សង្គ្រាមអ៊ុយក្រែន ៖ លោកចូ បៃដិន ព្រមានរុស្ស៊ីសាជាថ្មីពីរឿងប្រើអាវុធនុយក្លេអ៊ែរតាក់ទិក
នៅចំពោះមុខក្រុមប្រឹក្សាសន្តិសុខអង្គការសហប្រជាជាតិ នាថ្ងៃអង្គារទី ២៥តុលា រុស្ស៊ីបាននិយាយចោទប្រកាន់ដដែលៗ ថាអ៊ុយក្រែនចង់ប្រើគ្រាប់បែកវិទ្យុសកម្ម។ ជាមួយការបដិសេធទាំងស្រុង អ៊ុយក្រែនបានអញ្ជើញអ្នកជំនាញអន្តរជាតិឱ្យចុះទៅត្រួតពិនិត្យដោយផ្ទាល់។ ចំណែក លោកប្រធានាធិបតីអាមេរិកបានព្រមានរុស្ស៊ីសាជាថ្មី រឿងប្រើអាវុធនុយក្លេអ៊ែរតាក់ទិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ភ្នាក់ងារថាមពលបរមាណូអន្តរជាតិ នឹងចុះទៅត្រួតពិនិត្យ តាមសំណូមពររបស់អ៊ុយក្រែន ទីតាំងពីរកន្លែងពាក់ព័ន្ធនឹងការចោទប្រកាន់របស់រុស្ស៊ី ក្នុងពេលប៉ុន្មានថ្ងៃទៀតខាងមុខនេះ។ បើតាមឯកអគ្គរដ្ឋទូតរងរុស្ស៊ីប្រចាំអង្គការសហប្រជាជាតិ ដោយចង់បញ្ចៀសបរាជ័យ ព្រមទាំងនាំអូតង់ឱ្យមកប្រឈមនឹងសង្គ្រាមជាមួយរុស្ស៊ីដោយផ្ទាល់ អ៊ុយក្រែនមានសមត្ថភាពនឹងប្រើគ្រាប់បែកកខ្វក់ ឬគ្រាប់បែកវិទ្យុសកម្ម ដែលផលិតដោយប្រើបច្ចេកវិទ្យាអន់ៗនៅទីតាំងពីរកន្លែង។
អ៊ុយក្រែននិងបស្ចិមលោក ចាត់ទុក និងសង្ស័យថា រុស្ស៊ីប្រើពាក្យចោទប្រកាន់ដដែលៗ ជាលេស ក្នុងការប្រើគ្រាប់បែកកខ្វក់ខ្លួនឯង ដើម្បីសងសឹកនឹងសន្ទុះជោគជ័យរបស់អ៊ុយក្រែន។ ហេតុដូច្នេះហើយបានជា លោកចូ បៃដិន បានព្រមានរុស្ស៊ីសាជាថ្មី ថារុស្ស៊ីនឹងខុសធ្ងន់ក្រៃបើហ៊ានប្រើអាវុធនុយក្លេអ៊ែរតាក់ទិក។
នៅក្នុងប្រទេសអ៊ុយក្រែនវិញ ការប្រយុទ្ធនៅតែបន្តមានខ្លាំងនៅភាគខាងកើតប្រទេស ជាពិសេសនៅក្រុងBakhmout ដែលយោធារុស្ស៊ីប៉ុនប៉ងវាយប្រហារយកតាំងពីជាច្រើនខែមក តែមិនបានសម្រេច។ មានជនស៊ីវិលយ៉ាងហោច៧នាក់បានស្លាប់។ ក្រៅអំពីត្រូវការជំនួយជាអាវុធយុទ្ធភ័ណ្ឌ នៅថ្ងៃអង្គារទី ២៥តុលា ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បានអំពាវនាវសុំជំនួយហិរញ្ញវត្ថុពីសហគមន៍អន្តរជាតិ សម្រាប់បង្គប់ចំណាយសាធារណៈនៅឆ្នាំ២០២៣។ ដោយហេតុសង្គ្រាមឈ្លានពានរបស់រុស្ស៊ី អ៊ុយក្រែនមានឱនភាពថវិកាយ៉ាងធ្ងន់ធ្ងរ។ អ៊ុយក្រែនត្រូវថវិកាចំនួន ៣៨ពាន់លានដុល្លារ សម្រាប់បើកប្រាក់បៀរវត្សរ៍ជូនបុគ្គលិក គ្រូបង្រៀន គ្រូពេទ្យ ចំណាយសង្គមផ្សេងៗ និងអ្នកចូលនិវត្តន៍។ នេះបើតាមការលម្អិតរបស់លោក ហ្សេឡេនស្គី ក្នុងឱកាសថ្លែងពីទីក្រុងកៀវ ទៅកាន់សន្និសីទអន្តរជាតិនៅប៊ែរឡាំងស្តីពីការស្ថាបនាអ៊ុយក្រែនឡើងវិញ។ ការស្ថាបនាអ៊ុយក្រែនឡើងវិញដែលត្រូវចាប់ផ្តើមភ្លាមនៅពេលនេះ។ នេះបើតាមប្រសាសន៍របស់លោកនាយករដ្ឋមន្ត្រីអាល្លឺម៉ង់ និងសម្រាប់លោកស្រីប្រធានគណៈកម្មការអឺរ៉ុប សង្គ្រាមបានបង្ហិនបង្ហោចអ៊ុយក្រែនហួសនិស្ស័យ។ បើតាមធនាគារពិភពលោក ការខូចខាតនៅអ៊ុយក្រែនមានតម្លៃប្រមាណ៣៥០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ