អឺរ៉ុបជួបរលកអាកាសធាតុក្តៅ កាន់តែយូរ គួរឱ្យព្រួយបារម្ភ
នៅ១០ថ្ងៃមុនបើកសន្និសីទអាកាសធាតុអន្តរជាតិ COP២៧ អង្គការសហប្រជាជាតិបាន ទាញសញ្ញាអាសន្នថ្មីមួយបន្ថែមទៀតថា នយោបាយប្រយុទ្ធប្រឆាំងនឹងការប្រែប្រួលអាកាសធាតុដែលរដ្ឋជាសមាជិកបានអនុវត្តរហូតមកទល់ពេលនេះ នឹងធ្វើឱ្យសីតុណ្ហភាពភពផែនដីឡើង ២,៦អង្សា។ ពោលគឺខ្ពស់ឆ្ងាយជាងកម្មវត្ថុក្រោម២អង្សា ចែងក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ឆ្ងាយណាស់។ ការឡើងកម្តៅអាកាសធាតុបានបង្កឱ្យមានផលវិបាក ព្រមទាំងការប្រែប្រួលអាកាសធាតុយ៉ាងខ្លាំង។ ជាក់ស្តែងឆ្នាំ២០២២នេះ តំបន់អឌ្ឍគោលខាងជើង ជាពិសេសអឺរ៉ុប កំពុងស្គាល់រលកកម្តៅសីតុណ្ហភាព យ៉ាងយូរ និងខ្ពស់ខ្លាំងបំផុត មិនធ្លាប់មាន។ ជិតដាច់ខែតុលាហើយ សីតុណ្ហភាពនៅចង្អុលលេខម្តុំ ៣០អង្សាទៀត។
ចុះផ្សាយនៅថ្ងៃ៖
ស្តាប់ - ០១:៥៩
ខែតុលាមិនទាន់ផុតទេ ប៉ុន្តែគេអាចប្រកាសបានថា តុលា២០២២ ជាខែដ៏ក្តៅជាងគេតាំងពីឆ្នាំ១៩៦១ ឆ្នាំដែលពិភពលោកចេះកត់ត្រាសីតុណ្ហភាពមក និងសម្រាប់រយៈពេល១០០ឆ្នាំមកបើមើលតាមគំរូប្រវត្តិសាស្ត្រ។ នេះបើតាមអ្នកនាំពាក្យទីភ្នាក់ងារឧតុនិយមអេស្ប៉ាញ ដោយថ្ងូចថ្ងួរបន្ថែមទៀតថា សីតុណ្ហភាព ឡើងដល់៣០អង្សា មួយថ្ងៃពីរក្នុងមួយខែជាការធម្មតាសម្រាប់អេស្ប៉ាញ តែក្តៅជាប់គ្នាជាច្រើនថ្ងៃក្នុងរដូវស្លឹកឈើជ្រុះ ពិតជាចម្លែកខ្លាំងណាស់។
រដូវប្រាំងក្តៅហួតហែងខ្លាំង រលកសីតុណ្ហភាពឡើងជាង៤០អង្សាជាច្រើនថ្ងៃ និងជាច្រើនលើកហើយ នៅព្រឹកថ្ងៃទី ២៨តុលា នៅតំបន់ភាគខាងជើងបំផុតរបស់អេស្ប៉ាញ ដែលល្បីខាងត្រជាក់ជាងគេ សីតុណ្ហភាពចង្អុលលេខ៣០អង្សា តាំងពីព្រឹកព្រហាមទៀត។ បើតាមរបាយការណ៍របស់អង្គការ Think-tank Climate Central ក្រុងអេស្ប៉ាញចំនួន៤ (ម៉ាឌ្រីត វ៉ាឡង់ សារ៉ាហ្កូស្ស និងបាសឺឡោន) ជាប់ក្នុងចំណាត់ថា្នក់ជាក្រុងអឺរ៉ុប១០ដំបូងគេដែលរកផលប៉ះពាល់ពីការឡើងកម្តៅអាកាសធាតុជាងគេ ក្នុងរយៈ១២ខែមកនេះ។
នៅភាគខាងត្បូងប្រទេសបារាំងសីតុណ្ហភាពក៏បានឡើងដល់៣០អង្សាដែរ។ ២០អង្សានៅក្រុងឡុងដ៍អង់គ្លេស ២៤អង្សានៅព្រុចសែលប្រទេសប៊ែលហ្សិក... តាំងពីថ្ងៃទី ១៥តុលាមក អឺរ៉ុបមានកម្តៅសីតុណ្ហភាពលើស២០អង្សាដូចនៅចុងរដូវក្តៅខែសីហា ពោលគឺក្តៅជាងធម្មតាដល់ទៅ១០អង្សា។ សីតុណ្ហភាពក្តៅល្មមបែបនេះ គួរជាទីមនោរម្យសម្រាប់ប្រជាពលរដ្ឋ និងសម្រាប់អឺរ៉ុបដែលកំពុងជួបវិបត្តិថាមពល ប៉ុន្តែដល់រដូវត្រជាក់ហើយសីតុណ្ហភាពនៅតែក្តៅ គឺជាការប្រែប្រួលខុសប្រក្រតី ដែលគួរឱ្យព្រួយបារម្ភ និងដែលបង្កផលវិបាកដោយជាក់ស្តែងមិនខានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ