំផុត តាមដែលអាចធ្វើទៅបាន ព្រោះអាជ្ញាធរក្រុងកៀវកំពុងធ្វើគ្រប់យ៉ាងដើម្បីបំបាត់ដាន នៅទីតាំងផលិតគ្រាប់បែកវិទ្យុសកម្ម ពីរក្នុងប្រទេសអ៊ុយក្រែន។ នៅក្នុងសេចក្តីថ្លែងការណ៍ AIEA បានប្រកាសចុះទៅដល់ មណ្ឌលទាំងពីរ តាមសំណើអ៊ុយក្រែន នៅក្នុងសប្តាហ៍នេះ។ ជាការត្រួតពិនិត្យឯករាជ្យ ដើម្បីស្វែងរកសញ្ញានៃការលួចពង្វាងប្រើប្រាស់សារធាតុនុយក្លេអ៊ែរ។ លទ្ធផលនៃការងារនឹងត្រូវផ្សព្វផ្សាយក្នុងពេលដ៏ឆាប់ៗ។
យុទ្ធសាស្ត្រនុយក្លេអ៊ែរអាមេរិកថ្មី
គេបានដឹងតាំងពីប៉ុន្មានសប្តាហ៍មកហើយ ថាអាមេរិកមានយុទ្ធសាស្ត្រថ្មី ដែលចាត់ទុកចិនជាគូប្រជែងចម្បងអនាគត តែគ្រាបន្ទាន់គឺត្រូវរកវិធីទប់រុស្ស៊ី។ ម្សិលមិញស្ទើរទន្ទឹមនឹងសេចក្តី ថ្លែងការណ៍របស់លោកពូទីន សហរដ្ឋអាមេរិកបានចេញផ្សាយរបាយការណ៍ស្តីអំពីយុទ្ធសាស្ត្រការពារជាតិថ្មីរបស់ខ្លួន។ ជាឯកសារបានកំណត់អំពីកម្មវត្ថុយុទ្ធសាស្ត្រយោធា សម្រាប់ឆ្នាំខាងមុខ ដូចទម្លាប់ទេ ប៉ុន្តែនៅលើកនេះ ជាលើកទីមួយ វាមានបង្កប់លក្ខណៈពិសេសមួយ គឺមានភ្ជាប់យុទ្ធសាស្ត្រនុយក្លេអ៊ែរថ្មីបញ្ចូលជាមួយផង។ បើតាមមន្ទីរបញ្ចកោណ អាវុធនុយក្លេអ៊ែរ ដែលអាមេរិកមាននឹងប្រើសម្រាប់កម្លា រារាំងរាល់គ្រប់ទម្រង់នៃការវាយប្រហារយុទ្ធសាស្ត្រ រាប់ទាំងការសង្គ្រាមមិនមែននុយក្លេអ៊ែរផង។ សេចក្តីសម្រេចបែបនេះ មានទិសដៅ បន្ទុចបង្អាក់សេចក្តីសម្រេចចិត្តរបស់គូប្រជែង។ នេះបើតាមការលម្អិតរបស់មន្ត្រីជាន់ខ្ពស់នៃក្រសួងការពារជាតិអាមេរិក។
យុទ្ធសាស្ត្រនុយក្លេអ៊ែរថ្មី ទម្រង់ពេញលេញដែលឯកសារសម្ងាត់រដ្ឋ ត្រូវបានបញ្ជូនទៅឱ្យសភាអាមេរិកតាំងពីជាច្រើនខែមកហើយ មិនមែនសំដៅព្រមានរុស្ស៊ីតែមួយទេ យុទ្ធសាស្រ្តយោធាអាមេរិកថ្មីក៏បានកំណត់ដោយចំៗថា រាល់ការវាយប្រហារនុយក្លេអ៊ែរកូរ៉េខាងជើងប្រឆាំងអាមេរិក ឬសម្ព័ន្ធមិត្តព្រមទាំងដៃគូ នឹងនាំឱ្យមានបញ្ចប់របបកុម្មុយនិស្តព្យុងយ៉ាង។ គ្មានសេណារីយ៉ូណាផ្សេងដែលរបបគីមជុងអ៊ុនអាចប្រើអាវុធនុយក្លេអ៊ែរហើយអាចត្រដរបានទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ