សន្និសីទអាកាសធាតុ Cop27៖ កិច្ចព្រមព្រៀងប្រវត្តិសាស្រ្តសម្រាប់ប្រទេសក្រីក្រ
ចុះផ្សាយនៅថ្ងៃ៖
ស្តាប់ - ០៦:៥៣
បន្ទាប់ពីពន្យារពេល១ថ្ងៃ និងចរចារហូតដល់ម៉ោង៤ភ្លឺ នៅថ្ងៃអាទិត្យនេះ អ្នកតំណាងរបស់ប្រទេសជិត២០០ នៅទីបំផុត បានរកឃើញកិច្ចព្រមព្រៀងរួមគ្នាមួយ នៅក្នុងសន្និសីទអន្តរជាតិស្តីពីអាកាសធាតុ Cop27 ដែលប្រព្រឹត្តទៅនៅប្រទេសអេហ្ស៊ីប។ សេចក្តីថ្លែងការណ៍ចុងក្រោយ ដែលប្រធានសន្និសីទអាកាសធាតុ Cop27បានអានជាសាធារណៈ នៅព្រឹកថ្ងៃអាទិត្យមានបញ្ជាក់ពីការបង្កើតមូលនិធិ សម្រាប់ការខូចខាត និងបាត់បង់ដោយសារកត្តាប្រែប្រួលអាកាសធាតុ ដែលជាការទាមទារចង់បានប្រទេសក្រីក្រ និងប្រទេសកំពុងអភិវឌ្ឍ។
នៅទីបំផុត សន្និសីទអាកាសធាតុនៅអេហ្ស៊ីប Cop 27 បានបិទបញ្ចប់ នៅព្រឹកព្រលឹមថ្ងៃអាទិត្យ បន្ទាប់ពីត្រូវបានពន្យារពេល ១ថ្ងៃបន្ថែមទៀត។ នៅប៉ុន្មានម៉ោងមុនការបិទបញ្ចប់សន្និសីទ អ្នកតំណាងរបស់ប្រទេសជិត ២០០បានចរចាតយ៉ាងស្វិតស្វាញ មុននឹងយល់ព្រមព្រៀង លើការបង្កើតមូលនិធិពិសេសសម្រាប់ការខូចខាត និងការបាត់បង់ដោយសារគ្រោះមហន្តរាយធម្មជាតិ ដែលជាលទ្ធផលនៃការប្រែប្រួលអាកាសធាតុ។ ការបង្កើតមូលនិធិសម្រាប់ការខូចខាត និងការបាត់បង់ជាការទាមទារចង់បានខ្លាំងរបស់ប្រទេសក្រីក្រ។
កិច្ចព្រមព្រៀងស្តីពីការបង្កើតមូលនិធិសម្រាប់ការខូចខាត និងការបាត់បង់ ជាកិច្ចព្រមព្រៀងប្រវត្តិសាស្រ្ត ព្រោះថា នេះជាលើកទី១ ដែល ការទាមទារ របស់ក្រុមប្រទេសក្រីក្រ ប្រទេសកំពុងអភិវឌ្ឍ ដែលបញ្ចេញឧស្ម័នកាបូនិក តិចតួច ប៉ុន្តែ រងគ្រោះខ្លាំងជាងគេដោយសារគ្រោះមហន្តរាយធម្មជាតិ ត្រូវបានគេសរសេរចែង នៅក្នុងកិច្ចព្រមព្រៀង ស្តីពីអាកាសធាតុ។
ក្រុមប្រទេសក្រីក្រ ប្រទេសកោះដែលខូចខាតដោយសារគ្រោះមហន្តរាយធម្មជាតិ ឬកំពុងប្រឈមខ្លាំងនឹងការឡើងកំពស់ទឹកសមុទ្រ បានតស៊ូជាង ៣០ឆ្នាំមកហើយ ដើម្បី ឲ្យគេបង្កើតមូលនិធិពិសេស សម្រាប់បាត់បង់ និងការខូចខាតកន្លងមក។ នៅក្នុងសន្និសីទCop27 នៅអេហ្ស៊ីប ពួកគេនៅបន្តក្រាញននៀល ចរចា ធ្វើយ៉ាងណាឲ្យគេដឹងលឺពីតម្រូវការចង់បាន បន្ទាន់របស់ពួកគេ។
សន្និសីទស្តីពីអាកាសធាតុ នៅអេហ្ស៊ីប ត្រូវពន្យារពេល មួយថ្ងៃបន្ថែមទៀត ក៏ដោយសារតែ ការចរចាត្រូវជាប់គាំង នៅពេលគេនិយាយពីការទាមទារបង្កើត មូលនិធិសម្រាប់ជួយប្រទេសក្រីក្រ។ ក្រុមប្រទេសអ្នកមានធ្លាប់បានជំទាស់មិនឲ្យគេបង្កើតមូលនិធិថ្មីសម្រាប់ការខូចខាត និងការបាត់បង់ ក្នុងហេតុផលថា គេមានមូលនិធិបៃតៃងរួចទៅហើយ។
ប៉ុន្តែ សម្រាប់ ក្រុមប្រទេសក្រីក្រ ក្រុមប្រទេសអ្នកមាន មិនបានគោរពពាក្យសន្យាក្នុងការផ្តល់ប្រាក់១០០ពាន់លានដុល្លារក្នុងមួយឆ្នាំ សម្រាប់មូលនិធិបៃតង ដែលមានគោលដៅ ជួយកាត់បន្ថយការបញ្ចេញឧស្ម័នកាបូនិក និងសម្របប្រទេសនៅនឹងផលប៉ះពាល់អាកាសធាតុ។ ម្យ៉ាង គេចង់ឲ្យមានមូលនិធិពិសេសថ្មី ព្រោះគេត្រូវការថវិកាបន្ថែម សម្រាប់ជួយជាពិសេស ប្រទេសដែលរងការខូចខាត និងការបាត់បង់ដោយសារគ្រោះមហន្តរាយធម្មជាតិ។
កិច្ចព្រមព្រៀងស្តីពីការបង្កើតមូលនិធិសម្រាប់ការខូចខាត និងការបាត់បង់ ដោយសារកត្តាប្រែប្រួលអាកាសធាតុ គឺជាជោគជ័យដ៏ធំមួយ សម្រាប់ប្រទេសនៅភាគខាងត្បូង ព្រោះ ដែលនៅទីបំផុត ការទាមទារ ចង់បានរបស់ពួកគេត្រូវបានដឹងលឺ និងសរសេរចែងច្បាស់នៅក្នុងកិច្ចព្រមព្រៀងជាផ្លូវការ។
តើអ្នកណាដែលត្រូវបង់ប្រាក់ទៅក្នុងមូលនិធិសម្រាប់ការខូចខាត និងការបាត់បង់?
អ្នកណាជាបង់ប្រាក់ទៅក្នុងមូលនិធិ ហើយប្រទេសណាដែលទទួលថវិកាពីមូលនិធិ។ រឿងនេះគេនៅមិនទាន់ដឹងនៅឡើយទេ ព្រោះថា កិច្ចព្រមព្រៀង នៅCop27 នៅអេហ្ស៊ីប និយាយត្រឹមការបង្កើតមូលនិធិប៉ុណ្ណោះ។ ចំណែកខ្លឹមសារលម្អិត ត្រង់ថា តើប្រទេសណាដែលត្រូវទទួលបន្ទុកចេញថវិកា ហើយនិងលក្ខខណ្ឌជួយកម្រិតណានោះ នឹងត្រូវគេពិភាក្សាបន្ត នៅក្នុងសន្និសីទអន្តរជាតិស្តីពីអាកាសធាតុ នៅឆ្នាំក្រោយ ឬCop28 នៅប្រទេសអេមីរ៉ាត អារ៉ាប់រួម។
ប៉ុន្តែ តាមលោកស្រី Sherry Rehmen រដ្ឋមន្រ្តីអាកាសធាតុរបស់ប៉ាគីស្ថាន និងជាអ្នកតំណាងក្រុមប្រទេសកំពុងអភិវឌ្ឍ +ចិន G77 ដែលតស៊ូមតិខ្លាំង នៅក្នុងការចរចា ប៉ុន្មានថ្ងៃមកនេះ ការបង់ថវិកាទៅក្នុងកញ្ចប់មូលនិធិ សម្រាប់ការខូចខាត និងការបាត់បង់ ធ្វើឡើងដោយការស្ម័គ្រចិត្ត ពោលគឺនៅតែគ្មានការចាប់បង្ខំ។ ចំណែកប្រទេសដែលត្រូវទទួលប្រយោជន៍ពីមូលនិធិ អាចជាប្រទេសដែលក្រីក្រ និងប្រទេសកោះ ដែលងាយរងគ្រោះដោយសារគ្រោះមហន្តរាយធម្មជាតិ និងការឡើងកំពស់ទឹកសមុទ្រ។
អឺរ៉ុបខកចិត្តនឹងកិច្ចព្រមព្រៀង នៅCop27
ជារួម គ្រប់គ្នាសប្បាយចិត្ត ដែលនៅទីបំផុត ប្រទេសក្រីក្រទទួលបានយុត្តិធម៌ ទាមទារបានសម្រេចឲ្យមានកញ្ចប់ជំនួយ ដើម្បីជួយពួកគេដែលរងគ្រោះដោយសារកត្តាប្រែប្រួលអាកាសធាតុ។ ប៉ុន្តែ ប្រទេសនៅអឺរ៉ុបមិនសប្បាយចិត្តដែលឃើញថា ចិន និងឥណ្ឌា ដែលជាប្រទេសកំពុងបញ្ចេញឧស្ម័នកាបូនិក ច្រើនដែរនោះ ស្ថិតក្នុងបញ្ជីប្រទេសកំពុងអភិវឌ្ឍដែលត្រូវទទួលកញ្ចប់ថវិកាសម្រាប់ការខូចខាត និងការបាត់បង់។ អឺរ៉ុបចង់ឲ្យចិន ដែលជាមហាអំនាចសេដ្ឋកិច្ចទី២ក្នុងពិភពលោកជួយចេញថវិកាសម្រាប់មូលនិធិ។
មួយវិញទៀត អ្វីដែលបណ្តាប្រទេសអឺរ៉ុបមិនពេញចិត្តនៅត្រង់ថា សន្និសីទCop27 ផ្តោតនិយាយច្រើនតែពីរឿងថវិកា ប៉ុន្តែ ភ្លេចនិយាយពីការប្រឹងប្រែងដើម្បីកាត់បន្ថយការបញ្ចេញឧស្ម័នការបូនិក។
អគ្គលេខាធិការអង្គការសហប្រជាជាតិផ្ទាល់ ក៏មានជំហរដូចប្រទេសអ្នកមាន ប្រទេសនៅអឺរ៉ុបដែរ។ នៅថ្ងៃនេះលោកអង់តូនីញ៉ូ ហ្គូទែរស៍ បានស្វាគមកិច្ចព្រមព្រៀង ស្តីពីការបង្កើត មូលនិធិសម្រាប់ជួយប្រទេសក្រីក្រ ប៉ុន្តែ ដូចប្រទេសអឺរ៉ុប លោកបានសំដែងការសោកស្តាយ ព្រោះថា បញ្ហាកាត់បន្ថយឧស្ម័នកាបូនិក ឧស្ម័នផ្ទះកញ្ចក់ ត្រូវបានគេលើកនិយាយតិចតួច នៅក្នុងសន្និសីទ។ នៅក្នុងរឿងកាត់បន្ថយ ឧស្ម័នកាបូនិក កិច្ចព្រមព្រៀងនៅអេហ្ស៊ីបគឺមិនសូវជាមានមហិច្ឆតាដូចនៅ Cop26 នៅប្រទេសអង់គ្លេសអីចឹង ពោល គឺគេគ្មានឃើញ ប្រទេសទាំងអស់ ជាពិសេសប្រទេសដែលបញ្ចេញឧស្ម័នកាបូនិកក្រាស់ក្រែល ចេញមុខ សន្យាថ្មី ដើម្បីកាត់បន្ថយ ការបញ្ចេញឧស្ម័នកាបូនិករបស់ខ្លួនឲ្យបានច្រើនជាងមុននោះទេ។
ជាក់ស្តែង ពាក្យដែលគេប្រើប្រាស់ នៅក្នុងកិច្ចព្រមព្រៀង សម្រាប់និយាយពីការកាត់បន្ថយការបញ្ចេញឧស្ម័នកាបូនិក ក៏មិនសូវតឹងរ៉ឹង។ ឧទាហរណ៍ គេបានប្រើពាក្យ ទាមទារឲ្យរដ្ឋាភិបាលចាត់វិធានការកាត់បន្ថយការប្រើប្រាស់ធ្យូងថ្ម និងលុបបំបាត់ឧបត្ថម្ភទុន សម្រាប់កាប្រើប្រាស់ផូស៊ីលដែលមិនចាំបាច់។ សម្រាប់ក្រុមប្រទេសនៅអឺរ៉ុបកិច្ចព្រមព្រៀងមិនសូវមានមហិច្ឆតា និងចង់ឲ្យគេប្រើពាក្យផូស៊ីល ព្រោះថា ពាក្យនេះ ក្តោបបញ្ចូល ថាមពលធ្យូងថ្ម ប្រេង និងឧស្ម័ន។ ប្រធានកម្មវិធីនយោបាយអាកាសធាតុ របស់អឺរ៉ុប និងជាអ្នកតំណាងការចរចារបស់អឺរ៉ុប លោកFrans Timmermans បានបន្ទោស អេហ្ស៊ីប ដែលជាប្រធានសន្និសីទ ថា រងការដាក់សម្ពាធ ជឿតាមការបញ្ចុះបញ្ចូល របស់អ៊ីរ៉ង់ អារ៉ាប៊ី សាអូឌីត និងរុស្ស៊ី ដើម្បីជៀសវាងមិនប្រើពាក្យ កាត់បន្ថយប្រេង និងឧស្ម័ន នៅក្នុងកិច្ចព្រមព្រៀង។
មួយវិញភាគីអឺរ៉ុប មិនពេញចិត្តផងដែរ ដែលគេសរសេរចាត់ទុក ឧស្ម័ន ដែលបញ្ចេញឧស្ម័នតិចតួច ជាប្រភពថាមពលស្អាតស្អំ ដូចជាផ្ទាំងសូឡា និងវាយោថាមពល។ ការចែងយ៉ាងដូច្នេះ នឹងអាចធ្វើឲ្យអ្នកប្រើប្រាស់ឧស្ម័ន រួចខ្លួនពីកាតព្វកិច្ចកាត់បន្ថយ ឧស្ម័នកាបូនិក។
សម្រាប់អ្នកតំណាងអឺរ៉ុប ភាគីជាច្រើនមិនទាន់បានត្រៀមខ្លួនដើម្បីបោះជំហានទៅមុខ នៅក្នុងប្រយុទ្ធប្រឆាំងនឹងការប្រែប្រួលអាកាសធាតុ ពីព្រោះពួកគេនៅខ្លាច នៅចំពោះមុខការផ្លាស់ប្តូរ ហើយនិងមិនចង់ចំណាយច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ