សង្គ្រាមអ៊ុយក្រែន ៖ លោកហ្សេឡេនស្គី បរិហារទង្វើរបស់យោធារុស្ស៊ីថាជាសកម្មភាពបែបភេរវកម្ម
សង្គ្រាមនៅអ៊ុយក្រែនទំនងជាមិនអាចបញ្ចប់បានដោយងាយៗទេ នេះបើតាមការអះអាងរបស់រដ្ឋមន្ត្រីក្រសួងការពារជាតិតួកគី ដោយសំអាងទៅលើជំនួយរបស់ក្រុមលោកខាងលិចនិងភាពដាច់ខាតរបស់រុស្ស៊ី។ រុស្ស៊ីដែលបានបន្តវាយប្រហារយ៉ាងសន្ធាប់ទៀតលើទីប្រជុំជនក្រុងឃែរស៊ុន Kherson ភាគខាងត្បូងប្រទេស និងក្រុងបាក់មូត Bakhmout ភាគខាងកើតអ៊ុយក្រែន នៅថ្ងៃសៅរ៍ទី ២៤ធ្នូនេះ។ មានស្លាប់យ៉ាងហោចណាស់៨នាក់ និងរបួសជាង២០នាក់។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានបរិហារការវាយប្រហារលើផ្សារកណ្តាលក្រុងបែបនេះថាជាទង្វើដ៏ឃោរឃៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
“ថ្ងៃសៅរ៍ ពេលព្រឹក មួយថ្ងៃមុនណូអែល ទីប្រជុំជនក្រុងឃែរសុន ដែលមិនមែនទីតាំងយោធាសោះ បានរងការវាយប្រហារពីសំណាក់យោធារុស្ស៊ី។ នេះមិនមែនជាការធ្វើសង្គ្រាមទេ គឺជាការសាបព្រោះអំពីឃោរឃៅ គឺសម្លាប់ដើម្បីបំភ័យ និងដើម្បីសប្បាយ”។ នេះជាសារកំហឹងរបស់ប្រធានាធិបតីអ៊ុយក្រែនបង្ហោះក្នុងប្រព័ន្ធសង្គម ដោយបានចាត់ទុកជាថ្មី ទង្វើរបស់យោធារុស្ស៊ី ថាជាសកម្មភាពបែបភេវកម្ម។
អមដោយរូបភាពនៃការខូចខាតដោយគ្រាប់ផ្លោងរុស្ស៊ី លោកហ្សេឡេនស្គី បានបន្ថែមថា នេះជាជីវិតពិតរបស់អ៊ុយក្រែន និងពលរដ្ឋអ៊ុយក្រែន តាំងពី១០ខែនៃសង្គ្រាមមក។
បើតាមប្រភពអ៊ុយក្រែន ការវាយប្រហាររុស្ស៊ីមកលើផ្សារមួយកណ្តាលក្រុងឃែរសុន នៅព្រឹកថ្ងៃសៅរ៍ទី២៤ធ្នូ ចំពេលមានមនុស្សម្នាច្រើន បានសម្លាប់ជីវិតជនស៊ីវិល៨នាក់ និងរបួស៥៨នាក់ ក្នុងនោះ១៧នាក់ជារបួសធ្ងន់ខ្លាំង។ ស្នូរសំឡេងគ្រាប់ផ្លោងនៅបន្តឮលាន់រងំនៅឡើយ នៅពេលថ្ងៃ។ នេះបើតាមសហការីរបស់ទីភ្នាក់ងារសារព័ត៌មានបារាំង AFP។
ក្រុងឃែរសុនបានធ្លាក់ក្រោមការគ្រប់គ្រងរបស់ទាហានរុស្ស៊ីអស់រយៈពេល៨ខែ និងទើបត្រូវបានទាហានអ៊ុយក្រែនរំដោះបានពីរុស្ស៊ីវិញ នៅថ្ងៃទី ១១វិច្ឆិកា។ ប៉ុន្តែឃែរសុនតែងរងការទម្លាក់គ្រាប់បែក ជាញឹកញយពីសំណាក់យោធារុស្ស៊ី ជាពិសេសលើទីតាំងផលិតថាមពល។ កាលពីថ្ងៃសុក្រ រុស្ស៊ីបានដៅវាយប្រហារឃែរសុនចំនួន៧៤ដង ស្លាប់មនុស្ស៥នាក់ និងរបួស២២នាក់។ នេះបើតាមប្រភពអាជ្ញាធរមូលដ្ឋាន។
នៅក្រុងបាក់មូត ប៉ែកខាងកើតប្រទេសវិញ ទាហានរុស្ស៊ីធ្វើការវាយប្រហារស្ទើរជាប្រចាំ។ ហើយបើតាមប្រធានាធិបតីហ្សេឡេស្គីដដែល ទីប្រជុំជនក្រុងរងការផ្លោងទម្លាក់គ្រាប់បែកជាច្រើនលើកច្រើនសា។ រុស្ស៊ីប៉ុនប៉ងដណ្តើមកាន់កាប់ក្រុងនេះតាំងពីរដូវក្តៅមកមិនបានសម្រេច។
ប្រឈមនឹងការវាយលុករបស់រុស្ស៊ី ក្រុងកៀវបានទាមទារតាំងពីជាច្រើនសប្តាហ៍មកហើយ សុំជំនួយហិរញ្ញវត្ថុនិងយោធាបន្ថែមពីលោកខាងលិច។ កាលពីថ្ងៃសុក្រ សហរដ្ឋអាមេរិកបានអនុម័តច្បាប់ថវិកាផ្តល់៤៥ពាន់លានដុល្លារដល់អ៊ុយក្រែន។ ចំណែកហូឡង់បានប្រកាសផ្តល់២៥០០លានអឺរ៉ូ សម្រាប់ឆ្នាំ ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ