អ្នកជំនាញ៖គ្រាប់បែកវិទ្យុសកម្មមិនបង្កឲ្យស្លាប់មនុស្សច្រើនសម្បើមទេ តែបង្កឲ្យមានការភ័យខ្លាចខ្លាំង
រុស្ស៊ីបានចោទអ៊ុយក្រែនជាថ្មីពីបទចង់ប្រើគ្រាប់បែកកខ្វក់ ឬហៅជាគ្រាប់បែកវិទ្យុសកម្ម។ នៅក្នុងកិច្ចសន្ទនាតាមទូរស័ព្ទនាថ្ងៃចន្ទ ទី២៤ តុលា ប្រធានរឿងដដែលមួយនេះត្រូវបានមេបញ្ជាការកងទ័ពរុស្ស៊ីលើកយកទៅជជែកជាមួយមេបញ្ជាការកងទ័ពអាមេរិក។ តែអ៊ុយក្រែនបន្តបដិសេធលើការចោទប្រកាន់របស់រុស្ស៊ី ហើយអង្គការអូតង់ និងបស្ចិមប្រទេសបានចាត់ទុកការចោទប្រកាន់របស់រុស្ស៊ីថាជាលេសមួយរបស់រុស្ស៊ី។ អូតង់ និងបស្ចិមលោកបានចេញមុខព្រមានរុស្ស៊ីកុំឲ្យយករឿងគ្រាប់បែកវិទ្យុសកម្មនេះធ្វើជាលេសដើម្បីបង្កើតឲ្យមានភាពប្រទូស្រ្តាយនៅក្នុងសង្រ្គាមអ៊ុយក្រែន។ តើគ្រាប់បែកកខ្វក់ ឬហៅគ្រាប់បែកវិទ្យុសកម្មដែលរុស្ស៊ីបានលើកឡើងនេះជាគ្រាប់បែកអ្វីទៅ?។ យើងស្តាប់ចម្លើយរបស់លោកអូលីវីយេ ឡឺពីក អ្នកជំនាញអាវុធគីមី ជីវសាស្រ្ត និងអាវុធនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០១:២៨
« គ្រាប់បែកកខ្វក់ត្រូវបានគេហៅជាគ្រាប់បែកវិទ្យុសកម្ម។ គឺជាគ្រាប់បែកដែលជាទូទៅនៅខាងក្នុងត្រូវបានគេដាក់លាយគ្នានូវសារធាតុផ្ទុះធម្មតា និងសារធាតុវិទ្យុសកម្ម។ សារធាតុវិទ្យុសកម្មនេះទៀតសោតអាចមានប្រភពពីឧស្សាហកម្ម ឬវេជ្ជសាស្រ្ត។ កម្មវត្ថុនៃការប្រើគ្រាប់បែកកខ្វក់ ឬគ្រាប់បែកវិទ្យុសកម្មនេះ គឺដើម្បីសាយភាយសារធាតុវិទ្យុសកម្មទៅលើផ្ទាំងស៊ីបមួយ និងដើម្បីបំពុលបរិស្ថាន។
តាមធម្មតា គ្រាប់បែកកខ្វក់ ឬគ្រាប់បែកវិទ្យុសកម្មនេះមិនបង្កឲ្យមានការស្លាប់មនុស្សច្រើនសម្បើមទេ។ ផ្ទុយទៅវិញ គ្រាប់បែកប្រភេទនេះបង្កឲ្យមានការភ័យខ្លាចខ្លាំងណាស់។ ចូរកុំភ្លេចថា វត្តមានសារធាតុវិទ្យុសកម្មតិច ឬច្រើននៅទីតាំងមួយ ឬទីកន្លែងមួយធ្វើឲ្យទីតាំង ឬទីកន្លែងនោះលែងជាទីកន្លែងស្អាត និងពិបាករស់នៅបានទៀតឡើយ។ មួយវិញទៀត សារធាតុវិទ្យុសកម្មបង្កឲ្យមានជំងឺដូចដែលគេបានស្គាល់ច្បាស់តាំងពីក្រោយគ្រោះថ្នាក់ផ្ទុះមជ្ឈមណ្ឌលនុយក្លេអ៊ែរឆែរណូប៊ីល។
សុទ្ធសឹងជាជំងឺដែលមានជាប់ពាក់ព័ន្ធជាទូទៅនឹងការប្រឈមរបស់មនុស្សទៅនឹងសារធាតុវិទ្យុសកម្ម »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ