លោកពូទីនចោទប្រកាន់បស្ចិមលោកថា ប៉ុនប៉ងបំបែកបំបាក់រុស្ស៊ី
ចុះផ្សាយនៅថ្ងៃ៖
ស្តាប់ - ០៦:២៨
គិតមកត្រឹមថ្ងៃចន្ទនេះ សង្រ្គាមរុស្ស៊ីឈ្លានពានអ៊ុយក្រែន មានរយៈពេល ១០ខែ ២ថ្ងៃ ដោយរុស្ស៊ីនៅតែមិនទាន់សម្រេចគោលដៅ របស់ខ្លួន ដែលចង់បង្រួបបង្រួមប្រជាជនរុស្ស៊ី។ នៅក្នុងបទសម្ភាសន៍ចាក់ផ្សាយក្នុងទូរទស្សន៍ជាតិរុស្ស៊ី កាលពីយប់ថ្ងៃអាទិត្យ ប្រធានាធិបតី រុស្ស៊ី លោកពូទីនបានចោទប្រទេសលោកខាងលិចថា ប៉ុនប៉ងបំបែកបំបាក់រុស្ស៊ី តាមរយៈ ការផ្តល់ជំនួយគាំទ្រអាវុធដល់អ៊ុយក្រែន។ នៅថ្ងៃចន្ទនេះ កងទ័ពរុស្ស៊ីអះអាងថា គេបានបាញ់ទម្លាក់ យន្តហោះដ្រូនរបស់អ៊ុយក្រែន ដែលបើកការវាយប្រហារទៅលើមូលដ្ឋានទ័ពអាកាសមួយរបស់រុស្ស៊ី នៅភាគខាងត្បូង។ ប៉ុន្តែ បំណែកយន្តហោះដ្រូនបានធ្លាក់ សម្លាប់ ជនជាតិរុស្ស៊ី៣នាក់ ដែលធ្វើការនៅ ឃ្លាំងស្តុកនៅមូលដ្ឋានទ័ព។ នៅថ្ងៃចន្ទនេះជាថ្ងៃ ដែល រដ្ឋមន្រ្តីការបរទេសអ៊ុយក្រែននឹងដាក់ពាក្យសុំទាមទារ ឲ្យគេដករុស្ស៊ីចេញពីក្រុមប្រឹក្សា សន្តិសុខរបស់អង្គការសហប្រជាជាតិ។ តើគេអាចដករុស្ស៊ី ដែលជាសមាជិកអចិន្ត្រៃយ៍ចេញពីក្រុមប្រឹក្សាសន្តិសុខដែរឬទេ ?
សង្រ្គាមរុស្ស៊ី ឈ្លានពានអ៊ុយក្រែន បានអូសបន្លាយពេល១០ខែមកហើយ ដោយបានសម្លាប់ជីវិតមនុស្ស និងបំផ្លាញធ្ងន់ធ្ងរហេដ្ឋារចនាសម្ព័ន្ធរបស់អ៊ុយក្រែន។ ភាគីអ៊ុយក្រែនតាមរយៈរដ្ឋមន្រ្តីការបរទេស លោកDmytro Kuleba បានអះអាងថា អ៊ុយក្រែននឹងទាមទារជាផ្លូវការ នៅថ្ងៃចន្ទទី ២៦ ធ្នូ ឲ្យគេដករុស្ស៊ីចេញពីសមាជិកអចិន្ត្រៃយ៍របស់ក្រុមប្រឹក្សាសន្តិសុខ។ មានសមាជិក១៥ប្រទេស ក្រុមប្រឹក្សាសន្តិសុខរបស់អង្គការសហប្រជាជាតិមានតួនាទី ធានាសន្តិភាព និងសន្តិសុខនៅក្នុងពិភពលោក។
សម្រាប់អ៊ុយក្រែន សង្រ្គាមឈ្លានពាន ដ៏សាហាវឃោឃៅរបស់រុស្ស៊ីសបញ្ជាក់ច្បាស់ថា រុស្ស៊ី លែងមានសិទ្ធិធ្វើជាសមាជិករបស់ក្រុមប្រឹក្សាសន្តិសុខ និងមានកៅអីរបស់ខ្លួននៅ អង្គការសហប្រជាជាតិតទៅទៀត។ តាមរដ្ឋមន្រ្តីការបរទេសអ៊ុយក្រែន នៅក្នុងចំណោមមន្រ្តីការទូត នៅអង្គការសហប្រជាជាតិ គេកំពុងពិភាក្សាយ៉ាងសកម្ម ដើម្បី ធ្វើយ៉ាងណារារាំង រុស្ស៊ីកុំឲ្យប្រើសិទ្ធិអំណាច របស់ខ្លួន ដើម្បីគំរាមកំហែង សន្តិភាព សន្តិសុខពិភពលោក។
រដ្ឋមន្រ្តីការបរទេសអ៊ុយក្រែនទំនងចង់និយាយដល់សិទ្ធិវេតូ របស់រុស្ស៊ី ព្រោះថា ក្នុងនាមជាជាសមាជិកអចិន្រ្តៃយ៍របស់ក្រុមប្រឹក្សាសន្តិសុខអង្គការសហប្រជាជាតិ រុស្ស៊ី បានប្រើសិទ្ធិវេតូរបស់ខ្លួន ដើម្បីបោះឆ្នោតប្រឆាំងរាល់សេចក្តីសម្រេចរបស់ក្រុមប្រឹក្សាសន្តិសុខ ដែលទាក់ទងនឹងសង្រ្គាម អ៊ុយក្រែន។
ប៉ុន្តែ សួរថា តើគេអាចដករុស្ស៊ីចេញពីសមាជិកអចិន្ត្រៃយ៍របស់ក្រុមប្រឹក្សាសន្តិសុខដែរឬទេ ? ចម្លើយនោះ គឺមិនអាចទៅរួចទេ។ អ៊ុយក្រែន តាមរយៈ ប្រធានាធិបតី លោកហ្សេឡេនស្គី ធ្លាប់បានទាមទារម្តងហើយ កាលពីខែ មេសា ពោលនៅ២ខែក្រោយ កងទ័ពរុស្ស៊ីចូលឈ្លានពានអ៊ុយក្រែន ដើម្បី ទាមទារឲ្យគេដករុស្ស៊ីចេញពី ក្រុមប្រឹក្សាសន្តិសុខរបស់អង្គការសហប្រជាជាតិ។ សម្រាប់អ៊ុយក្រែន រុស្ស៊ី ធ្វើសង្រ្គាមដ៏ឃោឃៅនៅអ៊ុយក្រែនយ៉ាងដូច្នេះ គឺ មិនសក្តិសមអង្គុយនៅកៅអីសមាជិកក្រុមប្រឹក្សាសន្តិសុខ ដែលជាស្ថាប័នកំពូល ក្នុងការធានាសុខសន្តិភាពនៅក្នុងពិភពលោកនោះទេ។
ប៉ុន្តែ ការទាមទាររបស់ប្រធានាធិបតីអ៊ុយក្រែន គឺមិនបានចម្លើយតបជាវិជ្ជមាននោះទេ ព្រោះថា ដើម្បីអាចដក ផាត់រុស្ស៊ីចេញពី ក្រុមប្រឹក្សាសន្តិសុខ គេត្រូវឆ្លងកាត់នីតិវិធីដ៏ស្មុគស្មាញ។ ជាក់ស្តែង គេត្រូវធ្វើកំណែទម្រង់វិធានរបស់ក្រុមប្រឹក្សាសន្តិសុខជាមុន ដែលនិយាយពី សមាជិកភាពរបស់ក្រុមប្រឹក្សាសន្តិសុខ។ ដើម្បី អាចធ្វើដូច្នេះ គេទាមទារឲ្យមានសំឡេងគាំទ្រ ២ភាគ៣ នៃសមាជិកសរុប ទាំង ១៥របស់ក្រុមប្រឹក្សាសន្តិសុខ។ ពិសេសជាងនោះ គឺមិនត្រូវមានសំឡេងជំទាស់ នៅក្នុងចំណោមប្រទេសសមាជិកអចិន្ត្រៃយ៍ ទាំង៥។ ប៉ុន្តែ ដោយសាររុស្ស៊ី ជាសមាជិកអចិន្ត្រៃយ៍ របស់ក្រុមប្រឹក្សាសន្តិសុខ ដែលមានសិទ្ធិវេតូ រុស្ស៊ីប្រាកដជាលើកដៃ បោះឆ្នោត ប្រឆាំង មិនឲ្យគេដកខ្លួនចេញពីសមាជិករបស់ក្រុមប្រឹក្សាសន្តិសុខ។
លោកពូទីនចោទប្រកាន់ប្រទេសលោកខាងលិច និងអ៊ុយក្រែនថា បដិសេធមិនចង់ចរចា
នៅក្នុងបទសម្ភាសន៍ដែលចាក់ផ្សាយ តាមទូរទស្សន៍ ជាតិ រុស្ស៊ី កាលពីថ្ងៃអាទិត្យម្សិលមិញ ប្រធានាធិបតីរុស្ស៊ី លោកពូទីន បានអះអាងថា លោកត្រៀមខ្លួនចរចា ជាមួយគ្រប់ភាគីជម្លោះ ដើម្បីទទួលបានលទ្ធផល ដែលរុស្ស៊ីអាចទទួលយកបាន។ ប៉ុន្តែ សម្រាប់មេដឹកនាំរុស្ស៊ី គឺអ៊ុយក្រែន និង ប្រទេសលោកខាងលិចដែលជាសម្ព័ន្ធមិត្តរបស់អ៊ុយក្រែនទេ ដែលបដិសេធមិនចង់ចរចា បិទបញ្ចប់ជម្លោះនៅអ៊ុយក្រែន។
ភាគីអ៊ុយក្រែន បានប្រតិកម្មថា តាមពិត ម៉ូស្គូ គ្មានចេតនាចង់ចរចា ពិតប្រាកដនោះទេ ព្រោះថា រុស្ស៊ីនិយាយតែមាត់ថា ត្រៀមខ្លួនចរចា ប៉ុន្តែ នៅលើសមរភូមិ រុស្ស៊ី នៅតែបន្តបាញ់មីស៊ីល កម្ទេចបំផ្លាញ អ៊ុយក្រែន ស្ទើរក្លាយជាផេះ។ ជាក់ស្តែង នៅថ្ងៃបុណ្យណូអែល ម្សិលមិញ រុស្ស៊ីបាញ់មីស៊ីលដល់ទៅជាង ៧០គ្រាប់ ជាពិសេស ស្រោចលើទីក្រុងKherson ដែលទាហានអ៊ុយក្រែន ទើបវាយចូលកាន់កាប់បានមកវិញ ដោយបានសម្លាប់មនុស្ស១០នាក់។
មួយវិញទៀត គេពិបាកនឹងជឿថា លោកពូទីនមានចេតនាពិតប្រាកដ ដើម្បី បិទបញ្ចប់ជម្លោះប្រដាប់អាវុធ នៅអ៊ុយក្រែន នៅពេលគេលឺលោកនិយាយថា រុស្ស៊ី នឹងធ្វើអ្វីគ្រប់បែបយ៉ាងដើម្បីបង្រួបបង្រួមជនជាតិរុស្ស៊ី នៅអ៊ុយក្រែន។ តាំងពីដំបូងទី មេដឹកនាំរុស្ស៊ី បានយកលេស ការពារផលប្រយោជន៍ ជនជាតិ រុស្ស៊ី ដើម្បី បញ្ជូនទ័ពទៅធ្វើសង្រ្គាម នៅអ៊ុយក្រែន។ នៅក្នុងបទសម្ភាសន៍ នៅទូរទស្សន៍ជាតិរុស្ស៊ី កាលពីថ្ងៃម្សិលមិញ ប្រធានាធិបតី រុស្ស៊ី នៅបានចោទប្រកាន់ប្រទេសលោកខាងលិច ថា កំពុងប៉ុនប៉ងបំបែកបំបាក់រុស្ស៊ីនៅអ៊ុយក្រែន។ លោកពូទីនធ្លាប់បានសន្យារួចហើយថា នឹងបង្រួបបង្រួម ប្រជាជនអ៊ុយក្រែន និងប្រជាជនរុស្ស៊ី ឲ្យក្លាយជាប្រជាជាតិតែមួយ ដូចកាលពីមុន។ សម្រាប់មេដឹកនាំរុស្ស៊ី បេសកកម្មរបស់កងទ័ពរុស្ស៊ី នៅអ៊ុយក្រែនគឺជារឿងត្រឹមត្រូវ។
សង្រ្គាម នៅអ៊ុយក្រែន មើលទៅ មិនងាយនឹងបិទបញ្ចប់
សង្រ្គាមឈ្លានពានរបស់រុស្ស៊ីមិនងាយនឹងបិទបញ្ចប់ នៅឆ្នាំថ្មី ឆ្នាំ ២០២៣។ នេះបើតាមការវាយតម្លៃរបស់រដ្ឋមន្រ្តីការពារជាតិតួកគី លោក Hulusi Akar ។ សម្រាប់ ប្រមុខកងទ័ពតួកគី ដរាបណាប្រទេសលោកខាងលិច នៅតែបន្តផ្តល់ជំនួយយោធា ជាពិសេសការផ្តល់ប្រព័ន្ធខែលមីស៊ីលដ៏មានតម្លៃរបស់អាមេរិកទៅឲ្យអ៊ុយក្រែន នោះ ប្រទេសលោកខាងលិច មិនបានជួយលើកទឹកចិត្តឲ្យអ៊ុយក្រែន ត្រលប់ទៅចរចាជាមួយរុស្ស៊ីនោះទេ។
ផ្ទុយទៅវិញ រុស្ស៊ី ដែលកាន់តែក្រពុលមុខខឹងនឹងប្រទេសលោកខាងលិចដែលនៅតែជួយអ៊ុយក្រែន គឺ នៅតែមិនព្រម បន្ទន់ជំហរ ហើយនៅតែបង្កើនការវាយប្រហារទៅលើអ៊ុយក្រែន។ តាមរដ្ឋមន្រ្តីការបរទេសតួកគី សង្រ្គាមរុស្ស៊ីនៅអ៊ុយក្រែន មិនងាយនឹងចប់ដោយស្រួលៗ នោះបើទោះបីជាតួកគី ព្យាយាមធ្វើជាអាជ្ញាកណ្តាល ជួយសម្របសម្រួលអ៊ុយក្រែន និងរុស្ស៊ីក្តី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ