អាកាសធាតុ៖កាណាដាលាតត្រដាងយុទ្ធសាស្រ្តតម្លៃ ១ ១០០លានអឺរ៉ូដើម្បីសម្របទៅនឹងការប្រែប្រួលអាកាសធាតុ
ចុះផ្សាយនៅថ្ងៃ៖
ស្តាប់ - ០៦:៤៥
នៅក្នុងប្រទេសកាណាដា រដ្ឋាភិបាលបានលាតត្រដាងនាថ្ងៃព្រហស្បតិ៍ ទី២៤ វិច្ឆិកានូវយុទ្ធសាស្រ្តជាតិលើកទី១ ដើម្បីសម្របទៅនឹងការប្រែប្រួលអាកាសធាតុ។ លោកប៊ីល ប៊្លែរ រដ្ឋមន្រ្តីក្រសួងគាំពារស៊ីវិលបានថ្លែងថា ការប្រែប្រួលអាកាសធាតុបានកើតមាននៅគ្រប់ទីកន្លែង និងនៅលើសហគមន៍ទាំងអស់នៅទូទាំងប្រទេសកាណាដា។ តាមរដ្ឋមន្រ្តីកាណាដារូបនេះដដែល ការកើនឡើងញឹកញាប់ និងភាពធ្ងន់ធ្ងរនៃព្រឹត្តិការណ៍អាកាសធាតុមិនមែនមានតែនៅកាណាដាមួយទេ តែមាននៅគ្រប់ទីកន្លែងទាំងអស់ក្នុងលោកនារយៈពេលប៉ុន្មានឆ្នាំចុងក្រោយនេះ។
យុទ្ធសាស្រ្តជាតិរបស់កាណាដាដើម្បីសម្របនឹងការប្រែប្រួលអាកាសធាតុជាយុទ្ធសាស្រ្តជាតិមួយសម្រាប់រយៈពេល ៥ឆ្នាំដែលមានជិត ៧០វិធានការ និងដែលមានតម្លៃសរុប ១ ៦០០លានដុល្លារកាណាដា ឬស្មើនឹងជិត ១ ២០០លានដុល្លារអាមេរិក។ តាមរយៈកញ្ចប់ថវិកាទាំងជិត ១ ២០០លានដុល្លារនេះ រដ្ឋាភិបាលនឹងធ្វើការចំណាយទៅលើវិធានការជាច្រើនដើម្បីសម្របនឹងការប្រែប្រួលអាកាសធាតុ ពិសេសការសាងសង់ហេដ្ឋារចនាសម្ព័ន្ធសាធារណៈថ្មីដែលធន់នឹងគ្រោះធម្មជាតិ ដូចជាខ្យល់ព្យុះ ទឹកជំនន់ ឬមួយក៏ចំណាយទៅលើការបង្កើតឧបករណ៍ថ្មីជាមួយនឹងបច្ចេកវិទ្យាខ្ពស់ដើម្បីផ្តល់ដំណឹងឆាប់រហ័ស និងជាក់ច្បាស់ដល់ប្រជាជនកាណាដាស្តីពីទីកន្លែងដែលអាចប្រឈមនឹងគ្រោះទឹកជំនន់ ឬមួយក៏ទិន្នន័យស្តីពីអាកាសធាតុ។
ប្រសិនបើប្រជាជនមានព័ត៌មានគ្រប់គ្រាន់ និងច្បាស់លាស់ស្តីពីទីកន្លែងនៃការមកនូវទឹកជំនន់ ព្យុះសង្ឃរា ឬមួយក៏រលកកម្តៅក្តៅខ្លាំង ពួកគេអាចមានពេលគ្រប់គ្រាន់ដើម្បីជម្លៀសខ្លួនចេញ ឬមួយក៏ប្រើមធ្យោបាយដើម្បីសម្របខ្លួន។ នៅក្នុងជិត ៧០វិធានការនៃយុទ្ធសាស្រ្តជាតិដើម្បីសម្របនឹងការប្រែប្រួលអាកាសធាតុ រដ្ឋាភិបាលព្យាយាមធ្វើអ្វីគ្រប់យ៉ាងដើម្បីទី១ ចាប់ពីពេលនេះទៅឆ្នាំ ២០៥០ ប្រជាជនកាណាដាចំនួន ៦០% ស្គាល់ និងដឹងពីហានិភ័យនៃគ្រោះមហន្តរាយដែលពួកគេប្រឈម ទី២ ចាប់ពីពេលនេះទៅឆ្នាំ ២០៣០ ដី និងទឹកត្រូវបានអភិរក្សដើម្បីទ្រទ្រង់ប្រព័ន្ធជីវចម្រុះ និងទី៣ ចាប់ពីពេលនេះទៅឆ្នាំ ២០៤០ ការស្លាប់ដោយរលកកម្តៅក្តៅខ្លាំងនឹងលែងមាន។
ជម្រើសផ្លូវសម្របខ្លួន និងជម្រើសផ្លូវប្រយុទ្ធប្រឆាំងនឹងការប្រែប្រួលអាកាសធាតុត្រូវដើរទន្ទឹមគ្នា?
ការដែលរដ្ឋាភិបាលកាណាដាបានលាតត្រដាងនូវយុទ្ធសាស្រ្តជាតិដើម្បីសម្របនឹងការប្រែប្រួលអាកាសធាតុពេលនេះមិនមែនជាការបោះចោលយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុទេ។ វិធានការទប់ស្កាត់ និងវិធានការសម្របនឹងការប្រែប្រួលអាកាសធាតុត្រូវដើរទន្ទឹមគ្នា។ ក្រៅពីកាណាដា វិធានការទប់ស្កាត់ និងវិធានការសម្របនឹងការប្រែប្រួលអាកាសធាតុក៏ត្រូវបានប្រទេសមួយចំនួនទៀតយកទៅអនុវត្តដែរ។ ចូរកុំភ្លេចថា ការសម្របខ្លួនទៅនឹងស្ថានការណ៍មួយដែលគេពិបាកទប់ស្កាត់ ដូចរឿងប្រែប្រួលអាកាសធាតុជាជម្រើសល្អ និងទទួលបានផលចំណេញ។
តាមរយៈយុទ្ធសាស្រ្តជាតិដើម្បីសម្របនឹងការប្រែប្រួលអាកាសធាតុពេលនេះ រដ្ឋាភិបាលកាណាដាសង្ឃឹមកាត់បន្ថយតម្លៃនៃការខាតបង់ដែលបង្កដោយគ្រោះមហន្តរាយធម្មជាតិ ដូចជាគ្រោះទឹកជំនន់ គ្រោះរាំងស្ងួត ឬមួយក៏ព្យុះសង្ឃរា។ តាមរដ្ឋាភិបាលក្រុងអូតាវ៉ា ការបោះទុនវិនិយោគចំនួន ១ដុល្លារនឹងអាចសន្សំសំចៃបានរហូតដល់ទៅ ១៥ដុល្លារ។ អ្វីដែលរដ្ឋាភិបាលចង់និយាយគឺថា បើគេចំណាយតែ ១ដុល្លារដើម្បីសាងសង់ហេដ្ឋារចនាសម្ព័នដែលធន់នឹងគ្រោះធម្មជាតិ ដូចយ៉ាងទឹកជំនន់ គេអាចបញ្ជៀសការខាតបង់ដែលបង្កដោយគ្រោះទឹកជំនន់ដល់ទៅ ១៥ដុល្លារ។
រដ្ឋាភិបាលបានលើកឧទាហរណ៍ជាក់ស្តែងទៅពន្យល់ថា គ្រាន់តែការប្រើនិយាមថ្មីនៅក្នុងវិស័យសំណង់ពាក់ព័ន្ធនឹងគ្រោះទឹកជំនន់ និងគ្រោះអគ្គីភ័យមួយអាចសន្សំសំចៃប្រាក់បានដល់ទៅ ៤ ៧០០លានដុល្លារក្នុងមួយឆ្នាំ។ បន្ទាប់មក រដ្ឋាភិបាលក៏បានលើកឡើងពីការអភិវឌ្ឍន៍តំបន់បៃតងនៅតាមទីក្រុងនារយៈពេលប៉ុន្មានឆ្នាំកន្លងទៅ និងគ្រោងបង្កើនការអភិវឌ្ឍន៍បន្ថែមទៀតពីពេលនេះទៅឆ្នាំ ២០៣០។ តាមរដ្ឋាភិបាល តំបន់បៃតងនេះនឹងអនុញ្ញាតឲ្យមានការកាត់បន្ថយលើការប្រើម៉ាស៊ីនត្រជាក់ និងការបង្កើនគុណភាពខ្យល់ជាដើម។
ក្រុមសកម្មជន និងអង្គការបរិស្ថានសាទរ
យុទ្ធសាស្រ្តជាតិដើម្បីសម្របខ្លួនទៅនឹងការប្រែប្រួលអាកាសធាតុរបស់រដ្ឋាភិបាលពេលនេះទទួលបានការសាទរ ពិសេសពីក្រុមអង្គការ និងក្រុមសកម្មជនបរិស្ថាន។ « គឺជាការបោះមួយជំហានយ៉ាងធំ » នេះជាប្រតិកម្មរបស់អង្គការ Greenpeace។ ចំណែកការិយាល័យធានារ៉ាប់រងកាណាដាដែលតំណាងឲ្យក្រុមហ៊ុនធានារ៉ាប់រងឯកជនជាច្រើនបានចាត់ទុកយុទ្ធសាស្រ្តជាតិដើម្បីសម្របខ្លួនទៅនឹងការប្រែប្រួលអាកាសធាតុរបស់រដ្ឋាភិបាលថាជាយុទ្ធសាស្រ្តប្រកបដោយមហិច្ឆតា និងភាពក្លាហាន ព្រមទាំងបានអំពាវនាវឲ្យប្រទេសផ្សេងក្នុងលោកយកគំរូតាមកាណាដា។
អ្វីជាការកត់សម្គាល់ យុទ្ធសាស្រ្តថ្មីរបស់រដ្ឋាភិបាលកាណាដាពេលនេះជាវិធានការបន្ថែមទៅលើផែនការលើកមុនតាំងពីឆ្នាំ ២០០៩ ដែលមានកញ្ចប់ទឹកប្រាក់ចំនួន ៨ ០០០លានដុល្លារ។ គួរបញ្ជាក់ថា សំណួរទាក់ទងនឹងការសម្របនឹងការប្រែប្រួលអាកាសធាតុត្រូវបានលើកយកទៅជជែកយ៉ាងផុសផុលនាសន្និសីទអន្តរជាតិស្តីពីអាកាសធាតុ COP២៧ ដែលទើបបិទបញ្ចប់ថ្មីៗនៅក្នុងប្រទេសអេហ្ស៊ីប។ ក៏ប៉ុន្តែ ជំនួយដែលសន្យាដោយក្រុមប្រទេសអ្នកមានដើម្បីជួយក្រុមប្រទេសអ្នកក្រដែលបានរងគ្រោះដោយការប្រែប្រួលអាកាសធាតុនៅជាប្រធានបទប្រឈម និងចោទជាបញ្ហាដដែល។
គ្រប់គ្នាបានយល់ឃើញដូចគ្នាថា ជម្រើសសម្របនឹងការប្រែប្រួលអាកាសធាតុជាជម្រើសដែលគួរដើរទន្ទឹមគ្នានឹងការប្រយុទ្ធប្រឆាំងនឹងការប្រែប្រួលអាកាសធាតុ។ តែបញ្ហានៅត្រង់ថាសម្រាប់ក្រុមប្រទេសក្រីក្រ កុំថាឡើយជម្រើសសម្របនឹងការប្រែប្រួលអាកាសធាតុ សូម្បីតែជម្រើសយុទ្ធនាការប្រឆាំងនឹងការប្រែប្រួលអាកាសធាតុក៏ពួកគេគ្មានលទ្ធភាពដែរ។ អ្វីដែលគេកំពុងមើលឃើញ ជម្រើសដែលក្រុមប្រទេសក្រីក្រកំពុងមានក្នុងដៃពេលនេះ គឺគ្មានអ្វីក្រៅពីការបន្តទ្រាំទ្រ និងទទួលរងនូវផលវិបាកអាកាសធាតុដែលក្រុមប្រទេសអ្នកមានជាអ្នកបង្កឡើងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ