រុស្ស៊ីប្រកាសប្រើមីស៊ីលអ៊ីពែរសូនិក ខណៈអាមេរិកប្រកាសផ្តល់ប្រព័ន្ធខែលមីស៊ីលPatriot ទៅឲ្យអ៊ុយក្រែន
ខណៈពេលដែលសហរដ្ឋអាមេរិក បានប្រកាសថានឹងផ្តល់ប្រព័ន្ធខែលមីស៊ីលដ៏ទំនើបរបស់ខ្លួន ឈ្មោះ Patriot មកឲ្យអ៊ុយក្រែន ក្នុងឱកាសដែលលោក វ្លូឌីមៀរ ហ្សេឡេនស្គី បានទៅទស្សនកិច្ចនៅក្រុងវ៉ាស៊ីនតោន កាលពីថ្ងៃពុធទី២១ធ្នូ លោកប្រធានាធិបតីពូទីនឯណោះ ក៏បានប្រកាសចេញវិធានការមួយចំនួនធំ ដើម្បីពង្រឹងសមត្ថភាពកងទ័ពរុស្ស៊ី។ ក្រៅពីបន្ថែមកម្លាំងទាហានរុស្ស៊ី ឲ្យបាន១លាន៥សែននាក់ លោកពូទីន បានប្រកាសផងដែរ ថានឹងបញ្ចេញឲ្យប្រើមីស៊ីលអ៊ីពែរសូនិកដ៏ទំនើប ឈ្មោះ Zircon និងមីស៊ីលអន្តរទ្វីបផ្សេងទៀត ចាប់ពីខែមករាតទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
យោងតាមការវិភាគ របស់លោកអតីតមេបញ្ជាការកងទ័ពបារាំង ដូមីនីក ត្រាំងកង់ អ្នកជំនាញផ្នែកភូមិសាស្ត្រ និងយុទ្ធសាស្រ្តយោធា បានលើកឡើងថា ការដែលរុស្ស៊ី ប្រកាសបញ្ចេញមីស៊ីលអ៊ីពែរសូនិក និងមីស៊ីលអន្តរទ្វីបមកប្រើនៅអ៊ុយក្រែននេះ វាគឺជាការឆ្លើយតប ទៅនឹងការប្រកាសរបស់អាមេរិក ដែលផ្តល់ប្រព័ន្ធខែលមីស៊ីលPatriot មកឲ្យអ៊ុយក្រែន។ តែយ៉ាងណាគ្មានអ្វីមកបញ្ជាក់បានទេ ថាមីស៊ីលទំនើបរបស់រុស្ស៊ីនោះអាចនឹងធ្វើឲ្យរុស្ស៊ីឈ្នះសង្គ្រាម នៅសមរភូមិអ៊ុយក្រែននោះឡើយ។
សម្រង់ប្រសាសន៍របស់លោក Dominique Trinquand អតីតមេបញ្ជការកងទ័ពបារាំង ជំនាញភូមិសាស្ត្រនិងយុទ្ធសាស្ត្រកងទ័ព
"មីស៊ីលទាំងនេះ ត្រូវបានភាគីរុស្ស៊ីប្រកាសដាក់ឲ្យប្រើប្រាស់ ស្របពេលដែលអាមេរិក ទើបតែបានប្រកាស ថានឹងផ្តល់ប្រព័ន្ធមីស៊ីលPatriot ដែលជាប្រព័ន្ធការពារផ្លូវអាកាសដ៏ទំនើបបំផុត ទៅឲ្យអ៊ុយក្រែន។ ដូច្នេះ មានន័យថា រុស្ស៊ីត្រូវតែត្រៀម ដាក់សព្វាវុធដែលទំនើបបំផុតរបស់ខ្លួនដែរ ដើម្បីអាចយកឈ្នះប្រព័ន្ធខែលមីស៊ីលPatriot របស់អាមេរិក។ ខ្ញុំជឿថានេះហើយ ដែលជាកម្មវត្ថុរបស់រុស្ស៊ី។
ខ្ញុំក៏ចង់និយាយម្តងទៀតដែរថា អ្វីដែលកងទ័ពរុស្ស៊ីនឹងធ្វើនោះ គឺជាការវាយប្រហារ កម្ទេចហេដ្ឋារចនាសម្ព័ន្ធរបស់អ៊ុយក្រែនតែប៉ុណ្ណោះ។ កងទ័ពរុស្ស៊ីនឹងមិនប្រើមីស៊ីលទាំងនេះ ដើម្បីប្រយុទ្ធនៅលើសមរភូមិដោយផ្ទាល់នោះទេ ព្រោះថារហូតមកទល់ពេលនេះ កងទ័ពរុស្ស៊ីគ្មានសមត្ថភាពយកឈ្នះទេ នៅលើសមរភូមិ។
មីស៊ីលបច្ចេកវិទ្យាទំនើបបែបនេះ ជាទូទៅសំបូរណាស់ អាសំដីអួត ប្រកាសថាអស្ចារ្យខ្លាំងក្លាសម្បើម តែសួរថាការពិតជាក់ស្តែង មីស៊ីលទំនើបៗទាំងនេះ អាចត្រូវបានគេបាញ់ប្រើបានប៉ុន្មានគ្រាប់នោះ គឺគ្មាននរណាអាចដឹងបានទេ។ ដូច្នេះតាមយោបល់ខ្ញុំ សម្រាប់ពេលនេះ វាមានតែការឃោសនាអួតតែប៉ុណ្ណោះ ពីខាងរុស្ស៊ី តែលទ្ធផលជាក់ស្តែងនៅសមរភូមិ ថាបានផលយ៉ាងណា គឺមិនទាន់មានទេ។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ