អង្គការសហប្រជាជាតិ ៖ អឺរ៉ុបឡើងកម្តៅសីតុណ្ហភាពលឿនជាងគេនៅលើផែនដី
នៅក្នុងចំណោមតំបន់ទាំង៦របស់ភពផែនដី អឺរ៉ុបជាទ្វីបដែលរងការឡើងកម្តៅសីតុណ្ហភាពលឿនជាងគេបំផុត និងក្នុងកំរិតល្បឿន២ដងលើមធ្យមភាគ នៃកម្តៅផែនដីទាំងមូលសម្រាប់រយៈពេល៣០ឆ្នាំចុងក្រោយ។ នេះបើរបាយការណ៍របស់អង្គការសហប្រជាជាតិ ចេញផ្សាយនៅថ្ងៃពុធទី ២វិច្ឆិកា ២០២២ ដែលព្យាករថា ការឡើងកម្តៅយ៉ាងលឿន នឹងជំរុញឱ្យអឺរ៉ុបក្តៅខ្លាំង មានគ្រោះភ្លើងឆេះព្រៃ ព្រមទាំងទឹកជំនន់ កាន់តែធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
របាយការណ៍របស់អង្គការឧតុនិយមពិភពលោក និងភ្នាក់ងារអឺរ៉ុបស្តីពីការប្រែប្រួលអាកាសធាតុ បានបង្ហាញឱ្យឃើញថា កម្តៅសីតុណ្ហភាពនៅអឺរ៉ុបបានឡើងខ្ពស់ខ្លាំង គួរឱ្យកត់សម្គាល់ នៅរវាងពីឆ្នាំ ១៩៩១-២០២១ និងក្នុងល្បឿនកន្លះអង្សាជារៀងរាល់ទសវត្សរ៍។ ជាការឡើងកម្តៅដ៏លឿនជាងបំផុតបើប្រៀបទៅនឹងតំបន់ទាំង៦នៃភពផែនដី ដែលកំណត់ដោយអង្គការឧតុនិយមពិភពលោក។ ជាទូទៅ អាកទិក ឡើងកម្តៅលឿនខ្លាំងជាងអឺរ៉ុបទៅទៀត គ្រាន់តែអាកទិកមិនត្រូវបានចាត់ទុកថាជាតំបន់មួយដ៏ពេញលេញប៉ុណ្ណោះ។
ដោយហេតុតែឡើងកម្តៅលឿនខ្លាំងពេក ទឹកកកនៅលើកំពូលជួរភ្នំAlpesរបស់អឺរ៉ុប បានរលាយអស់កម្រាស់៣០ម៉ែត្រ ក្នុងរវាងពីឆ្នាំ ១៩៩៧-២០២១។ ចំណែកនៅតំបន់Groenland ស្នូលផ្ទាំងទឹកកកបានរលាយជាលំដាប់ ដែលមកជួយពន្លឿនការដំឡើងកម្ពស់ទឹកសមុទ្ទ។ ជាលើកទីមួយក្នុងប្រវត្តិកំណត់ត្រាអាកាសធាតុ កម្ពស់ទឹកភ្លៀងនៅ Groenland នារដូវក្តៅឆ្នាំ២០២១ បានឡើងដល់ចំណុចខ្ពស់ជាងគេបំផុត។
អឺរ៉ុបជាតំណាងទិដ្ឋភាពដ៏រស់រវើកនៃផែនដីដែលរងអាកាសធាតុប្រែប្រួល និងជាការដាស់តឿនប្រាប់ពិភពលោកថាទោះបីជាសង្គមបានត្រៀមលក្ខណៈប្រឈមយ៉ាងណាក៏ដោយក៏មិនអាចគេចរួចពីបាតុភូតអាកាសធាតុអាក្រក់ៗបំផុតបានដែរ។ នៅឆ្នាំ២០២១ ទ្វីបអឺរ៉ុបបានរងគ្រោះមហន្តរាយអាកាសធាតុនិងសីតុណ្ហភាពយ៉ាងធ្ងន់ធ្ងរ ទឹកជំនន់នៅអឺរ៉ុបកណ្តាល និងខាងលិច ភ្លើងឆេះព្រៃនៅអឺរ៉ុបប៉ែកអាគ្នេយ៍ ក្នុងខែក្តៅ ចារជាប់ក្នុងឯកសារអាកាសធាតុអន្តរជាតិដោយគ្មានថ្ងៃរលុបបានឡើយ។
បាតុភូតអាកាសធាតុនិងឧតុនិយម បានសម្លាប់ជីវិតមនុស្សរាប់រយនាក់នៅអឺរ៉ុប ជាងកន្លះលាននាក់រងផលប៉ះពាល់ដោយផ្ទាល់និងលើជីវភាព ក្នុងកំរិតជាង៥០ពាន់លានដុល្លារ។ នេះបើតាមរបាយការណ៍របស់អង្គការឧតុនិយមពិភពលោកដដែល ដោយលើកសរសើរថា អឺរ៉ុប ជាទ្វីបដែលមានកិច្ចសហប្រតិបត្តិការអន្តរព្រំដែនដើម្បីសម្របសម្រួលនឹងការប្រែប្រួលអាកាសធាតុបានល្អប្រសើរជាងគេ។ ៧៥%នៃប្រជាជនបានទទួលការការពារពីគ្រោះធម្មជាតិនិងអាកាសធាតុ តាមរយៈប្រព័ន្ធប្រកាសអាសន្នមានប្រសិទ្ធភាព។ អឺរ៉ុបបានកាត់បន្ថយការបញ្ចេញឧស្ម័នពុលបាន៣១% នៅរវាងពីឆ្នាំ១៩៩០-២០២០ ហើយអាចសម្រេច ដល់៥៥% នៅឆ្នាំ២០៣០ ពោលគឺសម្រេចកម្មវត្ថុកាបោនស្របតាមកិច្ចព្រមព្រៀងអាកាសធាតុក្រុងប៉ារីស នៅមុនឆ្នាំ២០៥០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ