G20 ៖ ក្រុមលោកខាងលិចបរិហារឥទ្ធិពលនៃសង្គ្រាមរុស្ស៊ីលើសេដ្ឋកិច្ច
រដ្ឋមន្ត្រីហិរញ្ញវត្ថុ ប្រធានធនាគារនៃក្រុមប្រទេសហ្សេ២០ កំពុងជួបប្រជុំគ្នាពីរថ្ងៃ ចាប់ពី នៅថ្ងៃ សុក្រទី ១៥កក្កដានេះទៅ នៅទីក្រុងបាលី ប្រទេសឥណ្ឌូណេស៊ី។ តាមគម្រោងដំបូង ជំនួបប្រជុំជាឱកាសជជែកពិភាក្សាគ្នារកមធ្យោបាយជំរុញកំណើនសេដ្ឋកិច្ចក្រោយវិបត្តិកូវីដ ប៉ុន្តែសង្គ្រាមនៅអ៊ុយក្រែនបានមកបំពុលបរិយាកាស និងប្តូរប្រធានបទ។ នៅទីបំផុត ក្រុមហិរញ្ញវត្ថុបស្ចិមលោកនាំគ្នាបរិហារនិងចោទអ្នកទទួលខុសត្រូវសេដ្ឋកិច្ចរុស្ស៊ី ថាជាអ្នកបង្កើតឱ្យមានវិបត្តិសេដ្ឋកិច្ចពិភពលោកបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:២០
អវត្តមានច្រើន ជំនួបប្រជុំក្រុមអ្នកទទួលខុសត្រូវហិរញ្ញវត្ថុនៃបណ្តាប្រទេសមានសេដ្ឋកិច្ចលូតលាស់ខ្លាំងជាងគេ ឬហៅកាត់ថា ហ្សេ២០ នៅក្រុងបាលីប្រទេសឥណ្ឌូណេស៊ី បានក្លាយជាវេទិកាប្រឈមមុខដាក់គ្នាជាថ្មី រវាងក្រុមលោកខាងលិចនិងរុស្ស៊ី មិនខុសពីជំនួបនៅសប្តាហ៍មុនទេ។
នៅចំពោះមុខការបដិសេធរបស់រុស្ស៊ី ថា សង្គ្រាមនៅអ៊ុយក្រែន គ្មានពាក់ព័ន្ធនឹងស្ថានភាពសេដ្ឋកិច្ចពិភពលោកបច្ចុបុ្បន្នទេ តែបណ្តាលមកពីទណ្ឌកម្មអន្តរជាតិ ក្រុមបស្ចិមលោកបានលាតត្រដាងឱ្យឃើញថា សង្គ្រាមនៅអ៊ុយក្រែន បានធ្វើឱ្យក្រឡាច់កំណើនសេដ្ឋកិច្ច ដោយហេតុមានវិបត្តិអតិផរណាខ្លាំងពេក និងអស្ថិរភាពស្បៀងអាហារ។
សង្គ្រាមគ្មានហេតុផលរបស់រុស្ស៊ីលើអ៊ុយក្រែន បានវាយប្រហារសេដ្ឋកិច្ចពិភពលោកទាំងមូល ដោយបានធ្វើឱ្យតម្លៃវត្ថុធាតុដើម ចំណីអាហារ ជីរ ថាមពល ឡើងថ្លៃ និងធ្វើឱ្យមនុស្សកាន់តែច្រើនធ្លាក់ក្នុងគ្រោះអត់ឃ្លាន។ នេះបើតាមការគូសបញ្ជាក់របស់រដ្ឋមន្ត្រីក្រសួងហិរញ្ញវត្ថុអាមេរិក លោកស្រី ចានែត យេឡែន។ ការឈ្លានពានរបស់រុស្ស៊ី បានបំផ្លាញសន្តិសុខស្បៀងអាហារនិងថាមពល មិនមែនទណ្ឌកម្មទេ ! នេះជាសំដីរបស់រដ្ឋមន្ត្រីក្រសួងសេដ្ឋកិច្ចអូស្ត្រាលី។ រដ្ឋមន្ត្រីក្រសួងហិរញ្ញវត្ថុកាណាដាដែលមានឬសគល់ជាអ៊ុយក្រែន បានចោទប្រតិភូហិរញ្ញវត្ថុរុស្ស៊ីថាចំណែកប្រព្រឹត្តឧក្រិដ្ឋកម្មសង្គ្រាមដែរ ព្រោះបានជួយទ្រទ្រង់ឱ្យមានសង្គ្រាមនិងបន្តសង្គ្រាម។ ប៉ុន្តែរុស្ស៊ីមិនបានបញ្ជូនរដ្ឋមន្ត្រីមកចូលរួមក្នុងជំនួបនេះដោយផ្ទាល់ទេ។ រដ្ឋមន្ត្រីក្រសួងហិរញ្ញវត្ថុរុស្ស៊ីថ្លែងតែតាមរយៈប្រព័ន្ធវីដេអូតែប៉ុណ្ណោះ។
ជាម្ចាស់ផ្ទះ ឥណ្ឌូណេស៊ី ដែលខំប្រឹងរក្សាជំហរអព្យាក្រិត្យ មិនផាត់រុស្ស៊ីពីជំនួបប្រជុំតាមសំណើរបស់លោកខាងលិច បានអំពាវនាវឱ្យអ្នកទទួលខុសត្រូវប្រទេសហ្សេ២០ទាំងអស់រួបរួមគ្នា និងបញ្ចេញសកម្មភាពប្រឈមនឹងវិបត្តិស្បៀងអាហារនិងថាមពលដែលនឹងបង្កឱ្យមានមហន្តរាយធ្ងន់ធ្ងរណាស់។ រដ្ឋាភិបាលត្រូវតែតម្រង់វិធានការជួយប្រជាពលរដ្ឋដែលទន់ខ្សោយខ្លាំង ពុំនោះទេវិបត្តិសេដ្ឋកិច្ចនឹងកាន់តែយ៉ាប់យឺនខ្លាំង។ នេះជាការជំរុញឱ្យរបស់លោកស្រីនាយិកាអង្គការមូលនិធិរូបិយវត្ថុអន្តរជាតិដែលបង្ហាញវត្តមានផ្ទាល់នៅបាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ