ជំនួបកំពូលG20 គ្របដណ្តប់ដោយសង្រ្គាមរុស្ស៊ីឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០៦:៥៧
ជំនួបកំពូល ក្រុមប្រទេសG20 បានចាប់ផ្តើមបើកទ្វារជាផ្លូវការនៅថ្ងៃអង្គារ នេះ នៅកោះបាលីប្រទេសឥណ្ឌូណេស៊ី។ ជំនួបកំពូល G20 ជាវេទិកាសេដ្ឋកិច្ចដែលប្រមូលផ្តុំដោយក្រុមប្រទេសអ្នកមាន និងប្រទេសកំពុងមានសេដ្ឋកិច្ចរីកលូតលាស់ថ្មី ដែលតំណាងឲ្យ៨០%នៃផលិតផលដុលពិភពលោក។ ជំនួបកំពូលG20 មាននាទីផ្តោតសំខាន់តែពីរឿងសេដ្ឋកិច្ច ប៉ុន្តែ ក្នុងកាលៈទេសៈ សង្រ្គាមឈ្លានពានអ៊ុយក្រែន ដែលកំពុងជះផលអាក្រក់លើសេដ្ឋកិច្ចពិភពលោក ជំនួបកំពូលG20 ដែលមានឥណ្ឌូណេស៊ីធ្វើជាម្ចាស់ផ្ទះ នៅឆ្នាំនេះ ជៀសមិនផុតពីនិយាយបញ្ហាសេដ្ឋកិច្ច និងសន្តិភាព នៅក្នុងពិភពលោក។
មេដឹកនាំរបស់ក្រុមប្រទេសមានសេដ្ឋកិច្ចលូតលាស់ជាងគេនៅក្នុងពិភពលោក បានជួបប្រជុំគ្នា នៅក្នុងជំនួបកំពូលហ្សេ ២០ ដែលបើកសម្ពោធ ជាផ្លូវការនៅថ្ងៃអង្គារទី ១៥វិច្ឆិកា នៅកោះបាលី ប្រទេសឥណ្ឌូណេស៊ី។
នៅក្នុងសុន្ទរកថា បើកជំនួបកំពូលហ្សេ ២០ ជាផ្លូវការ នៅថ្ងៃកោះបាលី នៅថ្ងៃអង្គារ លោកប្រធានាធិបតីឥណ្ឌូណេស៊ី ដែលជាម្ចាស់ផ្ទះ បានថ្លែងព្រមាន ពីការផ្ទុះឡើងនូវសង្រ្គាមត្រជាក់ថ្មី។ តាមលោកហ្សូកូ វីដូដូ ការទទួលខុសត្រូវ មានន័យថា គេត្រូវបិទបញ្ចប់សង្រ្គាម។ “យើងមិនត្រូវធ្វើឲ្យពិភពលោកបែកបាក់គ្នាជាច្រើនក្រុម។ យើងមិនត្រូវធ្វើឲ្យពិភពលោកជួបសង្រ្គាមត្រជាក់សាជាថ្មីនោះទេ”។ នេះជាប្រសាសន៍របស់ប្រធានាធិបតីឥណ្ឌូណេស៊ី។
ជំនួបកំពូលហ្សេ ២០ នៅកោះបាលីធ្វើឡើងក្នុងកាលៈទេសៈដែលពិភពលោកកំពុងតានតឹង និងប្រេះឆាគ្នាខ្លាំង ដោយសារតែសង្រ្គាមរុស្ស៊ី ឈ្លានពានអ៊ុយក្រែន។ ថ្លែងតាមសន្និសីទវីដេអូ ទៅកាន់មេដឹកនាំក្រុមប្រទេស ហ្សេ ២០ ដែលនៅក្នុងនោះ មានផងដែរ លោករដ្ឋមន្រ្តីការបរទេសរុស្ស៊ី ប្រធានាធិបតីអ៊ុយក្រែន លោកហ្សេឡេនស្គីបានទាមទារឲ្យក្រុមប្រទេស ហ្សេ ២០ ដាក់សម្ពាធ ដើម្បីឲ្យរុស្ស៊ី បញ្ឈប់ជាបន្ទាន់ សង្រ្គាមដ៏បំផ្លិចបំផ្លាញអ៊ុយក្រែន។ តាមប្រធានាធិបតីអ៊ុយក្រែន វាដល់ពេលហើយដែលសង្រ្គាមឈ្លានពានរបស់រុស្ស៊ី ត្រូវបិទបញ្ចប់។
ក្រុមប្រទេសលោកខាងលិច ចង់យកឱកាសជំនួបកំពូលហ្សេ ២០ ដើម្បីអូសទាញឲ្យប្រទេសសមាជិក ជាពិសេស ចិន និងឥណ្ឌាថ្កោលទោស រុស្ស៊ី ព្រោះថា ចិន កន្លងមក មិនបានថ្កោលទោស សង្រ្គាមឈ្លានពានរុស្ស៊ី នៅអ៊ុយក្រែន ហើយចិននៅបានស្តីបន្ទោស ប្រទេសលោកខាងលិចដែលដាក់ទណ្ឌកម្មលើរុស្ស៊ី។
ប៉ុន្តែ នៅក្នុងជំនួបកំពូលហ្សេ ២០ ចិនហាក់បង្ហាញជំហរឃ្លាតឆ្ងាយបន្តិច ពីរុស្ស៊ី នៅពេល ប្រធានាធិបតីចិន លោកស៊ី ជីនពីង បានឡើងថ្លែងប្រឆាំងដាច់ខាតនឹងការយករឿងថាមពល និងបញ្ហាស្បៀងមកធ្វើជានយោបាយ ជាអាវុធ។ លោកស៊ី ជីនពីងនៅបានប្រកាសដែរថា ចិនចេញមុខប្រឆាំងនឹងការគំរាម ឬការប្រើប្រាស់អាវុធនុយក្លេអ៊ែរ តាក់ទិក នៅក្នុងសង្រ្គាមអ៊ុយក្រែន។
ប្រសាសន៍របស់ប្រធានាធិបតីចិន ធ្វើឲ្យគេយល់ថា រុស្ស៊ីអាចបាត់បង់ការគាំទ្ររបស់មហាអំណាចចិន ដែលនេះមិនមែនជារឿងល្អនោះទេ សម្រាប់រុស្ស៊ី។ ដោយសារតែឥទ្ធិពលនិងអំណាចរបស់ចិន ប្រធានាធិបតីចិន លោកស៊ី ជីនពីងត្រូវបានគេស្វែងរកជួបគ្រប់គ្នា។ នៅក្នុងជំនួបជាមួយ លោកប្រធានាធិបតីបារាំងកាលពីថ្ងៃអង្គារទី ១៥វិច្ឆិកា លោកស៊ី ជីនពីងក៏ត្រូវបានសមភាគីបារាំងអំពាវនាវឲ្យទៅនិយាយបញ្ចុះបញ្ចូលប្រធានាធិបតីរុស្ស៊ី ឲ្យត្រលប់ចូលតុចរចា និងបញ្ឈប់ធ្វើសង្រ្គាមនៅអ៊ុយក្រែន។
សំណុំរឿងសំខាន់ៗនៅក្នុងហ្សេ ២០
នៅក្នុងកាលៈទេសៈ ដែលពិភពលោកកំពុងប្រឈមនឹងវិបត្តិសេដ្ឋកិច្ចដើរថយក្រោយ កង្វល់ធំបំផុតដែលក្រុមប្រទេសហ្សេ ២០ ត្រូវពិភាក្សាជាអាទិភាព គឺ បញ្ហាអសន្តិសុខស្បៀង ដែលបណ្តាលឡើងមួយផ្នែក ដោយសារសង្រ្គាមនៅអ៊ុយក្រែន។ បន្ទាប់មក ក្រុមប្រទេសហ្សេ ២០ ត្រូវពិភាក្សាពីបញ្ហាមួយចំនួនទៀត ដែលកំពុងប៉ះពាល់ស្ថិរភាព សេដ្ឋកិច្ចពិភពលោក ដូចជាបញ្ហាថាមពលឡើងថ្លៃ វិបត្តិហិរញ្ញវត្ថុ និងវិបត្តិប្រាក់បំណុល ហើយចុងក្រោយ គឺជំហររបស់ក្រុមប្រទេសហ្សេ ២០ នៅក្នុងរឿងប្រែប្រួលអាកាសធាតុ។
ទាក់ទងនឹងបញ្ហាអសន្តិសុខស្បៀង ក្រុមប្រទេសហ្សេ ២០ ត្រូវផ្តោតសំខាន់លើកិច្ចព្រមព្រៀង ស្តីពីការនាំចេញស្រូវសាលីរបស់អ៊ុយក្រែន ដែល រុស្ស៊ីទើបបានគំរាមលែងគោរពអនុវត្ត ចាប់ពីថ្ងៃសៅរ៍ ចុងសប្តាហ៍នេះ។ នៅក្រោមការសម្របសម្រួលរបស់ អង្គការសហប្រជាជាតិ និងមានតួកគីជាអាជ្ញាកណ្តាល រុស្ស៊ីបានយល់ព្រមចុះហត្ថលេខា លើកិច្ចព្រមព្រៀង ដែលបើកផ្លូវឲ្យគេនាំចេញស្រូវសាលីអ៊ុយក្រែន ២០លានតោនចេញពីកំពង់ផែអ៊ុយក្រែន។ ជាថ្នូរមកវិញ គេក៏ត្រូវនាំចេញស្រូវសាលីរុស្ស៊ីដែរ។ ប៉ុន្តែរហូតមកដល់ពេលនេះ ស្រូវសាលី គ្រាប់ធញ្ញជាតិ របស់រុស្ស៊ី មិនត្រូវបាននាំចេញច្រើន ដដែល ព្រោះថា ក្រុមហ៊ុនបរទេស ដែលខា្លចជាប់ទណ្ឌកម្មរបស់អាមេរិកនិងអឺរ៉ុប បដិសេធមិនដឹកជញ្ជូនស្រូវសាលីរុស្ស៊ី។ ដោយសារតែរឿងនេះ ទើបរុស្ស៊ី លែងចង់គោរពកិច្ចព្រមព្រៀង ដែលបើកផ្លូវសម្រាប់ការនាំចេញស្រូវសាលីអ៊ុយក្រែនតទៅទៀត។
វិបត្តិប្រាក់បំណុលក៏ជាសំណុំរឿងសំខាន់មួយដែរនៅក្នុងជំនួបកំពូលហ្សេ ២០។ តាមសេតវិមាន អាមេរិកកំពុងចង់បញ្ចុះបញ្ចូលសមាជិក ហ្សេ ២០ ដើម្បីសម្រាលបន្ទុកបំណុលរបស់ក្រុមប្រទេសក្រីក្រ។ ដោយសារតែសង្រ្គាមរុស្ស៊ីឈ្លានពានអ៊ុយក្រែន ប្រទេសកាន់តែច្រើននៅក្នុងពិភពលោក ដែលកំពុងរួបរឹតដោយសារវិបត្តិកូវីដ ត្រូវធ្លាក់ខ្លួនកាន់តែក្រីក្រ និងជាប់បំណុលមួយជាន់ទៀត ដោយសារវិបត្តិថាមពល និងទំនិញឡើងថ្លៃ។
ប៉ុន្តែ តាមមន្រ្តីអាមេរិក ដែលសុំមិនបញ្ចេញឈ្មោះ មានប្រទេសមួយដែលអាចលើកដៃ មិនព្រមបន្ធូរបន្ថយប្រាក់បំណុលរបស់ប្រទេសក្រីក្រ។ មន្រ្តីអាមេរិកទំនងចង់និយាយដល់ចិន ដែលជាម្ចាស់បំណុលធំជាងគេ។ តាមអាមេរិក ចិនចង់យកបញ្ហាបញ្ហាប្រាក់បំណុលនេះទៅធ្វើជាឈ្នាន់ដើម្បីពង្រឹងអំណាចរបស់ខ្លួនដើម្បីក្តោបក្តាប់សេដ្ឋកិច្ចពិភពលោក។
នៅក្នុងវិបត្តិថាមពល ក្រុមប្រទេសហ្សេ ២០ ត្រូវពិភាក្សា ជាមួយប្រទេសផលិតប្រេង ដូចជា អារ៉ាប៊ីសាអូឌីត ដែលមានរាជបុត្រស្នងរាជ្យមានវត្តមានចូលរួមប្រជុំ។ អារ៉ាប៊ី សាអូឌីត បានរងការរិះគន់ពីអាមេរិកថា កំពុងរួមដៃជាមួយរុស្ស៊ី ដោយបដិសេធមិនព្រមបង្កើនការផលិត ដែលជាហេតុធ្វើឲ្យប្រេងកាន់តែឡើងថ្លៃកប់ពពក។
តើរុស្ស៊ីនិយាយការពារខ្លួន និងទម្លាក់កំហុសលើអ៊ុយក្រែន
នៅកិច្ចប្រជុំហ្សេ ២០ នយោបាយការទូតរបស់រុស្ស៊ី ធ្វើយ៉ាងណា ជៀសវាងការថ្កោលទោសនៅក្នុងសេចក្តីថ្លែងការណ៍រួមរបស់ក្រុមប្រទេសG20។ ថ្លែងនៅក្នុងកិច្ចប្រជុំនៅថ្ងៃនេះ រដ្ឋមន្រ្តីការបរទេស រុស្ស៊ី ដែលតំណាងឲ្យលោកប្រធានាធិបតីរុស្ស៊ី ពូទីនបាននិយាយថា ក្រុមប្រទេសលោកខាងលិច កំពុងដាក់សម្ពាធនយោបាយឲ្យគេចេញសេចក្តីថ្លែងការណ៍ថ្កោលទោស រុស្ស៊ី។ សេចក្តីព្រាងនៃសេចក្តីថ្លែងការណ៍រួមរបស់ហ្សេ ២០ ដែលអ្នកកាសែតបានទទួលកាលពីថ្ងៃចន្ទម្សិលមិញ មាននិយាយពីការថ្កោលទោស របស់ប្រទេសសមាជិកជាច្រើនរបស់ហ្សេ២០ ទៅលើសង្រ្គាមអ៊ុយក្រែន ដែលកំពុងគំរាមកំហែងសេដ្ឋកិច្ចពិភពលោក។ ប៉ុន្តែ បើតាមប្រមុខការទូតរុស្ស៊ី ការប៉ុនប៉ង ថ្កោលទោស ទម្លាក់កំហុសលើរុស្ស៊ី ថា ជាអ្នកធ្វើឲ្យពិភពលោកជួបវិបត្តិស្បៀង និងវិបត្តិថាមពលឡើងថ្លៃ ត្រូវបានបរាជ័យទៅវិញ ព្រោះថា នៅមានប្រទេសមួយចំនួន ដែលមិនគាំទ្រ លង់ជឿការបញ្ចុះបញ្ចូលរបស់ប្រទេសលោកខាងលិច។
ឆ្លើយនឹងសំណួររបស់អ្នកកាសែតដែលថា តើប្រទេសណាដែលនៅគាំទ្ររុស្ស៊ី នៅហ្សេ ២០ ប្រមុខការបរទេសរុស្ស៊ីនិយាយថា លើកលែងក្រុមប្រទេសលោកខាងលិច និងបក្សពួក ក្រុមប្រទេសតតិយលោក ដែលប៉ះពាល់ដោយសារសំណុំរឿងនេះ បានអំពាវនាវឲ្យមានការដោះស្រាយដោយសន្តិភាព និងការចរចាឲ្យបានឆាប់ៗ។
ម្យ៉ាងវិញ បើតាមរដ្ឋមន្រ្តីការបរទេសរុស្ស៊ី មិនមែនរុស្ស៊ី ទេដែលមិនចង់ចរចា ប៉ុន្តែ គឺភាគីអ៊ុយក្រែន ដែលបដិសេធមិនព្រមចរចា។ តាមប្រមុខការបរទេសរុស្ស៊ីដដែល អ៊ុយក្រែន បានដាក់សំណើជាដែលមិនអាចទទួលយកបាន។ លោកឡាវ្រូវមិនបាននិយាយលម្អិតតើសំណើរបស់អ៊ុយក្រែនគឺ អ្វីទេ ប៉ុន្តែ លោកគ្រាន់តែនិយាយថា លោកបានយកបញ្ហានេះ ទៅប្រាប់ភាគីបារាំងនិងអាល្លឺម៉ង់រួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ