ហ្សេ២០បង្កើតមូលនិធិមួយដើម្បីត្រៀមប្រឈមនឹងជំងឺរាតត្បាតសកលនាអនាគត
ក្រុមប្រទេសមានសេដ្ឋកិច្ចលូតលាស់ជាងគេ ទាំង២០ដំបូងនៅលើពិភពលោក បានប្រកាសនៅថ្ងៃអាទិត្យទី ១៣ វិច្ឆិកា ដែលត្រូវជាមួយថ្ងៃមុនការបើកជំនួបកំពូលហ្សេ២០ ប្រមូលមូលនិធិបាន១៤០០លានដុល្លារ សម្រាប់ត្រៀមប្រឈមនឹងជំងឺរាតត្បាតសាកល ក្នុងពេលអនាគត។ ប៉ុន្តែសម្រាប់ឥណ្ឌូណេស៊ី ដែលជាម្ចាស់ផ្ទះរៀបចំជំនួបហ្សេ២០ នេះជាមូលនិធិ ដ៏តិចតួចស្តួងស្តើងណាស់។
ចុះផ្សាយនៅថ្ងៃ៖
ស្តាប់ - ០២:១២
នេះគឺជាលទ្ធផលក៏កម្រមួយដែលសម្រេចបានក្នុងឱកាសជំនួបកំពូលថ្នាក់ប្រមុខរដ្ឋនិងប្រមុខរដ្ឋាភិបាលនៃក្រុមប្រទេសមានសេដ្ឋកិច្ចលូតលាស់ខ្លាំងជាងគេ ហ្សេ២០។ ជំនួបកំពូល នឹងប្រព្រឹត្តទៅនៅថ្ងៃអង្គារទី ១៥-១៦-វិច្ឆិកា នៅក្រុងបាលីប្រទេសឥណ្ឌូណេស៊ី ចំពេលពិភពលោកកំពុងតានតឹងនិងប្រេះឆាជាងពេលណាៗ ទាំងអស់ដោយហេតុសង្គ្រាមនៅអ៊ុយក្រែន។
ក្រោមគំនិតផ្តួចផ្តើមប្រមូលរបស់រដ្ឋមន្ត្រីក្រសួងសុខាភិបាល និងហិរញ្ញវត្ថុហ្សេ២០ ក្រោមអធិបតីភាពអគ្គនាយកអង្គការសុខភាពពិភពលោក និងប្រធានធនាគារពិភពលោក មូលនិធិប្រមូលបានថវិកាចំនួន១,៤ពាន់លានដុល្លារ។ នៅក្នុងសន្និសីទកាសែត លោក ចូកូ វីដូដូ ប្រធានាធិបតីឥណ្ឌូណេស៊ី បានពន្យល់លម្អិតថា មានប្រទេសចំនួន២៤ ខ្លះជាសមាជិកខ្លះមិនមែនជាសមាជិកហ្សេ២០ បានចូលរួមផ្តល់ចំណែកក្នុងមូលនិធិនេះ សម្រាប់រៀបចំលក្ខណៈនិងបញ្ចៀសកុំឱ្យមានវិបត្តិជំងឺរាតត្បាតសាកលទៀត។ មូលនិធិថ្មីក៏ ជាឧបករណ៍ដ៏សំខាន់សម្រាប់ជួយបណ្តាប្រទេសក្រីក្រមានចំណូលទាប និងមធ្យម ក្នុងត្រៀមលក្ខណៈឱ្យបានប្រសើរឡើងប្រឈមនឹងវិបត្តិសុខាភិបាលពិភពលោក។
ប៉ុន្តែទឹកប្រាក់ត្រឹម១៤០០លាន មិនគ្រប់គ្រាន់ទេ ! ដើម្បីធានាថាពិភពលោកពិតជាអាចទប់ទល់នឹងជំងឺរាតត្បាតសាកលបាន ដែល អាចផ្តាច់ជីវិតមនុស្ស និងកាច់ចង្វាក់សេដ្ឋកិច្ចពិភពលោក គេចាំបាច់ត្រូវការមូលនិធិដល់ទៅ ៣១ពាន់លានដុល្លារឯណោះ។ នេះបើតាមការរំលឹកបន្ថែមរបស់លោកវីដូដូដដែល។
សហរដ្ឋអាមេរិកមានចំណែកដល់ទៅ១ភាគបី នៃមូលនិធិសរុប ពោលគឺត្រូវជា ៤៥០លានដុល្លារ ដោយសង្ឃឹមថាជួយធ្វើឱ្យប្រព័ន្ធសុខាភិបាលពិភពលោក កាន់តែប្រពៃ និងស្វាហាប់។ បារាំង អង់គ្លេស កាណាដា ឥណ្ឌា ចិន អូស្ត្រាលី និងជប៉ុន សុទ្ធសឹងជាប្រទេសផ្តល់វិភាគទានច្រើន។ ឯឥណ្ឌូណេស៊ីខ្លួនឯង ដែលជាម្ចាស់ផ្ទះរៀបចំជំនួបហ្សេ២០ មិនបានបញ្ជាក់ថាចូលចំណែកក្នុងទំហំប៉ុនណាទេ។ ប្រទេសធ្លាប់រងការរាតត្បាតកូវីដ១៩យ៉ាងធ្ងន់ធ្ងរ នៅពាក់កណ្តាលឆ្នាំ២០២១ ដែលធ្វើប្រព័ន្ធសុខាភិបាលប្រទេសចាល់ណែន និងជួបការលំបាកយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ